NKHANI YOPFUNZIRA 40
NYIMBO NA. 111 Tinavipfukwa vizinji vokhalira wokondwa
Yahova ni wa “chimwemwe chikulu”
‘ Nidzayende . . . kwa Mulungu, yemwe anikondweresa maninge.’—SAL. 43:4.
CHOLINGA
Kuzindikira chomwe chingatichosere chimwemwe na kuona momwe tingakhalire pomwe wokondwa.
1-2. (a) Ko wanthu azinji achita tani ntsiku zino? (b) Ko tipfunzire chani mu pfunziro ino?
WANTHU azinji ntsiku zino ni wofungiwa m’maso pankhani yofagafaga chimwemwe. Koma pankhani ya kufagafaga kumuku kuoneka ninge kulibe mapeto. Chaivo ni vakuti wanthu azinji ntsiku zino adzibva kukhala okhumudwa komasoti wosakondwa ndipo sikuti atumiki wa Yahova vingawachitikirembolini vimwevi. Pakuti tikukhala “muntsiku zomalizira,” tikudziwa kuti tikufunika kulimbana na vochitika komasoti maganizo yomwe ni yoshupa.”—2 Tim. 3:1.
2 Mu pfunziro ino, tione vinthu vomwe vingatichosere chimwemwe chathu na vomwe tingachite kuti tikhale pomwe wokondwa. Koma tifunika kudziwa komwe chimwemwe chaicho chichokera.
KOMWE CHIMWEMWE CHAICHO CHICHOKERA
3. Ko chilengedwe chitipfunzisa chani va Yahova? (Onani pomwe mafoto.)
3 Yahova nthawe zose ni wokondwa ndipo iye afuna kuti tose timbakhalembo wokondwa. Ndipomwapa tidabwalini kuona chimwemwe cha Yahova nthawe zose mu chilengedwe chake. Khalidwe mwiyi iwonekera bwino mu vinthu vomwe adalenga ninge makhaindi yosiyanasiyana yomwe tiyaona, momwe vinyama visenzekera na chakudya chabwino chizinji chomwe tiri nacho. Mosakaikira Yahova atikonda ndipo afuna kuti nasembo timbakondwe!
Kamwana ka nzowu: Foto © Romi Gamit/Shutterstock; penguim chicks: Vladimir Seliverstov/500px via Getty mafoto; wana wa mbuzi: Rita Kochmarjova/stock.adobe.com; two dolphins: georgeclerk/E+ via Getty mafoto
Masenzeka ya tunyama vionesa kuti Yahova ni wokondwa (Onani ndime 3)
4. (a) Ko Yahova apitiriza tani kukhala wokondwa podiya kuti ankuona mabvuto yazinji mu dziko ino? (b) Ko Yahova watipasa mphaso iponi? (Salimo 16:11)
4 Podiya kuti “ni Mulungu wachimwemwe,” iye awona mabvuto yose yomwe yali mudziko. (1 Tim. 1:11) Koma iye abvumalini kuti vimwevi vimuchitise kuleka kukhala wokondwa. Iye akudziwa kuti mabvuto yose mwaya ni yakanthawe kang’onong’ono. Iye wakhazikisa ntsiku yakuti adzamalise vimwevi. Yahova akupitiriza kudikhira modekha mpakana ntsiku yomwe adzamalisiretu mabvuto yose. Pakudikhira vimwivi, Yahova abvesa vomwe tikugumana navo ndipo afuna kutithandiza. Ko iye achita tani vimwivi? Njira ibodzi ni yakuti iye watipasa chimwemwe. (Werengani Salimo 16:11.) Ni vimwivi vomwe iye adachita na Mwana wake Yesu.
5-6. Ko ni vifukwa viponi vomwe vimuchitisa Yesu kukhala wokondwa?
