NKHANI YOPFUNZIRA 47
NYIMBO NA. 38 Mulungu adzakulimbise
“ Imwepo ndimwe munthu wofunika maninge”!
‘ Ndiwe munthu wofunika maninge.’—DAN. 9:23.
CHOLINGA
Kuthandiza wale omwe adziwona kuti ni wosafunika kuti abvese kuti ni ofunika kwa Yahova.
1-2. Ko nchani chingatithandize kutsimikizira kuti ndise ofunika maninge kwa Yahova?
ATUMIKI wa Yahova ni ofunika maninge kwa iye. Koma anango akhulupiriralini kuti Yahova awakonda. Vingachitike kuti adachitiriwa vinthu voipa, ndipomwa adziwona kuti alibe na basa. Ko imwepo mudzibvambo tene? Ko nchani chingakuthandizeni kutsimikizira kuti ndimwe wofunika maninge kwa Yahova?
2 Chinthu chibodzi chomwe chingakuthandizeni imwepo ni kupfunzira na kuganizira vitsanzo va m’Baibolo vomwe viwonesa kuti Yahova afuna kuti wanthu ambasamaliriwe. Mwana wake Yesu, ambachita vinthu na wanthu mwaulemu. Ndawa yochita vimwevi, iye adawonesa kuti wale omwe ambadziwona kuti ni osafunika, enze ofunika maninge kwa iye na kwa Ababa wake. (Yoh. 5:19; Aheb. 1:3) Mu nkhani mweino, tiwone vinthu viwiri ivi: (1) ko Yesu adathandiza tani wanthu kuwona kuti ni ofunika maninge kwa Yahova? Ndipo (2) ko tingatsimikizire tani kuti ndise ofunika maninge kwa Yahova?—Hag. 2:7.
KO YESU ADATHANDIZA TANI WANTHU KUZINDIKIRA KUTI NI OFUNIKA MANINGE?
3. Ko Yesu adachita tani na wanthu omwe adabwera kwa iye ku Galileya?
3 Pomwe Yesu ambalalikira ku Galileya, wanthu azinji ambamufenderera kuti amubvesere nakuti apolesewe. Yesu adazindikira kuti iwo “enze okuluzikakuluzika ndipo enze alibe owasamalira ninge nkhosa ziribe nyakabusa.” (Mat. 9:36) Atsogoleri wachipembedzo ambawona wanthu mwawa kuti ni osafunika. Iwo mpakana ambaganiza kuti wanthu wose mwawa ‘ni otembererewa.’ (Yoh. 7:47-49) Koma Yesu ambawachitira vinthu mokoma ntima na mwaulemu ndipo ambapatula nthawe kuti awapfunzise na kuwapolesa. (Mat. 9:35) Kuingizira pamwapa, pakufuna kuthandiza wanthu azinji, Yesu adapfunzisa opfunzira wake kuti ambalalikire ndipo adawapasa mphanvu ‘yopolesa wodwala.’—Mat. 10:5-8.
4. Ko tinkupfunzira chani na momwe Yesu adachitira vinthu na wanthu omwe ambanyozewa?
4 Pakuchita vinthu mokoma ntima na mwaulemu, Yesu adawonesa kuti kwa iye na kwa Ababa wake, wanthu omwe anyozewa na kuwonewa kuti ni osafunika kwa wanthu, ni ofunika maninge. Peno imwepo munkutumikira Yahova koma mukukaikira kuti ndimwe wofunika, ganizirani momwe Yesu adachitira na wanthu osapfunzira omwe ambafuna kupfunzira kwa iye. Kuchita vimwevi kudzakuthandizeni kuwona kuti ndimwe ofunika maninge kwa Yahova.
