NKHANI YOPFUNZIRA 51
NYIMBO NA. 132 Manje ndise thupi ibodzi
Momwe mungakonzekerere ukwati wolemekeza Yahova
“Vinthu vose vimbachitike bwinobwino na mwadongosolo.”—1 AKOR. 14:40.
CHOLINGA
Kuwona momwe mwamuna na nkazi wake angalemekezere Yahova pantsiku ya ukwati wawo.
1-2. Ko Yahova afuna kuti ukwati wanu udzafambe tani?
KO IMWEPO munkufuna kungena m’banja manjemanje? Peno nteno, viri bwino maninge. Tinashuwa kuti muli bizebize kukonzekera ukwati wanu. Dziwani kuti Yahova ankufuna kuti vidzakufambireni bwino pantsiku ya ukwatia wanu ndipo afuna kuti mudzakhale na banja yokondwa.—Miy. 5:18; Nyimbo 3:11.
2 Koma Yahova ankufuna kuti pantsiku ya ukwati wanu mudzachite vinthu vomulemekeza. Koma ko ndawa chani Yahova afuna kuti mudzamulemekeze pantsiku ya ukwati wanu, ndipo mungachite tani vimwivi? Olo kuti nkhani ino inkuyenderatu sitiriti kwa wanthu omwe ankukonzekera kuti alowolane, malangizo yake ni yothandiza kwa tose. Yangatithandize peno tandochemerewa panango takumbiriwa malangizo.
NDAWA CHANI MUFUNIKA KULEMEKEZA YAHOVA PANTSIKU YA UKWATI WANU?
3. Ko m’bale na mulongo afunika kuganizira maninge chani pokonzekera ukwati wawo, ndipo ndawa chani?
3 Mwamuna na nkazi omwe ankufuna kulowolana, afunika kutewedza malangizo yomwe Yahova adatipasa m’Baibolo. Viri teno ndawa yakuti Yahova ndiye adayambisa ukwati. Iye ndiye adachitisa kuti Adamu na Hava alowolane. (Gen. 1:28; 2:24) Ndipomwapa, omwe ankufuna kulowolana afunika kuwonesesa kuti vati achite pa ukwati wawo vilemekeze Mulungu.
4. Ko ndawa chani m’bale na mulongo afunika kulemekeza Yahova pa ntsiku ya ukwati wawo?
4 Mufunika pomwe kulemekeza Yahova pa ukwati wanu ndawa yakuti iye ni Baba na Shamwali wanu. (Aheb. 12:9) Tinashuwa kuti imwepo mufunalini kuti pa ukwati wanu mudzachite vinthu vomwe vingadzonge ushamwali wanu na iye. (Sal. 25:14) Tinkudziwa pomwe kuti mukaganizira vomwe Yahova wakuchitirani, mungafunelini kudzamukwinyiririsa pantsiku ya ukwati wanu.—Sal. 116:12.
KO MUNGAWONESE TANI KUTI MUNKULEMEKEZA YAHOVA PA UKWATI WANU?
5. Ko Baibolo ingathandize tani omwe ankufuna kulowolana kuti asankhule bwino vochita pokonzekera ukwati wawo?
5 Baibolo ifotokozeratulini vinthu vose vomwe m’bale na mulongo angachite pa ntsiku ya ukwati wawo. Ndipomwapa omwe ankufuna kulowolana, angachite ukwati wawo mobverana na momwe vinthu viriri pamoyo wawo na mobverana pomwe na chikhalidwe chawo. Koma Akhrisitu chaiwo afunika kutewedza pomwe malamulo ya boma pankhani ya ukwati. (Mat. 22:21) Ndipo m’bale na mulongo afunika pomwe kutewedza mpfundo za m’Baibolo pokonzekera ukwati wawo kuti akondwerese Yahova. Manje ni mpfundo ziponi zomwe iwo afunika kutewedza?
