NKHANI YOPFUNZIRA 49
NYIMBO NA. 44 Pemphero ya munthu yemwe ankubonera
Bukhu ya Yobu ingakuthandizeni mukafuna kupereka malangizo
‘Manje imwe a Yobu, bvani mawu yangu.’—YOBU 33:1.
CHOLINGA
Tipfunzire momwe bukhu ya Yobu ingatithandizire kusankhula bwino mawu na momwe tingayankhulire popereka malangizo kwa munthu.
1-2. Ko venze voshupa kuti azinzake atatu wa Yobu na Elihu achite chani?
YOBU padaluza vinthu vake vose, wanthu wa mudera yake adabva vomwe vidamuchitikira. Pamwapo azimuna atatu omwe ambadziwana na Yobu adachita ulendo kuti akamulimbikise. Madzina yawo yenze Elifazi, Bilidadi na Zofari. Koma padandoti afika nkuwona momwe Yobu ankudzudzikira, adasowa chochita.
2 Yobu ambabonera tene ndawa yakuti adaluza chirichose chewenze nacho. Ng’ombe zake zizinji, ngamila na nkhosa vidaphewa ndipo vinango vidabewa. Wana wake wose adafa padagwerewa na nyumba ndipo kudabwera vigananga nkupha anyabasa wake. Patsogolo pake Yobu adayamba kudwala maninge. Thupi yake yose yenze na vilonda ndipo ambabva kuwawa maninge. Pomwe Elifazi, Bilidadi na Zofari adafika, adagumana kuti Yobu ali kuchungudzala. Manje iwo adachita tani padamuona? Adamala ntsiku 7 ali naye pafupi ne kuyankhula chinthu nkumbandowona momwe iye ankubonerera. (Yobu 2:12, 13) Patsogolo pake mulumbwana munango dzina yake Elihu adabwerambo nkukhala pabodzi na azimuna wale. Pamapeto pake Yobu adayamba kuyankhula. Iye adati viri bwino kundofa ndipo vidakakhala bwino nidakaleka kubadwa. (Yobu 3:1-3, 11) Pamwapa Yobu ambafunika kulimbikisiwa na azinzake mwawa. Iwo enze na mwayi womulimbikisa na kumuwonesa kuti amuganizira. Koma ko iwo adachitadi vimwivi?
3. Ko tikambirane chani munkhani mwiyi?
3 Yahova adauza Mose kuti anembe vomwe azimuna atatu wale na Elihu adayankhula na kuchita. Elihu adayankhula vinthu vomwe adachita kuuziwa na Yahova. Koma Elifazi adayankhula vinthu motsogolerewa na chiwanda. (Yobu 4:12-16; 33:24, 25) Ndipomwapa m’bukhu ya Yobu mugumanika malangizo yabwino na yoipa. Ndipo tiwone momwe bukhu mwiyi ingatithandizire tikafuna kupasa munthu malangizo. Koma naboni tiyambe na kukambirana va Elifazi, Bilidadi na Zofari nkuwona vomwe tifunika kupewa kuyankhula na kuchita. Patsogolo pake tikambirane chitsanzo chabwino cha Elihu. Tiwone pomwe momwe bukhu ya Yobu idakathandizira Aizirayeli na momwe ingatithandizirembo ntsiku zino.
MOMWE AZINZAKE ATATU WA YOBU ADAMUPASIRA MALANGIZO
4. Nchani chidachitisa kuti azinzake atatu wa Yobu akangire kumulimbikisa? (Onani pomwe foto.)
4 Baibolo isimba kuti azinzake atatu wa Yobu adayenda kuti akamulimbikise ndawa ya mabvuto yomwe iye adagumana nayo. (Yobu 2:11) Koma iwo alibe kukwanisa kumulimbikisa. Ndawa chani? Ndawa ya vinthu vitatu vadaphonyesa. Choyamba, iwo alibe kuyamba amubvesera kuti abvese vomwe ankugumana navo. Mwakulinganiza, iwo adandothamingira kumuweruza kuti ankulangiwa ndawa ya vomwe adaphonyesa.a (Yobu 4:7; 11:14) Chachiwiri, malangizo yawo yenze yosathandiza ndawa alibe kusankhula mawu yabwino, enze alibe chifundo ndipo adandochitisa kuti Yobu abveretu kuwawa. Mwakulinganiza, iwo ambachita ninge ankuyankhula vanzeru, koma viribe na basa. (Yobu 13:12) Bilidadi adachita maulendo yawiri ankunyoza vomwe Yobu ambayankhula. (Yobu 8:2; 18:2) Nayembo Zofari adamulewa Yobu kuti alibe nzeru. (Yobu 11:12) Chachitatu, olo kuti iwo ambachitalini kumupopotera, vomwe adayankhula vidawoneseratu kuti alibe chifundo ndipo amuganiziralini Yobu. (Yobu 15:7-11) Azimuna mwawa ambandokhalira kunena kuti Yobu adachimwa ndipo alibe kumulimbikisa panango kumuthandiza kuti akhale na chikhulupiriro cholimba.
