NKHANI YOPFUNZIRA 42
NYIMBO NA. 103 Abusa Ndi Mphatso
Tembejani amuna omwe Yahova na Yesu awaphatisa basa mumpingo
“Padakwira pamalo yapadzulu . . . , adapereka amuna kuti akhale mphaso.”—AEF. 4:8.
CHOLINGA
Kuona momwe atumiki othandiza, akulu na onyang’anira madera atithandizira na kuona momwe tingaonesere kuti titembeja basa zomwe amuna okhulupirika mwawa achita.
1. Ko ni mphaso iponi yomwe Yesu adatipasa?
PALIBE munthu yemwe adakhalako wopasa ninge Yesu. Pomwe wenze pano padziko yapasi, iye adaphatisa basa mphanvu zake kuti athandize wanthu anango. (Luka 9:12-17) Iye adapereka mphaso yabwino maninge kuposha zose pakupereka moyo wake ndawa ya isepano. (Yoh. 15:13) Kundochokera pomwe adamukisiwa, Yesu ankupitiriza kukhala wopasa ninge momwe adapolomisira. Iye adakumbira Yahova kuti atipase mzimu wake uchena kuti utipfunzise na kutilimbikisa. (Yoh. 14:16, 17, mawu ya m’nyantsi.; 16:13) Ndipo pakuphatisa basa misonkhano ya mpingo, Yesu ankupitiriza kutitherena kuti tipfunzise wanthu Baibolo padziko yose.—Mat. 28:18-20.
2. Ko ni mbani omwe adaperekewa ninge mphaso zomwe zitomolewa pa Aefeso 4:7, 8?
2 Ganizirani mphaso inango ya Yesu. Ntumi Paulo adanemba kuti pomwe Yesu adayenda kudzulu, “adapereka amuna kuti akhale mphaso.” (Werengani Aefeso 4:7, 8.) Paulo adafotokoza kuti Yesu adapereka mphaso mwezi kuti zithandize mpingo mwa njira zizinji. (Aef. 1:22, 23; 4:11-13) Ntsiku zino, amuna wa maudindo mwawa ankuphatanidzapo atumiki othandiza, akulu mumpingo na onyang’anira madera.a Mwachibadwa amuna mwawa alibe ungwiro ndipomwapa aphonyesa vinthu vinango. (Yak. 3:2) Koma Ambuya wathu Yesu Khrisitu aphatisa basa amuna mwawa pakutithandiza. Zimwezi nimphaso zake kwa isepano.
3. Fotokozani momwe tose tingathandizire basa za “mphaso za amuna.”
3 Yesu adaikha “amuna kuti akhale mphaso” kuti alimbise mpingo. (Aef. 4:12) Koma tose tingawathandize kukwanirisa udindo wawo wodekana moyu. Mwakulinganiza, anango mwa isepano tithandiza pa kumanga Nyumba za Ufumu. Anango athandiza basa mweyi pakupereka chakudya, vofambira na vinthu vinango. Mwanjira ibodzibodzi mweyi, mwa mawu yathu na vochita vathu tose isepano tingathandize basa zomwe atumiki othandiza, akulu na onyang’anira dera achita. Naboni tikambirane momwe tiphindulira na basa zomwe iwo aziphata mwakhama na momwe tingawaonesere kuti tiwatembeja na kuti titembeja Yesu yemwe adatipasa amuna mwawa.
ATUMIKI OTHANDIZA APHATA BASA “ZABWINO MANINGE”
4. Ko ni “basa zinango ziponi zabwino” zomwe atumiki othandiza wa mu nthawe ya atumi ambachita?
4 Munthawe ya atumi, abale anango adayikhiwa kukhala atumiki othandiza. (1 Tim. 3:8) Vinkuoneka kuti ndiwo omwe adaphata “basa zabwino maninge” zomwe Paulo adanena. (1 Akor. 12:28) Vinkuonekeratu kuti atumiki othandiza asamalira nkhani zofunika maninge kuti akulu ambayikhe maganizo yawo pakupfunzisa na kusamalira nkhosa za Mulungu. Mwakulinganiza, atumiki othandiza panango ambathandiza pakukopiyali Malemba, ndipo panango ambagula vinthu vophatisira basa pakukopiyali Malemba mwaya.
