Takhala tinkupfunzisiwa na mpfunzisi wathu nkulu kwa moyo wathu wose

CHITSANZO CHA AZIBEREKI WANGU

Kumapeto kwa magole ya 1950, azibereki wangu adafuluka ku Itália nkuyenda ku Canadá ndipo adakakhala mu thaundi ya Kindersley, província ya Saskatchewan. Patsogolo pake iwo adapfunzira chonandi, ndipo chonadi mwechi chidakhala chinthu chodekana maninge pa moyo wathu. Nikumbukira pomwe nenze mwana timbamara nthawe itali tinkulalikira pabodzi na banja yathu. Nthawe zinango niuza wanthu moseka kuti nidayamba “upaniya wothandiza “ nina magole 8.

Azibereki wangu wenze wosauka. Olo nteno iwo adachita vinthu vizinji maninge kwa Yahova ndipo adasiya chitsanzo chabwino kwa inepano. Mwakulinganiza, mu 1963 iwo adagulisa vinthu vinango vomwe tenze navo kuti akwanise kugumana kobiri kuti tiyende ku nsonkhano wa m’maiko womwe udachitika ku Pasadena, Califórnia ku Estados Unidos. Patsogolo pake mu 1972 tidafuluka nkuyenda ku thaundi ya Trail mu província ya Colômbia Britânica ku Canadá. Thaundi mweyi yenze pa senga wa makilometro 1000 kuchokera komwe tingakhala. Cholinga chathu chenze kufuna kuthandiza wanthu omwe ambayankhula chi Italiano mudera mweire. Ababa wangu ambaphata basa yopysera na yokonza vinthu vomwe vadzogeka pa merikado inango. Nthawe zizinji iwo ambalamba kukwiziwa udindo ndawa yakuti ambafuna kuikha maganizo yawo pa vinthu vauzimu.

Nitembeja maninge chitsanzo chabwino chomwe azibereki wangu adanisiyira pabodzi na azibale wangu atatu. Iwo adanipfunzisa kutumikira Yahova ndipo adanipfunzisa pomwe chinthu chomwe nakhala ninkuchita kwa moyo wangu wose. Nikaikha Ufumu wa Mulungu pa malo yoyamba, Yahova nthawe zose adzanisamalire.—Mat. 6:33.

KUYESA KUCHITA UTUMIKI WA NTHAWE ZOSE

Mu 1980, nidalowolana na Debbie yemwe ni mulongo wabwino maninge komasoti wakhama pakutumikira Yahova. Isepano timbafuna kungena mu utumiki wa nthawe zose. Ndipomwapa, patsogolo pa minyezi itatu pomwe tidandolowolana, Debbie adayamba kutumikira ninge mpainiya. Pomwe padandopita gole ibodzi talowolana, tidafuluka nkuyenda mumpingo unango ung’ono womwe umbadekana thandizo. Kumoku inembo nidayamba kutumikira ninge mpainiya.

Koma kuyenda kwa nthawe tidaleka kukhala wokondwa pa utumiki wathu ndipo tidaganiza voti tichokeko. Tikanati kuchoka, tidaganiza vokacheza na wonyang’anira dera munango. Iye adationesa chikondi, koma adatiuza vinthu chaivo. Iye adanena kuti: “Pana bvuto inango kwa imwepo. Imwepo munkundokhalira kuona va mabvuto basi pa utumiki wanu. Koma muchiti mwanyang’ana vinthu vomwe ni vabwino pa utumiki wanu mungavigumane.” Malangizo mwaya ndiyodi timbadekana. (Sal. 141:5) Tidachinjiratu nthawe mweyo momwe timbaonera vinthu, ndipo tidazindikira kuti pana vinthu vizinji vabwino maninge pa utumiki wathu. Abale azinji mumpingo ambafuna kuchita vizinji pakutumikira Yahova, kuphatanidzapo wana komasoti alongo omwe azimuna wawo wenzerini mboni. Mweyi yenze pfunziro yabwino kwa isepano. Tidapfunzira kuona mbali yabwino ya utumiki wathu na kuthemba kuti Yahova angakonze vinthu vomwe vinkuoneka kuti nivosakwanisika. (Mika 7:7) Tidayamba pomwe kukhala okondwa pa utumiki wathu ndipo vinthu vidakhala bwino.

