NKHANI YOPFUNZIRA 31
NYIMBO NA. 111 Tili Ndi Zifukwa Zambiri Zokhalira Osangalala
Ko “mwapfunzira chintsintsi chokhala” wokhutira?
“Ndawa yakuti napfunzira kukhala wokhutira na vomwe ninavo, vilibe basa momwe vinthu viliri pa moyo wangu.”—AFIL. 4:11.
CHOLINGA
Tipfunzire vomwe tingachite kuti tikhale okhutira na vomwe tinavo, kutembeja, kukhala wodzichepesa na kumbaganizira va chidikhiro chathu chakutsogo.
1. Ko kukhala okhutira na kusakhala okhutira kutanthauza chani?
KO NDIMWE wokhutira na vomwe munavo? Munthu yemwe ni wokhutira akhala wokondwa komasoti wa ntendere ndawa yoganizira va madaliso yomwe anayo manjeuno. Iye akalipalini panango kukhala wokhumudwa ndawa ya vinthu vomwe alibe. Ndipomwapa, kukhala wokhutira kuthembalini kukhala na vinthu vose pa moyo. Kuingizira mwapa, Mkhrisitu afaga njira zomwe zingamupase mwayi wochita vizinji pakutumikira Yahova. (Aro. 12:1; 1 Tim. 3:1) Olo nteno, iye akhumundwalini olo kuti utumiki womwe ankudikhira alibe kuwutambira mwakankulumize.
2. Ko ndawa chani kukhala wosakhutira ni ngozi ikulu?
2 Kusakhutira na vomwe tinavo kungabweresa mabvuto yazinji maninge. Wale omwe akhutiralini na vinthu vomwe anavo, angambaphate basa nthawe ikulu maninge na cholinga chakuti akhale na vinthu vomwe ankufuna pa moyo wawo olo vichikhala kuti ni vosafunika maninge. Chobvesa ntsisi chakuti, Akhrisitu anango mpakana aba kobiri na vinthu vinango vomwe iwo ankufuna. Iwo pawokha panango angambadziwuze kuti: ‘Inepano ninkudekana vimwevi,’ ‘nadikhira kwa nthawe ikulu.’ Panango angaganize kuti nidzabwezere kobiri mwezi nthawe zinango.’ Olo nteno, kuba kwa ntundu uliwose kunyozesa dzina ya Yahova ndipo akodwalini navo. (Miy. 30:9) Anango akhumudwa ndawa yosatambira mwayi wa utumiki womwe ankuufuna, ndipo afika posiya kutumikira Yahova. (Agal. 6:9) Ko ntumiki wodzipereka kwa Yahova angachite vimwevi? Panango bvuto ingakhale yakuti munthu muyo waleka kukhala wokhutira na vomwe anavo.
3. Ko ni chilimbikiso chiponi chomwe tichigumana pa lemba ya Afilipi 4:11, 12?
3 Tose isepano tingakhale okhutira na vinthu vomwe tinkuchita. Ntumi Paulo adanemba kuti: “Napfunzira kukhala wokhutira na vomwe ninavo, vilibe basa momwe vinthu viriri pa moyo wangu.” (Werengani Afilipi 4:11, 12.) Iye adanemba mawu mwaya ali mu djeri. Olo nteno, iye wenze alibe kuluza chimwemwe chake. Wenze adapfunzira “chintsintsi chokhala wokhutira.” Tikachita khama kuti tikhale okhutira na vomwe tinavo, mawu ya Paulo na vomwe adagumana navo vingatitsimikizire kuti isembo tingakhale ninge iye. Tidekanalini kudikhira kuti mwachibadwa tingakhale wokhutira na momwe vinthu viriri pa moyo wathu. Koma tidekana kuchita kupfunzira kukhala okhutira. Ko tingachite tani vimwevi? Naboni tikambirane makhalidwe yomwe yangatithandize kupfunzira kukhala okhutira.
