NKHANI YOPFUNZIRA 46
NYIMBO NA. 17 “ Ninkufuna”
Nkulu wathu wa Antsembe Yesu atibvesa
“ Ndawa nkulu wa antsembe yemwe tiri naye uyu, ni nkululini wa antsembe yemwe angaleke kutibvera ntsisi pa vofoka vathu.”—AHEB. 4:15.
CHOLINGA
Kuona kuti ni ndawa chani Yesu ni Nkulu wa Antsembe wabwino yemwe tinaye na kuona momwe atithandizira njira zosiyanasiyana ntsiku zino.
1-2. (a) Ndawa chani Yahova adatumiza Mwana wake padziko yapasi? (b) Ko tikambirane chani mu pfunziro mweino? (Aheberi 5:7-9)
MAGOLE 2000 kumbuyo, Yahova adatumiza Mwana wake wokondewa padziko yapasi. Ndawa chani? Ndawa yakuti Yahova ambafuna kumasula wanthu ku uchimo na impfa na kumalisa kuipa kwa Satana. (Yoh. 3:16; 1 Yoh. 3:8) Yahova ambadziwa pomwe kuti moyo wa Yesu ninge munthu, udakamukonzekeresa kukhala Nkulu wa Antsembe wachifundo. Yesu adayamba kukwanirisa udindo moyu patsogolo pakuti wabatizika mugole ya 29 EC.a
2 Mu pfunziro mweino, tione momwe moyo wa Yesu pano padziko ya pasi udamukonzekeresa kuti akhale Nkulu wa Antsembe wachifundo. Ni vofunika maninge kubvesa momwe Yesu “adakhalira wa ungwiro” pa udindo wake muyu. Kubvesa vimwevi vitithandize kufenderera Yahova mosashupa olo kuti nthawe zinango tikhala okhumudwa ndawa ya vophonya vathu.—Werengani Aheberi 5:7-9.
MWANA WOKONDEWA WA MULUNGU ADABWERA PADZIKO YAPASI
3-4. Ko Yesu adabvuma kusiya chani kuti abwere padziko yapasi, ndipo moyo wake wenze tani padziko pano?
3 Nthawe zinango moyo wathu uchinja. Mwakulinganiza, tifuluka kuyenda ku malo yanango, kusiya azibale wathu na azishamwali wathu. Kuchinja muku kungakhale koshupa. Yesu nayembo moyo wake udachinja. Iye wenze woyamba kulengewa komasoti wenze mngelo wofunika maninge kudzulu. Yesu ambakonda maninge Yahova ndipo ambakondwa ndawa yophata naye basa pabodzi. (Sal. 16:11; Miy. 8:30) Olo nteno, lemba ya Afilipi 2:7 inena kuti: Koma iye adabvuma “kusiya vose,” adasiya udindo wake womwe wenze naye kudzulu nkudzakhala na wanthu ochimwa pano padziko yapasi.
4 Ganizirani momwe moyo wa Yesu wenzere pomwe wenze mwana. Yesu adabadwira mu banja yosauka, ndipo tikudziwa vimwevi ndawa ya ntsembe yomwe azibereki wake adapereka pomwe iye adabadwa. (Lev. 12:8; Luka 2:24) Kuingizira pamwapa, Mpfumu yoipa Herode pomwe adabva kubadwa kwa Yesu, ambafuna kumupha. Kuti aleke kuphewa na Herode, azibereki wa Yesu ambafunika kuchoka mu dziko yawo nkuyenda kukakhala ku Iguputo kwa kanthawe. (Mat. 2:13, 15) Vimwevi venze vosiyana na moyo womwe Yesu wenze naye kudzulu.
5. Ko Yesu adaona chani ali padziko yapasi, ndipo vimwevi vidamukonzekeresa tani kukhala Nkulu wa Antsembe wabwino? (Onani pomwe foto.)
5 Yesu adaona momwe wanthu abvera akaferewa munthu yemwe amukonda. Ndipo iye adaferewambo wanthu omwe ambawakonda. Mwakulinganiza, iye adaferewa ababa wake Ayosefe. Pa utumiki wake, Yesu adaona wanthu wakhate, alombe na opunduka. Ndipo adaona pomwe azibereki omwe enze okhumudwa ndawa ya impfa ya wana wawo. Yesu ambawabvera chifundo wanthu mwawa. (Mat. 9:2, 6; 15:30; 20:34; Maliko 1:40, 41; Luka 7:13) Ni shuwadi kuti Yesu pomwe wenze kudzulu ambaona wanthu ankubonera. Koma pomwe wenze padziko yapasi ambaona mabvuto ya wanthu mwanjira inango. (Yes. 53:4) Mabvuto yomwe Yesu adagumana nayo padziko yapasi, yadamuthandiza kubvesa momwe wanthu abvera akagumana na mabvuto. Ndipo molingana na munthu aliyese, iye ambakhalambo woneta, wankhawa na wokhumudwa.
