23-29 MARÇO 2026
NYIMBO NA. 18 Mwaphata basa ndawa yopereka Yesu
Ko imwepo mungaonese tani kuti mutembeja ntsembe ya Yesu?
“Chikondi chomwe Khrisitu ali nacho chitikakamiza.”—2 AKOR. 5:14.
CHOLINGA
Kuona momwe tingawonesere kutembeja kwathu ntsembe ya Khrisitu.
1-2. Ko ntsembe ya Yesu itichitisa kuchita chani ndipo ndawa chani? (2 Akorinto 5:14, 15) (Onani pomwe foto.)
MUDAKAKHALA kuti imwepo mwapulumuka pa ngozi ya nyumba yomwe yenze yakupswanthani, ko mungaleke kutembeja munthu yemwe wakupulumusani? Olo kuti mwapulumusiwa pabodzi na wanthu anango, imwepo pamwekha mungakonde kuonesa kuti ndimwe otembeja maninge komasoti mungayebwelini vomwe adakuchitirani munthu muyo.
2 Ninge momwe tidawonera munkhani yapita, tingakwaniselini kudzipulumusa ku uchimo womwe tidatengera kwa Adamu na Hava. Koma ntsembe ya Yesu Khrisitu ingatipulumuse ndawa yakuti itichitisa kuti choyamba tikhululukiriwe machimo yomwe tachita, chachiwiri itipasa chidikhiro chodzakhala na moyo wosapera kutsogolo ndipo chachitatu itithandiza kukhala paushamwali wolimba na Mulungu. Phindu yake niyakuti tinachidikhiro chodzakhala na moyo mpakana kalekale mudziko inyowani. Ntsembe ya Yesu ititsimikizira kuti Yesu atikonda. Ndipo chikondi mwichi wenze nacho kuyambira kalekale akanati kubwera padziko yapasi. (Miy. 8:30, 31) Ntumi Paulo adanena kuti “chikondi chomwe Khrisitu ali nacho chitikakamiza.” (Werengani 2 Akorinto 5:14, 15.) Chikondi chomwe Yesu ali nacho kwa isepano chitichitisa kuchitapo kanthu. Chitichitisa kuonesa kuti ndise otembeja maninge ndipo tidzayebwelini ntsembe mwiyi yomwe adapereka kwa isepano.
Imwepo mungatembeje munthu yemwe wapulumusa moyo wanu. Tifunika pomwe kutembeja Yahova na Yesu Khrisitu omwe adatiwombola ku uchimo na impfa (Onani ndime 1-2)
3. Ndawa chani njira yomwe tingawonesere kutembeja ntsembe ya Yesu ingakhale yosiyana na momwe wanthu anango angawonesere?
3 Ko imwepo mungawonese tani kutembeja ntsembe ya Yesu? Vomwe mungadawire vingasiyane na wanthu anango. Linganizani kuti wanthu atatu ankuyenda kumalo yabodzi, koma aliyese wachoka mu thaundi yake komasoti njira zomwe angaphatise basa zingakhale zosiyana. Molingana na vimwivi, kutembeja kwathu kungakhale kosiyana na momwe wanthu anango angatembejere ntsembe ya Yesu. Ndipo munkhani mweino, tikambirane va magulu yatatu ya wanthu: Woyamba opfunzira Baibolo, wachiwiri Akhrisitu obatizika na wachitatu nkhosa zomwe zapatuka pagulu.
OPFUNZIRA BAIBOLO
4. Ko Yahova awona tani wanthu omwe ankupfunzira Baibolo?
4 Peno ndimwe opfunzira Baibolo, dziwani ivi: Yahova ankufuna kuti imwepo mukhale shamwali wake. (Yoh. 6:44; Mac. 13:48) ‘Yahova ndiye aunguza mitima.’ Vimwivi vinkutanthauza kuti iye awona khama yanu yomwe munkuchita pakupfunzira va iye ndipo akondwa akambawona kuyenda kwanu patsogolo na kuchinja vomwe muchita kuti mukhale shamwali wake. (Miy. 17:3; 27:11) Ndipo ushamwali muyu ni wokwanisika ndawa ya ntsembe ya Yesu. (Aro. 5:10, 11) Ayi kuyebwa vimwivi.