5 Pa volengewa vose va Yahova, Yesu ndiye wokondwa maninge. Chifukwa chibodzi ni chakuti “iye ni chifaniziro cha Mulungu yemwe awonekalini” ndipo awonesa ndendende makhalidwe ya Ababa wake. (Akol. 1:15) Kuingizira pamwapa, Yesu pa moyo wake adakhala nthawe itali pabodzi na Ababa wake yemwe ni Munichiro wa “chimwemwe.”
6 Yesu ni wachimwemwe ndawa yakuti achita vose vomwe Ababa wake angamukumbire. (Miy. 8:30, 31; Yoh. 8:29) Ndawa yakupitiriza kukhala wokhulupirika mpakana mapeto, iye akondewa na Yahova.—Mat. 3:17.
7. Ko tingagumane tani chimwemwe chaicho?
7 Isembo tingagumane chimwemwe tikakhala paushamwali wolimba na Yahova yemwe ni munichiro wa chimwemwe. Tikambamala nthawe ikulu tinkupfunzira va Yahova na kumutewedzera tidzakhale wokondwa maninge. Tingakhale pomwe wokondwa pakuchita vomwe Yahova atikumbira na kudziwa kuti iye atikonda.a (Sal. 33:12) Ni shuwadi kuti nthawe zinango tikhala okhumudwa. Nthawe zinango tingakhale okhumudwa kanthawe kang’onong’ono koma nthawe zinango tingakhumudwe kwa nthawe ikulu. Ko vimwevi vinkuwonesa kuti Mulungu atikondalini? Neye! Ndise wochimwa ndipo nthawe zinango tibonera, kuwawiwa, kukhumudwa na kushupika koma Yahova abvesa vimwevi. (Sal. 103:14) Naboni tione vinthu vomwe vingatichosere chimwemwe na vomwe tingachite kuti tikhale pomwe wokondwa.
AYI KUBVUMA KUTI CHILICHOSE CHIKUCHOSELENI CHIMWEMWE CHANU
8. Ko mabvuto yomwe tigumana nayo yangatichitise kuganiza chani?
8 Chinthu choyamba: Bvuto yakuthupi. Ko imwepo munkubonera ndawa ya kutsutsiwa, matsoka ya chilengedwe, uphawi matenda panango ndawa ya kukalamba? Nivosashupa kuleka kukhala wokondwa peno tinkugumana na mabvuto ninge mwaya. Makamaka peno tinkukwanisalini kuchita vinango panango palibe chomwe tingachite pa mabvuto mwaya. Baibolo inena mobveka bwino pakunena kuti: ‘Munthu akhalalini okodwa peno ntima wake unkumuwawa.’ (Miy. 15:13) Nkulu munango yemwe adaferewa m’bale wake na azibereki wake kwa magole yanayi adati: “Inepano nidadzibva kuti nili nekhanekha ndipo vimbawoneka ninge kuti palibe munthu aliyese yemwe akufuna kunithandiza. Nthawe zinango nimbabva kuwawiwa maninge ndawa ya mabvuto yazinji yomwe nimbafunika kulimbana nayo. Ndipo nenze nilibe kumala nthawe ikulu na azibereki wangu komasoti m’bale wangu akanati amwalira.” Shuwadi mabvuto yakuthupi yangatichitese kukhala ofoka mwakuthupi na maganizo.
