“Nkondo ni ya Yahova”

Vose vidayamba kumapeto kwa magole ya 1990. Boma yaku França, yenze idalamula mosowa chilungamo kuti Beteli yaku moku imbalipire kobiri za ntsonkho kuchokera pa vopereka vomwe Beteli imbatambira kundochokera mu 1993 mpaka 1996. Tidayesa kukambirana va nkhani mweyi na thandizo ya maboma yaku França koma viribe kuthandiza. Patsogolo pakuti taluza apilo ya mulandu moyu, boma idatitengera kobiri zoposha 4,5 midyau kobiri za kwa América, ndipo zoposha (11 midyau kobiri ya ku Brazil), zochekera ku ofesi ya nthambi. Apa manje, timbandodikhira thandizo kuchokera ku tiribunali ikulu yaku Europa. Koma tikalibe kuchita vimwevi, adatikumbira kuti tigumane na boma ibodzi yowona va malamulo, na nkulu m’bodzi woimira boma. Cholinga chenze chakuti peno tingakwanise kumalisa nkhani mweyo ikanati yayenda patali.

Timbandoganiza kuti woimira boma moyu akatichichimize kumalisa nkhani mweyi pa kundopereka kobiri zinango zomwe boma imbafuna. Koma tenze otsimikiza muntima kuti olo kundopagali 1 euro kobiri ya kwa América, vingabverane lini na mpfundo za m’Baibolo. Abale na alongo, wenze adachita vopereka mwevi na cholinga chakuti basa ya Ufumu iyende patsogolo. Ndipomwapa, kobiri zimwezi zenzeli za boma neye. (Mat. 22:21) Koma ndawa yofuna kubvera lamulo ya boma, tidabvuma kuyenda ku nsonkhano moyu.

Tidasonkhana mu chipinda chinango chokhuza cha nyumba ya boma. Koma pakuyamba, timbabvesesanalini. Nkulu woimira boma ya Europa, wenze adayamba kunena kuti Wamboni za Yahova, adekana kupagali kobiri za ntsonkho zomwe boma ya França yenze idanena. Mwadzidzi tidakhala na chifuno chofuna kubvunza mbvunzo ubodzi basi. Mbvunzo wake wenze wakuti: “Ko imwepo munkudziwa kuti boma yatenga kale kobiri zathu zokwana 4,5 midyau?”

Nkulu woimira boma moyu adadabwa maninge na vimwevi. Pomwe gulu ya malamulo idatsimikizira vomwe iwo wenze adachita, iye adachinjiratu maganizo yake pa nthawe mweyi. Iye adawakalipira ndipo adamalisiratu nsonkhano nthawe imweyo. Nidazindikira kuti Yahova waimalisa nkhani mweyi munjira yomwe timbaidikhiralini. Tidachoka pa nsonkhano moyu tiri okondwa maninge. Ndipo timbakwanisalini kubvesa vomwe venze vidachitika.

Pa 30 Junho 2011, boma yoona va ufulu wa wanthu, idagamula chinthu chotikomera maninge. Lamulo yake yenze yakuti ntsonkho moyu wenze wosabvumizika, ndipo adalamula boma kuti itibwezere kobiri zathu. Ndipo iwo ambadekana kupagali nakalowa kobiri mwezi. Lamulo yosayebweka mweyi inkuteteza kupemphera chaiko ku França mpaka pano. Mbvunzo ubodzi moule yemwe tenze tiribe kuuganizirako, wenze ninge mwala yemwe udafikira mu msolo mwa Goliyati. Iye adachinjiratu nkhani mweyi. Ko ndawa chani tidawina? Ninge momwe Davide adauzira Goliyati kuti ‘nkhondo ni ya Yahova.’—1 Sam. 17:45-47.

Koma nikamwaka lini kokha komwe takhala tinkuwina nkhani ku tiribunali. Mpakana manjeuno, viribe basa kuti tinkutsutsiwa na akuluakulu wa boma na akuluakulu wa vipembedzo koma matiribunali yakuluyakulu yokwana 70 na matiribunali yazinji ya m’maiko yosiyanasiyana, yakhala yankugamula vinthu vokomera wa Mboni za Yahova pa mirandu yokwana 1 225. Kuwina mirandu mweyi, kwateteza ufulu wathu ukulu maninge. Mwakuliganiza, kukhala na ufulu wokhala wa Mboni za Yahova, kukhala na ufulu wolalikira, kulamba kungenerera miyambi yomwe yaonesa kuti tiri ku mbali ya dziko komasoti kulamba kuikhiwa magazi.

