Chikondi cha Mulungu chikhalapo mpakana kalekale

1-2. Ko ni mabvuto yaponi yomwe atumiki wa Yahova agumana nayo?

GANIZIRANI va barko yomwe iri pakati panyanja pomwe pakuchita chimphepo champhanvu. Mabimbi yamphanvu yankugwinya barko nkumbaiyendesa uku na uku. Palibe thandizo ya ndangula, barko mwiyi ingayendesewe komwe mabimbi yafuna. Ndangula ithandiza barko kuti osati ifambisiwe na mabimbi.

² Tikambagumana na mabvuto, tikhala ninge barko mwiyi. Maganizo yathu yakhala kuti yakuyendesewa uku na uku. Ntsiku yoyamba tingambaganize kuti Yahova atikonda komasoti kutisamalira, koma ntsiku inango tingaganize kuti iye aonalini mabvuto yathu. (Sal. 10:1; 13:1) Pamwapo panango pangagumanike shamwali wanu yemwe angakulimbikiseni, ndawa ya vimwivi mungabveko bwino kwa kanthawe. (Miy. 17:17; 25:11) Koma nthawe zinango tingayambe kukaikira pomwe peno Yahova atithandiza pa mabvuto yathu. Nthawe zinango mungafike pakuganiza kuti Yahova wakusiyani. Ko nchani chomwe chingakhale ndangula yathu? Mwa mawu yanango, ko tingatsimikizire tani kuti Yahova atikonda na kutisamalira?

3. Mobverana na Salimo 31:7 na 136:1, ko ‘chikondi chokhulupirika’ ni chani? Ndawa chani tinganene kuti Yahova ni chitsanzo chikulu cha chikondi chokhulupirika? (Onani pomwe foto.)

³ Chinthu chomwe chingakhale ninge ndangula kwa isepano pomwe tinkugumana na mabvuto, ni kukumbukira chikondi chokhulupirika cha Yahova. (Werengani Salimo 31:7; 136:1.) Mawu yakuti: ‘Chikondi chokhulupirika’ yafotokoza va chikondi champhanvu na chokhalisa chomwe munthu akhala nacho kwa munzake. Yahova ni chitsanzo chikulu cha chikondi chokhulupirika. Ndipomwapa, Baibolo inena kuti Yahova ni ‘wodzala na chikondi chokhulupirika.’ (Eks. 34:6, 7) Baibolo inena pomwe va Yahova kuti: ‘Imwepo muonesa chikondi chikulu kwa wose omwe akuchemerani.’ (Sal. 86:5) Ganizirani tanthauzo ya vimwevi: Yahova asiyalini atumiki wake okhulupirika! Kuganizira kuti Yahova ni wokhulupirika, kungakhale ninge ndangula yomwe ingatithandize kukhala wosagunduzika pomwe tinkugumana na mabvuto.—Sal. 23:4.

KUMBUKIRANI KUTI CHIKONDI CHOFOTOKOZEWA M’BAIBOLO NI CHAICHO

4. Perekani vitsanzo va mpfundo zoyambirira za m’Baibolo ndipo fotokozani kuti ndawa chani tisiyalini kuzikhulupirira.

⁴ Njira ibodzi yolimbisira chikhulupiriro chathu pa chikondi cha Yahova, nikukumbukira kuti chikondi chogumanika m’Baibolo mwechi ni chokhulupirika. Ko kwa imwepo mawu yakuti: ‘Chonadi cha m’Baibolo’ yatanthauza chani? Panango imwepo mungaganizire mpfundo zoyambirira za chonadi zomwe mudapfunzira m’mawu ya Mulungu. Mwakulinganiza, imwepo mudapfunzira kuti dzina ya Mulungu ni Yahova, kuti Yesu ni Mwana wa Mulungu wobadwa yekha, kuti wakufa adziwalini chirichose na kuti kudzakhale paradaiso pano padziko yapasi ndipo wanthu adzakhale na moyo wosapera. Sal. 83:18; Mla. 9:5; Yoh. 3:16; Chiv. 21:3, 4) Patsogolo pakuti mwabvuma chonadi mwechi, ni voshupa maninge kuti muleke kukhulupirira. Ndawa chani? Ndawa yakuti imwepo mwabvesa kuti chonadi mwechi ni chaicho. Kukumbukira kuti chikondi cha Yahova ni chonadi cha m’Baibolo chingatithandize kuleka kukhala na maganizo yakuti iye aonalini mabvuto yomwe tigumana nayo na kuti afunalini kutithandiza. Naboni tiwone momwe tingachitire vimwivi.