5. Ko wanthu omwe ankupfunzira Baibolo angatewedze tani malangizo ya pa Afilipi 3:16?
5 Ko imwepo opfunzira Baibolo mungaonesa tani kutembeja ntsembe ya Yesu? Njira ibodzi ni kutewedza malangizo yomwe ntumi Paulo adanembera Akhrisitu waku Filipi yakuti: “Olo kuti tapita kale patsogolo, naboni tipitirize kupita patsogolo pochita vatinkuchita kale.” (Afil. 3:16) Ndipo ayi kubvuma kuti aliyese akukangiseni kufamba panjira yaku moyo.—Mat. 7:14; Luka 9:62.
6. Ko opfunzira Baibolo angachite tani peno ankugumana na mabvuto? (Deuteronomo 30:11-14) (Onani pomwe foto.)
6 Manje tani peno munkuona kuti ni voshupa kutewedza vomwe Baibolo ipfunzisa pa vomwe mwapfunzira manjemanje? Faganifagani va nkhani mwiyo, pempherani kwa Yahova kuti akuthandizeni kuibvesa bwino nkhani mwiyo. (Sal. 86:11) Peno mwachita vimwivi ndipo munkuona kuti ni voshupa kubvesa basi, ayi kufoka. Pitirizani kupfunzira Baibolo. Nkuyenda kwa nthawe mudzakwanise kuibvesa bwino nkhani mwiyo. Manje tani peno bvuto yanu ni yofuna kuleka makhalidwe yanu yoipa yomwe Baibolo ilambiza? Kumbukirani kuti Yahova atikumbiralini kuchita chinthu chomwe ni choshupa maninge. Yahova ankufuna kuti imwepo mukwanise kukhala na moyo womwe umukondweresa. (Werengani Deuteronomo 30:11-14.) Yahova wapolomisa kuti adzakuthandizeni. (Yes. 41:10, 13; 1 Akor. 10:13) Ndipomwapa pitirizani kuchita khama pakubvera Yahova. M’malo mochita nkhawa maninge ndawa ya mabvuto yomwe munkugumana nayo, mbaganizirani vose vomwe Yahova wakuchitirani kuphatanidzapo ntsembe ya Yesu. Pomwe chikondi chanu chinkukula kwa Yahova ni pomwe mudzabvese kuti “Malamulo yake ni yosashupa kutewedza.”—1 Yoh. 5:3.a
Yahova angatikumbirelini vinthu vomwe tingakwaniselini. Ndipomwapa adzatithandize kukhala na moyo womukondweresa (Onani ndime 6)
7. Ko alumbwana omwe akulira m’banja ya Mboni afunika kuganizira va chani?
7 Manje tani imwepo alumbwana omwe azibereki wanu ni mboni? Kunena shuwa imwepo ndimwe opfunzira Baibolo ofunika maninge kwa azibereki wanu. Baibolo inena kuti: “Fendererani Mulungu ndipo iyembo adzakufenderereni.” (Yak. 4:8; 1 Mbiri 28:9) Peno imwepo mungachite mbali yanu pakufenderera Yahova, iye adzakufenderereni. Yahova sikuti adakukwekwetani imwepo ndawa ya azibereki wanu panango azibale wanu, iye akwekweta munthu aliyese payekha. Vomwe vinkuphatanidzapo wale omwe ankulerewa na azibereki omwe ni mboni. Ko iye wachita chani kuti mukhale naye pa ushamwali wolimba? Yahova adapereka mwana wake. Ayi kuyebwa kuti imwiyi ni mphaso yapadera kwa imwepo. (Aro. 5:1, 2) Ndipomwapa mukalibe mwachita Chikumbuso cha gole ino, mufunika kupatula nthawe na kuganizira vomwe Yahova na Yesu adachita kwa imwepo. Patsogolo pake bvumani kuti vimwivi vitsogolere moyo wanu na volinga vanu kuti muonese kutembeja kwanu ndawa ya ntsembe ya Yesu.b
