Yesesani kukhala odzichepesa ninge Yahova

1. Ndawa chani ni vodabwisa kuwona kuti Yahova ni wodzichepesa?

TINASHUWA kuti imwepo muwona kuti wanthu azinji wamaudindo ntsiku zino alibe khalidwe yodzichepesa. Koma Yahova ni wodzichepesa podiya kuti anaudindo ukulu kuposha munthu aliyese. (Sal. 113:5-8) Pakuti iye ni wodzichepesa, achitalini vinthu modzikuza. Munkhani ino, tikambirane mbali zinayi nkuwona momwe Yahova awonesera kudzichepesa pa mbali iriyose. Tiwone pomwe momwe Yesu adatewedzerera Ababa wake pankhani yodzichepesa. Kukambirana vimwivi kutithandize kukhala pa ushamwali na Yahova na kukhala odzichepesa ninge iye.

YAHOVA NI WOFIKIKA

2. Ko lemba Salimo 62:8 itiuza chani va Yahova? (Onani pomwe foto ya pakhava.)

² Vikhala voshupa kucheza na wanthu wodzikuza. Viri teno ndawa yakuti iwo anyoza anzawo ndipo ni wankhanza. Koma Yahova alilini tene. Pakuti iye ni wodzichepesa, timasuka kumuuza chirichose chatinkuganiza na momwe tinkubvera. (Werengani Salimo 62:8.) Baba wachikondi afuna kudziwa vomwe mwana wake ankuganiza na momwe ankubvera. Ndipo Yahova afunambo kuti timbapemphere kwa iye nkumuuza chirichose. M’Baibolo munavitsanzo va wanthu azinji omwe adadawiriwa mapemphero yawo na Yahova. Tikawona momwe iye adawadawirira, titsimikiza kuti isembo angatidawire. (Yos. 10:12-14; 1 Sam. 1:10-18) Koma nthawe zinango tikaphonyesa vinthu, tingambawone kuti Yahova angatidawirelini mapemphero yathu.

3. Nchani chinkukutsimikizirani kuti Yahova afuna kuti mumbapemphere nthawe zose kwa iye?

³ Olo tikhale na maganizo yakuti Mulungu angatikondelini, tifunika kuyesesa kupemphera kwa iye. Tinkunena vimwivi ndawa ya chitsanzo cha mwana wolowerera yemwe adaphonyesa vinthu vizinji mpaka kumbaona kuti ababa wake angamutambirelini pomwe kumuyi. Manje ko ababa wake adachita chani mwana muyu padabwerera kumuyi? Yesu adati ababa wake padamuona na patali, “adamuthamingira nkumukumbatira ndipo adamubejali mwachikondi.” (Luka 15:17-20) Tikambapemphera kwa Yahova ndawa yakuti ndise wokwinyirira ndawa ya vophonya vathu, iye atibvesera mwatcheru. (Maliro 3:19, 20) Yahova atibvera ntsisi, ninge baba ule yemwe adathamanga kuyenda kukakumbatira mwana wake. (Yes. 57:15) Ko Yahova atithandiza tani ntsiku zino? Iye aphatisa basa akulu, abale na alongo kuti atithandize. (Yak. 5:14, 15) Iye achita vimwevi kuti tikhale naye paushamwali.

4. Ndawa chani wanthu ambamasuka kucheza na Yesu?

⁴ Momwe Yesu adatewedzerera Ababa wake. Yesu ni wodzichepesambo ninge Ababa wake. Ndipomwapa pewenze padziko pano wanthu ambamasuka naye. Iwo ambachitalini mantha kumubvunza mibvunzo. (Maliko 4:10, 11) Ndipo Yesu akabvunza wanthu mibvunzo, iwo ambadawira vomwe viri muntima mwawo. (Mat. 16:13-16) Iwo akaphonyesa vinthu, ambachitalini mantha kuti apopoterewe na Yesu. Viri teno ndawa iwo ambadziwa kuti Yesu ni wabwino ntima, wachifundo na wodekha. (Mat. 17:24-27) Opfunzira wa Yesu adakwanisa kumudziwa bwino Yahova ndawa yakuti Yesu ambatewedzera Ababa wake. (Yoh. 14:9) Wanthu akawona Yesu, ambakwanisa kudziwa kuti Yahova ni wabwino ntima ndipo ni wofikika. Ambawona pomwe kuti iye ni wosiyana na atsogoleri wavipembedzo omwe enze alibe chifundo, oipa ntima na odzikuza.