6. Ndawa chani omwe ankufuna kulowolana afunika kutewedza malamulo ya boma?
6 Tewedzani malamulo ya boma. (Aro. 13:1, 2) M’madziko yazinji, mwamuna na nkazi afunika kutewedza malamulo ya boma akanati kulowolana. Ndipomwapa ni vabwino kudziwiratu malamulo ya mudziko yomwe tinkukhala. Peno pamwekha munkukangira kudziwa malamulo ya boma, masukani kucheza na akulu kuti akuthandizeni.b
7. Ko vinthu vifunika kufamba tani pa ukwati, ndipo nchani chingathandize kuti vifambe teno?
7 Yesesani kuchita vinthu mwaulemu. (1 Akor. 10:31, 32) Wonesani makhalidwe yabwino paukwati wanu, m’malo mochita vinthu ninge wanthu omwe adziwalini Mulungu. (Agal. 5:19-26) Malemba yafotokoza kuti mwamuna ndiye nsolo. Ndipomwapa iye afunika kuwonesesa kuti ukwati wake ni wokomedza ndipo ni wolemekeza Yahova. Manje nchani chingathandize kuti ukwati ukhale tene? Azinji afuna kuti paukwati wawo pakambiwe nkhani yochokera m’Baibolo. M’bale yemwe wapasiwa nkhani mwiyi afunika kuyesesa kuikamba mwaulemu na mwachikondi. Akateno, angathandize wanthu kudziwa kuti ukwati udayambisiwa na Yahova. Nkhani mwiyi ifunika kuthandiza wose omwe ankubvesera kudziwa kuti ukwati ni wofunika maninge. Ndipomwapa azinji afuna kuti nkhani ya ukwati wawo ikakambiriwe ku Nyumba ya Ufumu, peno ni vokwanisika. Peno imwepo munkufuna kuti nkhani ya ukwati wanu idzakambiriwe ku Nyumba ya Ufumu, mufunika kunembera kalata yokumbira bungwe ya akulu kudakali nthawe.
8. Peno munkufuna kuchita phwando paukwati wanu, ko mungachite tani kuti phwando mwiyo ikhale yolemekeza Yahova? (Aroma 13:13)
8 Werengani Aroma 13:13. Peno imwepo mwafuna kuti muchite phwando ya ukwati, ko mungachite tani kuti osati muichite ninge wanthu wakudziko? Mawu ya Chigiriki yomwe yadatsumbudzuliriwa kuti “maphwando yoipa,” yankulewa va wanthu omwe akagumana akumwa maninge mowa na kuliza nyimbo mpakana usiku. Peno paukwati wanu pakhale mowa, mufunika kuwonesesa kuti wanthu osati amwe maninge.c Peno pakhale nyimbo, osati volume imbakwire maninge mpakana wanthu kukanga kubvana akambacheza. Sankhulani nyimbo zabwino zomwe zilibe mawu yoipa kuti osati mukwinyiririse wanthu.
9. Ko mufunika kusamala na chani peno pa ukwati wanu munkufuna kuti wanthu adzayankhuleko na kuwonesa mavidiyo panango mafoto?
9 M’madera yanango, paukwati akonda kuuza wakuchikazi na wakuchimuna kuti ayankhuleko. Ndipo m’maukwati yanango aikha vidiyo yowonesa mwamuna na nkazi omwe ankulowolana panango kuwonesa mafoto yawo. Vimwivi vithandizira kuti ntsiku mwiyo ikhale yokomedza. Koma olo nteno, mufunika kuwonesa vinthu volimbikisa. (Afil. 4:8) Dzibvunzeni kuti: ‘Ko vikachitiselini manyazi wanthu? Ko vikawonese kuti tilemekeza ukwati?’ Koma mbvunzo wofunika maninge ni wakuti: ‘Ko vikalemekeze Yahova?’ Olo kuti nkuphonyalini kuyankhula vinthu vosekesa, mpofunika kusamala kuti osati payankhuliwe vinthu vochitisa wanthu kuganizira vogonana. (Aef. 5:3) Ndipo peno wakubanja panango azishamwali ankufuna kuyankhula chinthu, afunika kulemekeza vomwe mwasankhula.
