Ko ubatizo utanthauzo chani ndipo ndawa chani tifunika kubatizika?

1. Ko tidziwa tani kuti ubatizo ni wofunika maninge?

MUNTHU akabatizika isepano tikhala wokondwa maninge! Akhrisitu oyambirira adabvambo teneuyu pomwe adawona wanthu azinji ankubatizika pa Pentekosite mu 33 C.E. Pa nthawe mwiyi, ntumi Petulo adakamba nkhani ya kufunika kwa ubatizo. (Mac. 2:38, 40, 41) Patsogolo pake ntumi Paulo adanemba kuti: “Chipfunziso chonena va ubatizo” chiphatanidza pomwe “mpfundo zoyambirira zonena va Khrisitu.” (Aheb. 6:1, 2) Ndipomwapa, ubatizo ni chinthu chofunika maninge ndipo tifunika kubvesa bwino tanthauzo yake. Ndawa chani?

2. Ko ndawa chani tifunika kubvesa bwino tanthauzo ya ubatizo?

² Ninge momwe fundasau ingathandizire kuti nyumba ikhale yolimba, kubvesa bwino tanthauzo ya ubatizo kungatithandize kukhala na chikhulupiriro cholimba. Ndipomwapa, peno mukalibe mwabatizika panango mudabatizika kale kwa magole yazinji, mufunika kubvesa ndawa yake ubatizo ni wofunika maninge. Mu pfunziro ino tidawire mibvunzo aya: Ko tanthauzo ya ubatizo ni yofunika tani? Ko kubatizika kutanthauza chani? Ndawa chani isepano tibatizika mu dzina ya Ababa, ya Mwana na mzimu uchena?

KO UBATIZO UTANTHAUZA CHANI NDIPO NDAWA CHANI NI WOFUNIKA?

3. Ko ubatizo utanthauza chani?

³ Ubatizo uwonesa kuti mwabvuma chonadi chonena va Yahova na Yesu Khrisitu. Mwachinja moyo wanu na kulapa machimo yanu kuti mutumikire Yahova. Muwonesa pomwe kuti mukubvesa kuti Mulungu adaphatisira basa Yesu kuti atiwombole ku uchimo na impfa. Komasoti mudadzipereka kwa Yahova kuti mudzamutumikire pabodzi na gulu yake. Ndipo mukadzipereka kwa Yahova na kubatizika, mukhala kuti mwayamba kufamba munjira ya ku moyo wosapera.

4. Ko kumiziwa m’madzi thupi yose kutanthauza chani? (Onani pomwe foto.)

⁴ Pa ubatizo, munthu amiziwa m’madzi thupi yose. Vikhala ninge kuti waikhiwa m’manda patsogolo pake nkumukisiwa.a (Linganizani na Akolose 2:12.) Ubatizo uwonesa kuti mwachinja maninge vinthu pa moyo wanu. Ko vinkutanthauza chani? Mukamiziwa m’madzi viwonesa kuti mwalekeratu kuchita vinthu voipa. Kundoyambira nthawe mwiyi imwepo muwona kuti chinthu chofunika maninge pa moyo wanu ni kukondweresa Yahova.

5. Ndawa chani khama yomwe tingachite kuti tikabatizike inkulingana na basa yomanga chingalawa? (1 Petulo 3:18-21)

⁵ Werengani 1 Petulo 3:18-21. Khama yomwe munthu achita pokonzekera kuti akabatizike, tingailinganize na khama yomwe Nowa adachita kuti amange chingalawa. Peno imwepo mwayamba kupfunzira Baibolo chamanjemanje, mungawone kuti ni voshupa maninge kuchinja vinthu pa moyo wanu kuti mufikane pa kubatizika. Mungambaganize kuti ni voshupa ninge momwe venzere kwa Nowa pomwe ambamanga chingalawa. Panango mungadzibvunze kuti: Ko nifunika kuyesesa kuchita khama teno uyu? Inde Ninge momwe Nowa adachitira. Mulungu ndiye adakonza pulani yakuti Nowa amange chingalawa kuti adzapulumukiremo panthawe ya chigumula. Ndipo Nowa ambafunika kutewedza bwinobwino malangizo yomwe adatambira kuchokera kwa Yahova. Ndawa yachikhulupiriro komasoti na thandizo ya Yahova, Nowa adabvera na kumanga chingalawa. Iye “adachita vose vomwe Yahova adamuuza.” Imwepo mungachitembo chibodzibodzi.—Gen. 6:22.

6. Ko Petulo ambatanthauza chani padanena kuti ubatizo utipulumusa?

⁶ Mu vesi 21, ntumi Petulo adanemba kuti: “Ubatizo unkupulumusa pomwe imwepo.” Koma iye ambafunalini kutanthauza kuti munthu akabatizika ndiye kuti wapulumuka kale. Komasoti viwonesalini kuti machimo yathu yakhululukiriwa ndawa ni ntsembe ya Yesu yokha yomwe ingachitise kuti machimo yathu yakhululukiriwe. (1 Yoh. 1:7) Koma kubatizika ni kofunika maninge ndawa Yahova ndiye adatilamula kuti timbabatizike. Tikabatizika tikhala na “chikumbuntima chabwino maninge.” Ndipo Yahova atikhululukira machimo yathu pakuphatisa basa ntsembe ya Yesu Khrisitu. Ndawa ya vimwivi tidzakhale na mwayi wogumana moyo wosapera

KO UBATIZO UPHATANIDZA POMWE KUCHITA CHANI?