Alangizi wathu wa mushikola yoyamba ya apainiya, enze adatumikirako kale m’madziko yanango. Iwo adationesa mafoto ndipo adatiuza pomwe va madaliso na mabvuto yomwe agumana nayo pa utumiki wawo. Vimwevi vidatichitisambo kuti tikhale na cholinga chofuna kutumikirambo ninge amishonale. Ndipomwapa, tidaganiza vokhala na cholinga mwechi.

Kuti tiyambe, tidayeserera kutumikira ninge amishonale mu 1984. Tidafuluka nkuyenda ku província ya Quebeque komwe ayankhula chi Francês. Província mweyi ikhala pa senga wa makilometro 4,000 kuchokera ku Colúmbia Britânica. Ku Quebeque timbadekana kuzolowera chikhalidwe na chiyankhulo chinyowani. Bvuto inango yenze yakuti nthawe zizinji tenze tilibe kobiri. Kwa kanthawe timbandodya m’batata zomwe timbachita machanga m’munda mwa wanthu. Debbie wenze waluso, ndipo ambaphika vakudya vokoma na m’batata mwezi. Olo na mabvuto yose mwaya, tidachita vose vomwe tingakwanise kuti tikwanise kupirira uku tiri okondwa. Ndipo chodekana maninge ni chakuti timbakwanisa kuona momwe Yahova ambatisamalirira.—Sal. 64:10.

Mwadzidzidzi ntsiku inango, tidafonerewa. Kwenze kuchemerewa kuti tikayambe kutumikira ku Beteli ya ku Canadá. Tidakhala okondwa koma nthawe ibodzibodzi mweyo timbakaikira ndawa yakuti tenze tidasaina fomu inango kuti tikangene shikola ya Giriyadi. Koma olo venze teno, tidasalula vakuti tibvume utumiki moyu. Pomwe tidafika ku Beteli moku, tidabvunza m’bale Kenneth Little, yemwe wenze wa nkometi ya thambi kuti: “Manje tikachemerewa kuti tikangene shikola ya Giriyadi?” Iye adadawira kuti: “Ayi kudandaula, vimwevi vikachitika tione vochita.”

Ndipo ni vimweviretu vomwe vidachitika pomwe padandopita sondo ibodzi. Ine na Debbie tidachemerewa kuti tiyende ku Giriyadi ndipo timbadekana pomwe kuchita chosalula. M’bale Little adanena kuti: “Viribe basa vomwe mungasalule. Nthawe zinango mungadekane kusalula chinthu chinango, koma dziwani kuti chirichose chomwe mungasalule Yahova adalise vose viwiri.” Pamwapo isepano tidasalula kuyenda ku Giriyadi. Ndipo kuyenda kwa magole tidakwanisa kuona kuti mawu ya m’bale Little yenze chaiyo. Kwa maulendo yazinji isembo takhala tinkuuza vimweviretu wanthu omwe ankudekana kusalula pa mautumiki yawiri.

KUTUMIKIRA NINGE AMISHONALE

Tidakhala okondwa maninge kukhala abodzi mwa aluno 24 omwe adangena shikola ya Giriyadi turma 83 yomwe idachitikira ku Brooklyn, Nova Iorque. Idayamba mu Abril 1987. M’bale Ulysses Glass na Jack Redford enze alangizi wathu pa shikola mweyi. Minyezi 5 mwayare, yadapita mwakankulumize maninge. Tidamaliza mapfunziro mwaya pa 6 Setembro 1987. Tidatumiziwa kuti tikatumikire ku Haiti, pabodzi na John na Marie Goode.