Ko vidakwanisika tani kuti niyende ku Europa kukathandizira nkhani mweyi ku tiribunali, pomwe inepano nimbaphata basa ku likulu ya wa Mboni za Yahova ku Nova York, Estados Unidos?

KHAMA YA AZIBEREKI WANGU YOFUNA KUTUMIKIRA NINGE AMISHONALE

Azibereki wangu omwe ni George na Lucille, adangena chikola ya giriyadi numero 12, ndipo ambatumikira ku Etiópia pomwe inepano nidabadwa mu gole ya 1956. Iwo adanipasa dzina yakuti Philip, pakutengera mulaliki Filipo wa m’magole yoyamba. (Mac. 21:8) Gole patsogolo pake, boma idaletsa basa ya wa Mboni za Yahova. Olo kuti nenze mwana, ninkukumbukira bwinobwino banja yathu inkugumanika pa basa zauzimu mobisa. Kwa mwana, vose mwevire venze vokomedza. Chobvesa ntsisi ni chakuti boma idatichichimiza kuti tichoke mu dziko mweyo mu gole ya 1960.

Banja yathu idafulukira ku Wichita, ku Kansas, mu Estados Unidos. Koma azibereki wangu adatakula chinthu chodekana maninge. Chomwe ni ntima wofuna kukhala amishonale. Iwo wenze na wana atatu, inepano m’bale wangu nkulu dzina yake Judy, na mulongosi wangu n’gono dzina yake Leslie. Tose atatu tidabadwira ku Etiópia. Azibereki wathu ambakonda chonadi, ndipo adatipfunzisa kumbakonda Yahova na kumutumikira na ntima wose. Inepano, nidabatizika na magole 13. Ndipo magole yatatu patsogolo pake, banja yathu idafuluka nkuyenda komwe kumbafunika ofalisa azinji ku Arequipa, ku Peru.

Mu gole ya 1974 pomwe nenze na magole 18, beteli yaku Peru idanisalula pabodzi na abale anango anayi, kuti titumikire ninge apainiya wapadera. Timbayenda kukalalikira m’mapiri yaku Andes kudera komwe kwenze kukanati kwalalikiriwako. Utumiki moyu umbaphatanidzapo kulalikira wanthu wa ntundu wa quéchua na aimará. Timbafamba na karo yomwe imbaoneka ninge nyumba, yomwe tidaipasa dzina yakuti likasa. Ndawa karo mweyi imbaoneka ninge kasha ikulu maninge. Ninkukumbukira kuti nimbakonda kuphatisa basa Baibolo pakuuza wanthu kuti manjemanjepa, Yahova adzamalise kubonera, matenda na impfa. (Chiv. 21:3, 4) Azinji kumoku adakhala wa Mboni za Yahova.

KUTUMIKIRA KU LIKULU YA MBONI ZA YAHOVA

Mu gole ya 1977 pomwe adadzatizungira m’bale Albert Schroeder ku Peru, yemwe wenze wa M’bungwe Yotonga ya Mboni za Yahova, adanilimbikisa kuti nisaine fomu yautumiki wa pa Beteli ku likulu yathu. Ndipo ni vimwevi letu vomwe nidachita. Patsogolo pake, pa 17 Junho 1977, nidayamba kutumikira pa Beteli yaku Brooklyn. Nidaphata basa mu dipatimenti yochenesa na ya manutenção kwa magole yanayi.

Mu Junho 1978, nidadziwana na Elizabeth Avallone ku nsonkhano wa m’maiko ku Nova Orleans, ku Louisiana. Iyembo wenze adalerewa na azibereki omwe ambatumikira Yahova na ntima wose ninge azibereki wangu. Elizabeth ambatumikira kale ninge mpainiya wokhazikika kwa magole yanayi, ndipo ambafuna kutumikira Yahova mu utumiki wa nthawe zose kwa moyo wake wose. Tidapitiriza kudziwana, ndipo kuyenda kwa nthawe tidakondana. Tidalowolana pa 20 Outubro 1979, ndipo tidayamba kutumikira pa Beteli ninge banja.

