Ko nivokwanisika kupitiriza kupfunzira na vipfunziso voyamba va m’Baibolo?

1. Ko vipfunziso voyamba va m’Baibolo vidachinja tani moyo wanu?

VIPFUNZISO voyamba va m’Baibolo vidachinja moyo wathu. Mwakulinganiza, pomwe mudapfunzira kuti dzina ya Mulungu ni Yahova, imwepo mudayamba kumufenderera. (Yes. 42:8) Patsogolo pakuti mwapfunzira vomwe vichitika munthu akamwalira, imwepo mudaleka kuda nkhawa kuti peno azibale wanu omwe adamwalira ankubonera. (Mla. 9:10) Ndipo pomwe mudapfunzira kuti dziko yapasi idzakhale Paradaiso, imwepo mudaleka kuda nkhawa va tsogolo yanu. Imwepo mudatsimikizira kuti mudzakhale na moyo osati na magole 70 panango 80 yokha koma mpakana kalekale.—Sal. 37:29; 90:10.

2. Ko ndawa chani tingalewe kuti olo Akhrisitu wokhuma mwauzimu, angaphindule na vipfunziso voyamba va m’Baibolo 2 Petulo 1:12, 13?

² Isepano tilekalini kuphindula na mpfundo zoyamba za m’Baibolo. Mu kalata yake yachiwiri, Petulo adanembera Akhrisitu omwe enze olimba kale mu chonadi. Panango kuti iwo enze “wokhuma mwauzimu.” (Werengani 2 Petulo 1:12, 13.) Koma pa nthawe mweyire, azipfunzisi wabodza komasoti wanthu anango ambayesesa kusokoneza kupemphera chaiko. (2 Pet. 2:1-3) Petulo ambafuna kulimbikisa abale kuti akwanise kupirira bvuto mweyi. Ndipomwapa, iye adawakumbusa vinthu vomwe iwo enze adapfunzira kale. Vipfunziso vimwevi vidakathandiza Akhrisitu mwawale kupitiriza kukhala okhulupirika kwa Yahova mpakana mapeto.

3. Ko ni chitsanzo chiponi chomwe chitithandiza kuwona kuti vipfunziso voyamba va m’Baibolo ni vothandiza olo kwa Akhrisitu wokhuma mwauzimu?

³ Olo kuti takhala tinkutumikira Yahova kwa magole yazinji, tingapitirize kupfunzira vinthu vinyowani na mpfundo zoyamba za m’Baibolo. Ganizirani va chitsanzo ichi: Munthu yemwe aphika mwaluso na munthu yemwe ankupfunzira panango angaphatisire basa vophikira vibodzibodzi pakuphika chakudya. Koma kuyenda kwa nthawe, iwo angaphatise basa vinthu vibodzibodzi mwevi munjira yosiyana nkukwanisa kuphika chakudya chabwino maninge. Molingana na vimwevi, wanthu omwe akhala ankutumikira Yahova kwa nthawe itali, na omwe ankupfunzira Baibolo cha manjemanje adziwa mpfundo zibodzibodzi zoyambirira za m’Baibolo. Koma iwo angawone vipfunziso vimwevi munjira yosiyana. Kundochokera pomwe tidabatizika, vingachitike kuti moyo wathu na utumiki wathu vachinja. Koma kuganizira chonadi chomwe tidapfunzira kale, kutithandiza kuona njira zinyowani zomwe tingaziphatise basa mobverana na momwe vinthu viriri manjeuno pa moyo wathu. Naboni tione vipfunziso vitatu voyamba va m’Baibolo na vomwe Akhrisitu okhuma mwauzimu angapfunzire na vipfunziso mwevi.

YAHOVA NI MULENGI

4. Kudziwa kuti Yahova ni Mulengi, ko kwatithandiza tani pa moyo wathu?

⁴ Tidziwa kuti dziko yapasi pabodzi na vinthu vose vidalengewa na Mulengi wanzeru komasoti wamphanvu. Baibolo inena kuti: “Yemwe adakonza vinthu vose ni Mulungu.” (Aheb. 3:4) Koma isepano tingapfunzire vizinji na mpfundo mweyi. Ndawa yakuti ndiye yemwe adatilenga, Yahova adziwa vose vokhudza isepano. Iye atidera nkhawa komasoti adziwa vomwe nivodekana kwa isepano. Ndipomwapa, kudziwa kuti Yahova ni Mulengi kudachinja moyo wathu ndipo kudatithandiza kukhala na cholinga chaicho cha moyo.