KHALANI OTEMBEJA
4. Ko kukhala na khalidwe yotembeja kungatithandize tani kukhala okodwa? (1 Atesalonika 5:18)
4 Munthu wa khalidwe yotembeja akhala wokhutira. (Werengani 1 Atesalonika 5:18.) Mwakulinganiza, peno titembeja vinthu vomwe tinavo pa moyo wathu, tikhalalini otangwanika maninge kufaga vinthu vizinji. Tikambaganizira mwachidwi utumiki womwe tinawo manjeuno, tiyesesa kuchita vomwe tingakwanise pa utumiki wathu m’malo mofunisisa kutambira utumiki unango. Ndipomwapa, malemba yatilimbikisa kuti timbatembeje m’mapemphero yathu. Tikakhala na khalidwe yotembeja, tidzakhale na “ntendere wa Mulungu womwe wanthu angakwaniselini kuubvesa.”—Afil. 4:6, 7.
5. Ko ndawa chani Aizirayeli ambadekana kukhala otembeja? (Onani pomwe foto.)
5 Ganizirani vomwe vidachitikira Aizirayeli. Kwa maulendo yazinji iwo ambadandaulira Yahova kuti alibe chakudya chomwe iwo ambadya ku Iguputo. (Num. 11:4-6) Ni shuwadi kuti moyo wenze woshupa nchipululu. Manje ko nchani chomwe chidakawathandiza kukhala okhutira? Iwo ambadekana kuganizira komasoti kutembeja vomwe Yahova wenze adawachitira. Ku Iguputo komwe ambaphatisiwa basa ninge akapolo, Yahova adalanga wanthu angawakhawulisa wale na miliri 10. Patsogolo pakuti Aizirayeli wamasuliwa, iwo ‘adakumbira Aiguputo’ vinthu va siriva, ouro komasoti vovala. (Eks. 12:35, 36) Pomwe Aiguputo adalondola Aizirayeli mpakana pa Nyanja Ifuwira, Yahova modabwisa adagawa madzi. Ndipo pomwe angafamba nchipululu, iye ambawapasa mana ntsiku iriyose ninge chakudya. Manje ko bvuto ya Aizirayeli yenze iponi? Iwo ambakondwalini, osati ndawa yakuti enze alibe chakudya chomwe ambafuna koma ndawa yakuti ambatembejalini vinthu vomwe enze navo.
Ko ndawa chani Aizirayeli adakhala osakondwa? (Onani ndime 5)
6. Ko ni njira ziponi zomwe tingakulisire khalidwe yotembeja?
6 Ko manje ni chani chomwe chingakuthandizeni kukhala na ntima wotembeja? Chakuyamba, patulani nthawe ntsiku iriyose kuganizira vinthu vabwino vomwe munavo. Imwepo munganembe vinthu viwiri panango vitatu vomwe munkutembeja. (Maliro. 3:22, 23) Chachiwiri, onesani kutembeja kwanu. Khalani woyamba kutembeja wanthu anango pa vinthu vabwino vomwe akuchitirani. Kuposha vose, tembejani Yahova nthawe zose. (Sal. 75:1) Chachitatu, salulani azishamwali wa pa ntima wale omwe ni otembeja. Imwepo, mungakwanise kutengera khalidwe yotembeja, ninge momwe viriri vosashupa kuti munthu atengere khalidwe yosatembeja kwa azinzake. (Deut. 1:26-28; 2 Tim. 3:1, 2, 5) Tikambachita khama kuti tionese khalidwe yotembeja, vitithandiza maninge kuti tileke kukhala na maganizo yosakhutira.
7. Ko Aci adachita tani kuti akhale na khalidwe yotembeja, ndipo phindu yenze iponi?
7 Ganizirani vomwe vidachitikira Aci, yemwe akhala ku Indonésia. Iye adanena kuti: “Pa nthawe ya Koronaviru, nidayamba kulinganiza momwe vinthu venzere kwa inepano na momwe venzere na Akhrisitu anzangu. Ndipo vomwe vidachitika nivakuti nidayamba kukhala wosakhutira.” (Agal. 6:4) Ko chidamuthandiza nchani kuti achinje? Iye adanena kuti: “Nidayamba kuganizira va madaliso yomwe nimbatambira ntsiku iriyose na kuganizira vinthu vizinji vabwino vomwe nenze nidagumana ndawa yochita mbali ya gulu ya Mulungu. Ndawa ya vimwevi nidayamba kutembeja Yahova. Ndipo vomwe vidachitika nivakuti, nidayamba kukhala wokondwa maninge.” Peno imwepo mutembejalini vinthu vomwe munavo, ko mungachite tani kuti mukhale na ntima wotembeja?