5. Ko ni basa zinango ziponi zabwino zomwe atumiki othandiza wantsiku zino achita?
5 Ganizirani basa zabwino zomwe atumiki othandiza aphata pa mpingo wanu. (1 Pet. 4:10) Angayikhiwe kuti anyang’anire makaunti ya mpingo panango kunyang’anira gawo ya mpingo, kukumbira mabukhu, kugawira mabukhu abale na alongo, kuphata basa na vokuzira mawu, kutumikira ninge akalinde panango kusamalira Nyumba ya Ufumu. Basa zose zimwezi ni zofunika kuti vinthu vifambe bwino mumpingo. (1 Akor. 14:40) Kuingizira mwapa, atumiki othandiza anango akamba nkhani pa misonkhano ya nkati mwa sondo panango nkhani za ose. Atumiki othandiza angayikhiwe kuti athandize wonyang’anira kagulu ka utumiki. Ndipo nthawe zinango ntumiki wothandiza woyenerera, angaperekeze akulu kukachita maulendo ya ubusa.
6. Ko ni vifukwa vinango viponi vomwe vitichitisa kutembeja basa zomwe atumiki othandiza achita?
6 Ko basa ya atumiki othandiza iphindulisa tani mpingo? Mulongo munango wa ku Bolivia dzina yake Beberly,b adanena kuti: “Ndawa ya atumiki othandiza, nikonda maninge misonkhano. Ndawa ya basa zawo ningakwanise kuyimba, kuyankha, kubvesera nkhani, kuphindula na mavidiyo komasoti mafoto. Iwo awonesesa kuti ndise otetezeka komasoti athandiza wale omwe ankubvesera misonkhano pophatisa basa foni. Misonkhano ikamala, iwo athandiza kunyang’anira basa yochenesa Nyumba ya Ufumu, anyang’anira va makaunti komasoti aonesesa kuti tinavofalisa vokwana. Niwatembeja maninge ndawa ya vimwevi.” Leslie, yemwe akhala ku Colômbia yemwe mwamuna wake atumikira ninge nkulu adanena kuti: “Mwamuna wangu athemba atumiki othandiza kuti akwanise kusamalira mautumiki yanango. Palibe iwo, adakakhala wopanikizika maninge. Ndipomwapa, nitembeja ndawa yakudzipereka kwawo pakuthandiza.” Mosakaika, imwembo muchabva teneuyu na basa zomwe atumiki othandiza achita mumpingo mwanu.—1 Tim. 3:13.
7. Ko tingaonese tani kuti titembeja basa zomwe atumiki othandiza achita? (Onani pomwe foto.)
7 Nthawe zinango tingambawatembeje atumiki othandiza cha muntima koma Baibolo itilimbikisa kuti: “Wonesani kuti ndimwe otembeja.” (Akol. 3:15) Cristóvão, nkulu munango wa ku Finlândia, adanena kuti awonesa kutembeja mwa njira iyi: “Nitumiza kalata panango mensaje pomwe ninembapo vesi, ndipo nilewa mwa sitiriti njira yomwe ntumiki wothandiza wanilimbikisira panango kuti nitembeja maninge na basa zomwe iye aphata.” Pascal na Jael, omwe akhala ku Nova Caledônia, apempherera atumiki othandiza mwa sitiriti. Pascal adafotokoza kuti: “Ntsiku zino tipemphera mogwigwirira atumiki othandiza wa mumpingo mwathu.” Yahova achabvesera mapemphero mwaya, ndipo ose mumpingo aphindula.—2 Akor. 1:11.
