NKHANI YOPFUNZIRA 43
NYIMBO NA. 90 Tizilimbikitsana
Vomwe tingachite kuti tileke kudzikaikira
“Mumbafagefage vinthu vose.”—1 ATES. 5:21.
CHOLINGA
Kuona momwe tingamalisire maganizo ya kudzikaikira yomwe yangasokoneze utumiki wathu kwa Yahova.
1-2. (a) Ko atumiki wa Yahova angambakaikire va chani? (b) Ko tikambirane chani mu pfunziro mweino?
WANTHU wa misinkhu yose, nthawe zinango adzikaikira.a Mwakulinganiza, ganizirani va mulumbwana wa Mboni za Yahova yemwe nthawe zinango adzibvunza kuti peno Yahova amuganizira. Iye nthawe zinango angakaikire va kubatizika kwake. Ganizirani pomwe va wachikulire yemwe adakali mulumbwana adasalula kuikha Ufumu wa Mulungu pa malo yoyamba m’malo mwa kuchita vinthu va kudziko uku. Ndawa yakuti manjeuno ankugumana na bvuto yosowa kobiri, iye angambaganize kuti adasalula mophonyeka. Ganizirani pomwe va mulongo wachikulire yemwe anamphanvu zochepa, iye ankukwinyirira ndawa yakuti ankuchitalini vizinji pakulinganiza na vomwe ambachita pakuyamba. Ko nthawe zinango mudzibvunza kuti: ‘Ko Yahova aniganizira? Ko vinthu vomwe nidachita kwa Yahova vinaphindu? Ko nidakali wofunika kwa Yahova?’
2 Tikasiya mibvunzo mwaya ne kugumana midawiro yake, vingasokoneze ushamwali wathu na Yahova. Mu pfunziro mweino tikambirane momwe kuikha maganizo yathu pa mpfundo za m’Baibolo kungatithandizire peno tikaikira kuti (1) peno Yahova ationa kuti ndise ofunika, (2) peno vomwe tidasalula kumbuyo ni vodekana, ndipo (3) peno tidakali wofunika kwa Yahova.
VOMWE TINGACHITE KUTI TILEKE KUMBADZIKAIKIRA
3. Ko ni njira iponi yomwe ingatithandize kuti tileke kumbadzikaikira?
3 Njira ibodzi yomwe ingatithandize kuti tileke kumbadzikaikira ni kuwerenga Mawu ya Mulungu kuti tigumane midawiro ya mibvunzo yathu. Tikachita vimwevi tidzalimbikisiwe, tidzakule mwauzimu ndipo tidzakhale okonzeka kuti tipitirize kukhala na “chikhulupiriro cholimba.”—1 Akor. 16:13.
4. Ko tingakwanise tani “kufagafaga vinthu vose”? (1 Atesalonika 5:21)
4 Werengani 1 Atesalonika 5:21. Onani kuti Baibolo inena kuti “Mumbafagefage vinthu vose.” Ko tingachite tani vimwevi? Tingatsimikizire kuti vomwe tichakhulupirira ni chaivo pakulinganiza vomwe Baibolo ichanena. Mwakulinganiza, linganizani na mulumbwana yemwe ambadzibvunza kuti peno ni wobvumizika pa maso pa Mulungu. Ko iye achadekana kutsimikiza kuti maganizo mwaya ni chaiyo? Neye. Iye achadekana “kufagafaga vinthu vose” pakudziwa maganizo ya Yahova pa nkhani mweiyi.
5. Ko tingagumane kuponi midawiro ya mibvunzo yathu?
5 Pomwe tinkuwerenga Mawu ya Mulungu ‘tichabva’ Yahova ankuyankhula nase. Koma kuti tibvese maganizo ya Yahova pa nkhani inango tichadekana kuchita khama kufagafaga. Tichadekana kuikha maganizo yathu pa kuwerenga Baibolo makamaka pa nkhani yomwe inkutichitisa nkhawa. Tingafage va nkhani mweiyo pakuphatisa basa vinthu vizinji vopfunzirira vomwe gulu ya Yahova ipereka. (Miy. 2:3-6) Tingakumbire Yahova kuti atithandize pomwe tinkufagafaga nakuti tidziwe maganizo yake pa mbvunzo wathu. Patsogolo pake tingafage mpfundo za m’Baibolo na vinthu vomwe vingatithandize pa nkhani yathu. Tingaphindule pomwe pa kuwerenga va atumiki wa Yahova wakalekale omwe adagumana na vinthu vomwe vinkulingana na vomwe tinkugumana navo.