9. Ko nchani chingatithandize kukhala pomwe wokondwa? (Yeremiya 29:4-7, 10)
9 Ko nchani chomwe chingatithandize kuti tiyambe pomwe kukhala okondwa? Chomwe chingatithandize ni kukhala wotembeja na wokhulupirika. Wanthu azinji ayesesa kutichitisa kukhulupirira kuti pa moyo wathu tingakhale okondwa peno tinkugumanalini na mabvuto. Koma vimwevi ni chaivolini. Mwakulinganiza, Yahova adauza Ayuda omwe enze ku ukapolo ku Babulo kuti iwo ambafunika kubvuma moyo wawo unyowani mu dziko ya chilendo na kuchita vose vomwe angakwanise mobverana na mabvuto yomwe ambagumana nayo. (Werengani Yeremiya 29:4-7, 10.) Ko tinkupfunzira chani na vimwevi? Bvumani momwe vinthu viriri pa moyo wanu ndipo tembejani vinthu vabwino vomwe munavo. Kumbukirani kuti Yahova nthawe zose adzakuthandizeni ndipo iye adzakusiyenilini. (Sal. 63:7; 146:5) Mulongo munango dzina yake Effie, yemwe adachita ngozi ndipo akwanisalini kufamba adati: “Nidathandiziwa maninge na Yahova, wanthu wa banja yangu na mpingo. Inepano nimbaganiza kuti ningawonese kuti ndine osatembeja peno ningalambe nthandizo yose mweyi. Inepano nimbafuna kuonesa kuti nitembeja Yahova na abale ndawa ya thandizo yomwe adanipasa.”
10. Ndawa chani tingakhale wokondwa podiya kuti tinkugumana na mabvuto?
10 Isepano tipitiriza kukhala wokondwa olo kuti tinkugumana na mabvuto pa moyo wanthu.b (Sal. 126:5) Ko ndawa chani? Ndawa kukondwa kwathu kuthembalini momwe vinthu viriri pa moyo wathu. Mulongo munango yemwe ni mpainiya dzina yake Maria, adati: “Peno imwepo mungapitirize kukhala okondwa podiya pomwe munkugumana na mabvuto vimwevi vinkutathauzalini kuti imwepo mungalileni panango kuuza munango va mabvuto yanu. M’malo mwa vimwevi vinkutathauza kuti imwepo nthawe zose mukumbukira mapolomisi yomwe Yahova adachita. Ababa wathu angatithandize kupitiriza kukhala wokondwa vilibe basa vomwe tinkugumana navo.” Ayi kuyebwa kuti podiya kuti vinthu vingakhale voshupa maninge manjeuno, mabvuto yose mwaya ni ya kanthawe ninge mapazi panango mtsoka munchenga wa m’nyanja, manjemanje yadzaonekelini pomwe.
11. Ndawa chani chitsanzo cha ntumi Paulo ni cholimbikisa kwa imwepo?
11 Ko tani peno imwepo mwayamba kuganiza kuti munkugumana na mabvuto ndawa yakuti Yahova akukondanilini? Chinthu chibodzi chomwe chingatithandize ni kuganizira va atumiki anango wokhulupirika wa Yahova womwe adagumana na mabvuto yoshupa maninge. Onani chitsanzo cha ntumi Paulo. Iye adasankhuliwa na Yesu chaiye kuti adziwise chonadi “kwa wanthu wa makhaindi yanango komasoti kwa mafumu na Aizirayeli.” (Mac. 9:15) Wenze mwayi ukulu maninge! Koma Paulo adakagumana na mabvuto yazinji maninge. (2 Akor. 11:23-27) Ko Paulo ambagumana na mabvuto mwaya yomwe yambawoneka ninge yamalelini ndawa yakuti Yahova ambamukondalini? Vodziwikilatu kuti ntenolini! Mosiyana na vimwevi, kupirira kwa Paulo kumbaonesa kuti iye ambakondewa na Yahova. (Aro. 5:3-5) Manje ganizirani momwe vinthu viriri pa moyo wanu. Peno imwepo munkupirira mokhulupirika podiya mukugumana na mabvuto, mungakhale wotsimikiza kuti Yahova akuthandizeni ndawa iye akukondani.
12. Ndawa chani vinthu vomwe timbadikhira vikaleka kukwanisika tingakhalelini wokondwa?
12 Chinthu chachiwiri: Vomwe timbadikhira vikaleka kukwanisika. (Miy. 13:12) Chikondi chathu na kutembeja Yahova kutilimbikisa kudziikhira volinga pa utumiki wathu. Koma peno volinga vathu vingaleke kukwanirisika tingakhale wokhumudwa. (Miy. 17:22) Mpaniya munango dzina yake Holly adati: “Inepano nimbafuna kungena Shikola ya Akhirisitu Olalikira va Ufumu, kutumikira madziko yanango, kuphata basa ya chimango ku Ramapo. Koma vinthu pa moyo wangu vidachinja ndipo inepano nidakakwanisalini pomwe kukwanirisa volinga vimwevi. Inepano nidakwinyirira maninge. Vikhala vokhumudwisa maninge ukakhala kuti unavolinga vakuti uchite koma ne kukwanisa.” azinji abvambo teno.