5. Ko nchonadi chiponi cha m’Baibolo chomwe chitithandiza kukhala odzichepesa? (Yesaya 45:9-12)

⁵ Kudziwa kuti Yahova ni Mulengi kutithandiza pomwe kukhala odzichepesa. Mwakulinganiza, nthawe inango Yobu ambaganizira maninge va iye na wanthu anango. Pakufuna kuthandiza Yobu, Yahova adamukumbusa kuti iye ni Mulengi wamphanvu yose. (Yobu 38:1-4) Na vimwevi m’maganizo, Yobu adakakwanisa kubvesa kuti vose vomwe Yahova achita ni vabwino. Pakufuna kufotokoza kuti munthu adekanalini kudziwona wapadzulu maninge kuposha Mulungu, Yesaya adanemba kuti: ‘Ko dongo ingauze yemwe ankuyiumba kuti: ‘Ko unkuchita chani?’’—Werengani Yesaya 45:9-12.

6. Ko ni nthawe iponi yomwe ni yabwino kuganizira va nzeru na mphanvu za Mulengi wathu? (Onani pomwe mafoto.)

⁶ Pomwe Mkhrisitu ankudziwa vinthu vizinji, iye angayambe kumbathemba maninge nzeru zake m’malo mofaga malangizo ya Yahova m’Baibolo. (Yobu 37:23, 24) Vimwevi vikachitika, ni vabwino Mkhrisitu kuganizira momwe nzeru na mphanvu za Mulengi wathu ziriri zosalinganizika. (Yes. 40:22; 55:8, 9) Mwanjira mweyi, chonadi choyamba cha m’Baibolo mwechi chidzamuthandize kuti apitirize kukhala wodzichepesa na kubvesa kuti vomwe Yahova aganiza ni vabwino maninge kuposha maganizo yake.

7. Ko Rahela adachita tani kuti abvume kuchinja kunyowani?

⁷ Kukumbukira kuti Yahova ni Mulengi, kudathandiza Rahela, yemwe akhala ku Eslovênia kubvuma makonzedwe yanyowani ya gulu yathu. Iye adanena kuti: “Nthawe zinango niwona kuti nivoshupa kubvuma malangizo yanango ya abale omwe atinyang’anira. Mwakulinganiza, nidawona lipoti ya numero 8 ya 2023. Olo nteno, pomwe nidawona m’bale ankukamba nkhani na ndevu, inepano nilibe kubva bwino. Ndipomwapa, nidapemphera kwa Yahova kuti anithandize kubvuma kuchinja moku.” Rahela adabvesa kuti pakukhala Mulengi wakudzulu na dziko yapasi, Yahova akwanisa kutsogolera gulu yake munjira yabwino. Ko imwepo muona kuti nthawe zinango nivoshupa kubvuma vinthu vikachinja panango mukatambira malangizo? Peno nteno chithu chabwino nikukhala odzichepesa na kupatula nthawe kuganizira va nzeru na mphanvu za Mulengi wathu.—Aro. 11:33-36.

MULUNGU AYAMBISALINI MABVUTO

8. Ko ndawa chani ni vabwino kwa imwepo kupfunzira kuti Mulungu achitisalini kuti timbabonere?

⁸ Ko ndawa chani Yahova wabvuma kuti wanthu ambabonere? Ndawa yosadziwa m’dawiro wa mbvunzo moyu, azinji awona kuti Mulungu ni woipa ndipo aluza chikhulupiriro chawo chakuti iye alipo. (Miy. 19:3) Koma imwepo mudapfunzira kuti uchimo ndiye uyambisa mabvuto osati Yahova. Mudapfunzira pomwe kuti kudekha kwa Yahova kwachitisa kuti wanthu mamidyau yazinji amudziwe, na kudziwa pomwe njira zomwe iye adzaphatise basa kuti amalise mabvuto mpakana kalekale. (2 Pet. 3:9, 15) Chonadi mwechi chidakulimbikisani ndipo chidalimbisa pomwe ushamwali wanu na Yahova.

9. Ko ni pavochitika viponi pomwe ni kwabwino kukumbuki chifukwa chomwe chichitisa Yahova kubvuma kuti timbabonere?

⁹ Tinkudziwa kuti tidekana kukhala odekha pomwe tinkudikhira kuti Yahova amalise mabvuto. Koma peno isepano, panango munthu yemwe timukonda ankugumana na mabvuto, vinthu vosowa chilungamo panango akaferewa, tingayambe kukumbuka kuti Yahova ankuchedwa kuti amalise mabvuto. (Aheb. 1:2, 3) Pa vochitika ninge mwevi, ni vabwino kukumbukira vomwe vichitisa kuti Yahova abvume kuti wanthu wabwino agumane na mabvuto.a (Sal. 34:19) Tingakumbukire pomwe va cholinga cha Yahova chomalisa mabvuto mpakana kalekale.