Dziko ya Haiti yenze ikanati kutambirako amishonale kuchokera mu 1962 pomwe amishonale womalizira adachoka mu dziko mweyi. Pomwe padandopita masondo yatatu tamaliza shikola ya Giriyadi, inepano na Debbie tidayamba kutumikira ku Haiti, ndipo mpingo wathu wenze na ofalisa 35. Mpingo moyu wenze kwayekhayekha pakati pa mapiri. Tenze alumbwana osadziwa vizinji ndipo timbakhala tekhatekha mu nyumba ya amishonale. Wanthu azinji mu dera mweyi enze osauka, ndipo azinji ambadziwalini kuwerenga. Pa nthawe mweyi ku Haiti isepano tidapirira nkhondo ya pachibale, kuchosa perezidente mwafosi, viwonesero na mphepo za nkutho.

Tidapfunzira vinthu vizinji maninge ndawa ya kupirira komasoti chimwemwe chomwe abale waku Haiti anacho. Abale azinji enze na moyo woshupa koma ambakonda Yahova komasoti utumiki. Ninkukumbukira va mulongo munango wachikulire yemwe ambadziwalini kuwerenga koma ambakwanisa kusunga malemba yokwana 150 mu msolo mwake. Vinthu voshupa va mu dziko mweire, vidatichitisa kuti tipitirize kukhala na shungu yofuna kulalikira ntontholo wabwino womwe ni chinthu chomwe chingamalise mabvuto ya wanthu. Tingakwaniserini kufotokoza chimwemwe chomwe tinacho ndawa yodziwa kuti yanango mwa mapfunziro yathu yoyamba ni apainiya okhazikika, apainiya wa padera komasoti akulu.

Ku Haiti, nidadziwana na mulumbwana munango dzina yake Trevor, yemwe wenze m’mishonale wa chipembedzo chinango. Inepano nimbakambirana naye va Baibolo nthawe zinango. Koma chomwe chidanichitisa chidwi chakuti magole yanganani patsogolo pake, nidatambira kalata yomwe iye adanemba kuti: “Nibatiziwe pa nsonkhano wadera womwe unkubwera uyu. Ninkufuna kubwerera ku Haiti kuti nikatumikire ninge mpainiya wapadera ku malo mwayale yomwe nimbatumikira ninge m’mishonale wa chipembedzo.” Ndipo ni vimweviretu vomwe iye adachita kwa magole yazinji pabodzi na nkazi wake.

KU EUROPA PATSOGOLO PAKE KUYENDA KU ÁFRICA

Tidatumiziwa kuti tikatumukire ku dera inango ya ku Europa komwe basa yathu imbayamba. Mu 1992 tidafika ku Liubliana Eslovênia, mu thaundi inango yomwe yenze kufupi na komwe azibereki wangu adakulira akanati kufuluka kuyenda ku Itália. Dziko yomwe imbachemera kuti Iugoslávia, pa nthawe mweyi kwenze kudakachitika nkhondo. Basa yolalikira mu dziko mweyi imbanyang’aniriwa na Beteli ya ku Áustria, ku Viena, yaku Croácia, ku Zagreb yaku Sérvia, na yaku Belgrado. Koma manje kada dziko ina Beteli yake.

Kukhala ku Eslovênia, kumbadekana pomwe kupfunzira chiyankhulo chinyowani na chikhalidwe chinyowani. Wanthu wa kumoku ambanena kuti “Jezik je težek,” vomwe vimbatanthauza kuti “chiyankhulo nchoshupa.” Ndipo chenzedi choshupa. Koma tidachita chidwi maninge kuona abale momwe enzere okonzeka kutewenzera malangizo yaliyose yanyowani ya gulu, ndipo tidaona momwe Yahova adawadalisira. Pamwapa pomwe tidachita kuona kuti Yahova akonza vinthu mwachikondi komasoti pa nthawe yake. Vinthu vose vomwe tidapfunzira pomwe timbatumikira Yahova pakuyamba vidatithandiza kuti tipirire ku Eslovênia.