5. Ko kudzichepesa kungathandize tani kuti wanthu ambamasuke nase?

⁵ Ko isembo tingamutewedzere tani Yahova? Kuti tikhale ofikika, tifunika kuyesesa kukhala odzichepesa. Peno ndiselini odzichepesa, tingambachitire njiru anango, kumbadziona kuti ndise wapadzulu kuposha iwo ndipo tingawakhululukirelini akatiphonyera. Tikambachita tene vinthu, wanthu angafunelini kubverana nase. Koma kudzichepesa kungatithandize kukhala wabwino ntima, odekha na okhululuka. Makhalidwe mwaya yachitisa kuti wanthu ambabverane nase. (Akol. 3:12-14) Makamaka akulu afunika kuyesesa kukhala ofikika. Kuti akwanise kuchita vimwivi, afunika kuyesesa kukhala na nthawe yocheza na abale na alongo. Afunika kumbayenda ku Nyumba ya Ufumu kukachita misonkhano, osati nthawe zose kumbandochitira pafoni palibe chifukwa chobveka. Ndipo peno ni vokwanisika, akulu angachite bwino kumbalalikira pabodzi na abale na alongo muyi na muyi. Akachita tene, abale na alongo ambawamasukire kuwauza nkhani akafuna kuthandiziwa.

YAHOVA ANGINGIMIRALINI MAGANIZO YAKE

6-7. Fotokozani vitsanzo vowonesa kuti Yahova adachinja maganizo yake pomwe atumiki wake adapemphera kwa iye.

⁶ Wanthu odzikuza angingimira maganizo yawo akambachita vinthu na anzawo. Koma olo kuti Yahova anaudindo ukulu kuposha munthu aliyese, abvuma kuchinja maganizo yake ndawa ni wodzichepesa. Ndoganizani momwe iye adachitira vinthu na Miriamu. Iye na Aroni pambakokola Mose m’bale wawo, Yahova adakalipa maninge nkuchitisa khate Miriamu. Vidakhala teno ndawa yakuti iye adanyoza Yahova yemwe ambatuma Mose. Koma patsogolo pake Aroni adagwigwirira Mose kuti athandize Miriamu ndipo Mose adagwigwirirambo Yahova kuti amupolesere mulongosi wake muyu. Manje ko Yahova adachita tani? Iye adadzichepesa nkumupolesa Miriamu, m’malo mongingimira kuti nichinjelini vanagemula.—Num. 12:1-15.

⁷ Tinkuwona pomwe kudzichepesa kwa Yahova tikawona momwe adachitira vinthu na Mpfumu Hezekiya. Yahova adatuma mneneri wake kuti akauze Hezekiya kuti matenda yomwe ankudwala afe nayo. Pamwapo Hezekiya adapemphera nkugwigwirira Yahova uku ankulira kuti amupolese. Ndipo Yahova adabva pemphero yake nkumupolesa ndipo adamuuza kuti akhale pomwe na moyo kwa magole 15. (2 Maf. 20:1, 5, 6) Yahova nthawe zose atichitira chifundo ndipo abvuma kuchinja maganizo yake ndawa yakuti ni wodzichepesa.

8. Nchani chinkutitsimikizira kuti Yesu ambangingimiralini maganizo yake? (Maliko 3:1-6)

⁸ Momwe Yesu adatewedzerera Ababa wake. Yesu pewenze padziko yapasi, ambayesesa kuchitira wanthu vinthu vabwino. Mwakulinganiza, iye adapolesa wanthu pa Satade, podiya kuti atsogoleri wavipembedzo ambawona kuti vililini bwino. (Werengani Maliko 3:1-6.) Ntsiku zino Yesu ankupitiriza kuwonesa chifundo potsogolera mipingo ndipo angingimiralini maganizo yake. Mwakulinganiza, anango akachita chimo mumpingo, iye achita nawo vinthu modekha ndipo awapasa mwayi wakuti achinje.—Chiv. 2:2-5.

9. Ko tingachite tani kuti osati timbangingimire maganizo yathu? (Onani pomwe mafoto.)

⁹ Ko isembo tingamutewedzere tani Yahova? Tifunika kuyesesa kukhala odzichepesa, ndipo voganiza na vochita vathu vimbawonese kuti tingingimiralini maganizo yathu. (Yak. 3:17) Mwakulinganiza, azibereki omwe atewedzera Yahova angadikhirelini kuti wana wawo ambachite vinthu vomwe angakwaniselini. Lemba ya Genezesi 33:12-14, iwonesa kuti Yakobo ni chitsanzo chabwino maninge pankhani yochita vinthu moganizira wana. Ndipo kuti azibereki awonese kuti ni odzichepesa, afunika kupewa kumbalinganiza wana wawo. Nawombo akulu afunika kukhala wachikatikati. Mwakulinganiza, nkulu afunikalini kungingimira maganizo yake. Koma afunika kubverana na vomwe akulu anzake ankuwona kuti viri bwino peno vinkuphwanyalini mpfundo za m’Baibolo. (1 Tim. 3:2, 3) Ndipo tose tifunika kumbalemekeza vomwe anango asankhula olo kuti tiwona vinthu mosiyana. (Aro. 14:1) Munthu aliyese mumpingo afunika kuyesesa kupewa ‘kungingimira maganizo yake.’—Afil. 4:5.