Yesu aganizira maninge momwe wanthu akubvera komasoti kubonera kwawo (Onani ndime 5) )
YESU ADAONESA CHIFUNDO KWA WANTHU
6. Ko vitsanzo vomwe Yesaya adaviphatisa basa, vikutipfunzisa chani va chifundo cha Yesu? (Yesaya 42:3)
6 Pa utumiki wake, Yesu adaonesa chifundo chikulu kwa wanthu omwe ambadzudziwa. Pakuchita vimwevi, iye adakwanirisa vomwe Yahova wenze adaneneratu pakuphatisa basa mneneri Yesaya. M’Malemba Yachiheberi, wanthu omwe akhulupirira maninge Yahova alinganiziwa na munda womwe uli na miti yakuluyakulu yolimba. (Sal. 92:12; Sal. 61:3; Yer. 31:12) Koma wanthu omwe achitiriwa vinthu viribe chilungamo, alinganiziwa ninge mitete panango ntsanga yophwanyika. Komasoti ninge luju yomwe yakhala pang’ono kudzimwa, kutanthauza vinthu vomwe viribe phindu. (Werengani Yesaya 42:3; Mat. 12:20) Mouziriwa, Yesaya adaphatisa basa vitsanzo mwevi pakufotokoza va chitsanzo chikulu chomwe Yesu adachiwonesa kwa wanthu omwe enze wonyozeka na kwa wanthu omwe ambadziona kuti alibe na basa.
7-8. Ko Yesu adakwanirisa tani vomwe Yesaya adaneneratu?
7 Mateyu adaonesa kuti Yesu adakwanirisa vomwe vidanembewa bukhu ya Yesaya kuti: ‘Ntsanga yophwanyika, adzaityolelini. Ndipo chingwe cha kandyero chomwe chikuchoka utsi adzachidzimwelini.’ Vinango pa vodabwisa vomwe Yesu adachita vidathandiza wanthu womwe ambadzibva ninge ntsanga yophwanyika na wanthu alibe chidikhiro omwe ambadzibva ninge kandyero komwe kakhala pang’ono kudzimwa. Mwakulinganiza, nthawe zinango Yesu adagumana na munthu yemwe ambadwala khate. Ko mwamuna muyu wenze na chidikhiro chakuti angapole nkudzakhala pomwe na azibale panango azishamwali wake? (Luka 5:12, 13) Yesu adagumana pomwe na munthu munango yemwe wenze na bvuto yakubva na yoyankhula. Ko munkuganiza kuti munthu muyu ambabva tani akaona wanthu ankukondwa, ankucheza koma iye osakwanisa kuchita vimwevo? (Maliko 7:32, 33) Yesu adapitiriza pomwe kuchita vinthu vinango.
8 Mu nthawe ya Yesu, Ayuda azinji ambakhulupirira kuti wanthu omwe akudwala na opunduka, ambalangiwa ndawa ya machimo yawo komasoti machimo ya azibereki wawo. (Yoh. 9:2) Ndawa ya chikhulupiriro chophonyeka chawo mwechi, wanthu omwe enze obonera ambapitiriza kunyozewa na wanthu anango ndipo ambadziona kuti alibe na basa. Pakukwanirisa vomwe Yesaya adaneneratu, Yesu adapolesa wanthu mwawo ndipo adawaonesa kuti Mulungu awaganizira. Ko kudziwa vimwevi kungatilimbikise tani?
