Titembeja maninge Yahova ndawa atikhululukira machimo yathu

1-2. Momwe vinthu viliri kwa wanthu, ko tingavilinganize na mbani?

LINGANIZANI kuti mulumbwana munango adakulira m’banja yolemera maninge. Koma ntsiku inango azibereki wake ankuchita ngozi nkumwalira. Ndipo iye ankuwawiwa maninge na nkhani mweyi. Kuingizira mwapa, pakuchitika chinthu chinango choipa, iye ankuzindikira kuti azibereki wake adadzonga chuma chose cha banja ndipo asiya vikwerete. Manje ganizirani kuti m’malo mwakuti asiyiriwe chuma iye ankusiyiriwa vikwerete vizinji. Ndipo wanthu ankufuna kuti iye awapagali mwakankulumize, koma iye alibe chirichose kuti akwanise kupagali vikwerete mwevi.

² Molingana na mulumbwana moyu, ni momwe vinthu viliri kwa isepano. Azibereki wathu oyambirira Adamu na Hava, enze na moyo waungwiro ndipo ambakhala mu Paradaiso wokhuza maninge. (Gen. 1:27; 2:7-9) Iwo enze na chidikhiro chokhala na moyo wabwino na wosapera. Koma vose vidachinja. Iwo adaluza mwayi wokhala m’Paradaiso komasoti chidikhiro cha moyo wosapera. Ko ni cholowa chiponi chomwe iwo adasiyira wana wawo? Baibolo inena kuti: “Uchimo udangena mudziko kupitira mwa munthu m’bodzi [Adamu] ndipo uchimo muyo udabweresa impfa. Ndipomwapa impfa mwiyo idafalikira kwa wanthu wose ndawa wose adachimwa.” (Aro. 5:12) Cholowa chomwe Adamu adatipasa ni uchimo womwe ubweresa impfa. Uchimo moyu womwe tidatengera kwa Adamu uli ninge chikwerete chikulu chomwe palibe aliyese waise yemwe angakwanise kuchipagali.—Sal. 49:8.

3. Ndawa chani machimo yathu yangalinganiziwe na “vikwerete”?

³ Yesu adalinganiza machimo na “vikwerete.” (Mat. 6:12; Luka 11:4) Tikachimwa tikhala ninge tachita chikwerete kwa Yahova ndipo tinkudekana kupagali malipiro ya chikwerete mwecho. Tikaleka kupagali chikwerete mwechi tiri moyo, chimala tikamwalira.—Aro. 6:7, 23.

4. (a) Sembe palibe thandizo, ko nchani chomwe chidakachitikira wanthu ose ochimwa? (Salimo 49:7-9) (b) Ko mawu yakuti “chimo” yatanthauza chani m’Baibolo? (Onani kabokosi kakuti “Chimo”)

⁴ Ko ni vokwanisika kugumana pomwe vose vomwe Adamu na Hava adaluza? Mwamphanvu zathu tingakwaniselini. (Werengani Salimo 49:7-9.) Tidakaleka kuthandiziwa, tidakakhala tilibe chidikhiro chirichose cha kutsogolo, olo chakumukisiwa. Kulewa chaivo, tidakakhala tinkufa tilibe chidikhiro chakudzakhala pomwe na moyo ninge momwe viliri vinyama.—Mla. 3:19; 2 Pet. 2:12.

5. Ko Ababa wathu wachikondi Yahova adatithandiza tani kupagali vikwerete va machimo yathu?

⁵ Ganizirani pomwe va mulumbwana yemwe tamutomola pakuyamba ule. Ko adakabva tani peno munthu munango wolemera adakadzipereka kuti amupagaliri vikwerete vake vose? Mosakaika adakatembeja maninge kuchokera pasi pa ntima, nkutambira mphaso mweyo. Molingana na vimwevi Ababa wathu wachikondi Yahova adatipasa mphaso yomwe iripira chikwerete cha uchimo womwe tidatengera kwa Adamu. Yesu adafotokoza va mphaso mweyi mwa njira iyi: “Mulungu adakonda maninge dziko mwakuti adapereka Mwana wake wobadwa yekha kuti aliyese womukhulupirira ayi kuti adzongewe koma akhale na moyo wosapera.” (Yoh. 3:16) Kuingizira mwapa mphaso mweyi itipasa mwayi wokhala pa ushamwali na Yahova.

