Mbayankhulani mopfatsa komasoti mokoma ntima pomwe mukupfunzisa wanthu chonadi cha m’Baibolo

1. Ko tifunika kuchita chani kuti tikhale m’banja ya Yahova?

TIKAGUMANA na m’bale yemwe timudziwalini, chinthu choyamba chomwe tifuna kudziwa ni momwe iye adapfunzirira chonadi. Anango anganene kuti “adabadwira mu banja ya Mboni,” anango anganene kuti “napfunzira chamanjemanje Baibolo.” Tidawira teno ndawa yakuti chonadi cha mawu ya Mulungu ni chofunika maninge pa moyo wathu. Ndipo tinkudziwa kuti tingakhale m’banja ya Yahova, peno tikonda chonadi ndipo titewedza vomwe tipfunzira. Vimwevi vinkuphatanidza kukhala wokhulupirika pa vomwe tiyankhula na kuchita. —Sal. 15:1-3.

2. (a) Ko wanthu ambadziwa chani pakulewa va Yesu? (b) Ko wanthu adachita chani pomwe adabva va chonadi chomwe Yesu ambapfunzisa?

² Yesu nthawe zose, ambayankhula va chonadi olo kuti wanthu anango ambakomedzewalini. (Mat. 22:16) Yesu adauza ateweri wake momwe wanthu adakachitira na vomwe iye ambapfunzisa. Iye adati: “Nidabwera kudzachitisa wanthu kuyambana, nidabwera kudzachitisa kuti mwana mwamuna atsutsane na ababa wake, mwana nkazi atsutsane na amayi wake nakuti mulowola atsutsane na apongozi wake wachikazi.” (Mat. 10:35) Pakufotokoza vimwevi sikuti Yesu ambafuna kuti wanthu akhumundwe na vomwe iye ambalalikira pabodzi na wopfunzira wake, koma ambadziwa kuti vimwevi vidzachitike. (Mat. 23:37) Iye ambadziwa kuti ntontholo womwe ambalalikira udzachitise kuti wanthu agawanikane mbali ziwiri: Wale womwe akonda chonadi cha m’Baibolo na wale womwe achikondalini.—2 Ates. 2:9-11.

3. Ko tipfunzire chani mu nkhani mweino?

³ Isembo titewedzera Yesu pakuuza wanthu chonadi cha m’Baibolo olo kuti anango akomedzewalini. Olo nteno, tipitiriza basi kulalikira. Koma tifunika kusamala na momwe tingayankhulire tikambalalikira va ntontholo wabwino. Choyamba mupfunziro mweino tidawire bvunzo wakuti: Ko chonadi tingachigumane kuponi? Ndipo tione kuti ni panthawe iponi yomwe tifunika kuyankhula va chonadi cha m’Baibolo. Vimwevi vidzatithandize kuuza anango va ntontholo wabwino na kukhala wokhulupirika.

KO CHONADI CHA M’BAIBOLO TINGACHIGUMANE KUPONI?

4. Ndawa chani tinganene kuti Yahova ni munichiro wa chonadi?

⁴ Yahova ndiye munichiro wa chonadi. Vose vomwe ayankhula ni chaivo. Mwakulinganiza, iye ayankhula chaivo akambanena vabwino, na voipa (Sal. 19:9; 119:142, 151) Vose vomwe iye anena pakulewa va kutsogolo vichitika. (Yes. 55:10, 11) Nthawe zose iye achita vomwe wapolomisa (Num. 23:19) Baibolo inena kuti Mulungu anganamelini (Aheb. 6:18) Ndipomwapa, iye adziwika kuti ni ‘Mulungu wa chonadi.’—Sal. 31:5.

5. Ndawa chani ni vosashupa kumudziwa “Mulungu”? Fotokozani. (Machitidwe 17:27)

⁵ Wanthu anango anena kuti nivoshupa kudziwa ‘Mulungu wa chonadi.’ Koma vimwevi nichaivolini ndipo tikambaona vomwe iye adalenga titsimikizira kuti Mulungu aliko. (Aro. 1:20) Pomwe ntumi Paulo ambacheza na wanthu waku Atene, iye adanena kuti: ‘Mulungu akhalalini kutali na munthu aliyese payekha.’ (Werengani Machitidwe 17:27.) Chaivo ni vakuti Yahova, akwekweta wanthu wale omwe ni wodzichepesa, womwe ankufagafaga chonadi cha m’Baibolo.—Yoh. 6:44.

