16-22 MARÇO 2026
NYIMBO NA. 20 Mudapereka Mwana wanu wapamoyo
Ndawa chani timbafunika kuwombolewa?
“Nimbani adzanipulumuse ku thupi mweyi yomwe inkunichitisa kuti nife?”—ARO. 7:24.
CHOLINGA
Tipfunzire momwe impfa ya Yesu Khrisitu itichitisira kuti Yahova atikhululukire machimo yathu, kukhala na chidikhiro cha moyo wosapera na kukhala pa ushamwali wolimba na Yahova.
1-2. Ndawa chani timbafunika kuwombolewa? (Aroma 7:22-24) (Onani pomwe foto.)
GANIZIRANI chochitika ichi. Nyumba inkugwa ndipo nkati mumo munamwamuna ndipo iye wapswanthiwa na vimapitsi va ntcherwa. Iye anamoyo koma ankukwanisalini kuti abule yekha. Vomwe iye angachite ni kukuwa kuti wanthu abwere kudzamupulumusa.
2 Aliyese wa isepano ali ninge mwamuna muyu. Ndawa chani? Ndawa yakuti Adamu alibe kubvera Yahova ndipo iye adakhala wochimwa. Ndawa yakuti tidachokera kwa Adamu, isembo ndise ochimwa. Molingana na munthu ule, isembo tinkufunika munthu munango kuti atiwombole. Mukalata yake Paulo adanena kuti tose ndise akapolo wa uchimo. (Werengani Aroma 7:22-24.) Paulo adatengera uchimo kwa azibereki wake womwe udachitisa kuti patsogolo pake afe. (Aro. 6:23) Nichibodzibodzimbo na isepano. Isembo tikufunikira munthu kuti atipulumuse ku uchimo na impfa!
Ninge munthu yemwe wapswanthiwa na nyumba, isembo tinkufunika munthu kuti atiwombole (Onani ndime 1-2)
3. Ko ntsembe ya Yesu itithandiza tani?
3 Chokomedza ni chakuti, Paulo pomwe adanena va mabvuto yomwe adagumana nayo, iye adatipasa chidikhiro. Pomwe adabvunza kuti: “Nimbani adzanipulumuse ku thupi mweyi yomwe inkunichitisa kuti nife?” Iye adadawira molimba ntima kuti: “Mulungu adzanipulumuse pakuphatisa basa Yesu Khrisitu Ambuya wathu!” (Aro. 7:25) Paulo ambanena va ntsembe ya Yesu Khrisitu.a Ntsembe ya Yesu Khrisitu itipulumusa ndawa yakuti choyamba tikhululukiriwa machimo yathu. Chachiwri tidzakhale na moyo wosapera ndipo chachitatu tikhala pa ushamwali wolimba na Yahova. Kupfunzira nkhani mwiyi, kuingizira chikondi chathu kwa “Mulungu yemwe apereka chidikhiro.” (Aro. 15:13) Ndipo titembeja Yesu ndawa kupitira mwa iye “tidamasuliwa na malipiro ndipo machimo yathu yakhululukiriwa.”—Akol. 1:14.
NDAWA YA NTSEMBE YA YESU KHRISITU, YAHOVA ATIKHULULUKIRA MACHIMO YATHU
4-5. Ndawa chani aliyese afunika ntsembe ya Yesu? (Mlaliki 7:20)
4 Isepano tifunikira ntsembe ya Yesu Khrisitu kuti tikhululukiriwe machimo yathu. Tose isepano tiphonyesa vinthu muvoyankhula vathu panango vochita. (Werengani Mlaliki 7:20.) Machimo yanango yakhala yakulu. Mwakulinganiza, Chilamulo cha Mose chimbalewa kuti Muizirayeli yemwe wachita chigololo panango wapha munthu ambafunika kuphewa. (Lev. 20:10; Num. 35:30, 31) Nishuwadi kuti machimo yanango yakhalalini yakulu ninge mwaya, koma olo nteno yose ni machimo. Mwakulinganiza, Davide adanena kuti: ‘Nidzakhale wosamala na vochita vangu kuti osati nichimwe na lilimi yangu.’ (Sal. 39:1) Vimwivi vinkuonesa kuti tingachimwe na vomwe tiyankhula tikaleka kukhala osamala.—Yak. 3:2.
5 Ko imwepo mudayankhulako kale mawu yomwe patsogolo pake mudadziringa nayo? Tose isepano vitichikirambo ndipo tiyankhula vinthu vomwe patsogolo pake tidziringa navo. Baibolo inena kuti: “Tikambanena kuti: ‘Tiribe uchimo,’ ndiye kuti tinkudzinamiza ndipo muntima mwathu mulibe chonadi.”—1 Yoh. 1:8.
6-7. Ndawa chani Yahova atikhululukira machimo yathu? (Onani pomwe foto.)
