Ko munkudziwa

Ko tinkudziwa tani kuti nyimbo zenze zodekana maninge pa moyo wa Aizirayeli?

KUYIMBA nyimbo chenze chikhalidwe cha Aizirayeli. Kazinjikazinji Baibolo ifotokoza va wanthu omwe ambaphatisa basa vipangizo pa kuyimba nyimbo. Pa magawo 10 ya malemba gawo ibodzi ni nyimbo. Mwakulinganiza, bukhu ya Masalimo, Nyimbo ya Solomo na Maliro yadanembewa kuti yambayimbiwe. Bukhu inango yakuti Music in Biblical Life ifotokoza kuti “Aizirayeli ambaphatisa basa nyimbo pa vochitika vizinji.”

Kuimba nyimbo pa moyo wawo wa ntsiku na ntsiku. Aizirayeli ambaimba nyimbo zowonesa momwe angabvera. (Yes. 30:29) Akazi ambaliza maseche na kuimba komasoti kuvina pa kuikha mpfumu inyowani, pa mafesta komasoti akawina ku nkhondo. (Ower. 11:34; 1 Sam. 18:6, 7; 1 Maf. 1:39, 40) Aizirayeli ambaimba pomwe nyimbo zobvesa ntsisi pa maliro. (2 Mbiri 35:25) Mobverana na McClintock na Strong’s Cyclopedia “Aheberi enze wanthu okonda kuimba.”

Nyimbo ku nyumba ya mpfumu. Mafumu ya Chiyizirayeli yambakonda nyimbo. Mpfumu Sauli idatenga Davide kuti ambakhale m’nyumba mwake na cholinga chakuti ambamuimbire nyimbo. (1 Sam. 16:18, 23) Pomwe Davide adakhala mpfumu adakonza voimbira, ambapeka nyimbo ndipo patsogolo pake adasalula pomwe wanthu oimba pa kachisi. (2 Mbiri 7:6; Amosi 6:5) Mpfumu Solomo wenze na amuna na akazi oimba pa nyumba yake.—Mla. 2:8.

Nyimbo pa kutamanda Yahova. Chofunika maninge nchakuti Aizirayeli ambaphatisa basa nyimbo pa kutamanda Yahova. Ndipo aimbi okwana 4 000 ambaimba pa kachisi ku Yerusalemu. (1 Mbiri 23:5) Iwo ambaimba pakuphatisa basa zinganga, voimbira va vingwe, azeze na vitoliro. (2 Mbiri 5:12) Koma aimbi mwawa, ndiwolini okha omwe ambatamanda Yahova na nyimbo. Vinkuonesa kuti Aizirayeli azinji ambaimbambo nyimbo pa maulendo yawo yoyenda kuphwando ya pagole ku Yerusalemu. (Sal. 120-134) Ndipo mobverana na onemba Wachiyuda Aizirayeli ambaimba Masalimo ya Aleluyaa pa pasika.

Mpakana manje nyimbo ni zodekana kwa wanthu wa Mulungu. (Yak. 5:13) Isepano tiyimba ndawa ni mbali ibodzi ya kupemphera kwathu. (Aef. 5:19) Nyimbo zitithandiza kukhala obverana na Akhrisitu anzathu. (Akol. 3:16) Ndipo zitilimbikisa tikagumana na mabvuto. (Mac. 16:25) Nyimbo ni njira yabwino maninge yowonesera chikhulupiriro chathu kwa Yahova na chikondi chathu kwa iye.