6. (a) Ko ni nkhani zinango ziponi zomwe tizigumana m’Baibolo? (b) Ndawa chani imwepo mukomedzewa kudziwa nkhani mwizi?

⁶ Njira ibodzi yomwe tingamudziwire Yahova ni kupfunzira Baibolo. Amuna omwe adalemba Baibolo adatsogolerewa na mzimu uchena wa Mulungu (2 Pet. 1:20, 21) Ndipomwapa, tingakhulupirire kuti vose vomwe viri m’Baibolo ni chaivo. Mwakulinganiza, tingakhulupirire vomwe Baibolo inena pakulewa va chilengedwe chose na momwe moyo udayambira (Gen. 1:1, 26) Komasoti tikhulupirira vomwe Baibolo inena pa nkhani ya momwe uchimo na mabvuto yadayambira (Aro. 5:12; 6:23) Tikhulupirira kuti Yahova adzaphatise basa mwana wake kukonza vinthu padziko yapasi. Mabvuto yomwe yadayambisiwa na Satana yemwe ni “Baba wabodza.” (Yoh. 8:44; Aro. 16:20) Ndipo isepano tikhulupirira mapolomisi ya Yahova yakuti Yesu adzadzonge wanthu woipa, adzamukise wakufa, adzachitise dziko kukhala paradaiso ndipo tidzakhale wokondwa. (Yoh 11:25, 26; 1 Yoh 3:8) Yahova ndawa ya chikondi chake, watipfunzisa chonadi chake cha m’Baibolo ndipo watipasa mwayi wopfunzisa wanthu anango.—Mat. 28:19, 20.

NDAWA CHANI TILALIKIRA WANTHU VA CHONADI CHA M’BAIBOLO?

7-8. Ko nchani chomwe chitilimbikisa kuyankhula chonadi cha m’Baibolo? Perekani chitsanzo. (Maliko 3:11, 12) (Onani pomwe mafoto.)

⁷ Ninge momwe taonera, kuti tikhale m’banja ya Yahova, tifunika kuyankhula va chonadi cha m’Baibolo. Koma Yahova afunalini kuti timbandochita vinthu vimwevi basi. Iye afuna pomwe kuti timbalalikire na cholinga chabwino. Onani vomwe vidachitikira Yesu pa utumiki wake pomwe wenze pano pa dziko yapasi. (Werengani Maliko 3:11, 12.) Pomwe Yesu ambalalikira pafupi na Nyanja ya Galireya, gulu ya wanthu idaunganidzana kuti imubvesere. Pamwapo penze pomwe wanthu womwe enze na viwanda ndipo ambakuwa kumbanena kuti: “Imwepo ndimwe mwana wa Mulungu.” Ndawa chani viwanda vimwevi vimbanena tene uyu? Panango ivo vimbachita vimwevi kuti wanthu avikhulupirire nakuti asiye kutumikira Yahova. Ni shuwadi kuti viwanda vimwevo vimbanena chaivo kuti Yesu ni mwana wa Mulungu, koma vimbanena vimwevo na cholinga choipa. Yesu ambadziwa cholinga cha viwanda vimwevi. Iye alibe kukomedzewa navo ndipo adaviuza kuti visiye kuyankhula vimwevo.

⁸ Ko tinkupfunzira chani na nkhani mweyi? Kulalikira ntontholo wabwino nikofunika maninge kwa Yahova. Ndipomwapa, iye akomedzewa tikambalalikira wanthu va ntontholo wabwino ndawa yakuti timukonda. Ndipo iye afuna kuti wanthu akambatitembeja timbapereke ulemerero kwa iye osati kwa isepano.—Mat. 5:16; onani pomwe Machitidwe 14:12-15.