10. Ndawa chani omwe ankulowolana afunika kupewa kuchita vinthu modziwonesera pa ukwati wawo? (1 Yohani 2:15-17)
10 Ayi kuchita vinthu modziwonesera. (Werengani 1 Yohani 2:15-17.) Yahova akomedzewa peno atumiki wake ankuchita vinthu vomulemekeza, osati kumbachita vinthu pakundofuna kuti wanthu awawone. Ndipomwapa Akhrisitu afunika kupewa kuchita phwando yonyanyira yofuna kobiri zizinji pakundofuna kudabwisa wanthu. Ko mungaphindule tani ndawa yochita ukwati wosafuna vizinji? Panango phindu yake ingakhale ninge yomwe adagumana m’bale Mike wa ku Noruega. Iye adati: “Tiribe kungena muvikwerete, ndipomwapa tidakwanisa kupitiriza kuchita upainiya. Ukwati wathu wenze wosafuna vizinji, koma olo nteno, wenze wokomedza maninge.” Nayembo mulongo Tabitha wa ku Índia adati: “Tidapewa kuchita vinthu votipanikiza maninge. Pakuti ukwati wathu wenze wosafuna vizinji, ndandanda yathu yenzembo ing’ono ndipo timbandokhaliralini kushupana.”
M’bale na mulongo afunika kuyesesa kuchita ukwati wokomedza, wolemekeza Yahova na wosadziwonesera, viribe basa kuti chikhalidwe chawo chiri tani (Onani ndime 10-11)
11. Ko omwe ankufuna kulowolana angapewe tani ntima wodziwonesera akambasankhula vovala vati adzavale pa ukwati wawo? (Onani pomwe mafoto.)
11 Ko mwaganizirako kale kuti mudzavale chani pa ukwati wanu? Tinashuwa kuti imwepo munkufuna kudzawoneka bwino. Olo kalekale nthawe ya Aizirayeli, mwamuna na nkazi omwe ankulowolana ambayesesa kuvala bwino. (Yes. 61:10) Ni shuwadi kuti vomwe mungavale pa ukwati wanu vingakhale vosiyana na vomwe mungavale pa vochitika vinango. Koma olo nteno, mufunika kuvala modzilemekeza. (1 Tim. 2:9) Ayi kuyebwa kuti ukwati wanu ndiwo wofunika maninge, osati vovala vati mudzavale.—1 Pet. 3:3, 4.
12. Ndawa chani m’bale na mulongo afunika kupewa miyambo yosabverana na mpfundo za m’Baibolo pochita ukwati?
12 Pewani kuchita vinthu vosabverana na vomwe Baibolo ipfunzisa. (Chiv. 18:4) Maukwati yazinji ya ntsiku zino yachitika mobverana na miyambo ya matchetchi ndipo achita pomwe vamizimu. Koma Yahova ankutichenjeza mobveka bwino kuti tifunika kupewa kuchita vimwivi. (2 Akor. 6:14-17) Peno imwepo mukhala mudera yomwe kuchitika miyambo yokaikisa, yesesani kudziwa kuti yadayamba tani. Mufunika pomwe kuwona mpfundo za m’Baibolo zobverana na nkhani mwiyo mukanati kusaina vati muchite paukwati wanu.
13. Ko omwe ankulowolana angatewedzere tani Yahova pankhani yotambira mphaso?
13 Ko mudera yanu wanthu akonda kupereka mphaso pa ukwati? Peno nteno, mufunika kudziwa kuti munthu angapereke chinthu mobverana na kobiri zomwe agumana. Akhrisitu alimbikisiwa kupasa ndawa kutithandiza kukhala okondwa. (Miy. 11:25; Mac. 20:35) Koma olo nteno, mufunikalini kuchichimiza wanthu kuti apereke vinthu. Mufunikalini pomwe kuchitisa manyazi wanthu omwe apereka vochepa. Mufunika kutewedzera Yahova yemwe akondwa na vomwe wanthu apereka mwa kufuna kwawo na mochokera pasi pa ntima.—2 Akor. 9:7.