Ndipo tidapfunzira vinthu vinango vinyowani, koma kuchinja kulibe kuimira mwapa. Mu gole ya 2000, tidatumiziwa kuti tiyende ku Costa do Marfim, yomwe ikhala ku África Ocidental. Patsogolo pake mu gole ya 2002, ndawa ya nkhondo ya pachibale timbadekana kuchoka nkuyenda ku Serra Leoa. Kumoku vinthu venze bwino ndawa yakuti nkhondo ya pachibale yomwe idatenga magole 11 yenze idandomala manjemanje. Vidakhala voshupa kuchoka ku Costa do Marfim mwadzidzidzi. Koma vinthu vomwe tenze tidapfunzira, vidatithandiza kuti tipitirize kukhala okondwa.

Ku Serra Leoa, wanthu azinji ambafuna kupfunzira chonadi. Abale wa kumoku enze wachikondi ndipo enze adapirira kwa magole yazinji. Ndipomwapa, timbawona vinthu vabwino vimwevi. Olo kuti abale enze osauka, koma iwo enze okonzeka kugawira anzawo vomwe anavo. Mulongo munango adamupasa Debbie vovala. Debbie ambachita manyazi kutambira, koma mulongo ule adamuchichimiza nkunena kuti: “Kwa magole yazinji abale wa madziko yanango adatithandiza, manje ni nthawe yathu yakuti tichitembo vimwevi.” Ine na Debbie tidatsimikiza kukhalambo na cholinga chotewedzera chitsanzo chawo.

Kuyenda kwa nthawe tidakwanisa kubwerera pomwe ku Costa do Marfim. Koma vinthu kumoku vidayipa pomwe. Pamwapo mu Novembro 2004, timbadekana kuchoka pomwe. Tidayenda na alikopito mpakana ku malo ya masocha ya chi francês tili takule mamala yomwe yambalemera 10 kilo kada munthu. Ndipo tidagona pamwapo patsi. Magwana yake tidapakira ndeke nkuyenda ku Suíça. Tidafika ku Beteli mpakati pa usiku. Koma tidatambiriwa bwino na abale wa Nkomiti ya Thambi, alangizi wa mashikola yopfunzisa va utumiki na azikazi wawo. Iwo adatikumbatira ndipo adatipasa pomwe chakudya na shocolate cha kumoku. Tidakhala wokondwa maninge.

Tidakhala tinkutumikira kwa kanthawe ku Gana, patsogolo pake tidakwanisa kubwerera pomwe ku Costa do Marfim pa nthawe yakuti nkhondo ya pachibale yachepako. Kukoma ntima kwa abale kudatithandiza kuti tikwanise kulimbana na mabvuto mwaya yodesa nkhawa komasoti kuchinja kwa mautumiki. Inepano na Debbie tidatsimikizira kuti chikondi cha abale mwechi nicholingana mu gulu ya Yahova. Koma vimwevi videkanalini kutichitisa kuleka kutembeja vomwe abale angatichitire. Kuyenda kwa nthawe tidazindikira kuti nthawe yoshupa mweyi yenze thereno ikulu maninge kwa isepano.

ORIENTE MÉDIO

Mu 2006 tidatambira kalata yochokera ku likulu yathu yomwe adatiuza kuti tikhale na utumiki unango unyowani. Utumiki wake wenze wokatumikira ku Oriente Médio. Apa pomwe timbadikhira kugumana na mabvuto yanango yanyowani. Kupfunzira chiyankhulo chinyowani komasoti chikhalidwe chinyowani. Koma timbadziwa kuti tikapfunzire vinthu vizinji mu dera mweyi, ndawa ya bvuto ya vandale na ya vipembedzo. Venze vokomedza maninge kuona abale ankuyankhula viyankhulo vosiyanasiyana m’mipingo. Tikwanisa kuona kuti viribe basa kusiyana kwa chikhalidwe. Abale enze obvana ndawa yakuti ambatewedza malangizo ya gulu ya Yahova. Timbachita chidwi maninge na abale ndawa yakuti iwo enze olimba ntima pakulimbana na kutsutsiwa na wanthu wa m’banja yawo, wanthu omwe akhala nawo pafupi, anzawo wa kushikola na wa kubasa.