9. Ko lemba ya Aheberi 4:15, 16 iwonesa tani kuti Nkulu wa Antsembe wathu abvera ntsisi wanthu wochimwa?
9 Werengani Aheberi 4:15, 16. Tingatsimikizire kuti nthawe zose Yesu adzatiwonese chifundo. Ko vimwevi vikutanthauza chani? Mawu ya Chigiriki yomwe adayatsumbudzulira kuti kubvesa pa Aheberi 4:15 yatanthauza kubvera “chifundo” wanthu anango. (Linganizani na Aheberi 10:34, pamwapa mawu ya Chigiriki yabodzibodzi mwaya adayatsumbudzulira kuti: Kuchitira chifundo wanthu anango.) Tikambawerenga Baibolo pa vodabwisa vomwe Yesu adachita, tiona kuti iye wenze na chifundo chikulu kwa wanthu. Iye ambachitalini vimwevi mochichimiziwa. Iye ambawakonda ndipo ambafunisisa kuwathandiza. Mwakulinganiza, pomwe adabwereserewa munthu wakhate iye adakakwanisa kuchita vimwevi ali kutali, koma iye adasalula kuchita kumuphata. Ndipo panango kenze koyamba kuti munthu aphate munthu muyu. Ganizirani pomwe va nthawe yomwe Yesu adapolesa munthu wosabva. Yesu mwachikondi adamutenga munthu muyo nkumuyendesa kumalo komwe kwenze kulibe wanthu. Komasoti Mfalisi munango yemwe alibe kuchitira chifundo nkazi yemwe adasambisa mapazi ya Yesu, nkuyapukuta na tsitsi yake. Pamwapoletu Yesu adamuyinkhira kumbuyo nkazi muyo. (Mat. 8:3; Maliko 7:33; Luka 7:44) Yesu ambachitira chifundo wanthu omwe ambadwala na wale omwe enze adachita machimo yakuluyakulu. Shuwadi, iye ambafuna kuti wanthu mwawa abwere kwa iye ndipo ambawaonesa chikondi chomwe wenze nacho kwa iwo. Tingatsimikizire kuti iye akupitirizambo kutiwonesa chifundo mwechi kwa isepano.
MOMWE TINGATEWEDZERE YESU NTSIKU ZINO
10. Ko tingaphatise basa chani ntsiku zino kuti tithandize wanthu omwe akwanisalini kubva bwinobwino na omwe awonalini bwinobwino? (Onani pomwe mafoto.)
10 Ninge ateweri wa Yesu, tichita vose vomwe tingakwanise kuti timutewedzere pakuonesa chikondi na chifundo. (1 Pet. 2:21; 3:8) Ni shuwadi kuti tikwanisalini kupolesa wanthu omwe akwanisalini kubva na alombe, koma tingawathandize wanthu mwawa kukhala pa ushamwali na Yahova. Mwakulinganiza, vofalisa vathu vigumanika mu viyankhulo voposha 100 mu chiyankhulo chamanja. Ndipo kwa wanthu omwe awonalini bwinobwino, pali vofalisa vomwe viri na manamba yakuluyakulu mu viyankhulo voposha 60, komasoti pakhala mawu yofotokozera mavidiyo yathu mu viyankhulo voposha 100. Vose mwevi vichitiwa pakufuna kuthandiza wanthu wale omwe akwanisalini kubva bwinobwino na wale omwe ali na bvuto yowona kuti akhale pa ushamwali na Yahova na Mwana wake Yesu.
Vofalisa vathu vigumanika mu viyankhulo voposha 1000
Kumanzere: Viyankhulo voposha 100 mu chiyankhulo cha manja
Kumakulu: Mu viyankhulo voposha 60 m’manamba yakuluyakulu
(Onani ndime 10)
11. Ko gulu ya Yahova iwonesa tani chifundo kwa wanthu wose ninge Yesu? (Machitidwe 2:5-7, 33) (Onani pomwe mafoto.)
11 Gulu ya Yahova iyesesa kuthandiza wanthu wa makhaindi yosiyanasiyana. Kumbukirani kuti patsogolo pakuti Yesu wamukisiwa, iye adawapasa mzimu uchena wanthu wose omwe enze adasonkhana pa phwando ya pa Pentekosite kuti akwanise kubva ntontholo wabwino mu “chiyankhulo chawo.” (Werengani Machitidwe 2:5-7, 33.) Pakutewedzera Yesu, gulu ya Yahova ipereka vofalisa mu viyankhulo voposha 1000, ndipo vinango viyankhuliwa na wanthu ang’onong’ono. Mwakulinganiza, viyankhulo vinango kwa América viyankhuliwa na wanthu ang’onong’ono ku sul na ku norte kwa América. Olo nteno, vofalisa vathu kumuku vigumanika mu viyankhulo vokwana 160 kuti wanthu omwe ayankhula viyankhulo mwevi akhale na mwayi wakubva ntontholo wabwino. Vofalisa vathu vigumanika pomwe mu viyankhulo voposha 20 ku Romani. Wanthu azinji omwe ayankhula viyankhulo mwevi akutumikira Yahova.
Kumanzere: Viyankhulo voposha 160 mu chiyankhulo cha Amerendio
Kumakulu: Viyankhulo voposha 20 ku Romani
(Onani ndime 11)
12. Ko gulu ya Yahova ntsiku zino, ichita pomwe chani kuti ithandize wanthu?
12 Kuingizira pakuthandiza wanthu kuti abve ntontholo wabwino, gulu ya Yahova ithandiza pomwe wanthu omwe akugumana na matsoka ya nchilengedwe. Kuti vimwevi vikwanisike, abale azinji adzipereka kuti athandize wanthu omwe akugumana na matsoka ninge mwaya. Gulu ya Yahova ikonza pomwe malo yabwino yakuti wanthu ambasonkhaniremo kuti apfunzire vizinji va chikondi cha Mulungu na kumutumikira.