PITIRIZANI KUKHALA WODZICHEPESA
8. Ko nchani chidachitikira Baruki?
8 Baruki yemwe wenze mulembi wa mneneri Yeremiya, kwa kanthawe adayamba kukhala wosakhutira na vomwe wenze navo. Baruki wenze na basa yoshupa yothandiza Yeremiya kupereka ntontholo kwa Aizirayeli omwe enze osatembeja. Koma pa nthawe inango iye adayamba kuganizira vofuna vake m’malo mwakuti ambayikhire nzeru vinthu vomwe Yahova ambafuna kuti achite. Pakuphatisira basa Yeremiya, Yahova adauza Baruki kuti: ‘Iwepo unkudzifagira vinthu vizinji maninge. Leka kufaga vinthu vimwevi.’ (Yer. 45:3-5) Mwa mawu yanango iye ambanena kuti: “Khala wokondwa na vomwe unavo manjeuno.” Baruki adabvera malangizo mwaya ndipo adapitiriza kukhala wobvumizika kwa Yahova.
9. Mobverana na lemba ya 1 Akorinto 4:6, 7, ko kudzichepesa kutithaniza kudziwa chani? (Onani pomwe mafoto.)
9 Nthawe zinango Mkhrisitu angaganize kuti ana mwayi wotambira utumiki unango. Iye angakhale waluso, wakhama pa basa panango wodziwa vinthu vizinji. Nthawe zinango iye angakhale kuti adziwa vinthu vose vitatu mwevi. Koma vingachitike kuti nthawe zinango anango angatambire udindo womwe iye ankuwufunisisa. Nchani chomwe chingamuthandize kuti aleke kukwinyirira? Iye angaganizire vomwe ntumi Paulo adanemba pa lemba ya 1 Akorinto 4:6, 7. (Werengani.) Utumiki uliwose womwe tingatambire na luso yomwe tinayo, vichokera kwa Yahova. Iye atipasalini vinthu vimwevi ndawa yakuti ndise wapadera kuposha anango. Vose mwevi titambira ndawa ya kukoma ntima kosapera kwa Yahova.—Aro. 12:3, 6; Aef. 2:8, 9.
Mphaso iriyose yomwe tinayo ni ndawa ya kukoma ntima kukulu kwa Yahova (Onani ndime 9)b
10. Ko tingakulise tani khalidwe yodzichepesa?
10 Tingakulise khalidwe ya kudzichepesa tikambaganizira maninge chitsanzo chomwe Yesu adatipasa. Ganizirani kuti Yesu adasambika mapazi ya atumi wake olo kuti ambadziwa kuti ni mwana wa Mulungu. Ntumi Yohani adanemba kuti: ‘Yesu ambadziwa kuti [1] Ababa adapereka vinthu vose m’manja mwake [2] adabwera kuchokera kwa Mulungu [3] ambayenda kwa Mulungu. . . Koma iye adayamba kusambika mapazi ya wopfunzira.’ (Yoh. 13:3-5) Yesu adakaganiza kuti opfunzira wake ndiwo enze wodekana kusambika mapazi yake. Koma pa moyo wake ali pano pa dziko yapasi, alibe kuganizirako vokhala na moyo wabwino panango vinthu vizinji. (Luka 9:58) Yesu wenze wodzichepesa ndipo wenze wokondwa. Iye adatisiyira chitsanzo chabwino maninge.—Yoh. 13:15.
11. Ko kudzichepesa kudathandiza tani Dennis kukhala wokondwa?
11 Dennis yemwe akhala ku Holanda, adayesesa kutengera khalidwe yodzichepesa ya Yesu. Koma venze voshupa. Iye adanena kuti: “Nthawe zinango niona kuti makhalidwe yodzikuza komasoti yosakhutira yanibwerera makamaka peno munthu watambira utumiki unango. Vimwevi vikachitika nikonda kuwerenga nkhani zomwe zinena va kudzichepesa. Mu aplicativo ya JW Library, nidaikha chizindikiro malemba yanango yomwe yanena va kudzichepesa kuti nimbakwanise kuyagumana mosashupa. Nidabashari pomwe nkhani zinango zomwe zinena va kudzichepesa, ndipo nikonda kuzibvesera kawirikawiri.a Napfunzira kuti basa zose zomwe tichita, tichita kuti tipereke ulemerero kwa Yahova osati kwa isepano. Aliyese ankuyesesa kuchita vomwe angakwanise kuti athandizire basa ya Yahova pa vomwe ankuchita.” Peno mwayamba kukhala osakhutira na momwe vinthu viriri pa moyo wanu, yesesani kukulisa khalidwe yodzichepesa. Vimwevi vidzakuthandizeni kuti mulimbise ushamwali wanu na Yahova komasoti kuti mukhale okondwa.—Yak. 4:6, 8.