5. Fotokozani momwe tingalimbanirane na vipfunziso vabodza.

⁵ Ko nchani chomwe chidakuthandizani kulamba vipfunziso vabodza pomwe mudayamba kupfunzira Baibolo? Mosakaika, ni kulinganiza na vomwe imwepo mwenze mudapfunzira kuchipembedzo chanu chakalekale na vomwe Baibolo ipfunzisa. Naboni tiwone chitsanzo: Linganizani kuti imwepo mumbakhulupirira kuti Yesu ni Mulungu wamphanvu yose. Koma pomwe mudayamba kufunzira Baibolo imwepo mudayamba kudzibvunza kuti: ‘Ko vimwevi ni chaivo?’ Patsogolo pakuganizira vomwe Baibolo inena, imwepo mudazindikira kuti ni chaivolini. Pamwapo chipfunziso chabodza mwichi chidangenewa m’malo na chonadi cha m’Baibolo chakuti: Yesu ni “woyamba kubadwa wa chilengedwe chose,” ndipo “ni Mwana wobadwa yekha wa Mulungu.” (Akol. 1:15; Yoh. 3:18) Ni shuwadi kuti vipfunziso vabodza vingakhale ninge “chotikangisa” na voshupa kuchosa. (2 Akor. 10:4, 5) Patsogolo pakuti imwepo mwapfunzira chonadi, mulibe kubwerera pomwe kukhulupirira vipfunziso vabodza vomwe mudasiya kumbuyo.—Afil. 3:13.

6. Ndawa chani imwepo mungatsimikizire kuti ‘chikondi chokhulupirika cha Yahova chidzakhalepo mpakana kalekale’?

⁶ Imwembo mungachite chibodzibodzi pa vomwe Baibolo ipfunzisa pa chikondi cha Yahova. Pomwe imwepo munkugumana na mabvuto, panango mungayambe kumbakaikira va chikondi cha Yahova. Peno nteno, dzibvunzeni kuti: ‘Ko vomwe ninkuganiza ivi vinaphindu?’ Peno munkukayikira, linganizani na mawu ya pa Salimo 136:1—yomwe ni lemba yomwe pachokera msolo wa pfunziro ino. Ndawa chani Yahova anena kuti chikondi chake ni ‘chokhulupirika’? Ko ni ndawa ya mawu yakuti ‘chikondi chake chokhulupirika chikhalapo mpakana kalekale’ yagumanika maulendo 26 mu Salimo mweyi? Ninge momwe taonera, chikondi chokhulupirika cha Yahova kwa wanthu wake ni chonadi cha m’Baibolo. Ninge momwe viriri na mpfundo zinango zoyambirira za chonadi zomwe imwepo mulibe kushupika kuzikhulupirira. Maganizo yakuti Yahova akukondanilini nakuti akuonanilini kuti ndimwe wofunika ni yabodza. Lambani kukhulupirira vimwevi ninge momwe mudakalambira chipfunziso chirichose chabodza!

7. Perekani vitsanzo va m’Baibolo vomwe vititsimikizira kuti Yahova atikonda.

⁷ Baibolo itipasa mpfundo zizinji zomwe zititsimikira kuti Yahova atikonda. Mwakulinganiza, Yesu adauza opfunzira wake kuti: “Imwepo ndimwe ofunika maninge kuposha mpheta zizinji.” (Mat. 10:31) Komasoti Yahova chaiye adauza wanthu wake kuti: ‘Nikulimbise, shuwa, nikuthandize, nikuphate mwamphanvu na djanja yangu yamakulu yachilungamo.’ (Yes. 41:10) Ganizirani momwe mawu mwaya yatitsimikizirira. Yesu alibe kunena kuti: ‘Panango ndimwe ofunika kuposha mpheta zizinji,’ ndipo Yahova alibe kunena kuti: ‘Panango nikuthandize.’ M’malo mwa vimwevi, iwo adati: “Imwepo ndimwe ofunika maninge” ndipo ‘nikuthandizeni.’ Pomwe mukugumana na mabvuto nkuyamba kukaikira va chikondi cha Yahova, malemba ninge mwaya yangakuthandizeni imwepo. Osati kundobva kuti Yahova akukondani, koma mufunika kudziwa na kukhulupirira vimwevi. Mpfundo mwizi ni chaizo. Kupemphera na kuganizira vimwevi, imwepo mungadzafike pakunenambo mawu ya pa 1 Yohani 4:16 yomwe yanena kuti: “Isepano tinkudziwa ndipo tikhulupirira kuti Mulungu atikonda.”a