Mukambapasa munthu malangizo, ayi kumuchitisa kudzibva kuti alibe na basa. Koma cholinga chanu chimbakhale kumulimbikisa (Onani ndime 4)
5. Ko nchani chidachitikira Yobu padapasiwa malangizo na Elifazi, Bilidadi na Zofari?
5 Padati Bilidadi, Elifazi na Zofari amaliza kuyankhula, Yobu adakhala wokwinyirira maninge kuposha mwewenzere iwo akanati kubwera. (Yobu 19:2) Ndipomwapa iwo akambamulewa kuti adaphonya, Yobu ambadziikhira kumbuyo. Kumuweruza komwe iwo ambachita, kudachitisa kuti Yobu ayankhule vinthu mosaganiza bwino. (Yobu 6:3, 26) Azinzake mwawa alibe kumuchitira chifundo ndipo adayankhula vinthu vomwe Yahova abveranalini navo. Ndipomwapa Satana adawaphatisa basa kuti afokese Yobu. (Yobu 2:4, 6) Manje ko nkhani mwiyi idakathandiza tani wanthu wa kalekale, ndipo ingatithandizembo tani ntsiku zino?
6. Ko akulu wa mu Izirayeli adakapfunzira chani kwa Elifazi, Bilidadi na Zofari?
6 Momwe Aizirayeli adakaphindulira. Yahova padapereka malamulo kwa Aizirayeli, adasankhula akulu kuti ambawathandize kuyatewedza. (Deut. 1:15-18; 27:1) Akulu mwawa ambafunika kubvesera bwino akanati kupereka malangizo panango kuweruza nkhani. (2 Mbiri 19:6) Iwo ambafunika pomwe kubvunza mibvunzo m’malo mothamingira kuganiza kuti aidziwa kale nkhani yose. (Deut. 19:18) Ambafunika pomwe kupewa kupopotera wanthu omwe abwera kudzakumbira thandizo. Viri teno ndawa yakuti kuyankhula mokalipa kudakachitisa kuti wanthu akhale alibe shungu yofotokoza mabvuto yawo. (Eks. 22:22-24) Mumu ni momwe akulu wa mu Izirayeli adakaphindulira na bukhu ya Yobu.
7. Ko Aizirayeli wose adakaphindula tani na bukhu ya Yobu pankhani yopereka malangizo? (Miyambo 27:9)
7 Koma sikuti ni akulu wa mu Izirayeli okha omwe ambafunika kupereka malangizo. Aliyese wenze na udindo wothandiza munzake kukhala pa ushamwali wolimba na Yahova panango kumupasa malangizo pakafunika kuteno. (Sal. 141:5) Munthu akambapereka malangizo yabwino kwa munzake awonesa kuti amukondadi. (Werengani Miyambo 27:9.) Peno Aizirayeli adakaganizira momwe Elifazi, Bilidadi na Zofari adayankhulira na Yobu, adakakwanisa kuwona vomwe afunikalini kuyankhula na vomwe afunikalini kuchita popereka malangizo.
8. Ko tifunika kupewa chani tikambapasa anango malangizo? Onani pomwe mafoto.)
8 Momwe isembo tingaphindulire. Tikawona abale na alongo wathu ankubonera, tifunika kuyesesa kuwathandiza. Koma tikachita ninge azinzake atatu wa Yobu wale, tingakwaniselini kulimbikisa abale na alongo wathu. Ndipomwapa tifunika kuyamba tabvesa nkhani yose tikanati kupereka malangizo. Ndipo chachiwiri, tifunika kupereka malangizo yochokera m’Baibolo, osati kundoyankhula vamunsolo mwathu ninge mwadachitira Elifazi. (Yobu 4:8; 5:3, 27) Chachitatu, tifunika kupewa kuyankhula mawu yoipa. Kumbukirani kuti vinthu vinango vomwe Elifazi na anzake wale adayankhula venze vazedi. Ndipo patsogolo pake ntumi Paulo adaphatisambo basa mawu ya Elifazi. (Linganizani Yobu 5:13 na 1 Akorinto 3:19.) Koma vinthu vizinji vomwe Elifazi, Bilidadi na Zofari adayankhula pakunena va Mulungu, venzelini vazedi ndipo vidandokwinyiririsa Yobu. Ndipomwapa Mulungu adati iwo alibe kunena chaivo. (Yobu 42:7, 8) Malangizo yathu yafunikalini kuchitisa munthu kudzibva kuti ni wosafunika panango kumuchitisa kuwona kuti Mulungu amukondalini. Naboni manje tikambirane vomwe tinkupfunzira pa chitsanzo cha Elihu.