5. Ko tinkudziwa chani va nkazi yemwe Yesu adagumana naye ku Galileya?
5 Sikuti Yesu ambandopfunzisa gulu ya wanthu, koma ambasamalira pomwe munthu aliyese payekha. Mwakulinganiza, pomwe ambalalikira ku Galileya, iye adagumana na nkazi munango yemwe ambadwala matenda yotaya magazi kwa magole 12. (Maliko 5:25) Mobverana na Chilamulo, matenda mwaya yambamuchitisa kukhala wopsyipiziwa ndipo munthu aliyese yemwe wamugumirira ambakhalambo wopsyipiziwa. Ndipomwapa, iye ambafunikalini kukhala pafupi na wanthu anango ndipo nthawe ikulu ambakhala yekhayekha. Kuingizira pamwapa, iye ambafunikalini kutumikira Yahova pabodzi na wanthu anango mu masunagoge panango pa vikondwerero. (Lev. 15:19, 25) Kunena chaivo, nkazi moyu ambabonera maninge m’thupi na m’maganizo.—Maliko 5:26.
6. Ko nkazi yemwe ambadwala matenda yotaya magazi adachita chani kuti apolesewe?
6 Nkazi wokwinyirira moyu ambafuna kuti Yesu amupolese. Koma iye alibe kumukumbira kuti amuchitire vimwevi. Ndawa chani? Panango ambachita manyazi ndawa ya matenda yake. Panango ambachita mantha kuti Yesu amuthamangise pakuti wenze wopsyipiziwa komasoti ambafunikalini kukhala pa gulu ya wanthu. Ndipomwapa, iye adakhala wotsimikiza kuti akaphata chovala cha Yesu, apole. (Maliko 5:27, 28) Iye wenze na chikhulupiriro cholimba maninge ndipo matenda yake yadamala! Patsogolo pake, Yesu adabvunza kuti ni mbani waniphata, ndipo nkazi muyu adaulula kuti ndine. Ko Yesu adachita tani?
7. Ko Yesu adachita tani vinthu na nkazi yemwe ambabonera maninge? (Maliko 5:34)
7 Yesu adachita vinthu na nkazi muyu mwachikondi na mwaulemu. Yesu adawona kuti nkazi muyu “adachita mantha nkuyamba kunjenjemera.” (Maliko 5:33) Padazindikira momwe ambabvera na kuti ambabonera, Yesu adawonesa chikondi chikulu ndipo adamulimbikisa. Iye mpakana adamuchemera kuti “mwana,” yomwe ni mawu osati yowonesa ulemu basi, koma chifundo na chikondi chikulu. (Werengani Maliko 5:34.) M’Baibolo, ni malo mwaya yokha yomwe Yesu adachemera nkazi kuti “mwana.” Yesu panango adanena vimwevi ndawa yakuti vinthu venze voshupa maninge ndipo nkazi muyu ‘ambanjenjemera.’ Ganizirani momwe nkazi muyo adakhalira wokondwa pomwe adapolesewa! Sembe Yesu alibe kumuchitira vinthu mwachikondi, nkazi muyu adakakhala wokwinyirira maninge nkumbadziwona kuti niwophonya podiya kuti matenda yake yamala. Yesu ambafuna kuchita vizinji kuposha kundomupolesa matenda yake. Yesu ambafuna kuti nkazi muyo azindikire momwe iye wenzere mwana wofunika maninge wa Ababa wathu wachikondi wakudzulu.
8. Ko mulongo munango waku Brasil adagumana na mabvuto yaponi?
8 Ntsiku zino, atumiki wa Mulungu anango akhala wokwinyirira ndawa ya mabvuto pa moyo wawo, yomwe yawachitisa kudzibva kuti alibe na basa. Onani chitsanzo cha Maria,a yemwe ni mpainiya wokhazikika wa ku Brasil. Iye adabadwa alibe mendo na djanja yamadzere. Iye adati: “Inepano nimbanyozewa maninge ku shikola ndipo ambanichitira vinthu vilibe chilungamo ndawa ya kupunduka kwangu. Anzangu ambanichemera madzina yoipa maninge. Nthawe zinango, mpakana azibale wangu ambaninyoza.”