8. Ko imwepo mungachite tani peno munkukaikira kuti Yahova akukondani?

⁸ Manje tani peno mukupitiriza kukaikira kuti peno Yahova akukondani? Linganizani momwe imwepo mukubvera na vomwe mudziwa. Ni nthawelini zose pomwe tingathembe maganizo yathu, koma nthawe zose tingathembe mpfundo za m’Baibolo. Mwakuti vomwe Baibolo ipfunzisa vakuti Yahova atikonda ni chaivo. Kuganiza kuti Yahova akukondanilini ni kunyalanyaza khalidwe yake ikulu yomwe ni chikondi.—1 Yoh. 4:8.

GANIZIRANI CHIKONDI CHA YAHOVA “KWA IMWEPO”

9-10. Ko mawu ya Yesu yogumanika pa Yohani 16:26, 27 yakuti: “Ababa mwawo akukondani,” yakutanthauza chani? (Onani pomwe foto.)

⁹ Tingapfunzire vizinji va chikondi cha Yahova tikambaganizira vomwe Yesu adauza opfunzira wake kuti: “Ababa mwawo akukondani.” (Werengani Yohani 16:26, 27.) Yesu alibe kunena mawu mwaya pakundofuna kukondweresa opfunzira wake. Tikambawerenga nkhani ya mawu mwaya, tiona kuti Yesu ambayankhula va pemphero.

¹⁰ Yesu wenze adamaliza kuuza opfunzira wake kuti iwo ambafunika kupemphera kupitira mwa iye osati kupemphera kwa iye. (Yoh. 16:23, 24) Venze vofunika kuti iwo adziwe vimwevi. Patsogolo pakuti Yesu wamukisiwa, panango opfunzira wake adakafuna kumbapemphera kwa Yesu ndawa iwo enze adakhala azishamwali wake. Iwo adakakaganiza kuti, pakuti Yesu ambawakonda maninge iye abve vomwe angamukumbire na kuti adakakumbira Ababa wake kuti awathandize. Koma Yesu adanena kuti ambafunikalini kuganiza teneuyo. Ndawa chani? Yesu adati: “Ababa mwawo akukondani.” Mpfundo mwiyi ni mbali ya chonadi choyambirira cha m’Baibolo pankhani ya pemphero. Ko vimwevi vikutanthauza chani kwa imwepo? Imwembo mudapfunzira va Yesu ndipo adakhala shamwali wanu. (Yoh. 14:21) Koma ninge opfunzira wale, imwepo mungambapemphere kwa Mulungu motsimikiza, uku mukutsimikiza kuti Ababa mwawo “akukondani.” Nthawe zose pomwe imwepo mwapemphera kwa Yahova, muonesa kuti mukhulupirira mawu mwaya.—1 Yoh. 5:14.

ZINDIKIRANI VOMWE VIKUCHITISANI KUKAIKIRA

11. Ndawa chani Satana akhala wokondwa tikambakaikira va chikondi cha Yahova?

¹¹ Ko ni chani chomwe chinichitisa kukaikira va chikondi cha Yahova? Panango imwepo munganene kuti ni Satana, ndipo mwevi ni chaivo. Satana “akufuna kutidya” ndipo iye akhala wokondwa maninge peno tingayambe kukaikira va chikondi cha Yahova. (1 Pet. 5:8) Ndipo ni chikondi cha Yahova chomwe chidachitisa kuti apereke mwayi wa ntsembe ya Yesu. Ndipo Satana afuna kuti timbaganize kuti tifunikalini ntsembe mwiyi. (Aheb. 2:9) Manje ko ni mbani yemwe angawine tikambakaikira va chikondi cha Yahova? Ni Satana. Ndipo ni mbani yemwe angakhale wokondwa ndawa yosiya kutumikira Yahova ndawa yokhumudwa? Ni Satana basi. Koma onani vochitisa manyazi ivi: Ni Satana yemwe adaluza chikondi cha Yahova. Kundoti ni ibodzi ya misampha yake, “iye atichitisa kumbaganiza” kuti ndisepano omwe tiluza chikondi cha Yahova. (Aef. 6:11) Tikazindikira vomwe mzondi wathu akuyesesa kuchita, tikhala otsimikiza kupitiriza “kutsutsa Ndyerekezi.”—Yak. 4:7.