6. Ko misonkhano yangatithandize tani kumalisa bvuto ya kudzikaikira?
6 Yahova ayankhula nase pomwe pakuphatisa basa misonkhano. Tikambagumanika pa misonkhano nthawe zose, tingabve chinthu chinango pa nkhani panango pa ndemanga yomwe m’bale panango mulongo angapereke yomwe tinkudekana kuti timalise bvuto ya kudzikaikira. (Miy. 27:17) Manje naboni tione vomwe tingachite kuti timalise bvuto mweyi.
PENO MUKAIKIRA KUTI YAHOVA AKUONANI KUTI NDIMWE OFUNIKA
7. Ko mungadzibvunze mbvunzo uponi?
7 Ko mudadzibvunzako kale kuti ‘ko Yahova aniganizira?’ Peno mudziona kuti ndimwe wosafunika, vingaoneke ninge ni vosakwanisika kukhala pa ushamwali na Mulengi wa chilengedwe chose. Vingachitike kuti maganizo ninge mwaya yadamubwererambo Mpfumu Davide. Iye adadabwa kuona kuti Yahova adziwa olo wanthu omwe adziona kuti ni osafunika ndipo adabvunza kuti: ‘Imwe Yahova, munthu ni mbani kuti mumbamuganizire? Ko mwana wa munthu ni mbani kuti mumbamuwerengere?’ (Sal. 144:3) Ko midawiro ya mibvunzo mwaya mungayagumane kuponi?
8. Mobverana na 1 Samueli 16:6, 7, 10-12, ko Yahova aona chani kwa wanthu?
8 Tipfunzira m’Baibolo kuti Yahova aona wanthu ose kukhala ofunika olo wale omwe aoneka kuti ni osafunika kwa anango. Mwakulinganiza, Yahova adatumiza Samueli ku nyumba kwa Jese kuti akadzodze m’bodzi mwa wana wake kuti adzakhale mpfumu ya Aizirayeli. Pa wana wake 8, Jese adachemera 7 kuti adzaonekere kwa Samueli koma Davide yemwe wenze mwana ng’ono maninge alibe kumuchemera.b Koma pamwapa ni Davide yemwe adasaluliwa na Yahova. (Werengani 1 Samueli 16:6, 7, 10-12.) Yahova adaona ntima wa Davide, iye adaona kuti wenze mulumbwana yemwe ambalemekeza vinthu vauzimu.
9. Ko mungatsimikizire tani kuti Yahova akuganizirani? (Onani pomwe foto.)
9 Ganizirani momwe Yahova waonesera kale kuti akuganizirani imwepo. Iye adzipereka pa kukupasani malangizo yobverana na mabvuto yanu. (Sal. 32:8) Ko iye angachite tani vimwevi peno akudziwanilini bwinobwino? (Sal. 139:1) Mukambaphatisira basa malangizo ya Yahova na kuona momwe yangakuthandizireni mudzatsimikizire kuti Yahova akuganizirani. (1 Mbiri 28:9; Mac. 17:26, 27) Yahova aona khama yanu. Iye aona makhalidwe yanu ya muntima ndipo alimbikisiwa kuti akuthandizeni. (Yer. 17:10) Iye ankufuna kuti mubvume kukhala shamwali wake.—1 Yoh. 4:19.
‘Mukambamufagafaga [Yahova], iye adzabvume kuti mumugumane.’ —1 Mbiri 28:9 (Onani ndime 9)c
MUKAMBAKAIKIRA KUTI PENO MUDACHITA VOSALULA VABWINO
10. Tikambakumbukira vomwe tidasalula m’buyo, ko tingakhale na mibvunzo iponi?
10 Pakapita nthawe, anango angambaganizire vosalula vomwe adachita kumbuyo nkumbadzibvunza kuti peno adasalula vinthu vabwino. Anango adasiya basa yawo yabwino, bizi yawo yabwino kuti akwanise kutumikira Yahova bwinobwino. Koma manjeuno papita nthawe mpakana magole yazinji. Panango mungagumane na wanthu omwe adapitiriza kufagafaga vinthu vakuthupi ndipo manjeuno vinkuoneka kuti vinkuwafambira. Ndawa ya vimwevi mungadzibvunze kuti: ‘Ko vomwe nidasalula pakutumikira Yahova ni vothandizadi? Panango vidandonichitisa kuti niluze vinthu vinango?’