Mu 2012 tidayenda ku nsonkhano wachigawo ku Tel Aviv, Israel. Muyu wenze nsonkhano woyamba ukulu omwe udachitika mu dziko mweyi kwa wanthu wa Yahova kundochokera mu gole ya 33 C.E. ndipo wenze nsonkhano wosayebweka.

Magole yomwe takhala tinkutumikira mu dziko mweyi, tidafambira pomwe madera yanango yomwe basa yathu ni yolambiziwa. Timbatenga vofalisa vathu, timbayenda mu umboni ndipo timbagumanika pomwe pa misonkhano yadera ing’ono ing’ono. Kulikose komwe tingayende, timbaona masocha yokhala na vida vamphanvu. Koma ndawa yakuti timbakhala tcheru komasoti tenze na abale anango omwe ambakhala kumoku timbadzibva otetezeka.

KUBWERERA KU ÁFRICA

Mu 2013, tidatambira utumiki unango unyowani maninge. Tidatumiziwa kuti tikatumikire ku Ofesi ya Nthambi yaku Kinshasa ku Congo, dziko yomwe ni yodzadza na kukhuza kwa chilengedwe. Koma ina mbiri ikulu ya uphawi ndipo kawirikawiri kuchitika nkhondo. Pakuyamba timbaganiza kuti, “tinkukudziwa kale ku África manje vikakhalelini voshupa maninge.” Koma chaivo ni vakuti tidapfunzira vizinji kumoku makamaka pa maulendo yathu ndawa yakuti dziko mweyi yenze ilibe misewu ikuluikulu komasoti maponti. Ndipo tidaona vinthu vabwino kumoku. Mwakulinganiza, abale ambapirira mokondwa olo kuti ambagumana na bvuto yosowa kobiri. Ambakonda utumiki ndipo ambachita khama kuti akwanise kugumanika pa misonkhano ya mpingo komasoti misonkhano ya dera. Tidachita kuona na maso yathu kuti kukula kwa basa yathu kudakwanisika ndawa ya madaliso ya Yahova. Magole yose yomwe takhala tinkutumikira ku Congo tagumana vinthu vabwino maninge ndawa yakuti tidakwanisa kugumana azishamwali omwe adakhala azibale wathu.

Kumapeto kwa 2017, tidafika ku utumiki wathu unyowani ku a África do Sul. Imweyi ni Ofesi ya Nthambi ikulu maninge yomwe tikanati kutumikirako. Olo utumiki womwe tidatambira wenze wachilendo pomwe kwa isepano. Ndipomwapa, penze pomwe vinthu vizinji kuti tipfunzire. Koma vinthu vomwe tenze tidapfunzira kale kumbuyo vidatithandiza. Kundochokera pomwe tidafika kuno tikondwa maninge kudziwa abale omwe akhala ankupirira kwa magole yazinji pomwe ankutumikira Yahova. Ni vokomedza maninge kuona abale wa pabanja ya Beteli ankuphata basa mobvana olo kuti adachokera kosiyana na vikhalidwe vosiyana. Atumiki wa Yahova achita khama kuti akhale na makhalidwe yanyowani na kuphatisa basa mpfundo za m’Baibolo ndipo phindu ni yakuti Yahova awadalisa na ntendere.

Kwa magole yazinji, Debbie na inepano tatambira mautumiki yokomedza maninge. Tazolowera vikhalidwe vosiyana ndipo tapfunzira pomwe viyankhulu vinyowani. Ni nthawelini zose pomwe vikhala vosashupa. Koma tikwanisa kubva chikondi chokhulupirika cha Yahova chomwe achiwonesa pakuphatisa basa gulu yake komasoti abale na alongo wathu. (Sal. 144:2) Tinkutsimikizira na ntima wose kuti utumiki wa nthawe zose watithandiza kuti tikhale atumiki wa Yahova wabwino.

Nitembeja maninge vose vomwe azibereki wangu adanipfunzisa na thandizo ya nkazi wangu Debbie komasoti chitsanzo chabwino chomwe natambira kwa abale na alongo pa dziko yose. Tikambanyang’ana kutsogolo ndise okonzeka kupitiriza kupfunzisiwa na Mpfunzisi wathu Nkulu Yahova.