YAHOVA NI WODEKHA

10. Ko Yahova adawonesa tani kuti ni wodekha?

¹⁰ Wanthu odzikuza viwashupa kudikhira. Koma pakuti Yahova ni wodzichepesa, achita vinthu modekha. Mwakulinganiza, muntsiku za Nowa, Yahova adati wenze wokonzeka kudikhira kwa magole 120 akanati kudzonga wanthu oipa. (Gen. 6:3) Vimwivi vidathandiza kuti Nowa akwanise kulera wana wake nkudzamanga nawo pabodzi chingalawa. Ndipo nkuyenda kwa nthawe, mngelo wa Yahova adachitambo vinthu modekha pakudawira mibvunzo yomwe Abulahamu ambachita pankhani ya kudzongewa kwa Sodomu na Gomora. Adakati mngelo muyu wenze wodzikuza, adakadawira kuti: ‘Osanibvunza tene mibvunzo, ninkudziwa kale vati nichite.’ Koma mngelo muyu adatewedzera Yahova ndipo adachita vinthu modekha na Abulahamu.—Gen. 18:20-33.

11. Ko lemba ya 2 Petulo 3:9 inkuwonesa kuti ndawa chani Yahova ankudekha ntsiku zino?

¹¹ Ntsiku zino Yahova ankutichitirambo vinthu modekha. Iye ankudikhira kuti mapeto ya dziko ino yadzafike panthawe yomwe iye adakhazikisa. Koma ko ndawa chani iye ankudekha tene? Ankudekha “ndawa afunalini kuti munthu aliyese adzadzongewe, koma ankufuna kuti wanthu wose alape.” (Werengani 2 Petulo 3:9.) Kudekha kwa Yahova kwachitisa kuti wanthu azinji akhale na mwayi womudziwa. Ndipo tinashuwa kuti wanthu anango azinji apitirize kumudziwa basi. Koma sikuti Yahova apitirize kukhala wodekha mpakana kalekale. Ni shuwadi kuti Yahova akonda wanthu, koma iye awalekererelini kuti ambandochita vomwe iwo ankufuna. Manjemanje iye adzadzonge wanthu omwe achita voipa.—Hab. 2:3.

12. Ko Yesu atewedzera tani Yahova pankhani yodzichepesa?

¹² Momwe Yesu adatewedzerera Ababa wake. Kwa magole yazinji maninge, Yesu wakhala ankutewedzera Yahova pankhani yodekha. Yesu adamubvambo Satana pambanamizira Yahova na wanthu okhulupirika. (Gen. 3:4, 5; Yobu 1:11; Chiv. 12:10) Yesu wakhala pomwe ankuwona wanthu ankubonera maninge. Manje ndoganizani momwe iye aliri wofunisisa “kudzonga basa zose za Ndyerekezi”! (1 Yoh. 3:8) Manje nchani chinkuthandiza Yesu kuti adikhire nthawe yomwe Yahova adzamuuze kuti adzonge basa za Ndyerekezi? Kudzichepesa ndiko kunkumuthandiza. Ndipomwapa ankusiya vose m’manja mwa Yahova.—Mac. 1:7.

13. Ko Yesu adawonesa tani kuti wenze wodekha na atumi wake, ndipo ndawa chani?

¹³ Pewenze padziko yapasi, Yesu adachita pomwe vinthu modekha na atumi wake. Mwakulinganiza, atumi mwawo adachita maulendo yazinji ankugegedzana kuti nkulu ni mbani. Koma Yesu alibe kundowasiya nkusankhula anango. Pamwapa adawonesa kuti ni wodekha maninge. (Luka 9:46; 22:24-27) Iye wenze wotsimikiza kuti iwo adzapfunzire kukhala wodzichepesa. Ko imwepo mudaphonyesako vinthu maulendo yazinji? Peno mwadawira kuti inde, ni vochita kuonekeratu kuti mutembeja ndawa yokhala na Mpfumu yomwe ni yodzichepesa na yodekha.