11. Ko wonemba Salimo 73 ambashupika na maganizo yaponi?
11 Peno mibvunzo ninge mwaya yankukuchitisani nkhawa, ganizirani momwe wonemba Salimo 73 adabvera. Iye adaona wanthu anango ankukondwa na moyo womwe umbaoneka ninge ulibe mabvuto. (Sal. 73:3-5, 12) Pakuona wanthu mwawo omwe ambaoneka ninge vinthu vinkuwafambira bwino, iye adayamba kuona kuti vomwe ambachita pakutumikira Yahova viribe phindu. Iye ‘adashupika na maganizo mwaya ntsiku yose.’ (Sal. 73:13, 14) Ko iye adayamalisa tani?
12. Mobverana na Salimo 73:16-18, ko wonemba Salimo mweyi adamalisa tani mabvuto yake?
12 Werengani Salimo 73:16-18. Iye adangena m’malo yopatulika ya ulemerero wa Mulungu. Kumoku iye adayamba kuganiza bwinobwino. Iye adazindikira kuti olo anango omwe ambaoneka kuti vinthu vinkuwafambira, tsogolo yawo yenzelini yabwino. Ndawa yobvesa vimwevi, iye adagumana ntendere wa m’maganizo pakudziwa kuti kuikha vinthu vauzimu pa malo yoyamba ni chinthu chabwino maninge. Ndawa ya vimwevi iye adabwezeresa pomwe chifuno chake cha kupitiriza kutumikira Yahova.—Sal. 73:23-28.
13. Ko imwepo mungagumane tani ntendere wa m’maganizo peno mukaikira pa vinthu vomwe mudasalula m’buyo? (Onani pomwe foto.)
13 Imwepombo mungagumane ntendere wa m’maganizo moyu na thandizo ya Mawu ya Mulungu. Mwanjira yanyi? Ganizirani va kufunika kwanu na madaliso yomwe tidapolomisiwa ndipo linganizani vimwevi na wale omwe adikhira kuti maphindu yawo yachokere kudziko uku. Iwo angathembe vinthu vomwe akwanisa kugumana kudziko iyi ndawa yakuti palibe chirichose chomwe ankudikhira kutsogolo. Koma kwa imwepo, Yahova ankukupolomisani madaliso yazinji maninge kuposha yomwe imwepo munkuyaganizira. (Sal. 145:16) Ganizirani pomwe ivi: Ko ntsiku inango tidzakwanise kudziwa momwe moyo wathu udakakhalira sembe tidasalula kuchita vinthu vinango? Chaivo ni vakuti, munthu yemwe achasalula vinthu ndawa yokonda Mulungu na wanthu anango adzaluzelini vinthu vabwino.
Dikhirani mokondwa madaliso yomwe Yahova wapolomisa (Onani ndime 13)d
MUKAMBAKAIKIRA KUTI NDIMWE WOFUNIKA
14. Ndawa chani anango adzikaikira ndipo angadzibvunze mbvunzo uponi?
14 Atumiki anango wa Yahova ankulimbana na mabvuto yomwe yabwera ndawa ya uchikulire, mabvuto ya thanzi panango ndawa ya kupunduka. Vimwevi vingachitise kuti ayambe kukaikira kufunika kwawo pa maso pa Yahova. Panango mungadzibvunze kuti, ‘ko nidakali wofunika kwa Yahova?’
15. Ko wonemba Salimo 71 ambatsimikizira va chani?
15 Wonemba Salimo 71 adafotokoza vinthu vomwe vimbamuchitisa kukhala na nkhawa. Iye adapemphera kuti: ‘Ayi kunisiya pomwe mphanvu zangu zinkumala.’ (Sal. 71:9, 18) Olo nteno, wamasalimo adapitiriza kukhala wotsimikiza kuti akapitiriza kutumikira Mulungu mokhulupirika, Yahova adzamutsogolere na kumuthandiza. Ninge momwe wamasalimo adapfunzirira, Yahova akhala wokondwa na wale omwe ankuchita vomwe angakwanise kuti amutumikire podiya kuti ankugumana na mabvuto.—Sal. 37:23-25.
