‘Pitirizani kutewera’ Yesu mukabatizika

1-2. Ko ni madaliso yaponi yomwe munthu agumana patsogolo pakuti wabatizika?

NI CHINTHU chokomedza maninge kubatizika na kuchita mbali ya banja ya Yahova, ndipo wale omwe adachita vimwevi ali pa ushamwali wolimba na Yahova ndipo abverana na mawu ya Davide yakuti: ‘Okondwa ni wale omwe imwepo mwawasalula kuti abwere pafupi na imwepo kuti akhale mu nyumba yanu.’—Sal. 65:4.

² Yahova asalula mosamala maninge wanthu omwe iye ankufuna kuti akhale m’banja yake. Ninge momwe tidawonera mupfunziro yapita ire, iye achasalula wanthu omwe achafunisisa kukhala pa ushamwali wolimba na iye. (Yak. 4:8) Imwepo mukadzipereka kwa Yahova na kubatizika, mudzakhale pa ushamwali wapadera maninge na Yahova ndipo mungatsimikizire kuti patsogolo pakuti mwabatizika, Yahova ‘adzakukhuthulireni madaliso yazinji maninge ndipo mudzasowelini chilichose.’—Mal. 3:10; Yer. 17:7, 8.

3. Ko munthu akadzipereka na kubatizika achadekana kuchita chani? (Mlaliki 5:4, 5)

³ Ubatizo ni chiyambi chabe. Imwepo mudzafunisise kuchita vomwe mungakwanise kuti mupitirize kukhala okhulupirika kwa Yahova podiya pa nthawe yomwe munkugumana na mabvuto panango viyeso. (Werengani Mlaliki 5:4, 5.) Ninge ateweri wa Yesu imwepo mudzachite vizinji kuti mutewedze chitsanzo chake na vose vomwe iye adapfunzisa. (Mat. 28:19, 20; 1 Pet. 2:21) Pfunziro mweyi ikuthandizeni imwepo pa nkhani mweyi.

‘PITIRIZANI KUTEWERA’ YESU PODIYA PA NTHAWE YA MABVUTO NA VIYESO

4. Ko ni nthawe iponi yomwe wopfunzira wa Yesu achadekana “kunyamula muti wake wodzudzikirapo”? (Luka 9:23)

⁴ Ayi kuganiza kuti pambuyo pakuti mwabatizika mudzagumanelini na mabvuto pa moyo wanu. Shuwadi Yesu adabvekesa bwinobwino pfundo mweyi pomwe adauza ateweri kuti adzatakule “muti wawo wodzudzikirapo” ndipo angadekana kuchita vimwevi “ntsiku na ntsiku” (Werengani Luka 9:23.) Ko pamwapa Yesu ambatanthauza kuti ateweri wake ambadzabonere nthawe zose? Neye ntenolini. Koma iye adabvekesa bwinobwino kuti kuyingizira pa madaliso, ateweri wake adzagumane na mabvuto ndipo yanango mwa mabvuto mwayo yadzakhale yoshupa maninge.—2 Tim. 3:12.

5. Ko ni madaliso yaponi yomwe Yesu adapolomisa kwa wale womwe adzimana?

⁵ Vingachitike kuti mudadzudziwako kale na munthu wa m’banja yanu panango kusiya vinthu vakuthupi ndawa yofuna kuikha Ufumu pa malo yoyamba. (Mat. 6:33) Ndawa ya vimwevi ndimwe wotsimikizira kuti Yahova adziwa vose vomwe mwamuchitira. (Aheb. 6:10) Mosakaika imwepo munkubvesesa kuti mawu yomwe Yesu adalewa ni chaiyo yakuti: “Palibe yemwe wasiya nyumba, azibale, azilongosi, amayi, ababa, wana panango minda ndawa ya ine komasoti ndawa ya ntontholo wabwino yemwe manjeuno adzagumanelini vinthu vizinji kuyingira maulendo 100 mu nthawe ino. Iye adzagumane pomwe nyumba, azibale, azilongosi, amayi, wana na minda komasoti adzadzudziwe ndipo nthawe yomwe inkubwera iyo adzagumane moyo wosapera.” (Maliko 10:29, 30) Mosakayika madaliso yomwe imwepo mwatambira ni yakulu maninge kuposha khama iliyose yomwe imwepo mungachite.—Sal. 37:4.