9. Ko nchani chidathandiza Maria kuwona kuti ni wofunika maninge kwa Yahova?
9 Ko nchani chomwe chidamuthandiza Maria? Pomwe iye adakhala wa Mboni za Yahova, abale na alongo adamunyamalisa na kumuthandiza kuti ambadziwone ninge momwe Yahova amuwonera. Iye adati: “Ningakwaniselini kunemba madzina ya abale na alongo wose omwe adanithandiza, ndawa ni azinji. Inepano ninkutembeja Yahova kuchokera pasi pa ntima ndawa yakuti wanipasa abale na alongo wabwino maninge.” Abale na alongo mwawa adathandiza Maria kuti ambadziwone kuti ni wofunika maninge kwa Mulungu.
10. Ko vinthu venze tani pa moyo wa Mariya waku Magadala, ndipo ko iye ambabva tani? (Onani pomwe mafoto.)
10 Onani momwe Yesu adathandizira munthu munango dzina yake Mariya waku Magadala. Iye wenze na viwada 7. (Luka 8:2) Iye ambachita vinthu voipa ndawa ya viwanda. Ndipomwapa, wanthu ambakhala kutali na iye. Panthawe yose mweyi yoshupa pa moyo wake, vingachitike kuti ambadzibva kuti ni wosatetezeka, nkumbaganiza kuti alibe na basa. Yesu adachosa viwanda vomwe vimbamuchitisa kubonera, ndipo nkazi muyu adakhala wopfunzira wake wokhulupirika. Ko ni mwanjira inango iponi yomwe Yesu adathandizira Mariya waku Magadala kubvesa kuti iye wenze wofunika maninge kwa Mulungu?
Ko Yesu adamutsimikizira tani Mariya waku Magadala kuti wenze wofunika maninge kwa Yahova? (Onani ndime 10-11)
11. Ko Yesu adawonesa tani kwa Mariya waku Magadala kuti wenze wofunika maninge kwa Mulungu? (Onani pomwe mafoto.)
11 Yesu adachemerambo Mariya waku Magadala kuti ambafambe naye pa basa yolalikira.b Mwanjira mweyi, iye adapitiriza kukhala na mwayi wakubva Yesu pomwe ambapfunzisa anango. Yesu adawonekera pomwe kwa iye pantsiku yomwe adamukisiwa. Iye wenze mu gulu ya wanthu oyambirira omwe Yesu adayankhula nawo ntsiku mwiyo. Ndipo mpakana Yesu adamukumbira kuti akafotokozere opfunzira wake kuti wamukisiwa. Ndawa ya vose vimwevi, Yesu adathandiza Mariya waku Magadala kuwona kuti wenze wofunika maninge kwa Yahova!—Yoh. 20:11-18.
12. Fotokozani vomwe vidachitisa Lídia kudziona kuti alibe na basa?
12 Ninge Mariya waku Magadala, wanthu azinji ntsiku zino ankubonera na maganizo yodziwona kuti alibe na basa. Mulongo munango dzina yake Lídia wa ku Espanha, panthawe yomwe amayi wake enze na mimba yake, ambaganiza vakuti achose mimba. Lídia akumbukira kuti podiya pomwe wenze mng’ono maninge amayi wake ambamusamaliralini bwino ndipo ambamuyankhula mawu yoipa maninge. Iye adati: “Chomwe inepano nimbafuna pa moyo wangu ni kukondewa na anango. Nimbachita mantha kuti ningakondewelini na munthu aliyese, ndawa amayi wangu enze adanitsimikizira kuti ndine munthu woipa.”