10. Ko nchani chithandiza Anne kuti ambalimbane na bvuto ya kumwalira kwa amayi wake?

¹⁰ Kudziwa chaivo vokhudza mabvuto, kungatithandize kuti tipirire. Anne, yemwe akhala pa ntsuwa ya Mayotte ku Oceano Índico, adanena kuti: “Magole kumbuyo, amayi wangu adamwalira. Vimwevi vidanichitisa kukhala wokhumudwa. Koma inepano nthawe zose niyesesa kukumbukira kuti Yahova ndiyelini ayambisa mabvuto. Mosiyana na vimwevi iye afunadi kuchosa vinthu vomwe vitichitisa kuti timbabonere na kumukisa wanthu omwe tiwakonda. Kuganizira va chonadi mwechi, kunithandiza kukhala na ntendere womwe ningakwaniselini kuufotokoza.”

11. Ko kudziwa chifukwa chomwe chichitisa Yahova kuti abvume kuti timbagumane na mabvuto, kutilimbisa tani?

¹¹ Kudziwa kuti ndawa chani Yahova ni wodekha, komasoti kudziwa vomwe vimuchitisa kuti abvume kuti timbagumane na mabvuto, kungatilimbikise kuti timbalalikire. Ntumi Petulo adafotokoza kuti kudekha kwa Yahova, kupereka mwayi kuti wanthu ose alape na kupulumuka. Patsogolo pake iye adanemba kuti: “Ganizirani va khaindi ya wanthu omwe mufunika kukhala. Mufunika kukhala wanthu wa khalidwe yochena ndipo mumbachite basa zowonesa kuti ndimwe odzipereka kwa Mulungu.” (2 Pet. 3:11) Ibodzi mwa basa zowonesa kuti ndimwe “wodzipereka kwa Mulungu” ni kulalikira. Ninge Ababa wathu isembo tikonda wanthu ndipo tinkufuna kuti adzakhalembo na moyo mu dziko inyowani mpakana kalekale. Yahova ankupitiriza kupasa mwayi wanthu wa mudera yanu kuti amutumikire ndipo imwepo muna mwayi wophata basa na Mulungu kuti muthandize wanthu azinji kupfunzira va iye mapeto yakanati kufika.—1 Akor. 3:9.

TINKUKHALA “MU NTSIKU ZOMALIZIRA”

12. Ko kudziwa kuti tinkukhala mu “ntsiku zomalizira” kutitsimikizira chani?

¹² Baibolo ifotokoza bwinobwino momwe wanthu adzakhalire mu “ntsiku zomalizira.” (2 Tim. 3:1-5) Kundowona va makhalidwe yoipa ya wanthu omwe tikhala nawo pafupi, tikwanisa kuona kuti ulosi moyu unkukwanirisika. Kubvesa chonadi mwechi, kutithandiza kuti timbathembe maninge mawu ya Mulungu.—2 Tim. 3:13-15.

13. Pakuganizira chitsanzo cha Yesu pa Luka 12:15-21, ko tidekana kudzibvunza chani?

¹³ Kudziwa kuti tinkukhala mu ntsiku zomalizira, kutithandiza kuti timbaphatise basa mwanzeru nthawe yathu. Yesu adafotokoza chitsazo chomwe chingatipfunzise kudekana kochita vinthu vimwevi pa lemba ya Luka 12:15-21. (Werengani.) Ko ndawa chani munthu wolemera adanenewa kuti ulibe “nzeru?” Alibe kumunena tene ndawa yakuti iye wenze na vinthu vizinji, koma ndawa yakuti ambayikha chuma chake pa malo yoyamba. “Iye adadziunjikira chuma, koma wenzelini wodala kwa Mulungu.” Ko ndawa chani kuchita vimwevi kwenze kuphonya? Mulungu adamuuza mwamuna muyu kuti: “Usiku mwauno moyo wako aufune.” Ko chitsanzo mwechi chinkutipfunzisa chani? Nthawe yomwe yasala mpakana mapeto ya nthawe ino ni ifupi maninge. Ndipomwapa, tidekana kudzibvunza kuti: ‘Ko volinga vangu viwonesa kuti ninkuchita vinthu mwakhama? Ko nilimbikisa wana wangu kukhala na volinga viponi? Ko niphatisa basa nthawe yangu, mphanvu zangu na chuma changu kuti nidzinyang’anire chuma cha pa dziko yapasi panango kuti nidzinyang’anire chuma cha kudzulu?’

14. Ndawa chani ni vodekana kuganizira vinthu vomwe vitichitisa kudziwa kuti tili mu ntsiku zomalizira, ndipo chitsanzo cha Miki chinkuwonesa tani vimwevi?

