Mbakumbukirani malemba

Ko mudashupikako kale kukumbukira lemba yomwe muikonda maninge? Ingakhale yomwe ikulimbikisani, ikuthandizani kulimbana na maganizo yoipa panango yomwe munkufuna kuuzako munthu munango. (Sal. 119:11, 111) Naboni tione mpfundo zinango zomwe zingakuthandizeni kukumbukira malemba.

• Phatisani basa malo yoikhira chizindikiro pa JW Library. Mukakhala kuti munkuwerenga Baibolo pa JW Library nkuona lemba yomwe munkufuna kudzaikumbukira pomwe, imwepo mungaikhe chizindikiro kuti mudzaione pomwe mosashupa.

• Ikhani lemba yomwe muikonda pa mbuto yomwe mungakwanise kumbaiwona. Munganembe pa pepa lemba yomwe muikonda ndipo mungaiyikhe pa malo yomwe mungakwanise kumbaiona kawirikawiri. Anango ayikha pafupi na girazi ya m’nyumba mwawo, anango amatika pa jalera, anango akonda kuchosa foto ya lemba yomwe aikonda nkuikha pa sikirini ya computador panango pa sikirini ya foni yawo.

• Nembani pa kapepa. Nembani mawu ya lemba mweyo saidi inango ndipo saidi inango nembani lemba yake. Yesani kuwerenga mawu na kukumbukira lemba yomwe inena vimwevo. Ndipo mukatembenuza saidi inango onani lemba nkuyesa nkukumbukira mawu yake.