6. Ko ni mawu yaponi yomwe yaphatisiriwa basa m’Baibolo yomwe tiyabvesese bwinobwino mu nkhani ino, ndipo ndawa chani?

⁶ Ko tingaphindule tani na mphaso mweyi yomwe itithandiza kuti timbakhululukiriwe machimo panango kuti “vikwerete” vathu? M’dawiro wa mbvunzo moyu ugumanika mu mawu aya yomwe Baibolo iphatisa basa: Kubveranisa, kufuchira machimo, dipo, kuwombolewa na kuonewa olungama. Munkhani mweyi, tikambirane tanthauzo ya mawu mwaya. Ndipo tikambaganizira tanthauzo ya mawu mwaya na kuona vomwe Yahova adachita kuti atikhululukire, tidzamutembeje maninge.

YAHOVA ANKUFUNISISA KUTI TIKHALE AZISHAMWALI WAKE

7. (a) Ko ni chinthu chinango chiponi chomwe Adamu na Hava adaluza? (b) Pa kukhala wana wa Adamu na Hava, ko isepano tichadekana chani? (Aroma 5:10, 11)

⁷ Kuingizira pa kuluza mwayi wokhala na moyo mpakana kalekale, Adamu na Hava adaluza mwayi wokhala pa ushamwali na Yahova. Pakuyamba Adamu na Hava enze m’banja ya Mulungu. (Luka 3:38) Koma pomwe adaleka kubvera Yahova, iwo adachosewa m’banja mweyi akanati kuyamba kubereka wana. (Gen. 3:23, 24; 4:1) Ndawa ya vimwevi, isepano ninge wana wake tichadekana kubveranisiwa na Yahova. (Werengani Aroma 5:10, 11.) M’mawu yanango tingalewe kuti tinkudekana kulimbisa ushamwali wathu na Yahova. Mawu yachigiriki yomwe yadatsumbudzuliriwa kuti kubveranisa yatanthauza kukhala pa ushamwali na m’zondi wako, ndipo vodabwisa nivakuti Yahova ndiye yemwe adayamba kuchita vimwevi.

MULUNGU ADACHITISA KUTI TIKHALE AZISHAMWALI WAKE

8. (a) Ko kufuchira machimo ni chani? (b) Ko kutetezera ni chani?

⁸ Yahova adachitisa kuti vikwanisike kuti wanthu ochimwa akhale azishamwali wake. Vimwevi ndivo vomwe Baibolo ichalewa kuti kufuchira machimo. Kufuchira machimo kutanthauza kuchinjanisa chinthu na chinango koma nkukhala cholingana. Yahova adachitisa kuti vikhale vokwanisika kubwezeresa chinthu chomwe Adamu adaluza pakupereka chinthu chinango cholingana nacho. Malemba ya Chigiriki ya Chikhrisitu yaphatisa basa mawu yomwe yanatanthauzo yolingana na “kufuchira machimo” yomwe ni kutetezera. (Aro. 3:25) Kutetezera ndiko komwe kuchitisa kuti vikhale vokwanisika kuti munthu akhale wobverana na Mulungu na kukhala naye pa ushamwali.

9. Ko Yahova adachita chani kuti machimo ya Aizirayeli yakhululukiriwe?

⁹ Yahova adachitisa kuti vikhale vokwanisika kuti machimo ya Aizirayeli yambakhululukiriwe nakuti ambakhale pa ushamwali wabwino na iye. Gole iriyose Aizirayeli ambakondwerera ntsiku ya kufuchira machimo. Pa ntsiku mweyi nkulu wantsembe ambapereka ntsembe za nyama kuti wanthu akhululukiriwe. Kulewa shuwa, ntsembe za nyama mwezi zimbapfudziratulini machimo ya wanthu ndawa yakuti wanthu ni wapadzulu maninge kuposha nyama. Koma kwa Aizirayeli omwe enze olapa nkupereka ntsembe zomwe Yahova ambafuna, iwo ambakhala otsimikiza kuti Yahova angawakhululukire machimo yawo. (Aheb. 10:1-4) Kuyingizira mwapa, kupereka ntsembe za nyama mobwerezabwereza kumbakumbusa Aizirayeli kuti iwo enze ochimwa. Kuti machimo yawo yakhululukiriwe mpakana kalekale, ambadekana chinthu chinango chikulu maninge.

10. Ko nchani chomwe Yahova adachita kuti machimo ya wanthu yakhululukiriwe mpakana kalekale?

¹⁰ Ko Yahova adachita chani kuti ambakhululukire wanthu machimo yawo mpakana kalekale? Iye adachitisa kuti mwana wake wokondewa Yesu apereke ntsembe kabodzi kokha basi kuti atakule machimo ya wanthu azinji. (Aheb. 9:28) Yesu adapereka moyo wake kuti ukhale dipo yowombola wanthu azinji. (Mat. 20:28) Manje ko dipo nchani?