AKULU MUMPINGO “APHATA BASA MWAKHAMA PAKATI PANU”
8. Ndawa chani Paulo adanemba kuti akulu wa mu nthawe ya atumi “ambaphata basa mwakhama”? (1 Atesalonika 5:12, 13)
8 Akulu wa mu nthawe ya atumi, ambaphata basa mwakhama kuti athandize mpingo. (Werengani 1 Atesalonika 5:12, 13; 1 Tim. 5:17) Iwo “ambatsogolera” mpingo, ambachitisa misonkhano ndipo ambasalula vochita ninge bungwe ya akulu. Iwo “ambachenjeza” abale na alongo pakuwapasa malangizo mwa sitiriti koma mwachikondi na cholinga chofuna kuteteza mpingo. (1 Ates. 2:11, 12; 2 Tim. 4:2) Kuingizira pamwapa, amuna mwawa ambadekana kuphata basa mwakhama kuti asamalire mabanja yawo mwakuthupi komasoti mwauzimu.—1 Tim. 3:2, 4; Tito 1:6-9.
9. Ko ni maudindo yanango yaponi yomwe akulu ntsiku zino anayo?
9 Akulu ntsiku zino akhala otangwanika maninge na basa yolalikira. (2 Tim. 4:5) Atsogolera mwakhama basa yolalikira, akonza pomwe momwe basa yolalikira ingafambire mu gawo ya mpingo, ndipo atitherena kuti timbalalikire na kupfunzisa mwabuya. Iwo atumikira pomwe ninge oweruza milandu, ndipo achita vimwevi mwachikondi komasoti alibe tsankho. Mkhrisitu akachita chimo ikulu, akulu achita khama kuti amuthandize kubwezeresa ushamwali wake na Yahova, nthawe ibodzibodzi mweyo awonesesa kuti mpingo ukhale wochena. (1 Akor. 5:12, 13; Agal. 6:1) Nthawe zizinji akulu adziwika kuti ni abusa. (1 Pet. 5:1-3) Iwo akamba nkhani za ose zomwe akonzekera bwino, ayesayesa kuti adziwe wanthu ose mumpingo komasoti achita maulendo yaubusa. Akulu anango, athandiza pomwe pakumanga na kukonza Nyumba za Ufumu, pakukonzekera misonkhano ya chigawo na kuphata basa yoyankhulana na wakushipitali na magulu yoyenda kukaona odwala kuingizira pa kuthandizira basa zinango. Akulu aphata basa mwakhama ndawa ya isepano.
10. Ko nivifukwa vinango viponi vomwe vitichitisa kutembeja akulu?
10 Yahova adapolomisa kuti abusa adzatisamalire bwino mwakuti “tidzagopelini chirichose panango kuchita mantha.” (Yer. 23:4) Mulongo munango dzina yake Johanna, wa ku Finlândia, adaona kuti mawu mwaya nichaiyo pomwe amayi wake ambadwala matenda yakulu. Iye adanena kuti: “Olo kuti nishupika kuuza anango momwe ninkubvera, nkulu munango yemwe nimbamudziwalini bwinobwino, adanibvesera mwachikondi, adapemphera nane ndipo adanitsimikizira kuti Yahova anikonda. Ninkukumbukiralini bwinobwino vomwe iye adanena koma nikumbukira kuti nidadzibva wotetezeka. Ninkukhulupirira kuti Yahova adamutumiza kuti adzanithandize pa nthawe yoyenera mweyi.” Ko akulu wa mumpingo wanu adakuthandizani kale tani?
11. Ko tingaonese tani kuti titembeja akulu? (Onani pomwe foto.)
11 Yahova akhala wokondwa maninge tikambatembeja akulu kuchokera pasi pantima “ndawa ya basa zawo.” (1 Ates. 5:12, 13) Henrietta, yemwe akhala pomwe ku Finlândia, adafotokoza kuti: “Akulu athandiza anango mofunisisa, koma vimwevi vinkutanthauzalini kuti iwo ananthawe na mphanvu zapadera panango kuti agumanalini na mabvuto pamoyo wawo. Nthawe zinango nindowauza kuti, ‘munkudziwa? Imwepo ndimwe nkulu wabwino, mumbadziwe vimwevi.’” Mulongo munango wa ku Turquiac dzina yake Sera adanena kuti: “Akulu achadekana kulimbikisiwa kuti apitirize kuchita vose vomwe iwo ankuchita. Tingachite vimwevi pakuwanembera kalata, kuwachemera kumuyi kwathu kuti adzadye chakudya panango kumbayenda nawo mu umboni.” Ko pa na nkulu yemwe imwepo mutembeja khama yake? Fagani njira zoonesera kutembeja kwanu.—1 Akor. 16:18.