MOMWE MUNGAPEWERE MABVUTO NA MOMWE MUNGAGWEBANIRANE NA YANANGO
14. Ko abale na alongo anango adagumana na mabvuto yaponi panthawe yomwe ambafuna kuchita ukwati wawo?
14 Nthawe zinango mungagumane na mabvuto pokonzekera ukwati wolemekeza Yahova. Mwakulinganiza, vingakhale voshupa kuti muchite ukwati wosafuna vizinji. M’bale Charlie wa ku Ilhas de Salomão adati: “Timbashupika kuti tichemere mbani na mbani ku ukwati wathu. Tinaanzathu azinji. Ndipo mobverana na chikhalidwe chathu, wanthu wose afuna kuchemerewa.” Tabitha watafotokoza poyamba ule adati: “Kudera komwe nikhala, wanthu akonda kuchita maphwando yakuluyakulu ya ukwati. Ndipomwapa vidatenga nthawe kuti azibereki wathu abverane na vomwe tidasaina vakuti tindochemera wanthu 100.” Nayembo Sara wa ku Índia adati: “Wanthu azinji andofuna kudziwonesera kuti anakobiri zizinji. Atsikana anango wa m’banja mwathu adachita ukwati wa kobiri zizinji. Ndipomwapa inembo nimbachichimizika kuti nichitembo ukwati watene.” Manje mungachite tani kuti mugwebane na bvuto mwiyi na mabvuto pomwe yanango?
15. Ndawa chani mufunika kupemphera pafupipafupi mukambakonzekera ukwati wanu?
15 Mbapempherani kwa Yahova kuti akuthandizeni kukonzekera. Muuzeni Yahova mabvuto yose yomwe munkugumana nayo na momwe munkubvera. (Afil. 4:6, 7) Mukumbireni Yahova kuti akuthandizeni kusankhula vochita mwanzeru, kuti mukhale odekha nakuti mulimbe ntima nkuchita vamwasaina podiya kuti vinkusiyana na vomwe anango ankufuna. (1 Pet. 5:7) Mukawona momwe Yahova ankudawirira mapemphero yanu, mudzayambe kumukhulupirira maninge. Tabitha watafotokoza kale ule adati: “Inepano na chibwenzi changu tenze na nkhawa yakuti panango timbashupaneshupane na kugegedzana pomwe na wakubanja. Ndipomwapa, nthawe iriyose yomwe tinkufuna kukambirana va kukonzekera ukwati wathu, timbayamba na pemphero. Tidachita kuwona momwe Yahova adatithandizira kuti awiri ise timbabvane na kubvana pomwe na wakubanja.”
16-17. Ko kukambirana kungakuthandizeni tani mukambakonzekera ukwati wanu?
16 Mbachezeranani momasuka, koma mwaulemu. (Miy. 15:22) Pali vinthu vizinji vomwe awiri imwe mungasaine kuchita pokonzekera ukwati wanu. Vimwivi vinkuphatanidzapo kusankhula ntsiku yati mudzachite ukwati, wanthu wati mudzachemere na vinthu vinango. Mukanati kusaina chinthu, mumbayambe mwakambirana nkuwona momwe mungaphatisire basa mpfundo za m’Baibolo na malangizo yanzeru yochokera kwa abale na alongo wachitsanzo chabwino. Mukambacheza awiri panango na wakubanja, mbayankhulani mwaulemu ndipo mumbakhale okonzeka kuchinja pakafunika kuteno. Mwakulinganiza, peno azibereki wanu akuuzani kuchita chinthu chomwe palibe vuto kuchita, abvereni. Ayi kuyebwa kuti imwiyi ni nthawe yawombo kuti akondwe. Koma peno munkuwona kuti muchitelini vomwe akuuzani, auzeni kuti ndawa chani, koma mwaulemu. (Akol. 4:6) Auzeni wakubanja kuti cholinga chanu chikulu nkuchita ukwati wolemekeza Yahova.
17 Kufotokozera azibereki wanu vomwe mwasankhula, kungakhale koshupa makamaka peno iwo ni Mbonilini. Koma olo nteno, mungakwanise kuwafotokozera mobveka bwino. M’bale Santhosh wa ku Índia adati: “Wanthu wakubanja ambafuna kuti tichite miyambo yazinji ya Chihindu pa ukwati wathu, ndipo vidatenga nthawe kuti ine na chibwenzi changu tikwanise kubverana nawo. Tidawabvera pa vinthu vinango vomwe vidakakalipisalini Yahova. Mwakulinganiza, tidapewa kuikha nyimbo ndipo palibe kuviniwa, ndawa ni vinthu vomwe iwo avikondalini.”