6 Ntsembe ya Yesu itichitisa kuti Yahova atikhululukire machimo yathu. (Aef. 1:7) Olo kuti Yahova atikhululukira machimo yathu, vinkutanthauzalini kuti tikachita chimo, iye akhala alibe navo basa. Chaivo nivakuti, nkhani mwiyi ni ikulu kwa Yahova ndipo iye akondwalini tikachita chimo. (Yes. 59:2) Ndawa ya chilungamo chake, Yahova adachita chinthu chinango kuti atikhululukire machimo yathu.
7 Chilamulo cha Mose chimbanena kuti Aizirayeli ambafunika kupereka ntsembe za nyama kuti akhululukiriwe machimo yawo. (Lev. 4:27-31; 17:11) Ntsembe zimwizi zimbawonesa kuti wanthu ambafunikira ntsembe ikulu maninge. Ni ntsembe ya Yesu Khrisitu yomwe idabweresa madaliso yazinji ndipo ndiyo idachitisa kuti Yahova ambatikhululukire machimo yathu. Mawu ya Paulo yomwe adanembera Akhrisitu wa Korinto, yankuonesa kuti iye ambadziwa kufunika kwa ntsembe ya Yesu Khrisitu. Patsogolo pakuti wafotokoza vinthu vomwe adachita kumbuyo akalibe kukhala Mkhrisitu, iye adati: “Koma mwasambikiwa nkukhala wochena, mwapatuliwa, munkuonewa ninge wolungama mudzina ya Ambuya wanthu Yesu Khrisitu, komasoti na mzimu wa Mulungu wathu.”—1 Akor. 6:9-11.
Aizirayeli ambafunika kupereka ntsembe za nyama kuti akhululukiriwe machimo yawo, vimwivi vimbawonesa kuti timbafunika ntsembe ya Yesu kuti machimo yathu yakhululukiriwe komasoti kuti tidzagumane madaliso yanango (Onani ndime 6-7)
8. Nchani chomwe imwepo mufunika kukumbukira pomwe munkukonzekera Chikumbuso cha gole ino?
8 Pomwe imwepo munkukonzekera Chikumbuso cha gole ino, khalani na nthawe yoganizira momwe moyo wanu uliri wabwino ndawa yokhululukiriwa na Yahova. Mwakulinganiza, ndawa ya ntsembe ya Yesu, imwepo mufunikalini kukhala na nkhawa ndawa ya machimo yomwe mudachita kalekale ndipo mudalapa. Ko vikushupani kukhulupirira kuti Yahova adakukhululukirani machimo yomwe mudachita kalekale? Panango munganene kuti ‘nshuwadi kuti Yahova anganikhulukire koma inepano vinkunishupa kusiya kuganizira vomwe nidamuphonyera Yahova.’ Peno imwepo mudzibva tene, kumbukirani kuti Yahova ndiye atikhululukira machimo yathu ndipo adapasa Yesu udindo wotiweruza, koma ise tiribe kupasiwa udindo muyu. Baibolo inena kuti: “Koma peno tinkufamba mukugwerewera molingana na momwe [Yahova] aliri mukugwerewera, . . . magazi ya Yesu, yemwe ni Mwana wake, yankutichenesa ku machimo yose.” (1 Yoh. 1:6, 7) Isepano tingakhulupirire vimwivi ninge momwe tikhulupirira chipfunziso chirichose cha m’Baibolo. Ndawa ya ntsembe ya Yesu Khrisitu, Yahova atikhululukira machimo yathu. Ndipo Baibolo inena kuti: ‘Iye ni wokonzeka kutikhululukira.’—Sal. 86:5.
NDAWA YA NTSEMBE YA YESU KHRISITU TINACHIDIKHIRO CHODZAKHALA NA MOYO WOSAPERA
9. Kuchosapo makhalidwe yoipa ko kuchita chimo kuphataniza chani? (Salimo 51:5)
9 M’Baibolo mawu yakuti “chimo” yatanthauzalini vochita voipa vokhavokha, koma yatanthauza pomwe khalidwe yomwe tidatengera pomwe tidabadwa. (Werengani Salimo 51:5.) Ndawa yakuti tidatengera uchimo ni nthawe zoselini pomwe tikhala na maganizo yabwino. Ndipomwapa, mathupi yathu yaphatalini bwino basa ninge momwe Yahova ambafunira. Ndawa ya vimwivi tidwala, kukalamba na kufa. Ndipomwapa, olo kacheche yemwe wabadwa manjemanje yemwe alibe kuchita kalikose angadwale na kufa. Komasoti tose tikufa. Ndipo ndawa ya uchimo womwe tidatengera kwa Adamu tigumana na mabvuto.