NKULU WA ANTSEMBE WATHU ANGAKUTHANDIZENI IMWEPO
13. Ko Yesu atithandiza pomwe munjira ziponi?
13 Yesu ninge nyakabusa wabwino, ayesesa kupereka vofunikira kwa aliyese kuti akhale pa ushamwali wolimba na Yahova. (Yoh. 10:14; Aef. 4:7) Momwe vinthu viriri pa moyo wathu, nthawe zinango vingachitise kuti tikhale ninge kandyero komwe kasala pang’ono kudzimwa panango ninge ntsanga yophwanyika. Vingachitike kuti tikhumudwa ndawa yakuti tikudwala matenda yakulu, vophonya vomwe tidachita panango tikubveranalini na m’bale panango mulongo. Ndawa ya matenda panango vokhumudwisa vomwe tikugumana navo, vingatikangise kuona chidikhiro chathu cha kutsogolo. Koma kumbukirani kuti Yesu aona vomwe mukugumana navo ndipo abvesa momwe mukubvera. Ndawa ya chifundo chikulu chomwe iye ali nacho kwa imwepo, iye afunisisa kukuthandizani. Mwakulinganiza, iye aphatisa basa mzimu uchena kuti ukupaseni mphanvu mukakhala wofoka. (Yoh. 16:7; Tito 3:6) Kuingizira pamwapa, Yesu angaphatise basa akulu, abale na alongo kuti atithandize panango kukulimbikisani.—Aef. 4:8.
14. Ko tifunika kuchita chani tikakhala okhumudwa?
14 Mukakhala wokwinyirira, kumbukirani kuti Yesu ni Nkulu wa Antsembe wathu. Ko vimwevi vikutanthauza chani? Kumbukirani kuti Yahova adatumiza Yesu padziko yapasi kuti adzapereke moyo wake ninge malipiro nakuti amuthandize kubvesa mabvuto yomwe wanthu akugumana nayo. Tikakhala okhumudwa ndawa ya vophonya vathu, timbakumbukire kuti Yesu ni wokonzeka kutithandiza “panthawe yake.”—Aheb. 4:15, 16.
15. Nchani chidathandiza m’bale Sitefano kuti abwerere mumpingo?
15 Yesu atsogolera wale omwe ankuyesesa kufagafaga chonadi na kuthandiza wanthu omwe adachoka mugulu ya Yahova. (Mat. 18:12, 13) Onani vomwe vidachitikira Sitefano.b Patsogolo pakuti wakhala magole 12 ali kunja kwa gulu, iye adaganiza voyenda kumisonkhano ndipo iye adati: “Venze voshupa kwa ine, koma nimbafuna kukhala pomwe mu banja yachikondi ya Yahova.” “Akulu adanilimbikisa maninge. Nthawe zinango nimbakhala wokhumudwa maninge ndawa nenze nidasiya kutumikira Yahova. Koma abale adanikumbusa kuti Yahova na Yesu akufuna kuti inepano nipirire. Koma pomwe nidabwerera mumpingo, abale na alongo adanitambira mokondwa pabodzi na banja yangu. Patsogolo pake nkazi wangu adayamba kupfunzira Baibolo, ndipo manjeuno tikutumikira Yahova ninge banja.” Nkulu wa Antsembe wathu akhala wokondwa maninge akaona wanthu omwe alapa akuthandiziwa kuti abwerere pomwe mu gulu ya Yahova!
16. Ndawa chani imwepo mutembeja ndawa yokhala na Nkulu wa Antsembe yemwe akubvesani?
16 Pomwe Yesu wenze pano padziko yapasi, adathandiza wanthu azinji omwe ambafunika thandizo. Ntsiku zino timbatsimikizirembo kuti iye adzatithandize pa vomwe tinkufunikira. Manjemanjepa mudziko inyowani, iye adzathandize wanthu ochimwa kukhala omasuka ku uchimo. Titembeja pomwe maninge Yahova ndawa ya chikondi chomwe adationesa pakutipasa Nkulu wa Antsembe Yesu yemwe atibvesa.
NYIMBO NA. 13 Yesu adatisiyira chitsanzo chabwino
a Kuti mudziwe vizinji va momwe udindo wa Yesu ninge Nkulu wa Antsembe, na momwe udangenera m’malo mwa nkulu wa Antsembe wa Chiyuda, onani nkhani yakuti “tembejani Yahova ndawa ya mwayi wotumikira mu Kachisi wa Uzimu” mu Ntsanja ya Ulonda ya Outubro 2023 tsa. 26, ndi. 7-9.
b Madzina yanango yachinjiwa.