AKHRISITU WOMWE NI OBATIZIKA
8. Ko Akhrisitu wobatizika adawonesa tani kutembeja ntsembe ya Yesu?
8 Peno imwepo ndimwe Mkhrisitu wobatizika, mudawonesa kutembeja ntsembe ya Yesu munjira zizinji. Mwakulinganiza, imwepo mudachinja vinthu vinango kuti mufenderere Yahova na kukhala na moyo womukondweresa. Imwepo mudabvera Lamulo ya Yesu ya kulalikira na kupfunzisa wanthu. Imwepo mudadzipereka kwa Yahova na kubatizika ndipo panango mudabonera na kutsutsiwa ndawa yosankhula kutumikira Yahova. (2 Tim. 3:12) Koma imwepo mudapirira na kupitiriza kutumikira Yahova mokhulupirika. Vimwivi vinkuonesa kuti mumukonda maninge Yahova komasoti mutembeja ntsembe ya Yesu.—Aheb. 12:2, 3.
9. Ko Mkhrisitu yemwe ni wobatizika afunika kukhala tcheru na chani?
9 Peno tidabatizika kalekale, nkuyenda kwa nthawe tingasiye kutembeja ntsembe ya Yesu. Ko vimwivi vingachitike tani? Ganizirani chitsanzo cha Akhrisitu oyambirira waku Efeso. Patsogolo pakuti Yesu wamukisiwa adawatembeja ndawa ya kupirira kwawo. Iye adanena pomwe kuti: “Olo kuti viri teno, nakugumana na mulandu wakuti waleka kuwonesa chikondi ninge momwe ungachitira pakuyamba.” (Chiv. 2:3, 4) Mawu ya Yesu yankuonesa kuti Mkhrisitu pang’ono na pang’ono angaleke kutumikira Yahova. Munthu muyu angambapemphere, angambayende kumisonkhano na kugumanika mu umboni koma ndawa yakuti adadjaira kuchita vimwivi, angakhale kuti ankuchitalini vimwivi ndawa ya chikondi. Manje ko mungachite tani peno munkuona kuti munkukondwalini maninge ninge pakuyamba?
10. Ko mungachite tani kuti mutewedzere vomwe Paulo adauza Timoteyo? (1 Timoteyo 4:13, 15)
10 Ntumi Paulo adauza Timoteyo kuti “ambaganizire” na “kuikhira nzeru” maninge va makhalidwe yake yachikhrisitu. (Werengani 1 Timoteyo 4:13, 15.) Mobverana na malangizo mwaya, yesesani “kukhala wakhama” pakutumikira Yahova.” (Aro. 12:11) Mwakulinganiza, imwepo mungapatule nthawe ikulu yokonzekera misonkhano ndipo vimwivi vingakuthandizeni kuti mumbakhale tcheru pamisonkhano. Ndipo pomwe munkuchita pfunziro yanu ya pamwekha, mungafage malo yomwe yalibe vosokoneza kuti mukhale mwekha kumbaganizira vomwe munkupfunzira. Mukachita teno, mudzaphindule na pfunziro yanu ya pamwekha. Viri ninge kuikha nkhuni kuti moto ugake maninge. Imwepo munkufunika kuchita vinthu vimwevi kuti mupitirize kuonesa kutembeja kwanu kwa Yahova pa vomwe wakuchitirani. Vimwivi vinkuphanidza pomwe ntsembe ya Yesu. Kuingizira pamwapa, Chikumbuso chikalibe chachitika, tani kuganizira va madaliso yomwe tinayo ndawa ya ntsembe ya Yesu? Mosakaikira vidzachitise kuingizira kutembeja kwathu ntsembe ya Yesu yomwe itichitisa kukhala paushamwali na Yahova.
11-12. Peno nthawe zinango munkuona kuti munkukwanisalini kuchita vinthu ninge kalekale, ko vimwivi vinkuonesa kuti Yahova akukondanilini? Fotokozani. (Onani pomwe foto.)
11 Nkupita kwa nthawe mungayambe kuona kuti khama yanu inkuchepa ya kutumikira Yahova. Ayi kufoka kumbaganiza kuti Mulungu akukondanilini. Kumbukirani vomwe ntumi Paulo adanemba pa nkhani ya utumiki wake kwa Akhrisitu waku Korinto, iye adati: “Peno nichite mochichimizika, ndine wonyang’anira basi mobverana na udindo womwe nidapasiwa.” (1 Akor. 9:17) Ko iye ambafuna kunena chani?