MALIPIRO YOMWE YADAPAGALIWI KUTI TIKWANISE KUKHALA AZISHAMWALI WA MULUNGU

11. (a) Mobverana na Baibolo, ko dipo ni chani? (b) Ko ni munthu m’bodzi mponi yemwe adakakwanisa kupereka moyo wake ninge dipo?

¹¹ Baibolo inena kuti Yahova adawona kuti kenze kodekana kupagali dipo kuti machimo yathu yakhululukiriwe nakuti timbakhale azishamwali wake.a Ko chidakaperekewa ni chani chomwe chidakakwanisa kubwezeresa vomwe Adamu adaluza? Kumbukirani kuti Adamu na Hava adaluza moyo wa ungwiro na mwayi wokhala na moyo mpakana kalekale. Ndawa ya vimwevi malipiro ya dipo yambadekana kukhala yolingana na vomwe vidaluzika. (1 Tim. 2:6) Malipiro mwaya yadakakwanisika kupagaliwi na munthu nkulu yemwe (1) adakakhala wa ungwiro; (2) adakakwanisa kukhala na moyo pa dziko mpakana kalekale; ndipo (3) adakakhala wokonzeka kupereka moyo wake ntsembe ndawa ya isepano. Mwanjira mweyi moyo wa munthu moyu udakakwanisa kupagali vire vomwe vidaluzika.

12. Ndawa chani Yesu angadekana kupereka moyo wake ninge dipo?

¹² Ndawa chani Yesu angadekana kupereka dipo? Onani vifukwa vitatu ivi: (1) Iye wenze wa ungwiro ndipo “alibe kuchitako chimo.” (1 Pet. 2:22) (2) Ndawa yakuti iye adakakwanisa kukhala na moyo mpakana kalekale pano pa dziko yapasi. (3) Iye wenze wokonzeka kupereka moyo wake ndawa ya isepano. (Aheb. 10:9, 10) Yesu wenze munthu wa ungwiro ninge momwe Adamu wenzere akanati wachimwa. (1 Akor. 15:45) Ndawa yakutifera, Yesu adakwanisa kupagali ndendende vinthu vomwe Adamu wenze adaluza. (Aro. 5:19) Mwanjira mweyi Yesu adakhala “Adamu womalizira.” Palibe chifukwa chakuti munthu munango wa ungwiro abwere pomwe kudzapagali vinthu vomwe Adamu adaluza. Viri tene ndawa yakuti Yesu adadzipereka kabodzi kokha kuti akhale ntsembe yothandiza wanthu “mpakana kalekale.”—Aheb. 7:27; 10:12.

13. Ko pali kusiyana kuponi pakati pa makonzedwe ya kufuchira machimo na dipo?

¹³ Ko pali kusiyana kuponi pakati pa makonzedwe ya kufuchira machimo na dipo? Makonzedwe ya kufuchira machimo ni vomwe Mulungu achachita kuti tikhale azishamwali wake. Ndipo dipo ni malipiro yomwe yadapagaliwi kuti vimbakhale vokwanisika kuti machimo ya wanthu yambakhululukiriwe. Malipiro ya dipo yankuimira magazi ya Yesu yomwe yadakhesewa ndawa ya isepano.—Aef. 1:7; Aheb. 9:14.

YAHOVA ADATIMASULA KU UCHIMO NA IMPFA NDIPO ADATIONA OLUNGAMA

14. Ko tikambirane chani manje?

¹⁴ Ko tiphindula tani na vomwe Yahova adatichitira? Kuti tidawire mbvunzo moyu, naboni tione tanthauzo ya mawu yawiri yomwe yaphatisiwa basa m’Baibolo yomwe yatithandiza kubvesa momwe tingaphindulire na kukhululuka kwa Yahova.

15-16. (a) M’Baibolo, ko mawu yakuti “kuwombola” yatanthauza chani? (b) Ko tichabva tani pakudziwa kuti tidamasuliwa ku uchimo na impfa?

¹⁵ M’Baibolo, mawu yakuti kuwombola yatanthauza kumasuliwa komwe tinako ndawa ya malipiro ya dipo. Ntumi Petulo adalewa va kumasuliwa muku. Iye adanena kuti: “Imwepo munkudziwa kuti vinthu vomwe vidakumasulani ku moyo wanu womwe ulibe na basa womwe mudautengera kwa azibereki wanu venzelini vinthu vomwe vingadzongeke ninge, siliva panango golide. Koma [‘mudaombolewa’] na magazi yapadzulu, ninge ya mwana wa nkhosa alibe uchimo yemwe ni Khrisitu.”—1 Pet. 1:18, 19; mawu ya m’nyantsi.