Abale na alongo wa mumpingo wathu ku Espanhola Brooklyn adatitambira bwino maninge. Kwa magole yazinji, tatumikira pomwe mipingo inango itatu yomwe adatitambira pomwe bwino maninge, ndipo adatithandiza pa utumiki wathu wa pa Beteli. Titembeja maninge thandizo yomwe abale mwawa adatipasa, komasoti thandizo ya azishamwali wathu na azibale wathu omwe adathandizira kusamalira azibereki wathu okalamba.

BASA YANGU MU DIPATIMENTI YA VAMALAMULO

Mwadzidzidzi mu Janeiro 1982, nidasaluliwa kuti nikatumikire mu dipatimenti yowona va malamulo ku Beteli, ndipo magole yatatu patsogolo pake, abale adanibvunza kuti peno ningakwanise kuchita mapfunziro yowona va malamulo na cholinga chakuti nikhale loya. Nkati mwa ma pfunziro yangu, nidakondwa kudziwa kuti ufulu womwe wanthu wa ku Estados Unidos na m’madziko yanango anawo, ni ndawa ya mirandu yomwe wa Mboni za Yahova awina. Mirandu yodekana mwaya, timbayapfunzira kawirikawiri ku shikola.

Mu gole ya 1986 pomwe nenze na magole 30, nidasaluliwa kuti nikhale wonyanganira dipatimenti yowona va malamulo. Wenze ulemerero ukulu, ndawa yakuti olo kuti nenze mwana, abale pa Beteli ambanithemba. Koma nimbabvambo kukula kwa udindo moyu. Wenze utumiki woshupa ndawa yakuti vizinji nimbavidziwambo lini.

Nidakhala loya mu gole ya 1988. Koma ngozi yenze yakuti, nimbazindikiralini momwe mapfunziro mwaya yenze yadakhudzira moyo wangu komasoti oshamwali wangu na Yahova. Mapfunziro yapadzulu yangachitise munthu kukhala na ntima wakuti wanthu akuone, komasoti yachitisa kuti wanthu ambakuone kukhala wodekana maninge ndawa yakuti udziwa vinthu vizinji. Elizabeth ndiye yemwe adanipulumusa. Ndiye yemwe adanithandiza kuti niyambe pomwe kuchita vinthu vomwe nimbavichita kale nikanati kuchita mapfunziro mwaya, kuti nikwanise kulimbisa ushamwali wangu na Yahova. Vidatenga nthawe, koma mwapang’onopang’ono nidakwanisa kukonza pomwe uzimu wangu. Ningakwanise kufotokoza na vomwe vidanichitikira kuti kudziwa vinthu vizinji, nichinthulini chodekana pa moyo. Koma chomwe chichitisa kuti munthu akhale wokondwa, ni kukhala pa ushumwali wolimba na Yahova, na kumukonda maninge komasoti kukonda abale na alongo.

KUTETEZA NA KUKHAZIKISA NTONTHOLO WABWINO MWALAMULO

Pomwe nidamaliza mapfunziro ya vamalamulo, nidaikha maganizo yangu pakuthandiza mirandu ya pa Beteli, na kuteteza ufulu wa wanthu wa Mulungu m’matiribunali. Basa yangu yenze yokomedza maninge komasoti yoshupa, ndawa yakuti vinthu vimbachinja mwakankulumize mu gulu yathu. Mwakulinganiza, pakuyamba tenze na chizolowezi chokumbira vopereka pa vofalisa vathu. Koma mu gole ya 1990, abale adakumbira malangizo ku dipatimenti yowona va malamulo, kuti akwanise kudziwa vodekana kuchita kuti asiye kumbakumbira wanthu vopereka. Patsogolo pake wa Mboni za Yahova adayamba kugawira vofalisa vawo pa kusachita kukumbira kobiri. Vimwevi vidachitisa kuti basa ifambe bwino ku Beteli komasoti m’mipingo. Mpakana manjeuno, viteteza basa yathu pa nkhani ya mintsonkho. Anango ambaona ninge kuchinja kumoku kuchitise kuti tikhale tiribe kobiri ndipo visokoneze basa yathu yolalikira. Koma ndivolini vomwe vidachitika. Kundoyambira 1990, wanthu omwe ayamba kutumikira Yahova ni azinji maninge. Ndipo ntsiku zino, wanthu angakwanise kugumana chakudya chauzimu mosachita kupagali. Napfunzira kuti kuchinja kwa vinthu mu gulu yathu, kufamba bwino ndawa ya thandizo ya Yahova, komasoti na malangizo yomwe titambira kuchokera ku Bungwe Yotonga.—Eks. 15:2; Mat. 24:45.