12 Ninge momwe vichitikira munthu aliyese. Panango vinthu vinango vimbamukangisa Paulo kukwanirisa volinga vake pa nkhani yolalikira. Koma iye wenze wotsimikiza kupirira pa nkhani yolalikira olo pomwe anachifuno panango alibe. Imwembo mungakhalembo na maganizo mwaya. Khalani wotsimikiza kuchita vabwino podiya mulibe chifuno chochita vimwivi. Ndipomwapa pempherani kuti mukhale na ntima wofuna kuchita vinthu vomwe iye akonda na “kukupasani pomwe mphanvu yochitira vinthu vimwivi.” (Afil. 2:13) Pitirizani kukhala otangwanika pa basa za Mulungu. Khalani otsimikiza kuti kuyenda kwa nthawe vinthu vimwivi vidzachitise kuti chikondi chanu chikule komasoti mudzakhale pomwe na khama.
Yesesani kuchita vinthu vomwe vingakuthandizeni kukhala pa ushamwali wolimba na Yahova (Onani ndime 11-12)
13. Ko tingatsimikizire tani kuti vomwe tinkuchita vinkubverana na vomwe Yahova atipfunzisa?
13 Nthawe na nthawe ni bwino kudziunguza mobverana na malangizo yomwe yali pa 2 Akorinto 13:5 yakuti: “Pitirizani kudziyesa kuti muone peno mudakali na chikhulupiriro cholimba. Pitirizani kudziyesa kuti mudziwe kuti ndimwe munthu wotani.” Mwakulinganiza tingadzichite mibvunzo aya: ‘Ko ninkuikha Ufumu wa Mulungu pa malo yoyamba pa moyo wangu?’ (Mat. 6:33) ‘Ko vokondweresa vomwe nisalula vionesa kuti nizonda vinthu voipa?’ (Sal. 97:10) ‘Ko mawu yangu na vochita vangu vithandiza kuti mpingo upitirize kukhala wobverana?’ (Aef. 4:2, 3) Pa nthawe ya Chikumbuso ni pomwe tifunika kuganizira maninge va ntsembe ya Yesu yomwe Yahova adatipasa. Chikumbuso chitipasa mwayi wakuti tidziunguze mokwana na kutsimikizira kuti tinkukhala na moyo wobverana na Khrisitu osati mwa ise tekha.c
WANTHU OMWE ADACHOKA MU GULU YA YAHOVA
14. Ndawa chani abale na alongo anango adasiya kugumanika pamisonkhano?
14 Abale na alongo anango adaleka kufika pamisonkhano olo kuti ambatumikira Yahova mokhulupirika kwa magole yazinji. Ndawa chani? Anango adasiya kutumikira Yahova ndawa ya mabvuto yomwe ambagumana nayo. (Luka 21:34) Anango adasiya kutumikira Yahova ndawa yokhumudwa na vomwe m’bale adawachitira. (Yak. 3:2) Ndipo anango ndawa yakuti adachita chimo ikulu. Ndipo ndawa ya manyazi afunalini kukumbira thandizo. Peno vinthu vimwivi vidakuchitikirani ndipo peno mudasiya kutumikira Yahova, ko ntsembe ya Yesu Khrisitu ingakuthandizeni kuti muchite chani?
15. Ko Yahova awonesa tani kuti aganizira wanthu omwe adasiya kumutumikira? (Ezekieli 34:11, 12, 16)
15 Ganizirani momwe Yahova abvera akaganizira wanthu omwe adasiya kumutumikira. Iye akalipalini na wanthu mwawa ndipo awayebwalini. Iye awafagafaga kuti abwerere pomwe mugulu yake. Iye apitiriza kuwathandiza kuti abwerere. (Werengani Ezekieli 34:11, 12, 16.) Yahova achitambo chibodzibodzi kwa imwepo. Peno munkuwerenga nkhani mweino, munkuoneseratu kuti munkufuna kubwerera kwa iye. Yahova adawona vabwino kwa imwepo pomwe adakuthandizani kuti mumudziwe na kukhala kumbali yake. Iye ankupitiriza kuona vabwino mwa imwepo ndipo ankufuna pomwe kuti mubwerere mu gulu yake.