¹⁶ Ndawa ya ntsembe ya dipo, isepano tingamasuliwe ku uchimo na impfa na mabvuto yose yomwe vinthu mwevi vibweresa. (Aro. 5:21) Tikayikiralini kuti isepano tinachikwerete chikulu maninge kwa Yahova na Yesu Khrisitu ndawa ya vomwe iwo adachita potimasula na magazi yapadzulu maninge panango kuti moyo wa Yesu.—1 Akor. 15:22.

17-18. (a) Ko kuonewa olungama kutanthauza chani? (b) Ko vimwevi vinkutanthauza chani kwa aliyese wa isepano?

¹⁷ Baibolo inena kuti atumiki wa Yahova awonewa kuti ni olungama. Vimwevi vikutanthauza kuti Yahova awachichimizalini kuti iwo ambapagali machimo yomwe ayachita. Koma olo viri teno, iye anyalanyazalini mpfundo zake zolungama. Iye ationa olungama ndawa ya chikondi chake. Andokhaliralini kunyang’anisisa vophonya vathu. Shuwadi, Yahova ni wokonzeka kutikhululukira ndawa ya chikhulupiriro chomwe tinacho pa vomwe iye na mwana wake Yesu adachita kuti atiwombole.—Aro. 3:24; Agal. 2:16.

¹⁸ Ko vimwevi vikutanthauza chani kwa aliyese wa isepano? Wale omwe adasaluliwa kuti akatonge kudzulu pabodzi na Yesu Khrisitu adaonewa kale kuti ni olungama komasoti wana wa Mulungu. (Tito 3:7; 1 Yoh. 3:1) Machimo yawo yadakhululukiriwa. Viri ninge kuti iwo alibe kuchitako machimo. Mwanjira mweyi iwo ni obvumiziwa kukhala mu Ufumu. (Aro. 8:1, 2, 30) Wale omwe anachidikhiro chodzakhala pano padziko yapasi mpakana kalekale, adaonewa olungama ninge azishamwali wa Mulungu ndipo machimo yawo yakhululukiriwa. (Yak. 2:21-23) Wanthu azinji omwe adzapulumuke pa Arumagedo, anamwayi wodzakhala na moyo mpakana kalekale. (Yoh. 11:26) “Olungama” komasoti “osalungama” omwe adamwalira, anachidikhiro chodzamukisiwa. (Mac. 24:15; Yoh. 5:28, 29) Nkuyenda kwa nthawe, atumiki ose wa Yahova omwe adzakhale padziko yapasi omwe ni obvera adzakhale na “ufulu wa ulemelero wa wana wa Mulungu.” (Aro. 8:21) Tikhala okondwa maninge tikaganizira nthawe yomwe tidzakhale wana wa ungwiro wa Ababa wathu Yahova.

19. Ko vinthu vidachinja tani kwa isepano? (Onani bokosi yakuti “Ko vimwevi vinkutanthauza chani kwa isepano?”)

¹⁹ Shuwadi, momwe vinthu venzere kwa isepano vikulingana na mulumbwana yemwe tamutomola kumayambiriro kwa pfunziro ino yemwe adaluza vose ndipo adasiyiriwa vikwerete vomwe adakakwanisalini kuvipagali. Koma mwa chikondi cha Yahova tidathandiziwa. Vinthu vidachinja kwa isepano ndawa ya kufuchiriwa kwa machimo komasoti malipiro ya dipo. Chikhulupiriro chathu kwa Yesu Khrisitu chitithandiza kuti timasuliwe ku uchimo na impfa. Machimo yathu yangakhululukiriwe pomwe, ndipo Yahova akachita vimwevi vikhala ninge tiribe kuchimwako. Koma chodekana maninge kuposha vose ni chakuti tingakwanise kukhala pa ushamwali na Ababa wathu wachikondi, Yahova.

20. Ko tidzaone chani mu pfunziro inkubwera?

²⁰ Isepano titembeja maninge Yahova na Yesu tikambaganizira vose vomwe iwo adatichitira. (2 Akor. 5:15) Adakakhala kuti alibe kutithandiza tidakakhala tiribe chidikhiro chirichose. Ko kukhululuka kwa Yahova kutanthauza chani kwa aliyese wa isepano payekha? Ni vomwe tidzakambirane mu pfunziro yomwe inkubwera.