13. Ko nchani chidathandiza Lídia kudziwona kuti ni wofunika maninge kwa Yahova?
13 Pomwe Lídia adayamba kupfunzira Baibolo, vinthu vidachinja pa moyo wake. Kupemphera kwa Yahova, kuwerenga Baibolo, mawu na vochita va abale na alongo vidamuthandiza kuzindikira kuti iye ni wofunika maninge kwa Yahova. Iye adati: “Mwamuna wangu nthawe zose aniuza kuti anikonda maninge. Ndipo nthawe zose anikumbusa va makhalidwe yangu yabwino. Anzangu anango wa pantima achitambo vimwevi.” Ninge Lídia, vingachitike kuti mumpingo mwanu alipo munthu munango yemwe ankufunika kuthandiziwa kuti ambadziwone kuti ni wofunika maninge kwa Yahova. Ko imwepo mukuganizira va munthu munango yemwe ankufunika kuthandiziwa mumpingo mwanu?
TIMBADZIWONE NINGE MOMWE YAHOVA ATIWONERA
14. Ko lemba ya 1 Samueli 16:7 itithandiza tani kumbadziwona ninge momwe Yahova atiwonera? (Onani pomwe bokosi yakuti: “Ndawa chani atumiki wa Yahova ni ofunika maninge kwa iye?”)
14 Kumbukirani kuti Yahova akuwonanilini ninge momwe wanthu wose akuwonerani. (Werengani 1 Samueli 16:7.) Wanthu azinji kudziko uku, awona kuti munthu ni wofunika maninge peno ni wokhuza, anakobiri komasoti peno ni wopfunzira maninge. Koma Yahova atiwonalini mwa njira mweyi. (Yes. 55:8, 9) Ndipomwapa, m’malo mwa kumbadziwona ninge momwe wanthu aganizira, imwepo mufunika kumbadziwona mobverana na maganizo ya Yahova. Baibolo inena va wanthu omwe nthawe zinango ambaganiza kuti alibe na basa, ninge Eliya, Naomi na Hana. Mukambawerenga va wanthu mwawa, khalani tcheru ndipo onani momwe Yahova ambawakondera. Imwembo mungakhale na bukhu yakuti mumbanembemo vinthu vomwe vakuchitikirani pamoyo wanu vomwe viwonesa kuti Yahova akukondani na kukuwonani kuti ndimwe wofunika maninge. Kuingizira pamwapa, imwepo mungafagefage nkhani yakuti, ‘kudzithemba’ mu mabukhu yathu.c
15. Ko ndawa chani Yahova ambawona Danieli kuti ni ‘munthu wofunika maninge’? (Danieli 9:23)
15 Zindikirani kuti kukhulupirika kwanu kukuchitisani kuti Yahova ambakuwoneni kuti ndimwe wofunika maninge. Pa nthawe inango mneneri Danieli, pomwe wenze na magole 90, ‘adaneta maninge’ komasoti adakhala wokhumudwa. (Dan. 9:20, 21) Ko Yahova adamulimbikisa tani? Yahova adatumiza mngelo Gabirieli kuti akumbuse Danieli kuti wenze ‘wofunika maninge’ nakuti mapemphero yake yenze yadabvewa. (Werengani Danieli 9:23.) Ko nchani chomwe chidachitisa Danieli kukhala wofunika maninge kwa Mulungu? Ni makhalidwe yake yabwino yomwe ni chikondi na kukhulupirika kwake. (Ezek. 14:14) Yahova adasunga nkhani mweyi m’Baibolo kuti itilimbikise. (Aro. 15:4) Iye abveserambo mapemphero yanu ndipo akuwonani kuti ndimwe wofunika ndawa yokonda vinthu vabwino na kumutumikira mokhulupirika.—Mika 6:8; Aheb. 6:10.