6. Ndawa chani imwepo muchadekana kupitiriza kulimbana na “vilakolako va thupi” mukabatiziwa?

⁶ Patsogolo pakuti imwepo mwabatizika muchadekana kupitiriza kulimbana na ‘vofuna va thupi’. (1 Yoh. 2:16) Inde ndawa yakuti imwepo mudakali mbewu yochimwa ya Adamu. Ndipo nthawe zinango mungadzibve ninge ntumi Paulo yemwe adanena kuti: ‘Mu ntima mwangu nichakondwa maninge na malamulo ya Mulungu, koma nichaona mʼthupi mwangu lamulo inango inkumenyana na malamulo ya m’maganizo mwangu nkunichitisa kukhala kapolo wauchimo womwe uli mʼthupi yangu.’ (Aro. 7:22, 23) Nthawe zinango mungakhumudwe maninge na vophonya vanu, koma kukumbukira polomisi yomwe mudamuuza Yahova mpemphero pakudzipereka kwa iye ndiko komwe kudzakupaseni mphanvu kuti mukwanise kulimbana na chiyeso chilichose. Shuwadi, kuti lumbiro yomwe mudachita kwa Yahova idzakuchitiseni kuti mukhale na moyo wosashupa pa nthawe yomwe munkugumana na mabvuto. Mwa njira yanyi?

7. Ko kudzipereka kwa Yahova kudzakuthandizeni tani kuti mupitirize kukhala okhulupirika kwa iye?

⁷ Imwepo mukadzipereka kwa Yahova, mudziramba mwekha. Vimwevi vinkutanthauza kuti mudzalambe chilichose chomwe chingakhumudwise Yahova. (Mat. 16:24) Ndipomwapa mukambalimbana na chiyeso mudzatengelini nthawe ikulu kuganiza kuti ko pamwapa nichite chani ndawa mudzakhale munkudziwa kale vodekana kuchita pa vinthu viwiri mwevi. Ndipo mudzapitirize kukhala wokhulupirika kwa Yahova. Mudzapitirize kukhala wotsimikiza kukondweresa Yahova, ndipo ndawa ya vimwevi mudzakhale ninge Yobu. Olo pa nthawe yomwe adagumana na vinthu voshupa maninge, iye adanena kuti: ‘Nidzalekelini kukhala na ntima wosagawanika.’—Yobu 27:5.

8. Ko kuganizira pemphero yanu ya kudzipereka kungakuthandizeni tani kukhala wolimba ku viyeso?

⁸ Kuganizira pemphero yomwe imwepo mudachita pakudzipereka kwa Yahova, ndiko komwe kudzakupaseni mphanvu kuti muleke kugonja pa chiyeso chilichose. Mwakulinganiza, ko imwepo mungachitise munthu yemwe ali pabanja kukhala na maganizo yakuti munkumufuna? Mosakayika neye! Imwepo mudamupolomisa Yahova kuti mudzachitelini vinthu ninge mwevi, mukalambiza maganizo yoipa kuti yangene mu ntima mwanu, mudzadzipaselini basa kuti muyachose patsogolo pake. Mwa njira mweyi mudzakhale ‘munkutalikirana’ na ‘njira za wanthu oipa.’—Miy. 4:14, 15.

9. Ko kusinkhasinkha pemphero yanu ya kudzipereka kungakuthandizeni tani kuikha vinthu vauzimu pa malo yoyamba pa moyo wanu?

⁹ Ko imwepo mungachite tani peno mwagumana basa yakobiri zizinji yomwe inkukukangisani kugumanika pa misonkhano? Kulewa chaivo mudzashupikelini kudziwa vodekana kuchita. Viri teno ndawa yakuti mukanati mwagumana mwayi moyu, mudatsimikiziriratu kuti mudzabvumelini kuti chilichose chikukangiseni kufika pa misonkhano ndipo mudzabvumelini basa mweyo. Koma mudzayesese kufagafaga basa yomwe ingakuthandizeni kuti mumbachite vinthu vauzimu pa moyo wanu. Kuganizira chitsanzo cha Yesu kungatithandize maninge pa nkhani mweyi. Iye nthawe zose wenze wokonzeka kukondweresa Ababa wake. Ninge Yesu, isepano tinkufunambo nthawe zose kukondweresa Ababa wathu.—Mat. 4:10; Yoh. 8:29.

10. Ko Yahova adzakuthandizeni tani imwepo patsogolo pakuti mwabatizika kuti “mupitirize kutewedza” Yesu?

¹⁰ Kulewa chaivo mabvuto komasoti viyeso vidzakupaseni mwayi wowonesa kuti munkufunisisa ‘kupitiriza kutewera’ Yesu. Ndipo imwepo mungakhale wotsimikiza kuti Yahova adzakuthandizeni kuchita vimwevi. Baibolo inena kuti: ‘Mulungu ni wokhulupirika iye adzabvumelini kuti imwepo muyesewe mpakana kufika pakukangiwa kupirira. Koma viyeso vikabwera iye adzakupaseni njira yakuti mukwanise kupirira.’—1 Akor. 10:13.