16. Ko wachikulire ni ofunika tani kwa Yahova? (Salimo 92:12-15)
16 Wachikulire, mumbaone vinthu pa moyo wanu ninge momwe Yahova avionera. Iye angakuthandizeni kuti mupite patsogolo mwauzimu podiya kuti munkugumana na mabvuto yakuthupi. (Werengani Salimo 92:12-15.) M’malo mwakuti muikhe maganizo yanu pa vinthu vomwe mungavikwaniselini, ikhani maganizo yanu pa vinthu vomwe mungavikwanise kuchita. Mwakulinganiza, mungathandize anzanu na chitsanzo chanu chokhulupirika na khama yanu yomwe muchaonesa. Imwepo mungambayankhule momwe Yahova wakuthandizirani pa magole yose yomwe mwakhala munkumutumikira na kuuza anango va chidikhiro chanu pa kukwanirisika kwa mapolomisi ya Yahova. Ndipo ayi kukaikira kuti mapemphero yanu yangakhale yothandiza kwa anango. (1 Pet. 3:12) Viribe basa momwe vinthu viliri pa moyo wanu, tose tina chinthu chomwe tingapereke kwa Yahova na kwa wanthu anango.
17. Ndawa chani tichadekana kupewa maganizo yodzilinganiza na anango?
17 Panango imwepo ndimwe okhumudwa ndawa munkukwanisalini kuchita vizinji pakutumikira Yahova. Peno nteno dziwani kuti Yahova alemekeza vinthu vose vomwe imwepo mukwanisa kuchita. Nthawe zinango mungambafune kulinganiza vomwe muchachita na vomwe anango achita, koma ayi kuchita vimwevi. Ndawa chani? Ndawa yakuti Yahova alinganizalini tene. (Agal. 6:4) Mwakulinganiza, Mariya adapasa Yesu mphaso yodula maninge ya mafuta yonunkhira. (Yoh. 12:3-5) Ndipo mosiyana na vimwevi, nkazi wamasiye wosauka adachita chopereka ku kachisi tukobiri tuwiri tung’ono tochepa mphanvu. (Luka 21:1-4) Olo nteno, Yesu adaona mphaso zose zimwezi ninge chitsimikizo cha chikhulupiriro chawo. Ababa wanu wakudzulu Yahova alemekeza maninge vose vomwe muchachita pa kumutumikira ndawa ya chikondi chanu kwa iye podiya vichioneka kuti vomwe muchachita ni ving’onong’ono.
18. Ko nchani chingatithandize kumalisa maganizo yodzikaikira? (Onani bokosi yakuti: “Mawu ya Mulungu yangakuthandizeni kumalisa maganizo yodzikaikira.”)
18 Tose tikaikira nthawe zinango. Koma ninge momwe taonera, Mawu yokhulupirika ya Mulungu yangatithandize kulimbana na bvuto mweyi. Ndipomwapa, yesesani kumalisa kudzikaikira. Ndipo bvumani kuti chikhulupiriro chanu chimalise nkhawa yanu. Mosakaika Yahova akuonani kuti ndimwe munthu wofunika, iye alemekeza vomwe muchachita ndipo ni wofunisisa kukudalisani. Tsimikizirani kuti Yahova aona atumiki wake ose okhulupirika kukhala oyenerera kutambira chikondi chake na chisamaliro chake.
NYIMBO NA. 111 Tili Ndi Zifukwa Zambiri Zokhalira Osangalala
a MAWU YOFOTOKOZERA: Mu nkhani ino tinkulewa va kukaikira komwe kutichitisa kuti tileke kumbadziona kukhala ofunika kwa Yahova na kukaikira pa vomwe tidasalula kuchita kumbuyo. Kumoku ndikolini kukaikira komwe kutomolewa m’Baibolo komwe kuonesa kuti tiribe chikhulupiriro panango kuti tinkukaikira mapolomisi ya Yahova.
b Olo kuti Baibolo ifotokozalini magole chaiyo yomwe Davide wenze nayo pomwe Yahova adamusalula, vingachitike kuti iye wenze mulumbwana.—Onani Nsanja ya Olonda ya 1 Setembro 2011, tsa. 29 ndi. 2.
c MAWU YOFOTOKOZERA MAFOTO: Mulongo wachitsikana ankufagafaga Yahova pa kufufudza malangizo yake m’Malemba.
d MAWU YOFOTOKOZERA FOTO: M’bale ankuphata basa kuti asamalire banja yake, koma m’maganizo yake ankuganizira va Paradaiso.