12-13. Ndawa chani uchimo womwe tidatengera, utichitisa kumbakaikira va chikondi cha Yahova?

¹² Koma kukaikira va chikondi cha Yahova kungabwere pomwe mwa njira inango. Manje ko ni mwanjira yanyi? Ndawa ya uchimo womwe tidatengera. (Sal. 51:5; Aro. 5:12) Uchimo udatifutusa kwa Mulengi wathu. Uchimo udachitisa pomwe kuti thupi yathu, maganizo yathu na ntima wathu vikhale vochimwa.

¹³ Uchimo utiboneresa m’maganizo ndipo tidzibva kuti tinamulandu, tikhala na nkhawa, tidzibva kukhala wosatetezeka komasoti tikhala na manyazi. Vimwevi vingachitike peno isepano tachita chimo komasoti vingachitike ndawa yakuti nthawe zose tikukumbukira kuti tiribe ungwiro. Ni vinthu vomwe ni vosiyana na vomwe Mulungu ambafuna pomwe adatilenga. (Aro. 8:20, 21) Ninge momwe viriri kuti karo ikamala mathayera iphatalini bwino basa, isepanombo ndawa ya uchimo tikwanisalini kuchita vinthu ninge momwe tidalengerewa. Ndipomwapa, ni vosadabwisa kuti nthawe zinango tirimbana na maganizo yokaikira va chikondi cha Yahova. Vimwevi vikachitika, tifunika kukumbukira kuti Yahova ‘ni . . . Mulungu nkulu na wochitisa mantha.’—Neh. 1:5.

14. Ko kuganizira va ntsembe kungatithandize tani kutsimikizira kuti Yahova atikonda? (Aroma 5:8) (Onani pomwe bokosi yakuti: “Dzitetezeni ku ‘mphanvu yonamiza ya uchimo.’”)

¹⁴ Ni shuwadi kuti nthawe zinango tingambadzibve kuti ndiselini woyenerera kukondewa na Yahova. Ndipo kunena chaivo, ndisedilini oyenerera ndipo vimwevi ndivo vomwe vichitisa chikondi mwichi kukhala chapadera maninge. Olo nteno, ndawa ya chikondi, Yahova adapereka ntsembe Yesu kuti atikhululukire machimo yathu. (1 Yoh. 4:10) Kumbukirani pomwe kuti Yesu adabwera kudzapulumusa wanthu ochimwa, osati waungwiro. (Werengani Aroma 5:8.) Palibe munthu aliyese yemwe angakwanise kuchita vinthu mwaungwiro, ndipo Yahova adikhiralini vimwevi kwa isepano. Tikabvesa kuti uchimo ungatichitise kuyamba kukaikira kuti Yahova atikonda, tikhala otsimikiza kulimbana na kukaikira muku.—Aro. 7:24, 25.

SALULANI KUPITIRIZA KUKHALA OKHULUPIRIKA

15-16. Tikapitiriza kukhala okhulupirika kwa Yahova, ko tingakhale otsimikira va chani ndipo ndawa chani? (2 Samueli 22:26)

¹⁵ Yahova akufuna kuti tichite vosalula vabwino ndipo afuna kuti tipitirize kukhala ‘okhulupirika kwa iye.’ (Deut. 30:19, 20) Tikachita vimwivi, tingakhale otsimikiza kuti iye apitirize kukhala wokhulupirika kwa isepano. (Werengani 2 Samueli 22:26.) Tikakhala okhulupirika kwa Yahova, tingamuthembe kuti iye adzatithandize pa bvuto iriyose yomwe ingabwere pa moyo wathu.

¹⁶ Ninge momwe taonera, tinavifukwa vizinji vopitiriza kukhala okhulupirika pomwe tinkugumana na mabvuto. Ninge barko yomwe ikugunduzikalini ndawa ya ndangula, isepano tidziwa kuti Yahova atikonda ndipo adzatithandize. Ni vimwevi vomwe Baibolo ipfunzisa. Peno nthawe inango tingakaikire chikondi cha Yahova, tingakumbukire vinthu vomwe tikudziwa pa nkhani ya chikondi cha Yahova, m’malo mwakuthemba momwe tikubvera nthawe mwiyo. Tinkufuna kupitiriza kutsimikizira va chonadi cha m’Baibolo na kuti chikondi chokhulupirika cha Yahova chidzakhalepo mpakana kalekale ninge momwe Baibolo ifotokozera.