9. Ko tifunika kusamala kuchita chani ndipo ndawa chani?

⁹ Naboni tione njira inango yomwe ingatithandize kupewa kuchitisa wanthu kuti ambatione kuti ndise wofunika. Linganizani kuti m’bale yemwe anaudindo, wakuuzani nkhani inango ya chintsintsi. Ndipo wanena kuti ayi kuuza munthu aliyese. Ndipo peno isepano tilibe kusunga chintsintsi, ndipo tauza wanthu anango nkhani mweyo, wanthu akazindikira kuti nkhani mweyo ni ya chaivo angadabwe ndipo angambaganize kuti isepano tidziwa nkhani zizinji zachintsintsi. Vmwivi vingandokondweresa wanthu osati Yahova. (Miy. 11:13) Ndawa chani? Olo kuti vomwe tidanena ni chaivo, koma tenze tilibe udindo wofotokoza nkhani mweyi ndipo cholinga chathu chenze chophonyeka pakuyankhula vimwivi.

KO TINGAYANKHULE TANI VA CHONADI CHA M’BAIBOLO

10. Ko kuyankhula mawu “yabwino” kutanthauza chani? (Akolose 4:6)

¹⁰ Werengani Akolose 4:6. Ntumi Paulo adakumbusa Akhrisitu waku Kolose kuti: ‘Mawu yanu nthawe zose yambakhale yabwino.’Ko vimwevi vinkutanthauza chani? Mawu ya Chigiriki yomwe yadaphatisiriwa basa yankutanthauza kuti vomwe tiyankhula vifunika kukhala vothandiza kwa wanthu anango komasoti mawu yathu yafunika kukhala ya chikondi.

11-12. Ndawa chani tifunika kupfunzisa chonadi cha m’Baibolo mosamala maninge? Perekani chitsanzo. (Onani pomwe mafoto.)

¹¹ Tinkufunika kuphatisa basa malangizo yomwe ntumi Paulo adanena kuti timbayankhule bwino pomwe tinkupfunzisa wanthu va chonadi cha m’Baibolo. Baibolo ilinganiza chonadi na chibemba chakuthwa kosekose chomwe chilasa munthu mu ntima mpakana kulekanisa moyo na mzimu. (Aheb. 4:12) Peno tingaphatiselini bwino basa Baibolo, tingachitise wanthu kukhumudwa panango kuchitisa kuti tiyambe kugegedzana na wanthu palibe chifukwa. Ko vimwevi vingachitike tani?

¹² Tilinganize kuti mwagumana munthu wachidwi mu umboni yemwe apemphera pakuphatisa basa mafano ndipo akonda kukondwerera khisimisi pabodzi na banja yake. Isepano tingamuwerengere Baibolo nkumuonesa kuti nivabwinolini kupempherera mafano vomwe ni vinthu viribe moyo ndipo tingamuonese pomwe kuti kukondwerera khisimisi ni vinthu vomwe vibveranalini na Baibolo (Yes. 44:14-20; 2 Akor. 6:14-17) Peno tingachite vimwevi pa ulendo woyamba tingakhale kuti tikunena chaivo, koma tingakhale kuti tinkuphatisalini bwino basa mawu ya Mulungu.

13. Ndawa chani mawu yanu yafunika kukhala ninge mwayaikha munyu?

¹³ Ntumi Paulo adanena kuti mawu yanu yambakhale yabwino ninge kuti mwayaikha “munyu”. Iye ponena vimwevi ambatanthauzalini kuti tifunika kubisa chonadi, iye ambatanthauza kuti tifunika kumbayankhula bwino kuti tikwanise kupfunzisa chonadi, munjira “yokomedza.” (Yobu 12:11) Vimwevi vingakhale voshupa. Linganizani kuti munkufuna kuphikira wanthu anango chakudya. Kazinjikazinji tikonda kuphika chakudya chomwe tikomedzewa nacho poganiza kuti anango adzakomedzewe nacho. Nchibodzibodzimbo na mawu yathu yomwe tiyankhula, tiganiza kuti wanthu anango akomedzewembo nayo. Kuganiza teneuyo kugakhale kophonyeka. Mwakulinganiza mu m’chikhalidwe chinango wanthu ayankhuliratu mwasitiriti pomwe ankuyankhula na wanthu wachikulire. Koma mu vikhalidwe vinango vimwevi ni vophonyeka ndipo aona kuti ni kusowa ulemu. Paulo adanena kuti: “Tifunika kudziwa momwe tingadawirire munthu aliyese.” Vimwevi vinkuonesa kuti tifunika kumbayankhula bwino kuti mawu yathu yakhale yokomedza kwa wanthu womwe ankutibvesera.