Isepano tiwinalini mirandu mwaya ndawa yakuti tina maloya yabwino. Kazinjikazinji chomwe chichitisa kuti boma itikomere ntima, ni makhalidwe yabwino ya wanthu wa Yahova. Nidaona chitsanzo cha vimwevi mu gole ya 1998 pomwe abale atatu wa m’Bungwe Yotonga pabodzi na azikazi wawo, adafika ku nsonkhano wachigawo ku Cuba. Iwo ambaonesa kukoma ntima komasoti ulemu kwa munthu aliyese. Chitsanzo chawo ndicho chomwe chenze chodekana maninge kuposha misonkhano yomwe tidakhala nayo na waboma, kuti titsimikizire kuti tingenereralini nkhani zandale.

Koma peno nkhani za mirandu zinkumalalini mwantendere, ‘tidekana kukhazikisa mwalamulo basa ya ntontholo wabwino m’maboma.’ (Afil. 1:7) Mwakulinganiza, kwa magole yazinji ku Europa na ku Coreia do Sul, ambabvumalini ufulu wathu wophata basa zinango m’malo mongena usocha. Ndawa ya vimwevi, abale okwana 18 000 ku Europa na abale okwana 19 000 ku Coreia do Sul, adaikhiwa mudjeri ndawa yolamba kungena usocha ndawa ya chikumbuntima chawo.

Pakumalizira, pa 7 Junho 2011, boma ya ku Europa idagamula chinthu chabwino maninge pa mulandu wa m’bale Bayatyan v. Armenia. Iwo ambafuna kuti boma yaku Europa, ipereke basa inango yomwe ikhudzanalini na usocha. Chigamulo ninge chimwechi, chidaperekewa pomwe na dziko ya Coreia do Sul pa 28 Junho 2018. Palibe chigamulo ne chibodzi ninge mwechi chomwe chidakaperekewa sembe abale wathu wa chilumbwana alibe kupitiriza kukhala olimba pa nkhani yosangenerera ndale.

Madipatimenti yowona va malamulo, likulu yathu komasoti ma Beteli yose pa dziko yapasi, yankuphata basa mwakhama kuti ateteze ufulu wathu wotumukira Yahova komasoti na kulalikira ntontholo wabwino. Ni mwayi ukulu maninge kuimira abale wathu omwe ankugumana na chiyeso cha boma. Olo tikakhala kuti tiribe kuwina mulandu, isepano tinkupereka umboni kwa maboma, mafumu na makhaindi yose ya wanthu. (Mat. 10:18) Oweruza, oimira maboma, majornalista na wanthu wose, akwanisa kuona malemba yomwe tiikha pa ma dukumento yomwe tiwapasa, na kubvesera vomwe tiyankhula m’matiribunali. Wanthu azinji wantima wabwino, akwanisa kudziwa va wa Mboni za Yahova na komwe kuchokera vomwe tikhulupirira. Anango mpakana akhala abale wathu.

MWAPHATA BASA YAHOVA!

Magole 40 yapita aya, nakhala na mwayi wothandiza ma Beteli pa nkhani yowona va malamulo pa dziko yose na kugumanika m’matiribunali yazinji yakuluyakulu, komasoti pakati pa wanthu azinji obvekera. Inepano nikonda komasoti nichita chidwi na abale omwe niphata nawo basa mu Dipatimenti yowona va malamulo ku likulu yanthu na madipatimenti yowona va malamulo pa dziko yose. Nidzibva okhutira na vimwevi, ndipo moyo wangu wakhutira na madaliso yazinji.

Elizabeth wakhala munzangu wokhulupirika komasoti wachikondi kwa magole 45, pa nthawe yoshupa na pa nthawe yabwino. Nimutembeja maninge ndawa yakuti iye achita vimwevi olo kuti ana matenda yomwe yamuchitisa kukhala alibe mphanvu.

Pa moyo wathu, tapfunzira kuti mphanvu komasoti kuwina, kubweralini ndawa ya luso yathu. Ninge momwe Davide adanenera, ‘Yahova ni mphanvu kwa wanthu wake.’ (Sal. 28:8) Shuwadi, ‘nkhondo ni ya Yahova.’