Mukafuna kupasa munthu malangizo, (1) mumbayambe mwabvesa momwe vinthu viriri pamoyo wake, (2) mumbaphatise basa Baibolo, ndipo (3) mumbayankhule naye mwachikondi (Onani ndime 8)
MOMWE ELIHU ADAPASIRA MALANGIZO YOBU
9. Ndawa chani Yobu ambafunikira thandizo olo kuti wenze adacheza kale na Elifazi, Bilidadi na Zofari, ndipo Yahova adamuthandiza tani?
9 Yobu na anzake atatu wale adashupana kwa nthawe itali. Iwo adayankhulana mawu yazinji yomwe yankukwana misolo 28 ya bukhu ya Yobu. Ndipo mawu yazinji yomwe adayankhulana yankuwonesa kuti enze okalipa. Ndipomwapa ni vosadabwisa kuwona kuti Yobu adapitiriza kukhala wokwinyirira. Iye ambafunika kulimbikisiwa na kupasiwa malangizo. Koma ko Yahova adathandiza tani Yobu? Iye adaphatisa basa Elihu kuti amupase malangizo. Ndawa chani Elihu adayamba wadikhira kwa nthawe itali akalibe kuyankhula maganizo yake? Iye adati: ‘Inepano ndine mng’ono ndipo amuna imwe ndimwe wachikulire. Ndipomwapa nenze chete ndawa yokulemekezani.’ (Yobu 32:6, 7) Elihu adazindikira kuti akuluakulu ananzeru ndawa yakuti akhalako kwa nthawe itali ndipo agumana na vizinji kuposha alumbwana. Koma padabvesera Yobu na azinzake wale, Elihu adawona kuti ankufunikalini kupitiriza kukhala chete. Iye adati: ‘Sikuti akuluakulu okha ndiwo ananzeru, ndipo sikuti ni akuluakulu okha omwe akwanisa kudziwa vinthu vabwino.’ (Yobu 32:9) Manje ko Elihu adadzafotokoza vinthu viponi ndipo adavifotokoza tani?
10. Ko Elihu adayamba wachita chani akanati kupasa Yobu malangizo? (Yobu 33:6, 7)
10 Elihu akanati kupasa Yobu malangizo, adayamba wamukhazika ntima pasi kuti akwanise kumubvesera. Ko iye adayamba wachita chani? Choyamba, iye adadziphata kuti osati andoyankhula chilichose chawaganiza. Tinkunena teno ndawa yakuti Baibolo ifotokoza kuti poyamba iye wenze adakalipa. (Yobu 32:2-5) Manje pakuti iye adayesesa kudekha, adakwanisa kuyankhula bwino na Yobu. Adayankhula naye mwaulemu ninge shamwali wake wapamoyo. Mwakulinganiza, iye adauza Yobu kuti: ‘Mulungu awona kuti imwepo na inepano ndise olingana.’ (Werengani Yobu 33:6, 7.) Iye akanati kupasa Yobu malangizo, adayamba wabwerezerako mawu yanango yomwe Yobu adayankhula. (Yobu 32:11; 33:8-11) Ndipo pa nthawe yomwe ambapereka malangizo, Elihu adabwerezera pomwe vomwe Yobu adayankhula.—Yobu 34:5, 6, 9; 35:1-4.
11. Ko Elihu adapereka tani malangizo kwa Yobu? (Yobu 33:1)
11 Elihu pambapasa Yobu malangizo, alibe kumuchitisa kuti adziwone kuti alibe na basa. Koma adayankhula naye mwaulemu. Mwakulinganiza, iye adachita kumutomola dzina Yobu, koma anango atatu wale alibe kuchita vimwivi. (Werengani Yobu 33:1.) Vinkuwoneka kuti panthawe yomwe Yobu ambashupana na amuna atatu wale, Elihu ambaganizira vati ayankhule. Pamwapa tinganene kuti Elihu adapasa mpata Yobu kuti anene maganizo yake. (Yobu 32:4; 33:32) Elihu adauza pomwe Yobu mobveka bwino kuti vinthu vinango vawayankhula na kuchita nivabwinolini. Adamukumbusa pomwe kuti Yahova ni wanzeru, wamphanvu, wachilungamo ndipo anachikondi chokhulupirika. (Yobu 36:18, 21-26; 37:23, 24) Malangizo yabwino yomwe Elihu adapereka, yadakonzekeresa Yobu kuti akwanise kutambira malangizo yanango yochokera kwa Yahova. (Yobu 38:1-3) Manje malangizo ya Elihu yadathandiza tani wanthu wa kalekale, ndipo yangatithandizembo tani ntsiku zino?
12. Ko Yahova adaphatisa tani basa aneneri pothandiza wanthu wake, ndipo Aizirayeli adakaphindula tani na chitsanzo cha Elihu?