10. Ko kuchimwa kwa Adamu na Hava kudachitisa chani?
10 Ndoganizani momwe Adamu na Hava adabvera pomwe adakhala ochimwa. Uchimo udabweresa mabvuto yazinji kwa iwo. Adamu na Hava pomwe adandochita chimo, chikumbutima chawo chidawashupa ndawa alibe kubvera Yahova. (Aro. 2:15) Iwo adazindikira kuti chinthu chinango chenzelini bwino. Iwo adawona kuti ankufunikira vovala kuti abise thupi yawo na kubishala. (Gen. 3:7, 8) Adamu na Hava adadziimba mulandu, adakhala na manyazi komasoti enze na nkhawa. Kuyambira nthawe mwiyo, Adamu na Hava adagumana na mabvuto mpakana kufa kwawo.—Gen. 3:16-19.
11. Ko uchimo utichitisa chani?
11 Ninge momwe vidachitikira na Adamu na Hava isembo tidziimba mulandu, tichita manyazi komasoti tikhala na nkhawa. Mabvuto yomwe tinkugumana nayo, yabwera ndawa ya uchimo. Olo tichiyesesa kuchinja moyo wathu kuti tipewe mabvuto, tidzagumane na mabvuto basi ndawa ya uchimo. Ndipo Baibolo inena kuti: “Chilengedwe chidaweruziwa kuti chikhale chilibe basa.” (Aro. 8:20) Mwivi vinkuphatalini basa kwa isepano tekha, koma kwa wanthu wose. Mwakulinganiza, wanthu azinji ntsiku zino ayesesa kusamalira chilengedwe, kufuna kumalisa chipiringu, kumalisa usiwa na kuyesesa kukhazikisa ntendere padziko. Olo kuti iwo ankuyesesa, ankukwanisalini kumalisa mabvuto. Koma ndawa ya ntsembe ya Yesu tinachidikhiro chakuti Yahova adzamalise mabvuto yose mwaya.
12. Ko ntsembe ya Yesu itipasa chidikhiro chiponi?
12 Ntsembe ya Yesu, itipasa chidikhiro chakuti “chilengedwe mwicho chidzamasuliwe ku ukapolo wa thupi yomwe idzongeka.” (Aro. 8:21) Vimwivi vinkutanthauza kuti mudziko inyowani tidzadwalelini, timbadzadziimbelini pomwe mulandu, timbadzachitelini pomwe manyazi panango kukhala na nkhawa. Komasoti Yesu yemwe ni Mpfumu adzalamulire. Ndipo adzamalise mabvuto yose yomwe wanthu angakwaniselini kuyamalisa.—Yes. 9:6, 7.
13. Ko ni chinthu chinango chiponi chomwe mungachite pakukonzekera Chikumbuso cha gole ino?
13 Ganizirani momwe moyo wanu udzakhalire mudziko inyowani. Mumbadzadwarelini pomwe, mudzakhalelini pomwe na nkhawa, kusowa chakudya panango kufa. Olo manjeuno mungakhale odekha mukaganizira va ‘chidikhiro chanu chomwe chiri ninge ndangula ya moyo wathu ndipo ni chotsimikizika komasoti chokhazikika.’ (Aheb. 6:18, 19) Kuganizira va chidikhiro mwichi nthawe zose kungakulimbikiseni. Imwepo mungakhale otsimikiza kuti Yahova “apereka malipiro kwa wanthu omwe amufagafaga na ntima wose.” (Aheb. 11:6) Manjeuno mungalimbikisiwe na kukhala na chidikhiro cha kutsogolo ndawa ya ntsembe ya Yesu.
NDAWA YA NTSEMBE YA YESU KHRISITU WANTHU ANGAKHALE POMWE PA USHAMWALI WOLIMBA NA YAHOVA
14. Ko uchimo udadzonga tani ushamwali wathu na Yahova?
14 Pomwe Adamu na Hava adachimwa, wanthu adakakwanisalini kukhala paushamwali wolimba na Yahova. Baibolo inena kuti wanthu wose enze kutali na Mulungu. (Aro. 8:7, 8; Akol. 1:21) Ndawa chani? Mpfundo za Yahova ni zolungama, ndipomwapa, nivosakwanisika kuti iye andowayawaya machimo. Pakunena va Yahova, Baibolo inena kuti: “Maso yanu ni yochena maninge mwakuti munganyang’anirelini vinthu voipa, ndipo mungalekererelini khalidwe yoipa.” (Hab. 1:13) Kundoyambira pomwe wanthu adakhala wochimwa, ushamwali wawo na Yahova udasokonezeka. Palibe aliyese wa isepano yemwe angakhale pa ushamwali wabwino na Yahova peno palibe njira yomwe inkutichitisa kuti tikhale naye paushamwali. Ndipo njira mwiyi ni ntsembe ya Yesu Khrisitu yomwe itichitisa kuti tikhale pa ushamwali wolimba na Yahova.