7. Ko ubatizo ufunika kuchitika tani?

⁷ Ninge momwe tawonera, kubatizika ni kofunika maninge. Ndipo Baibolo inenalini vizinji momwe ubatizo ufunika kuchitikira. Koma pali mpfundo zinango zomwe zingatithandize kudziwa vofunika kuchita panthawe ya ubatizo. Mwakulinganiza, Baibolo itithandiza kudziwa momwe wanthu omwe akufuna kubatizika angavalire na vomwe afunika kuchita. (1 Akor. 14:40; 1 Tim. 2:9) Kazinjikazinji nkulu ni yemwe abatiza, koma isepano tifunikalini kumuwona kuti nkulu muyu ni wapadera. 1 Akor. 1:14, 15) Kwa Yahova ubatizo ni wofunika maninge, viribe basa peno wanthu omwe akunyang’anira ni azinji panango ang’onong’ono.—Mac. 8:36.

8. Ko ni mibvunzo yaponi yomwe abvunza wanthu oyenda ku ubatizo, ndipo ndawa chani? (Machitidwe 2:38-42) (Onani pomwe foto.)

⁸ Baibolo iwonesa kuti tifunika “kulengeza pachena kuti tidzapulumuke” panango kuti kuwonesa chikhulupiriro chathu. (Aro. 10:9, 10) Kuchita vimwivi pantsiku ya ubatizo nikofunika maninge ndawa ubatizo ni chinthu chofunika maninge kuti tidzapulumuke. Ndipomwapa, oyenda ku ubatizo abvunziwa mibvunzo yawiri. Woyamba ni wakuti: “Ko mudalapa machimo yanu nkudzipereka kwa Yahova komasoti kubvuma njira yake yopulumusira wanthu pophatisira basa Yesu Khrisitu?” Mbvunzo muyu unkutikumbusa vomwe ntumi Petulo adanena pa nkhani yake pa Pentekosite. Ndipo cholinga cha mbvunzo muyu ni kudziwa vomwe munthu wachita kale kuti abatizike. Mbvunzo wachiwiri ni wakuti: “Ko mukudziwa kuti mukabatizika mumbadziwike kuti ndimwe wa Mboni za Yahova komasoti kuti muli mu gulu yake?” Cholinga cha mbvunzo muyu, ni vomwe wanthu omwe ankubatiziwa angachite. Iwo adapolomisa kuti adzatewedze malangizo ya Yahova na gulu yake, komasoti kumutumikira pabodzi na abale na alongo. Vimwivi ni volingana na vomwe wanthu adachita pa Pentekosite pomwe adabatiziwa. (Werengani Machitidwe 2:38-42.) Omwe angadawire kuti inde pa mibvunzo yawiri mwaya, ni omwe angabatizike.

9. Ko aliyese afunika kuchita chani kuti akhale pa ushamwali na Mulungu?

⁹ Vingachitike kuti mukalibe kupfunzira chonadi, mwenze munthu wabwino ndipo mwenze mukalibe mwachitako tchimo ikulu. Panango vingachitike kuti mudakulira m’banja ya Mboni za Yahova ndipo azibereki wanu adakuthandizani kukonda Yahova. Olo kuti viri teno, ko mufunika kulapa na kubatizika kuti mukondwerese Mulungu? Inde, viribe basa na momwe vinthu venzere pa moyo wanu. Tifunika kudziwa kuti tose ndise wochimwa ndipo uchimo muyu utikangisa kukhala pa ushamwali na Mulungu. (Sal. 51:5) Tikambapfunzira vizinji va Yahova, tisankhula kuchita vomwe iye afuna, osati vomwe isepano tifuna. Tikalapa makhalidwe yathu yakalekale na kuchinja, nkuyamba kuchita vinthu vomwe vikondweresa Yahova, tingabatizike.—Mac. 3:19.

10. Ko mufunika kuchita chani podiya kuti mudabatizika kale mu chipembedzo chinango?

¹⁰ Panango kalekale pomwe mwenze nchipembedzo chinango mwenze mudabatizika kale. Olo nteno, imwepo mufunika kubatizika pomwe basi kuti mukhale wa Mboni za Yahova. Ndawa chani? Ndawa pa nthawe mwiyo mwenze mulibe kubvesa mokwana chonadi chonena va Yahova na Yesu Khrisitu. Olo kuti mudachita pemphero yodzipereka kwa Mulungu, polomisi yanu iribe kuchokera pa kubvesa bwino vomwe Yahova afuna. Ku Efeso, ntumi Paulo adagumana na amuna anango omwe enze obatizika kale koma ambabvesalini bwino chonadi chonena va Khrisitu. Ndipomwapa, amuna mwawa ambafunika kubatizika pomwe.b (Mac. 19:1-5) Ntsiku zino Yahova abvuma ubatizo wa munthu peno munthu muyo wabvesa bwino vomwe Yahova apfunzisa na vomwe afuna.