¹⁴ Tikambawona vinthu vomwe vitichitisa kudziwa kuti tinkukhala mu ntsiku zomalizira, vimwevi vingachinje momwe tichitira vinthu. Ni vimweviretu vomwe vidachitikira mulongo munango dzina yake Miki. Iye adanena kuti: “Pomwe nidamaliza shikola, nimbafunisisa maninge kukhala munthu wa vofufudza fufudza va umoyo wa nyama ndipo nimbafuna kuti imweyi ikhale basa yangu. Koma nenze pomwe na cholinga chokhala mpainiya wokhazikika na kuthandiza komwe kunkudekana ofalisa azinji. Koma azishamwali wangu odziwa vizinji, adanithandiza kuti niwone peno ningakwanisedi kuphata basa mweyi na volinga va uzimu vomwe nenze navo. Iwo adanikumbusa kuti mapeto ya dziko iyi yali pafupi na kuti mu dziko inyowani nidzakhale na nthawe ikulu yopfunzira umoyo wa vinyama vose vomwe inepano ningafune. Ndipomwapa, nidasalula kuti nichite kosi yosashupa yomwe idakanimaliralini nthawe ikulu. Ndawa ya vimwevi, nidakwanisa kukhala mpainiya wokhazikika ndipo patsogolo pake nidayenda kudera komwe kumbadekana ofalisa azinji ku Equador.” Manjeuno Miki na mwamuna wake ankutumikira ninge wonyang’anira dera mu dziko mweyi.

15. Ko chitsanzo cha Yakobo chiwonesa tani kuti tidekanalini kufoka na wanthu omwe ankuwonesalini chidwi. (Onani pomwe mafoto.)

¹⁵ Kukumbukira kuti tinkukhala mu ntsiku zomalizira, kutilimbikisa kuti tikhale wakhama pa basa yolalikira olo kuti pa nthawe yakuyamba wanthu angabvumelini ntontholo wabwino. Chaivo ni vakuti wanthu angachinje. Onani chitsanzo cha Yakobo m’bale wake wa Yesu. Iye adaona Yesu ankukula, nkukhala Mesiya komasoti mpfunzisi wosalinganizika. Olo nteno kwa magole yazinji Yakobo alibe kumutewera Yesu. Koma iye adakhala wopfunzira wa Yesu patsogolo pakuti Yesu wamukisiwa. Ndipo adakhala wopfunzira wakhama maninge.b (Yoh. 7:5; Agal. 2:9) Ndipomwapa, ayi kusiya azibale wanu panango wanthu wale omwe mu umboni awonesalini chidwi pa chonadi. Vingachitike kuti vomwe mungawauze lelo vingadzaphate basa kutsogolo. Panango patsogolo pakuti chisautso chikulu chayamba.c

PITIRIZANI KUCHITA CHIDWI NA MPFUNDO ZA YAHOVA

16. Ko vipfunziso va Yahova vakuthandizani tani? (Onani bokosi yakuti “Phatisani basa chonadi cha m’Baibolo kuti muthandize anango.”)

¹⁶ Chakudya chinango chauzimu chomwe titambira, chikonzerewa wanthu wale omwe adziwalini vizinji vokhudza Baibolo. Mwakulinganiza, nkhani ya wose ya kumapeto kwa sondo, ntsanja zogawira na nkhani zinango komasoti mavidiyo ya pa saite ya jw.org, vikonzerewa wanthu wale omwe ni Mbonilini za Yahova. Olo nteno, vinthu vimwevi vingatithandizembo. Ivo viyingizira chikondi chathu kwa Mulungu, vitichitisa kuti timbakhulupirire maninge Baibolo ndipo vitithandiza kuti tikhale mpfunzisi wabwino.—Sal. 19:7.

17. Ko ni pavochitika viponi vomwe tidekana kukumbukira vipfunziso voyambirira va m’Baibolo?

¹⁷ Ise wa Mboni za Yahova, tikhala okondwa tikatambira mpfundo zinyowani za chonadi cha m’Baibolo. Koma tikonda pomwe maninge mpfundo zoyamba za m’Baibolo zomwe zidatichitisa kuti tiyambe chonadi. Peno tina maganizo yombandofuna kuphatisa basa maganizo yathu, m’malo mwakuti timbatewedze malangizo ya gulu, tidekana kukhala wodekha nkumbakumbukira kuti Mulengi wathu wanzeru komasoti wamphanvu yose ndiye ankutsogolera gulu mweyi. Peno isepano panango munthu yemwe timukonda ankugumana na mabvuto, vingakhale bwino kukhala wodekha na kumbaganizira kuti ndawa chani Yahova wabvuma kuti tibonere. Ndipo tikambaganizira momwe tingaphatisire basa chuma chathu na nthawe yathu, tidekana kukumbukira kumbachita vinthu mwakhama nkumbakumbukira pomwe kuti tinkukhala mu ntsiku zomalizira. Tikachita tene, mpfundo za Yahova zidzapitirize kutilimbikisa kuti tipitirize kukhala wanzeru.