15. Ko impfa ya Yesu idatichitisa tani kuti tikhale pomwe pa ushamwali na Yahova?
15 Baibolo inena kuti Yesu “adakhala ntsembe yobisa machimo yathu.” (1 Yoh. 2:2) Ko ntsembe ya Yesu ithandiza pomwe tani wanthu kuti akhale pa ushamwali na Yahova? Ayi kumbaganiza kuti impfa ya Yesu idachitisa kuti Yahova abve bwino. Koma ntsembe ya Yesu Khrisitu idachitisa kuti tikhale pa ntendere na Yahova. (Aro. 3:23-26) Mulungu adakwanisa kukhala pa ushamwali na wanthu okhulupirika olo pomwe Yesu akalibe wafa. (Gen. 15:1, 6) Ko ndawa chani? Ndawa yakuti Yahova wenze wotsimikiza kuti mwana wake Yesu adzapereke ntsembe. (Yes. 46:10) Ntsembe ya Yesu idafungula njira kuti wanthu akhale paushamwali na Mulungu.
16. Ko ni chinthu chinango chiponi chomwe tifunika kuganizira pomwe tinkukonzekera Chikumbuso cha gole ino? (Onani pomwe foto.)
16 Ganizirani momwe moyo wanu uliri wabwino ndawa yakuti muli paushamwali wabwino na Mulungu. Mwakulinganiza, tingachemere Yahova kuti “Ababa” wathu ninge momwe Yesu adatipfunzisira. (Mat. 6:9) Ndipo nthawe zinango mungachemere Yahova kuti “Shamwali” wanu. Koma mufunika kuchita vimwevi mwaulemu komasoti modzichepesa. Ndawa chani? Ndawa ndise ochimwa. Tili paushamwali na Yahova ndawa ya ntsembe ya Yesu Khrisitu. “Kupitira mwa mwana wake muyo abveranise pomwe vinthu vinango vose na iye. Adachita vimwevi pokhazikisa ntendere kupitira m’magazi yomwe Khrisitu adakhesa pa muti wodzudzikirapo.” (Akol. 1:19, 20) Ndawa ya vimwivi isepano tingakhale paushamwali wolimba na Yahova olo kuti ndise ochimwa.
Ndawa ya impfa ya Yesu, vidakhala pomwe vokwanisika kuti tikhale pa ushamwali wabwino na Yahova (Onani ndime 16)
NTSEMBE YA YESU ITITSIMIKIZIRA KUTI YAHOVA ATIKONDA
17. Ko ntsembe ya Yesu ititsimikizira tani kuti Yahova atikonda maninge? (Aefeso 2:4, 5)
17 Ntsembe ya Yesu iwonesa kuti Yahova ni “wachifundo chikulu.” Iye “adachitisa kuti tikhale wamoyo . . . olo kuti tenze wakufa ndawa ya machimo yathu.” (Werengani Aefeso 2:4, 5.) Ninge munthu yemwe wagwerewa na nyumba ndipo ankukumbira thandizo, wanthu omwe ni odzichepesa azindikira kuti ankufunambo kuwombolewa ndipo akumbira thandizo. (Mac. 13:48) Yahova athandiza wanthu mwawa pakuwonesesa kuti ankupfunzira ntontholo wabwino wa Ufumu. (Yoh. 17:3) Peno Satana ambaganiza kuti kuchimwa kwa Adamu na Hava kuchitise kuti Yahova akangire kukwanirisa cholinga chake, ambadzinamiza.
18. Tikambaganizira ntsembe ya Yesu, ko tifunika kumbaganizira chani?
18 Isepano tifunikira kukumbukira chinthu chikulu chomwe chidachitisa Yahova kuti apereke ntsembe. Iye sikuti adandopereka ntsembe ya Yesu kuti atipulumuse. Koma kuti achite chinthu chinango chofunika kuti akwanise kudawira Satana kuti vomwe adanena m’munda wa Edeni ni vabodza. (Gen. 3:1-5, 15) Yahova adaphatisa basa ntsembe kuti achenese dzina yake na kutsimikizira kuti vinthu vose vomwe Satana adanena polewa va iye, ni vabodza. Ndawa yakuti ntsembe ya Yesu idatiwombola ku uchimo na impfa, imwiyi ni njira ibodzi yomwe Yahova adawonesera kuti atikonda. (Miy. 27:11) Ko mungachite chani kuti muonese kuti mutembeja ntsembe ya Yesu? Mu pfunziro yomwe inkubwera tidzadawire mbvunzo muyu.
NYIMBO NA. 19 Chakudya chamaulo cha Ambuya
a PFUNZIRANI VIZINJI: Ntsembe ni malipiro yomwe yamasula wanthu omwe ali kudjeri panango ku ukapolo. Ntsembe ya Yesu imasula wanthu omwe abvera Yahova.