Pitirizani ‘kulimbikisana’

1. Mobverana na 1 Atesalonika 5:11, ko tose tichadekana kuyesesa kuchita chani?

KO MPINGU wanu udamangako kale Nyumba ya Ufumu panango kuikonza panthawe yomwe yenze idadzongeka? Peno nteno, tinashuwa kuti mudakondwa maninge pamudachita misonkhano mu Nyumba ya Ufumu yanu inyowani. Mudatembeja Yahova ndipo panango mudafika pogwesa misozi pamumbaimba nyimbo yofungulira misonkhano. Nyumba zathu za Ufumu zokonzewa bwino zichitisa kuti Yahova alemekezeke. Koma pali pomwe chinthu chinango chomwe tichadekana kuchita kuti Yahova alemekezeke maninge. Chinthu chake ni kulimbikisa wanthu omwe abwera ku Nyumba ya Ufumu kuti adzatumikire Yahova. Mtumi Paulo wenze na vimwevi m’maganizo panthawe yomwe ambanemba mawu yogumanika pa 1 Atesalonika 5:11, yomwe ndiyo yatakula msolo wa nkhani yathu.—Lewengani.

2. Ko tikambirane chani munkhani ino?

² Mtumi Paulo ni chitsanzo chabwino maninge pankhani yolimbikisa Akhrisitu anzathu. Iye ambachitira chifundo maninge abale na alongo. Munkhani ino tikambirane momwe iye adathandizira abale na alongo wake (1) kupirira mayesero, (2) kukhazikisa ntendere na (3) kuwathandiza kuti ambakhulupirire maninge Yahova. Naboni tiwone momwe tingamutewedzerere pakulimbikisa abale na alongo wathu ntsiku zino.—1 Akor. 11:1.

PAULO ADATHANDIZA ABALE NA ALONGO WAKE KUTI APIRIRE MAYESERO

3. Nchani chinkuwonesa kuti Paulo wenze wachikatikati?

³ Paulo ambakonda maninge abale. Iyembo adagumana na mayesero yoshupa maninge. Ndipomwapa adakwanisa kuwachitira chifundo abale na alongo wake pangagumanambo na mayesero. Nthawe inango Paulo wenze alibiretu kobiri ndipo ambafunika kuphata basa kuti akwanise kudzisamalira na kusamalira pomwe anzake womwe angafamba nawo. (Mac. 20:34) Iye ambaphata basa yokonza matenti. Padafika ku Korinto, adaphata basa pabodzi na Akula na Purisikila omwe ambaphatambo basa yokonza matenti. Koma ‘satade iliyose’ iye ambalalikira Ayuda na Agiriki. Patsogolo pake padati Sila na Timoteyo abwera, ‘Paulo adatangwanika na kulalikira mawu ya Mulungu.’ (Mac. 18:2-5) Paulo adakwanisa kulimbikisa abale na alongo wake ndawa yakuti iye wenze na chitsanzo chabwino pankhani yolalikira na kuphata basa kuti akwanise kudzisamalira. Iye adawakumbusa kuti ni shuwadi kuti afunika kuphata basa, koma ambawone kuti kutumikira Yahova ndiko ‘kofunika maninge.’—Afil. 1:10.

4. Ko Paulo na Timoteyo adathandiza tani abale na alongo wawo kuti apirire mayesero?

⁴ Paudandoti mpingu wa Tesalonika wakhazikisiwa, abale na alongo omwe enze adondopfunzira manjemanje choonadi adagumana na mayesero yakulu. Wanthu wotsutsa padakangira kugumana Paulo na Sila, adatenga ‘abale anango nkuwayendesa kwa olamulira’ nkulewa kuti: ‘Wanthu wose mwawa ankuchita votsutsana na malamulo ya Kaisara.’ (Mac. 17:6, 7) Ko munkukwanisa kuwona momwe Akhrisitu anyowani mwawa adabvera padayamba kutsutsiwa na wanthu wa muthaundi yawo? Kutsutsiwa kumoku kudakachitisa kuti afokeretu nkusiya kutumikira Yahova. Koma Paulo alibe kubvuma kuti vimwivi viwachitikire. Podiya kuti iye na Sila enze adachokako, adachita vose vangakwanise kuti apitirize kulimbikisa mpingu moyu. Paulo adawakumbusa Atesalonika kuti: ‘Tidakutumizirani m’bale wathu Timoteyo . . . , kuti adzakulimbikiseni na kukuthandizani kuti mukhale na chikhulupiriro cholimba, kuti osati pagumanike munthu wopatusiwa na mayesero mwaya.’ (1 Ates. 3:2, 3) Vinkuwoneka kuti Timoteyo adadzudziwambo na wanthu ku thaundi ya kwawo ku Lusitara. Iye adawona momwe Paulo adalimbikisira abale na alongo wa kumuku. Kuwona momwe Yahova adawathandizira kudapasa mphanvu Timoteyo kuti ambalimbikise abale na alongo anango nkuwatsimikizira kuti Yahova adzawasiyelini.—Mac. 14:8, 19-22; Aheb. 12:2.