18. Ko mungachite tani kuti osati mudzapanikizike maninge pa ntsiku ya ukwati wanu? (1 Akorinto 14:40) (Onani pomwe foto.)
18 Konzekerani bwino. Mukayesesa kukonzekera bwino, mudzakhalelini wopanikizika pantsiku ya ukwati wanu. (Werengani 1 Akorinto 14:40.) M’bale Wayne wa ku Taiwan adati: “Pazidakhala ntsiku zing’onong’ono kuti tichite ukwati wathu, tidasonkhana na wose omwe adadzipereka kuti atithandizire. Tidakambirana momwe vinthu vose vidzachitikire ndipo tidayesererako vinango pakundofuna kutsimikizira kuti peno vidzafambedi bwino.” Ndipo kuti muwonese kuti munkulemekeza wanthu wamwachemera, dzachiteni vinthu panthawe yake.
Kukonzekereratu kudakali nthawe, kungachitise kuti vinthu vidzafambe bwino pantsiku ya ukwati (Onani ndime 18)
19. Ko mungafunike kuchitiratu chani kuti vinthu vidzafambedi bwino pa ntsiku ya ukwati wanu?
19 Kuti vinthu vidzafambe bwino, yesesani kuganizira mabvuto yomwe yangadzakhalepo nkuwoneratu vati mudzachite. (Miy. 22:3) Mwakulinganiza, peno mudera yanu wanthu azinji akonda kubwera koma alibe kuchemerewa, onerantuni vati mudzachite kuti wanthu mwawo osati adzafike. Auzeni wachibale wanu omwe ni mbonilini vamwalinganiza na momwe muwonera miyambo yomwe yachitika m’maukwati. Mungawapase pomwe nkhani ya Chichewa yakuti: “Kodi Paukwati wa Mboni za Yehova Pamachitika Zotani?” ya pa saiti ya jw.org. Kuti phwando ya ukwati idzafambe bwino, munkufunika kusankhula m’bale wachitsanzo chabwino kuti adzakhale “wonyang’anira phwando.” (Yoh. 2:8) Mukamuuza mobveka bwino m’bale muyo momwe phwando idzafambire, ndiye kuti vinthu vidzafambedi bwino maninge.
20. Ko omwe ankulowolana afunika kuiwona tani ntsiku ya ukwati wawo?
20 Nthawe zinango mungambakhale na nkhawa mukaganizira vose vomwe vinkufunika kuti ukwati wanu udzachitike. Koma mufunika kukumbukira kuti ukwati ni ntsiku ibodzi basi. Kwandokhala kuyamba kwa moyo unyowani womwe mukhale nawo potumikira Yahova pabodzi. Yesesani kuchita ukwati wosafuna vizinji, koma wolemekeza Yahova. Mukayesesa kutewedza malangizo ya Mulungu, ukwati wanu udzafambe bwino maninge. Ndipo mumbadzati mukakumbukira ntsiku ya ukwati wanu, mumbadzakondwe, osati kudziringa na vomwe mudachita.—Sal. 37:3, 4.
NYIMBO NA. 107 Yahova achatiwonesa chikondi
a TANTHAUZO YA MAWU YANANGO: Muvikhalidwe vizinji, pa ukwati mwamuna na nkazi apolomisa pamaso pa Mulungu kuti adzakhale pabodzi mpakana kalekale. Akamaliza kuchita vimwivi, anango akhala na phwando pabodzi na azibale na azishamwali. Koma m’madera yanango akhala alibe mwambo wopolomisana ndipo achitalini phwando. Olo viri teno, afunika kuphatisa basa mpfundo za m’Baibolo pa ntsiku ya ukwati wawo.
b Kuti mubve vizinji va momwe Akhrisitu awonera malamulo ya boma pankhani ya ukwati, onani nkhani ya Chichewa yakuti: “Ukwati Wolemekezeka kwa Mulungu ndi kwa Anthu,” mu Nsanja ya Olonda ya 15 Outubro, 2006.
c Onani vidiyo yakuti Ko nichadekana kumwa mowa? pa jw.org.