16. Ko nchani chingatithandize kuwona Yahova ninge Baba wathu wachikondi?
16 Mbawonani Yahova ninge Ababa wanu omwe akukondani. Iye afuna kukuthandizani, osati kugumana vophonya kwa imwepo. (Sal. 130:3; Mat. 7:11; Luka 12:6, 7) Kuganizira vimwevi, kwathandiza wanthu azinji omwe adziona kuti niwosafunika. Mwakulinganiza, onani nkhani ya mulongo munango dzina yake Eliana, wa ku Espanha yemwe ambadzibva kuti ni wosafunika na wachabechabe ndawa yakuti mwamuna wake wakhala ankumuchitira nkhanza kwa magole yazinji. Iye adati: “Nthawe zose nimbadziwona kuti nilibe na basa, koma nimbayesesa kuganizira kuti Yahova anikonda.” (Sal. 28:9) Mulongo munango waku África do Sul, dzina yake Lauren, nthawe zizinji ambadzikumbusa kuti: “Peno Yahova mwachikondi adanikwekwetera mu gulu yake, nkukhala nane pafupi kwa magole yose mwaya mpakana kuniphatisa basa pakupfunzisa anango, mosakaikira Yahova aniwona kuti ndine munthu wofunika maninge.”—Hos. 11:4.
17. Ko mungatsimikizire tani kuti Yahova akukondani? (Salimo 5:12) (Onani pomwe foto.)
17 Khalani otsimikiza kuti Yahova akukondani. (Werengani Salimo 5:12.) Davide adalinganiza kukondewa na Yahova na ‘chovikira chikulu’ chomwe chiteteza olungama. Kudziwa kuti Yahova atikonda kungakhale ninge chovikira chomwe chidzatiteteze tikayamba kuganizira vinthu voipa. Koma ko imwepo mungadziwe tani kuti Yahova akukondani? Ninge momwe tawonera, tingatsimikizire tikambawerenga Baibolo. Kuingizira pamwapa, iye aphatisira basa akulu, azishamwali na wanthu anango kuti akukumbuseni kuti ndimwe wofunika maninge kwa Yahova. Koma ko imwepo mufunika kuchita chani peno munthu munango wakuchitirani vinthu mwachikondi?
Kukumbukira kuti tikondewa na Yahova kutithandiza kulimbana na maganizo yodziwona kuti ndise osafunika (Onani ndime 17)
18. Ndawa chani mufunika kubvuma kutembejewa na wanthu anango?
18 Bvumani kutembejewa na wanthu omwe akukondani na kukudziwani. Kumbukirani kuti Yahova angaphatise basa wanthu mwawa kuti akuthandizeni kubvesa kuti iye akukondani. Eliana, yemwe tamutomola kale adati: “Ninkupfunzira kubvuma kutembejewa mwachikondi komwe wanthu anichitira. Kuchita vimwevi ni koshupa maninge kwa inepano, koma ninkudziwa kuti ni vomwe Yahova afuna kuti nimbachite.” Akulu mwachikondi adathandiza Eliana kuwona kuti Yahova amukonda. Iye manje ankutumikira ninge mpainiya wokhazikika komasoti kuthandizira pa Beteli ali kumuyi.
19. Ndawa chani mufunika kutsimikizira kuti ndimwe wofunika maninge kwa Mulungu?
19 Yesu mwachikondi atikumbusa kuti ndise ofunika maninge kwa Ababa wathu wakudzulu. (Luka 12:24) Tingakhale otsimikizira kuti Yahova atiwona kuti ndise wanthu ofunika maninge. Ndipomwapa, ayi kuyebwa vimwevi! Ndipo tinkufuna kuchita vomwe tingakwanise kuti tithandize wanthu kuti ambadziwone kuti ni ofunika maninge kwa Yahova!
NYIMBO NA. 139 Linganizani kuti muli mudziko inyowani
a Madzina yanango yachinjiwa.
b Vinkuwonesa kuti Mariya waku Magadala wenze mu gulu ya akazi omwe ambafamba na Yesu. Akazi mwawa ambaphatisa basa kobiri zawo kuti asamalire Yesu na opfunzira wake.—Mat. 27:55, 56; Luka 8:1-3.
c Mwakulinganiza, mungawerenge msolo 24 mu bukhu yakuti Yandikirani Yehova. Komasoti malemba na nkhani za m’Baibolo pa msolo wakuti: “Kudzikayikira” mu bukhu yakuti: Malemba yotithandiza pa moyo wathu wachikhrisitu.