“MU DZINA YA ABABA, YA MWANA NA YA MZIMU UCHENA”

11. Ko kubatizika “mu dzina ya Ababa, ya Mwana na ya mzimu uchena” kutanthauza chani? (Mateyu 28:18-20)

¹¹ Yesu adanena kuti opfunzira wake anyowani afunika kubatizika “mu dzina ya Ababa, ya Mwana na ya mzimu uchena.” (Werengani Mateyu 28:18-20.) Ko ambatanthauza chani pamwapa? M’Baibolo, mawu yakuti “dzina” kazinjikazinji yatanthauza mbiri ya munthu. Yangatanthauze pomwe udindo womwe munthu anawo. Ndipomwapa, tikabatizika mu dzina ya Ababa na ya Mwana tizindikira kuti iwo anaudindo komasoti anaulamuliro wotiuza vochita. Tikabatizika na mzimu uchena, tizindikira udindo womwe iye anawo potitsogolera. Manje naboni tiwone momwe tingachitire vimwivi.

12. Ko kubatizika mu dzina ya Ababa kutanthauza chani? (Chivumbuluso 4:11) (Onani pomwe mafoto.)

¹² Mu dzina ya Ababa. Isepano tikhulupirira kuti Yahova ni Ababa wathu wa kudzulu yemwe adatipasa moyo. Titsimikiza kuti iye ni Wamphanvu zose yemwe adalenga vinthu vose. Werengani Chivumbuluso 4:11.) Tidziwa kuti Iye abvesera mapemphero yathu ndipo titomola dzina yake popemphera komasoti pouza anango va iye. (Sal. 65:2) Koma tikabatizika mu dzina ya Ababa kutanthauza pomwe vinthu vinango. Wanthu omwe adabvesera nkhani ya Petulo pa Pentekosite, ambamudziwa kale Yahova. Koma iwo ambafunika kudziwa kuti Yahova adzapereke moyo wosapera kupitira mwa Yesu Khrisitu. Isembo tifunika kuchitambo chibodzibodzi.—Aro. 5:8.

13. Ko kubatizika mu dzina ya Mwana kutanthauza chani? (Onani pomwe foto.)

¹³ Mu dzina ya Mwana. Tikhulupirira kuti Yesu ni Mwana wa Mulungu wobadwa yekha ndipo iye “ni njira.” Tingakwanise kukhala paushamwali na Yahova kupitira mwa Yesu. (Yoh. 14:6) Yesu adatiwombola, iye adatifera kuti tidzagumane moyo wosapera. Kudziwa vimwivi kutithandiza kutewedzera chitsanzo chake nthawe zose. (1 Yoh. 2:6) Molingana na Yesu, tilalikira mwakhama ndipo tibvumalini kuti chirichose chitikangise kuchita vimwivi. (Luka 4:43) Olo tidzudziwe, isepano ndise wokonzeka kutumikira Yahova mokhulupirika. (2 Tim. 3:12) Isepano tilemekeza Yesu ninge “nsolo wa mpingo.” Ndipomwapa, tikhala wokondwa kutewedza malangizo ya wanthu omwe Yesu adawasankhula kuti atsogolere mpingo.—Aef. 4:8, 11, 12; 5:23.

14. (a) Ko kubatizika na mzimu uchena kutanthauza chani? (Onani pomwe foto.) (b) Ko pali ma ubatizo yanango yaponi ya odzodzewa? (Onani bokosi yakuti: “Ma ubatizo yanango ya odzodzewa.”)

¹⁴ Mu dzina ya mzimu uchena. Isepano tidadziwa chonadi ndawa ya mphanvu ya mzimu uchena. Tidziwa kuti mzimu uchena ni munthulini, koma ni mphanvu yomwe Mulungu aiphatisa basa. Tidziwa pomwe kuti Yahova adaphatisa basa mzimu uchena pothandiza aneneri wake kudziwa vofunika kunena komasoti adathandiza onemba Baibolo kunemba vomwe vimbafunika kunembewa. Ndipomwapa, nthawe zose tiwerenga Mawu ya Mulungu na kutewedza vomwe tapfunzira. (2 Pet. 1:20, 21) Tichita vose vomwe tingakwanise kuti tileke kuchita machimo yakuluyakulu, ndawa tidziwa kuti vimwivi vingakangise isepano komasoti mpingo kutambira mzimu uchena.— Aef. 4:30.

15. Ko tifunika kutsimikiza kuchita chani?

¹⁵ Peno imwepo mudabatizika kale, pitirizani kubvesa bwino “chipfunziso cha ubatizo”c na kubvesa vomwe mudapolomisa kwa Yahova pomwe mudadzipereka na kubatizika. Manje ko tani peno mukalibe mwabatizika? Ko pali chinthu chinango chomwe chinkukukangisani? Mu nkhani yomwe inkubwera idzafotokoze vomwe mungachite kuti mupitirize kuyenda patsogolo mpakana kubatizika.