14. Nchani chingatithandize kuti tikhale odekha maninge?

¹⁴ Ko isembo tingamutewedzere tani Yahova? Kuti timbaganize komasoti kuchita vinthu ninge momwe achitira Yahova, tifunika kupfunzira kukhala woganiza bwino ninge Yesu. (1 Akor. 2:16) Ko nchani chomwe chingatithandize kuti timbaganize ninge Yesu? Chinthu chomwe chingatithandize ni kuwerenga nkhani za moyo wa Yesu m’Baibolo. Tikateno tifunika kukhala na nthawe yoganizira vomwe tawerenga kuti tidziwe momwe Yesu awonera vinthu. Ndipo tifunika kupemphera kwa Yahova kuti atithandize kukhala wodzichepesa ninge Yesu. Tikachita teno, tidzakwanise kudzichitira vinthu modekha na kukhala pomwe wodekha na anzathu.—Mat. 18:26-30, 35.

YAHOVA AIKHIRA NZERU WANTHU ONYOZEKA

15. Fotokozankoni vitsanzo vowonesa kuti Yahova aikhira nzeru wanthu onyozeka. (Salimo 138:6)

¹⁵ Werengani Salimo 138:6. Ni mwayi ukulu maninge kuikhiriwa nzeru na Yahova yemwe anaudindo ukulu maninge kuposha aliyese. Naboni tikambiraneko va wanthu onyozeka omwe Yahova adawaikhira nzeru kalekale. Panango imwepo anango munkuwakumbukiralini, koma alimo m’Baibolo. Mwakulinganiza, Debora wenze nyabasa yemwe adatumikira m’banja ya Isaki na Yakobo kwa magole 125! Olo kuti wanthu azinji amudziwalini Debora, Yahova adachitisa kuti nkhani yake inembewe m’Baibolo kuti vidziwike kuti wenze wofunika maninge. (Gen. 24:59; 35:8, onani mawu ya m’nyantsi.) Ndipo payadapita magole yazinji, Yahova adasankhula mulumbwana munango dzina yake Davide yemwe wenze nyakabusa kuti akhale mpfumu ya Izirayeli. (2 Sam. 22:1, 36) Padandoti Yesu wabadwa, Yahova adatuma angelo kuti akagumane na kagulu ka anyakabusa kuti iwo akhale oyamba kudziwa kuti ku Betelehemu kwabadwa Mesiya. (Luka 2:8-11) Ndipo Yosefe na Mariya padatenga Yesu ali kacheche nkuyenda naye kukachisi, Yahova adaikhira nzeru Simiyoni na Ana omwe enze okalamba nkuwawonesa Mwana wake. (Luka 2:25-30, 36-38) Vimwivi vinkuwoneseratu kuti olo kuti “Yahova anaudindo ukulu, aikhira nzeru wanthu onyozeka.”

16. Ko Yesu adawonesa tani kuti aikhira nzeru wanthu na kuwalemekeza?

¹⁶ Momwe Yesu adatewedzerera Ababa wake. Yesu adatewedzerambo Yahova pakuikhira nzeru wanthu onyozeka. Iye adapfunzisa va Ufumu wa Mulungu wanthu ‘onyozeka na osapfunza.’ (Mac. 4:13; Mat. 11:25) Yesu adapolesa pomwe wanthu odwala ndipo ambachita nawo vinthu mwaulemu. (Luka 5:13) Usiku wakuti mangwana yake Yesu afe, adasambika minyendo ya opfunzira wake, ndipo mwiyi yenze basa ya anyabasa. (Yoh. 13:5) Akalibe kuyenda kudzulu, Yesu adaikhira nzeru opfunzira wake ndipo adapasa iwo na isepano basa yofunika maninge yopfunzisa wanthu kuti adzagumane moyo wosapera.—Mat. 28:19, 20

17. Ko isembo tingawonese tani kuti tiikhira nzeru anango na kuwalemekeza? (Onani pomwe foto.)

¹⁷ Ko isembo tingamutewedzere tani Yahova? Tingamutewedzere tikambalalikira wanthu wakhaindi iriyose, viribe basa kuti adachokera kuponi, peno ni azungu panango apsyipa, peno ni osauka panango olemera, peno ni opfunza panango neye. Tifunika pomwe kulemekeza abale na alongo wathu nkumbawona kuti atiposha, viribe basa peno tinaudindo na maluso yazinji. (Afil. 2:3) Tikakhala odzichepesa nkumbalemekeza anango, tichitisa kuti Yahova alemekezeke.—Aro. 12:10; Zef. 3:12.

18. Ndawa chani imwepo mufunika kukhala odzichepesa ninge Yahova?

¹⁸ Tikambayesesa kutewedzera Yahova pankhani yodzichepesa, tidzakhale ofikika, timbangingimirelini maganizo yathu ndipo tidzakhale odekha maninge. Tidzakwanise pomwe kuikhira nzeru anango na kuwalemekeza ninge momwe Yahova achitira. Ndipomwapa, naboni tose tiyesese kukhala odzichepesa ninge Mulungu wathu. Tikateno, tidzakhale ofunika maninge kwa iye.—Yes. 43:4.