MBAGANIZIRANI VA CHIDIKHIRO CHANU
12. Ko ni chidikhiro chiponi cha kutsogolo chomwe chitithandiza kukhala okondwa? (Yesaya 65:21-25)
12 Tikhala okondwa maninge tikambaganizira va chidikhiro chathu cha kutsogolo. Mawu ya Yahova yomwe yadanembewa na mneneri Yesaya, yankuonesa kuti Yahova ankudziwa momwe moyo uliri ntsiku zino, ndipo yatilimbikisa kuti Yahova adzachose mabvuto mwaya. (Werengani Yesaya 65:21-25.) Tidzakhale m’nyumba zotetezeka komasoti zabwino. Tidzakhale na basa zaphindu ndipo tidzadye vakudya vopasa thanzi komasoti vokoma. Tidzachiterini pomwe mantha na ngozi zomwe zingatichitikire panango kuchitikira wana wathu. (Yes. 32:17, 18; Ezek. 34:25) Tsogolo yathu ni yabwino komasoti idzakwanirisike.
13. Ko ni pa vochitika viponi pomwe tingadekane kumbakumbukira va chidikhiro chathu?
13 Manjeuno kuposha kale, tinkudekana kuganizira maninge va chidikhiro chathu. Ko ndawa chani? Ni ndawa yakuti tinkukhala mu “ntsiku zomalizira.” Ndipo tose isepano tinkugumana na mabvuto yomwe ni yoshupa maninge. (2 Tim. 3:1) Yahova atithandiza nthawe zose kupirira, atipasa malangizo, mphanvu na thandizo yomwe tinkudekana. (Sal. 145:14) Kuingizira mwapa, chidikhiro chomwe tinacho chingatithandize kuti tikwanise kulimbana na mabvuto. Panango imwepo mushupika kuti mugumane vosowa va banja yanu. Ko vimwevi vinkutanthauza kuti mudzakhale osauka mpakana kalekale? Neye. Yahova adapolomisa kukupasani vomwe munkudekana ndipo adzakupaseni vizinji m’Paradaiso. (Sal. 9:18; 72:12-14) Panango imwepo munkulimbana na matenda yosamala, nkhawa panango bvuto ikulu ya thanzi. Ko mudzakhale munkubonera na vinthu vimwevi basi mpakana kalekale? Neye. Matenda na impfa, vidzamale mu dziko inyowani. (Chiv. 21:3, 4) Chidikhiro mwechi chitithandiza kukhala okondwa, nkuleka kumbandokhala okalipa na kumbandokhala owawiwa ntima nthawe zose. Tingapirize kukhala okondwa pomwe tinkulimbana na vinthu vosowa chilungamo panango pomwe tinkulimbana na matenda. Ko ndawa chani? Ndawa yakuti tinkudziwa kuti “mabvuto yomwe tinkugumana nayo ni yakanthawe” basi. Nakuti dziko inyowani idzabwerese ntendere mpakana kalekale.—2 Akor. 4:17, 18.