MOMWE TINGAYANKHULIRE CHONADI CHA M’BAIBOLO

14. Ko Yesu ambawapfunzisa opfunzira wake vose vomwe iye ambadziwa? Fotokozani.

¹⁴ Yesu ambayankhula mawu yabwino na ateweri wake ndipo ambawapfunzisa vinthu vizinji. (Maliko 6:34) Koma iwo ambafunika kuti apfunzire vizinji basi. Yesu ambawapfunzisiratulini vose vomwe iye ambadziwa. Iye ambawadziwa bwino opfunzira wake ndipo ambadziwa pomwe vofoka vawo. Iye ambaona pomwe kuti imweyi ni nthawelini yabwino yowapfunzisa vinthu vinango va m’Baibolo. Yesu adanena kuti opfunzira wake adakakwanisalini kubvesa mpfundo mwizi kabodzi na kabodzi. (Yoh. 16:12) Ko vimwevi vinkutipfunzisa chani?

15. Ko mapfunziro yathu ya Baibolo tifunika kuwapfunzisa vose vomwe tikudziwa kabodzi na kabodzi? Fotokozani. (Miyambo 25:11) (Onani pomwe foto.)

¹⁵ Chitsanzo cha Yesu chinkuonesa kuti, olo kuti tinkudziwa vinthu vizinji volewa va chonadi, tifunikalini kuvifotokoza vose kabodzi na kabodzi kwa pfunziro yathu. Ko tingamutewedzere tani Yesu? Tifunika kuganizira momwe vinthu viriri pa moyo wa wanthu omwe tikuwapfunzisa. Ganizirani pomwe chitsanzo cha munthu ule yemwe akondwerera khisimisi pabodzi na banja yake. Tinkudziwa momwe vinthu vimwevi vidayambira na kuti Yahova akomedzewalini navo. Ndoganizirani kuti mwayamba kupfunzira Baibolo na munthu muyu ndipo kwasala sondo ibodzi panango ziwiri kuti khisimisi ichitike. Peno imwepo mudamufotokozera kale vomwe Baibolo ilewa pa nkhani ya vikondwerero vimwevi ndipo mudamuuza kuti afunikalini kukondwerera khisimisi, ko yenze nthawe yabwino yomufotokozera vimwevi? Ni shuwadi kuti opfunzira anango wa Baibolo achinja vinthu mwakankulumize koma anango atenga nthawe kuti achinje. Ndipomwapa, kuti tithandize opfunzira wanthu kuyenda patsogolo, isepano tifunika kuwafotokozera nkhani yomwe afunika kuidziwa nthawe mweyo panango kuti pa nthawe yomwe angakwanise kuibvesa.—Werengani Miyambo 25:11.

16. Ko tingathandize tani mapfunziro yathu ya Baibolo kuti “yapitirize kufamba mu chonadi”?

¹⁶ Tikhala okondwa tikambapfunzisa wanthu va chonadi cha m’Baibolo. Tingawathandize opfunzira wanthu kuti apitirize “kufamba mu chonadi” peno isepano tinkukhala chitsanzo chabwino kwa iwo. (3 Yoh. 3, 4) Tifunika kuonesa mu vochita vathu kuti tikhulupirira mpfundo za m’Baibolo. Onesesani kuti munkuyankhula mawu yabwino na volinga vabwino pomwe mukupfunzisa wanthu chonadi cha m’Baibolo. Timbapereke ulemerero kwa Yahova, tikakhala kuti tatembejewa. Tikachita teno, tidzaonese kuti tinkutumikira Yahova Mulungu wa chonadi.