MOMWE TINGAPITIRIZIRE KUTEWERA YESU

11. Ko ni njira yabwino ibodzi iponi yopitirizira kutewedza Yesu? (Onani pomwe foto.)

¹¹ Yesu adatumikira Yahova na ntima wose ndipo nthawe zose angapemphera kwa iye. (Luka 6:12) Patsogolo pakuti mwabatizika ndipo munkufuna kupitiriza kutewedza Yesu ni vabwino maninge kumbachita vinthu vomwe vingakuthandizeni kuti nthawe zose mumbamufenderere Yahova. Baibolo inena kuti: ‘Pa vose vomwe tachita kuti tipite patsogolo, naboni tipitirize kufamba pa njira mweyi.’ (Afil. 3:16) Nthawe zinango imwepo mudzabve vitsanzo va abale na alongo omwe adasalula kuchita vizinji pakutumikira Yahova. Anango wa iwo adangena Shikola ya Akhrisitu Olalikira va Ufumu panango adayenda ku dera komwe kumbafunika thandizo. Peno vinthu viri bwino pa moyo wanu mwechi ni cholinga chomwe imwepo mungakhale nacho pa moyo wanu. Wanthu wa Yahova nthawe zose agumana njira zowathandiza kuchita vizinji mu utumiki. (Mac. 16:9) Manje tani ndawa ya chifukwa chinango manjeuno munkukwanisalini kuchita vizinji? Ayi kuganiza kuti ndimwe osafunika pakulinganiza na abale omwe ankuchita vizinji. Chinthu chodekana maninge ni chakuti imwepo mupitirize kupirira. (Mat. 10:22) Ayi kuyebwa kuti Yahova akhala wokondwa maninge ndawa ya vomwe imwepo mungakwanise kuchita mobverana na momwe vinthu viliri pa moyo wanu na maluso yanu, ni vimwevi vomwe vidzakuthandizeni kupitiriza kutewedza Yesu patsogolo pakuti mwabatizika.—Sal. 26:1.

12-13. Ko imwepo mungachite chani peno munkuwona kuti khama yanu inkuchepa? (1 Akorinto 9:16, 17) (Onani pomwe kabokosi kakuti “Pitirizani kuthamanga.”)

¹² Manje ko tani peno munkudzibva kuti munkundopempherambo mwamwambo ndipo utumiki wanu wandokhalambo chizolowezi? Vingachitike kuti manjeuno munkukondwalini na kuwerenga Baibolo ninge momwe mumbachitira kale. Vimwevi vikachitika patsogolo pakuti mwabatizika ayi kuganiza kuti mulibe pomwe mzimu uchena wa Mulungu. Ninge wanthu ochimwa, ni vobveka kuti maganizo yanu yangakhalerini yabodzibodzi nthawe zose, ndipo peno khama yanu inkuchepa, ganizirani chitsanzo cha mtumi Paulo. Iye ambachita khama kuti atewedzere Yesu, koma Paulo nthawe zinango ambadzibva kuti alibe chifuno chochita chilichose chomwe iye ambafuna. (Werengani 1 Akorinto 9:16, 17.) Ndipomwapa Paulo adanena kuti: ‘Podiya nichichita vimwevi mokakamizika ndine wonyang’anira mobvera na udindo omwe nidapasiwa.’ Mu mawu yanango Paulo wenze wotsimikiza kukwanirisa utumiki wake, viribe basa momwe iye ambadzibvera.

¹³ Mwanjira ibodzibodzi, ayi kundosalula vinthu mobverana na momwe munkubvera. Khalani otsimikiza kuchita vinthu vabwino podiya kuti pasi pa ntima munkufunalini kuchita vimwevo. Mukapitiriza kuchita vabwino, nkuyenda kwa nthawe maganizo yanu yadzachinje. Mwanjira iliyose kukhala na chizolowezi chochitira vinthu va uzimu ninge pfunziro ya pamwekha, pemphero, kugumanika pa misonkhano na mu umboni kudzakuthandizeni kutedza Yesu pambuyo pakuti mwabatizika. Kuyingiziramwapa abale akaona kupirira kwanu pa kutumikira Yahova iwo adzalimbikisiwembo.—1 Ates. 5:11.

‘PITIRIZANI KUDZIFUFUDZA. . . PITIRIZANI KUDZIYESA’

14. Ko nthawe na nthawe, tichadekana kufufudza chani, ndipo ndawa chani? (2 Akorinto 13:5)

¹⁴ Chinthu chinango chomwe chingakuthandizeni pambuyo pakuti mwabatizika ni kufufudza maganizo yanu moona ntima ntsiku na ntsiku. (Werengani 2 Akorinto 13:5.) Nthawe zinango ni vabwino kupatula nthawe kuganizira momwe muchachitira vinthu. Mwakulinganiza, peno imwepo munkukwanisa kupemphera ntsiku zose, kuwerenga na kupfunzira Baibolo, kugumanika pamisonkhano na mu umboni onani njira ya momwe mungaphindulire maninge na vinthu vimwevi. Mwakulinganiza, dzibvunzeni kuti: ‘Ko inembo nichakwanisa kuuza anango vipfunziso voyambirira va m’Baibolo? Ko inepano ningachite vinthu vinango kuti nimbakondwe maninge mu umboni? Ko mapemphero yangu yankukhala yasitiriti ndipo yankuwonesa kuti inepano nichathemba Yahova na ntima wangu wose? Ko inepano nigumanika pa misonkhano nthawe zose? Peno m’dawiro ni wakuti neye. Ko ningachite tani kuti nimbagumanike pa vochitika vose mwevi?’