Imwepo mungalimbikise abale omwe anamaudindo mumpingo kuti apitirize na basa zawo (Onani ndime 7, 11, 15)
ONYANG’ANIRA MADERA ALIMBIKISA MIPINGO
12. Ko Yesu adaphatisa basa mbani kuti alimbikise mipingo mu nthawe ya atumi? (1 Atesalonika 2:7, 8)
12 Yesu Khrisitu adapereka “amuna kuti akhale mphaso” mumpingo omwe atumikira mwa njira zinango. Motsogolerewa na Yesu, akulu wa ku Yerusalemu adatumiza Paulo, Baranaba na anango ninge onyang’anira madera. (Mac. 11:22) Ndawa chani? Ni ndawa ya cholinga chibodzibodzi chomwe chidayikhiriwa atumiki othandiza na akulu kuti alimbikise mipingo. (Mac. 15:40, 41) Amuna mwawa adasiya vinthu vawo vodekana ndipo adaikha moyo wawo pangozi kuti apfunzise na kulimbikisa anango.—Werengani 1 Atesalonika 2:7, 8.
13. Ko onyang’anira madera anamaudindo yaponi?
13 Onyang’anira madera akhala moyo wofambafamba. Anango afamba misenga yataliyatali kufambira mipingo. Sondo iriyose onyang’anira madera akamba nkhani zizinji, achita maulendo yaubusa, achitisa nsonkhano wa apainiya, nsonkhano wa akulu komasoti akonzekeresa abale kuti ayende mu umboni. Iwo akonzekera nkhani, akonza madongosolo ya nsonkhano wadera na wachigawo. Gole iriyose iwo achitisa shikola ya apainiya, akonza madongosolo ya nsonkhano wapadera wa apainiya mudera yake, ndipo nthawe zinango apasiwa pomwe vinthu vinango na Ofesi ya Nthambi kuti avichite mwakankulumize.
14. Ndawa chani tinganene kuti onyang’anira madera ni mphaso za mpingo?
14 Ko mipingo yaphindula tani na onyang’anira madera? Pakuyankhula va kuchezeresewa na onyang’anira madera, m’bale munango wa ku Türkiye adanena kuti: “Kuchezeresewa kulikose kunilimbikisa kuti nipitirize kuthandiza abale na alongo. Nadziwa onyang’anira madera azinji koma palibe olo m’bodzi waiwo yemwe ambaoneka kuti ni wosafikirika panango kuniuza kuti ni wotangwanika maninge.” Johanna, yemwe tamutomola kale, adayenda kukalalikira na wonyang’anira dera koma alibe kugumana aliyese pamuyi. Olo nteno, iye adalewa kuti: “Nthawe zose nikumbukira ntsiku mweire. Azibale wangu akazi awiri enze adafuluka ndipo inepano nenze nidawasuwa maninge, wonyang’anira dera adanilimbikisa mwachikondi na kunithandiza kuti nimbaone kuti kukhala kutali na azibale wangu ni kwakanthawe, koma mudziko inyowani tidzakhale na mwayi wokhala pabodzi na anzathu kwa nthawe ikulu.” Vimwevi ni vinango mwa vitsanzo vomwe vinkuonesa kuti onyang’anira madera ni mphaso za mpingo.—Mac. 20:37–21:1.
15. (a) Mobverana na 3 Yohani 5-8, ko tingaonese tani kuti titembeja onyang’anira madera? (Onani pomwe foto.) (b) Ko tingaonese tani kuti titembeja akazi wa amuna wa maudindo, ndipo tingachite tani? (Onani bokosi yakuti “Kumbukirani azikazi wawo.”)