16. Ko chani chingathandize wanthu omwe adasiya kutumikira Yahova kuti abwerere mu gulu yake? (Onani pomwe foto)
16 Kabulosha kakuti Bwererani kwa Yahova tigumanamo mawu yolimbikisa yakuti: “Khalani wotsimikiza kuti Yahova adzakuthandizeni pa vose vomwe munkuchita kuti mubwerere kwa iye. Adzakupaseni mphanvu zolimbana na nkhawa za ntsiku na ntsiku. Ndipo adzakukhululukireni na kukuthandizani kuti mukhale na chikumbuntima chochena. Mwanjira mwiyi imwepo mudzakwanise kutumikira pomwe Yahova pabodzi na abale wanu.” Mbakumbukirani kuti akulu ankufuna kukuthandizani imwepo. Iwo ankufuna kukhala ninge malo yobishalirapo chimphepo kwa imwepo. (Yes. 32:2) Pakuonesa kutembeja kwanu ntsembe ya Yesu dzibvunzeni kuti, ‘ko chani chomwe nifunika kuchita kuti nibwerere kwa Yahova?’ (Yes. 1:18; 1 Pet. 2:25) Mwakulinganiza, imwepo mungayende kumisonkhano, nkuyankhula na nkulu kuti akuthandizeni kuti mubwerere kwa Yahova. Panango akulu angakonze makonzedwe kuti mumbapfunzire pomwe Baibolo na m’bale munango. Mungakhale wotsimikiza kuti Yahova akudaliseni pa vose vomwe munkuchita pofuna kubwerera kwa iye.
Dzibvunzeni kuti, ko nifunika kuchita chani kuti nibwerere kwa Yahova? (Onani ndime 16)
VOMWE MUNGACHITE
17-18. Ko tingachite chani kuti tiphatise bwino basa nthawe yathu pomwe nthawe ya Chikumbuso yafika?
17 Yesu adanena kuti adatumiwa ‘kudzapereka moyo wake, kuti aliyese womukhulupirira ayi kuti adzongewe koma akhale na moyo wosapera.’ (Yoh. 3:16) Ntsembe ni njira yomwe Yahova adatiwombolera ku uchimo na impfa. (Aro. 3:23, 24; 2 Akor. 6:1) Kwandosala pang’ono kuti Chikumbuso chichitike, ganizirani va chikondi chomwe Yahova na Yesu adationesa. Kuganizira va vimwivi kutichitisa kutembeja pa vomwe adatichitira.
18 Ko imwepo mungawonese tani kutembeja ndawa ya ntsembe ya Yesu? Aliyese angadawire mosiyana. Imwepo mungakhale wotsimikiza kuti Yahova adzakuthandizeni pa vomwe munkuchita kuti mukhale na abale na alongo omwe ankukhala na moyo osati wodzikondweresa okha, “koma ankukhala na moyo wokondweresa omwe adawafera.”—2 Akor. 5:15.
NYIMBO NA. 14 Tamandani Mpfumu inyowani ya dziko yapasi
a Ninge opfunzira Baibolo kuti muyende patsogolo na pfunziro yanu phatisani basa bokosi yakuti vati nichite vomwe viri kumapeto kwa pfunziro iriyose mubukhu yakuti Kondwani na moyo mpakana kalekale!.
b Kuti mugumane mpfundo zomwe zingakuthandize kuti mukulise ushamwali wanu na Yahova, onani nkhani yakuti: “Alumbwana—‘Pitirizani kukonza vinthu kuti mudzapulumuke” mu Ntsanja ya ulonda ya Dezembro 2017.
c Kuti mudziwe vizinji pa vomwe mungachite kuti mupitirize kukhala otembeja, onani nkhani yakuti “Nchani chomwe chikulimbikisani kuti mumbatumikire Mulungu?” mu Ntsanja ya ulonda ya Junho 15, 1995.