15-16. Ko mwapfunzira chani pa chitsanzo cha m’bale Robert pakukhala wolimba pa viyeso?

¹⁵ Chinthu chinango chodekana maninge ni kudziwa bwino vofoka vanu. M’bale munango dzina yake Robert adafotokoza vinthu vinango vomwe vinkubvekesa bwinobwino mpfundo mweyi. Iye adanena kuti: “Pomwe nenze na magole 20 nenze pa basa yochita kunembewa, ntsikana munango wakubasa adanikumbira kuti neyende kumuyi kwake pambuyo pakuti takotoka. Iye adaniuza kuti tikakhale tekhatekha ndipo ‘tikakondwe maninge.’ Pakuyamba nimbanyang’ana tuvifukwa tunango ndipo pakumalizira nidamuuza vifukwa vobveka ndipo nidalamba kuti niyendelini.” Robert alibe kugonjesewa na chiyeso ndipo vimwevi ni votembejeka. Koma patsogolo pake pomwe adaganizira vomwe vidachitika, Robert adazindikira kuti ambadekana kuchita vinthu mwa njira inango. Iye adati: “Inepano nimbadekana kulambiratu nthawe mweyo ninge momwe adachitira Yosefe na nkazi wa Potifara. (Gen. 39:7-9) Kulewa shuwa inepano nidadabwa maninge kuwona kuti venze voshupa maninge kuti nilambe. Vimwevi vidanithandiza kudziwa kuti nimbadekana kulimbisa ushamwali wangu na Yahova.”

¹⁶ Ninge Robert ni vabwino maninge kuti mufufudze maganizo yanu moona ntima podiya kuti imwepo mwakwanisa kupirira chiyeso chinango, dzibvunzeni kuti: ‘Ko inepano natenga nthawe ikulu kuti nikwanise kulamba?’ Peno mwakwanisa kuzindikira kuti munkudekana kuchinja ayi kumbandokhalira kudziyimba mulandu. Mosiyana na vimwevi khalani okondwa ndawa yakuti mwakwanisa kuzindikira chofoka chanu nthawe mweyo. Pempherani kwa Yahova va chofoka chanu ndipo mumbachite vinthu vomwe vingakuthandizeni kulimbisa chifuno chanu chobvera Yahova.—Sal. 139:23, 24.

17. Mobverana na chitsanzo cha Robert, ko kukhala okhulupirika kwa Yahova kukhudza tani dzina ya Yahova?

¹⁷ Tingapfunzire pomwe chinthu chinango pa chitsanzo cha Robert, iye adanena kuti: “Pambuyo pakuti nalamba kuyenda kumuyi kwake, iye adanena kuti ‘viri bwino, iwepo wawina pa chiyeso!’ Pamwapo inepano nidamubvunza kuti ambatanthauza chani? Ntsikana muyo adaniuza kuti shamwali wake mwamuna yemwe wenze wa Mboni za Yahova adamuuza kuti, alumbwana ose wa Mboni za Yahova akhala na moyo wachinyengo. Iwo akakhala na mwayi wochita vinthu voipa, achita. Ndipomwapa adamuuza shamwali wake muyo kuti adzayesere inepano. Nidakhala wokondwa pakudziwa kuti ningakwanise kulemekeza dzina ya Yahova.”

18. Ko imwepo mwasaina kuchita chani patsogolo pakuti mwabatizika? (Onani pomwe kabokosi kakuti: “Nkhani zomwe mudzakondwe nazo maninge.”)

¹⁸ Pakudzipereka kwa Yahova na kubatiziwa, imwepo muonesa kuti munkufuna kulemekeza dzina ya Yahova viribe basa vomwe vingachitike. Ndipo imwepo mungatsimikizire kuti Yahova ankudziwa bwinobwino viyeso vomwe imwepo munkugumana navo. Ndipo iye adzadalise khama yanu yofuna kupitiriza kukhala wokhulupirika. Imwepo mungatsimikize kuti kuphatisa basa mzimu uchena, Yahova adzakupaseni mphanvu zomwe munkudekana. (Luka 11:11-13) Na thandizo ya Yahova, imwepo mudzakwanise kupitiriza kutewedza Yesu pambuyo pakuti mwabatizika.