13. Peno momwe vinthu viriri pa moyo wathu vinkutikangisa kuchita vomwe timbafuna, ko ni volinga viponi vomwe tingakhale navo?
13 Ko nchani chomwe chingatithandize kuti tikhale pomwe wokondwa? Kumbukirani kuti Yahova ni Mulungulini yemwe atikakamiza kuchita vinthu vomwe nivoshupa. Iye atiuzalini kuti tichite vinthu vomwe tingakwaniselini ndipo atiikhiralini malire ya vomwe tingakwanise kuchita pakumutumikira. Vomwe Yahova afuna nivakuti tikhale odzichepesa na okhulupirika. (Mika 6:8; 1 Akor. 4:2) Kwa Yahova chofunika maninge ni ntima wathu, maganizo yathu, na makhalidwe yathu osati vinthu vomwe tichita. Manje ko nivobveka kumbaganiza teno pomwe Yahova achitalini vimwevo?c Neye nivosabveka! Peno momwe vinthu viriri pa moyo wanu vinkukukangisani kuchita vomwe mumbafuna kwa Yahova yesesani kuchita vomwe mungakwanise. Ko imwepo mungatherene mulumbwana panango kulimbikisa m’bale wachikulire? Ko tani kukhala na cholinga chakulimbikisa anango pakuchita kuyenda kukamuzungira, kumufonera, panango kumunembera mensaje? Tikambayesesa kuchita vose vomwe tingakwanise, Yahova akhala okondwa maninge ndipo iye atitsimikizira kuti isembo tidzakhalembo wokondwa! Ayi kuyebwa kuti manjemanje apa tikhale na mwayi wotumikira Yahova munjira zomwe timbaziganiziralini. Ninge momwe adanenera Holly, kuti: “Inepano niima na kuganizira kuti inepano nidzakhale na ‘moyo mpakana kalekale.’ Ndipomwapa na thandizo ya Yahova inepano nidzakwanise kukwanirisa volinga vangu vinango mudziko inyowani.”
14. Ko nchani pomwe chingatichosere chimwemwe chathu?
14 Chinthu chachitatu: Kudzikodweresa tekha. Anango aphatisa basa intaneti pakufuna kuonesa kuti tingakhale wokondwa chaivo peno tingambadzikondwerese tekha. Tingayambe kukhulupirira kuti tingakhale wokondwa chaivo peno tichita vose vomwe tikonda kugula, vomwe tinkufuna na kuyenda malo yosiyanasiyana. Vinthu vimwevi ni vophonyekalini. Yahova ankufuna kuti timbakondwe na vomwe iye adalenga. Wanthu azinji omwe adayesa kudzikondweresa okha patsogolo pake adazindikira kuti vomwe ambaganiza kuti vingawabweresere chimwemwe vilibe kukwanisika. Eva yemwe ni mpainiya, adati: “Ukakhala na moyo wodzikondweresa wekha ukhutiralini ndipo undofuna vizinji.” Peno tidzikondweresa tekha nthawe zose tidzakhale okhumudwa na kudziona kuti tilibe na basa.