14. Ko tingalimbise tani chidikhiro chathu?
14 Ndawa yakuti chidikhiro chathu cha kutsogolo chitithandiza kukhala okondwa, ko tingachilimbise tani? Ninge momwe viriri kuti munthu angadekane kuchita kuvala magirazi kuti akwanise kuona bwinobwino chinthu chomwe chiri patali, isembo tingadekane kuchita vinthu vodekana maninge kuti tilimbise chidikhiro chathu nakuti timbakwanise kuona bwinobwino Paradaiso. Tikakhala na nkhawa ndawa yakuti tina kobiri zing’onong’ono, tingadekane kumbaganizira momwe moyo udzakhalire pa nthawe yomwe tidzafunikelini pomwe kobiri, komasoti pa nthawe yomwe tidzakhalelini pomwe osauka. Tikakhala okhumudwa ndawa yakuti tinkutambiralini utumiki womwe tinkufuna, tingambaganizire pomwe momwe moyo udzakhalire mu dziko inyowani, ndipo kuchita vimwevi kungatithandize kuona kuti utumiki ni wosafunika maninge tikaulinganiza na nthawe yomwe tidzakhale waungwiro, nkumbatumikira Yahova kwa magole mamidyayu yazinji. (1 Tim. 6:19) Pakuyamba tingambaone kuti ni voshupa kumbaganizira vinthu va kutsogolo, m’malo mwakuganizira momwe vinthu viriri pa moyo wathu manjeuno. Koma kuyenda kwa nthawe tikambaganizira vinthu vomwe Yahova watipolomisa ku tsogolo, tidzaone kuti ni volimbikisa maninge.
15. Ko mwapfunzira chani na vomwe Christa adanena?
15 Onani momwe chidikhiro chidathandizira Christa, yemwe tamutomola kumayambiriro kule. Iye adanena kuti: “Nina matenda ya m’mafupa yomwe yanichitisa kuti nthawe zose nimbaphatise basa kanjika ka olemala, ndipo ntsiku zose nimala nthawe zizinji niri gone. Nibva kuwawiwa ntsiku iriyose. Manjemanjepa, mfulumero wangu adaniuza kuti tsogolo yangu niyabwinolini. Koma ninkuona kuti iye ankuona tsogolo mosiyana na inepano. Niganizira maninge va chidikhiro changu, ndipo vinipasa ntendere wa muntima. Manjeuno nidekana kulimbana na mabvuto yazinji ya mu dziko iyi, koma nidzakondwe maninge na moyo wabwino mu dziko inyowani.”
‘WALE OMWE AMUGOPA ADZASOWELINI KANTHU’
16. Ko ndawa chani Mpfumu Davide adafika pakunemba kuti ‘wale omwe agopa Yahova adzasowelini kanthu’?
16 Olo kuti ntumiki wa Yahova ni wokondwa, agumana na mabvuto. Olo Mpfumu Davide adaferewambo wana wake atatu. Wanthu anango adamuimba mulandu, kuchitiriwa vinthu vosowa chilungamo na kufagiwafagiwa kwa magole yazinji kuti amuphe. Olo nteno, pomwe iye ambagumana na mabvuto mwaya, adanena kuti: ‘Ose omwe amugopa adzasowelini kanthu.’ (Sal. 34:9, 10) Ndawa chani iye adanena vimwevi? Olo kuti ise wanthu wa Yahova tingadikhirelini moyo womwe ulibe mabvuto ntsiku zino, tina chitsimikizo chakuti tidzasowelini vinthu vomwe tinkudekana. (Sal. 145:16) Ndipo tingathembe Yahova kuti adzatithandize pa mabvuto yathu yose. Ndipo nivokwanisika kukhala okondwa.
17. Ko ndawa chani ndimwe wotsimikiza kupfunzira chintsintsi chokhala wokhutira?
17 Yahova ankufuna kuti imwepo mumbakhale okondwa. (Sal. 131:1, 2) Ndipomwapa, mudekana kuchita khama kuti mupfunzire chintsintsi chokhala okondwa. Mukachita khama kuti mukhale na khalidwe yotembeja, na kukhala wodzichepesa komasoti kulimbisa chikhulupiriro chanu mungafike pakunena kuti: ‘Inde, ndinedi wokondwa.’—Sal. 16:5, 6.
NYIMBO NA. 118 “Tiwonjezereni Chikhulupiriro”
a Mwakulinganiza, nyang’anirani pa jw.org pologalama ya kupemphera kwa machibese ya msolo wakuti Jeová Cuida dos Humildes na yakuti O Orgulho Vem Antes da Queda.
b MAWU YOFOTOKOZERA FOTO PA Tsamba 23: M’bale ankukonza pomwe vinthu vodzongeka va gulu yathu. Mulongo yemwe adapfunzira chiyankhulo chamanja ankuchita chitsanzo pa nsonkhano wadera. M’bale ankukamba nkhani pa nsonkhano wa mpingo.