15 Ntumi Yohani adalimbikisa Gayo kuti ambatambire bwino abale ndipo ‘akambachoka ambayesese kuwathandiza munjira yomwe Mulungu angakondwe nayo.’ (Werengani 3 Yohani 5-8.) Tingachite vimwevi tikambachemera onyang’anira dera kuti adzadye kumuyi kwathu. Ndipo njira inango yomwe tingachitire vimwevi nikuthandiza makonzedwe yolalikira pomwe iye ankuchezeresa mpingo. Leslie, yemwe tamutomola kale, aonesa pomwe kutembeja kwake mwanjira inango. Iye adanena kuti: “Nipemphera kuti Yahova asamalire vosowa vawo. Inepano na mwamuna wangu tiwanembera pomwe makalata yowauza kuti kuchezeresa kwawo kwatilimbikisa maninge.” Kumbukirani kuti onyang’anira madera agumanambo na mabvuto ninge matenda, nkhawa ndipo nthawe zinango mpakana akhalambo okwinyirira. Mawu yanu yachikondi panango mphaso, yangakhale m’dawiro wa mapemphero ya wonyang’anira dera wanu!—Miy. 12:25.
TINKUDEKANA “AMUNA KUTI AKHALE MPHASO”
16. Mobverana na Miyambo 3:27, ko abale angadzibvunze mibvunzo yaponi?
16 Padziko yose tinkudekana abale azinji kuti ayenerere maudindo. Peno imwepo ndimwe m’bale wobatizika, ‘ko mungakwanise kuthandiza’? (Werengani Miyambo 3:27.) Ko imwepo ndimwe wokonzeka kutumikira ninge ntumiki wothandiza? Ko mungathandize kusamalira vosowa va abale na alongo ninge nkulu?d Ko mungakhale moyo wosafuna vizinji kuti mukangene Shikola ya Akhrisitu Olalikira va Ufumu? Shikola mweyi idzakukonzekereseni kuti Yesu akuphatiseni basa maninge. Peno munkudziona kuti ndimwe wosayenerera, pempherani kwa Yahova. Mukumbireni kuti akuthandizeni na mzimu wake uchena kuti mukwanirise basa iriyose yomwe mungapasiwe.—Luka 11:13; Mac. 20:28.
17. Ko mphaso za amuna zitsimikizira chani va Mpfumu yathu Yesu Khrisitu?
17 Abale omwe Yesu adawapereka kuti akhale mphaso, ni chitsimikizo chomwe chinkuonesa kuti iye ankutitsogolera ntsiku zomalizira zino. (Mat. 28:20) Ko imwepo mutembejalini pa kukhala na Mpfumu yachikondi, yopasa ndipo itidera nkhawa nkutipasa abale oyenerera omwe asamalira vosowa vathu? Ndipomwapa, fagani njira zoyenerera zowonesera kuti mutembeja basa zakhama zomwe amuna mwawa aphata. Ndipo ayi kuleka kutembeja Yahova yemwe ni phata chaiyo ya ‘mphaso iriyose yabwino na yaungwiro.’—Yak. 1:17.
NYIMBO NA. 99 Abale Ambirimbiri
a Akulu omwe atumikira m’Bungwe Yotonga, othandizira Bungwe Yotonga, wa mu Komiti ya Nthambi na omwe aphata basa zinango za utumiki, iwombo ni mphaso.
b Madzina yanango yachinjiwa.
c Kalekale imbachemerewa kuti Turkey.
d Kuti mudziwe vizinji vomwe mungachite kuti muyenerere kutumikira ninge atumiki othandiza panango akulu, onani nkhani zakuti “Abale, ko munkuyesesa kuti mukhale ntumiki wothandiza?” na yakuti “Abale, ko munkuyesesa kuti mukhale nkulu?” mu Ntsanja ya ulonda ya Novembro 2024.