15. Ko tinkupfunzira chani na Mpfumu Solomo?
15 Mungapfunzire na vomwe vidachitikira Mpfumu Solomo, iye adachita vose kuti adzikodwese yekha. Koma maphindu yake yenzelini yabwino. Adayesesa kuti akhale wokondwa pakuchita vomwe ambafuna ninge kudya chakudya chabwino, kubvesera nyimbo zabwino na kukhala na vinthu va khaindi khaindi vomwe adakagula na kobiri pa nthawe mweyire. Koma vimwevi vidamuchitisa kukhala okhumudwa. Iye adati: ‘Diso ikhutiralini ndawa ya kuona ndipo dzitu idzalalini ndawa yakubva.’ (Mla. 1:8; 2:1-11) Vinthu vomwe wanthu aganiza kuti vingabwerese chimwemwe chaicho viri ninge kobiri ya bodza. Iwoneka ninge yaphindu koma ikwanisalini kuchita vomwe tinkufuna.
16. Ndawa chani kuthandiza anango kungatithandize kukhala wokondwa? (Onani pomwe mafoto.)
16 Nchani chingatithandize pomwe kukhala wokondwa? Yesu adatipfunzisa kuti: “Kupasa kutichitisa kukhala okondwa maninge kuposha kutambira.” (Mac. 20:35) Nkulu munango dzina yake Alekos adati: “Inepano niikhira maninge nzeru kuchitira wanthu anango vinthu ving’onoving’no. Nikambachitira wanthu anango vinthu vabwino, nisiya mwakankulumize kudziganizira nekha, ndipo vimwevi vinichitisa kukhala okondwa.” Manje ko imwepo mungachitire wanthu anango vinthu viponi? Peno imwepo munkudziwa kuti pana munthu munango yemwe ankugumana na mabvuto, yesesani kumuthandiza munthu muyo. Ni shuwadi kuti imwepo mungakwaniselini kumalisa bvuto yake, koma mungamubvesere mwatcheru, kumuonesa chifundo na kumukumbusa kuti ambafotokozere Yahova mabvuto yake. (Sal. 55:22; 68:19) Imwepo mungamuonese munthu muyo kuti ni vabwino maninge kudziwa kuti Yahova alibe kumusiya. (Sal. 37:28; Yes. 59:1) Imwepo mungadzipereke pakumukumbira kuti mumuchitire vinthu vinango ninge kuphika na kuzunga naye pabodzi. Chinthu chinango chomwe chingamukodwerese ni kuyenda naye mu umboni. Bvumani kuti Yahova akuphatiseni basa pakumuthandiza. Tikambaganizira va anango m’malo mwakundodziganizira tekha tikhala wokondwa!—Miy. 11:25.
M’malo mondoganizira vomwe munkufuna, mumbaganizire maninge vomwe anango ankufunika (Onani ndime 16)d
17. Ndawa chani chimwemwe chathu ni chobverana na Yahova? (Salimo 43:4)
17 Isepano tingakhale wokondwa chaivo tikapitiriza kulimbisa ushamwali wathu na Ababa wathu wadzulu. Baibolo ititsimikizira kuti ‘Yahova ndiye chimwemwe chathu chikulu.’ (Werengani Salimo 43:4.) Ndipomwapa, tingadzibve otetezeka vilibe basa mabvuto yomwe tinkugumana nayo pa moyo wathu. Naboni tipitirize kuikha maganizo yathu kwa Yahova yemwe ni Munichiro wachimwemwe chathu chosapera!—Sal. 144:15.
NYIMBO NA. 155 Chimwemwe chathu chosapera”
a Onani bokosi yakuti “fagani Yahova kuti mukhale wokondwa.”
b Mwakulinganiza onani pa jw.org pomwe banja ya Dennis na Irina Christensen inkubvudziwa mu Lipoti ya Bungwe Yotonga #5 2023.
c Kuti mudziwe vizinji, onani nkhani yakuti: “Musadzipanikize, Ndipo Mudzakhala Achimwemwe.” Mu Nsanja ya ulonda ya 15 Julho, 2008.
d MAWU YOFOTOKOZERA FOTO: Mulongo wayenda kukagula vose vomwe ankufuna, koma ankukondwa pomwe ankugula mafololi kuti akapase mulongo wachikulire yemwe ankufunika kulimbikisiwa.