12 Momwe Aizirayeli adakaphindulira. Yahova kazinjikazinji ambaphatisa basa aneneri kuti apfunzise Aizirayeli na kuwapasa malangizo. Mwakulinganiza, munthawe ya oweruza, Yahova adaphatisa basa mneneri wachikazi Debora kuti apereke malangizo kwa wanthu wake. Ndipo Yahova adaphatisa pomwe basa Samueli kuti alangize Aizirayeli podiya kuti iye wenze adakali mulumbwana. (Ower. 4:4-7; 5:7; 1 Sam. 3:19, 20) Ndipo munthawe ya mafumu, Yahova adapitiriza kuphatisa basa aneneri pakuthandiza atumiki wake kuti akhale naye pa ushamwali wolimba na kulangiza omwe ambamubveralini. (2 Sam. 12:1-4; Mac. 3:24) Chitsanzo cha Elihu chidanembewa m’bukhu ya Yobu kuti tipfunzire kusankhula mawu na kuwona momwe tingayayankhulire popereka malangizo.
13. Ko isembo tingalimbikise tani abale na alongo wathu ntsiku zino?
13 Momwe isembo tingaphindulire. Isembo tifunika kumbasankhula bwino mawu kuti tilimbikise abale na alongo wathu. (1 Akor. 14:3) Akulu afunika kuyesesa nthawe zose kumbayankhula bwino polimbikisa munthu podiya kuti munthu muyo ankukalipa ndipo ankuyankhula mosaganiza bwino.—1 Ates. 5:14; Yobu 6:3.
14-15. Fotokozani momwe nkulu angatewedzerere Elihu popasa munthu malangizo.
14 Tilinganize kuti nkulu wazindikira kuti mumpingo mwawo muli mulongo yemwe ankushupika maganizo. Ndipo nkulu muyo watengana na m’bale munango nkuyenda kuti akamulimbikise. Nkati mwa macheza, mulongo ule ankufotokoza kuti podiya kuti nilalikira mwakhama na kusonkhana nthawe zose, ndinelini wokondwa. Ko pamwapa nkulu angachite chani?
15 Nkulu muyu afunika kuyamba wabvesa vomwe vinkumuchitikira mulongo muyo. Kuti akwanise kuchita vimwivi, iye afunika kumubvunza mibvunzo na kutetekera vomwe iye ankudawira. Panango iye adziwona kuti alibe na basa ndipo awona pomwe kuti Yahova amukondalini. Apo neye, panango iye anankhawa yakuti ambagumane tani kobiri kuti ambakwanise kudzisamalira. (Luka 21:34) Pamwapo nkulu afunika kumutembeja mulongo muyu ndawa ya vabwino vomwe ankuyesesa kuchita. Afunika kumutembeja ndawa yakuti mulongo muyu ankuyesesa kusonkhana na kulalikira mwakhama podiya kuti vinthu virilini bwino pamoyo wake. Nkulu akabvesa bwinobwino vomwe vinkumuchitikira mulongo muyu nkudziwa vomwe vinkumuchitisa kuti ambadzione tene, angaphatise basa Baibolo pakumulimbikisa na kumutsimikizira kuti Yahova amukonda maninge.—Agal. 2:20.
PITIRIZANI KUPHINDULA NA BUKHU YA YOBU
16. Ko tingachite tani kuti tipitirize kuphindula na bukhu ya Yobu?
16 Apa tachita kuwona kuti bukhu ya Yobu inamalangizo yabwino maninge. Munkhani yapita, tidapfunzira vomwe vichitisa kuti Yahova ambalekerere mabvuto na momwe tingayapiririre. Ndipo munkhani ino tawona momwe tingatewedzerere Elihu pankhani yopereka malangizo yabwino. Tawona pomwe kuti tifunika kupewa kutewedzera Elifazi, Bilidadi na Zofari omwe ambadziwalini kulimbikisa. Tinashuwa kuti imwepo mukadzafuna kupasa munthu malangizo, mudzayambe mwakumbukira malangizo yogumanika m’bukhu ya Yobu. Ndipo mungachite bwino kukhala na cholinga chakuti muwerenge bukhu yose ya Yobu. Mukateno, mudzawone kuti bukhu ya Yobu ni yothandizambo ntsiku zino pankhani yopereka malangizo.
NYIMBO NA. 125 “Okondwa ni wanthu wachifundo!”
a Vinkuwoneka kuti chiwanda ndicho chidachitisa kuti Elifazi anene kuti Yahova awona kuti palibe munthu yemwe angakwanise kumukondweresa. Ndipo Elifazi ambakhulupirira vimwivi. Ndipomwapa iye adachita maulendo yawiri ankufokesa Yobu na maganizo mwaya.—Yobu 4:17; 15:15, 16; 22:2.