5. Ko mawu ya nkulu munango yadalimbikisa tani Bryant?

⁵ Ko ni njira inango iponi yomwe Paulo adalimbikisira abale na alongo wake? Pangayenda kukazungira pomwe Lusitara, Ikoniyo na Antiyokeya, Paulo na Baranaba ‘adaikha akulu mmipingu.’ (Mac. 14:21-23) Ni vosachita kubvunza kuti abale mwawa omwe adaikhiwa pa udindo adalimbikisa maninge mipingu ninge momwe akulu ankuchitirambo ntsiku zino. Bvani vomwe m’bale munango dzina yake Bryant adafotokoza. Iye adati: “Penenze na magole 15, ababa wangu adatithawa ndipo amayi adachosewa mumpingu. Nimbawona kuti tilibe wotithandiza ndipo nenze wokwinyirira maninge.” Ko nchani chidathandiza Bryant panthawe yoshupa mweyi? Iye adalewa kuti: “Nkulu munango dzina yake Tony, ambakonda kucheza nane tikakhala pamisonkhano na panthawembo inango. Iye ambanisimbira va wanthu omwe adagumanambo na mabvuto, koma olo nteno enze okondwa. Iye adaniwerengera lemba ya Salimo 27:10 ndipo kazinjikazinji ambakonda kunisimbira va Hezekiya yemwe adapitiriza kukhala chitsanzo chabwino podiya kuti ababa wake enzelini munthu wokhulupirika.” Ko vimwevi vidamulimbikisa tani Bryant? Iye adalewa kuti: “Mawu yomwe Tony adaniuza yadanilimbikisa maninge ndipo yadanithandiza kuti nichite utumiki wa nthawe zose.” Akulu, mbakhalani tcheru kuti muwone wanthu omwe ankugumanambo na mabvuto ninge ya Bryant ndipo mbawauzani ‘mawu yabwino’ kuti muwalimbikise.—Miy. 12:25.

6. Ko Paulo adaphatisa tani basa mbiri ya atumiki wa kalekale kuti alimbikise abale na alongo wake?

⁶ Paulo adakumbusa abale na alongo kuti ‘ntambo ukulu wa mboni’ udakwanisa kupirira mabvuto ndawa yothandiziwa na Yahova. (Aheb. 12:1) Paulo ambadziwa kuti nkhani za atumiki wa kalekale omwe adapirira mabvuto zingawathandize abale wake kuti ambaikhire nzeru pa ‘thaundi ya Mulungu wamoyo.’ (Aheb. 12:22) Vimwivi ndivo vinkuchitikambo ntsiku zino. Ni mbani yemwe alimbikisiwalini akawerenga momwe Yahova adathandizira Gidiyoni, Baraki, Davide, Samueli na anango azinji? (Aheb. 11:32-35) Ndipo vitsanzo va atumiki wokhulupirika wa ntsiku zino ni volimbikisa pomwe maninge. Kulikulu yathu yapadziko yose, takhala tinkutambira makalata yazinji ya abale na alongo yofotokoza momwe chikhulupiriro chawo chidakhalira cholimba padandoti awerenga mbiri ya moyo wa mtumiki wa Yahova wa ntsiku zino.

PAULO ADAWONESA ABALE NA ALONGO WAKE MOMWE ANGAKHALIRE PANTENDERE

7. Ko munkupfunzira chani pa malangizo yomwe Paulo adapereka pa Aroma 14:19-21?

⁷ Abale na alongo wathu angakhale olimba peno isepano tiyesesa kukhazikisa ntendere mumpingu. Osati timbabvume kuti kusiyana maganizo kutigawanise. Ndipo peno munthu wachita vinthu vomwe vinkuphwanyalini mpfundo za m’Baibolo, osati timbangingimire maganizo yathu. Onankoni chitsanzo chibodzi. Mpingu wa ku Roma wenze na Akhrisitu wachiyuda na wa ntundu unango. Chilamulo cha Mose pachidamalisiwa, atumiki wa Yahova ambafunikalini pomwe kutewedza malamulo yolambiza kudya vinthu vinango. (Maliko 7:19) Kundochokera nthawe mweyo, Akhrisitu anango wachiyuda adawona kuti palibe vuto kuyamba kudya vakudya vomwe vimbalambiziwa mu Chilamulo. Koma Akhrisitu anango wachiyuda angawona kuti kumuku kwenze kuphonya. Nkhani mwiyi idachitisa kuti abale na alongo osati ambabvane bwinobwino. Paulo padawona vimwivi, adatsindika maninge nkhani yokhala pantendere ndipo adawauza kuti: ‘Vingakhale bwino kuleka kudya nyama panango kumwa vinyu panango kuchita chilichose chomwe chingakalipise m’bale wako.’ (Lewengani Aroma 14:19-21.) Paulo adawathandiza abale na alongo wake kuwona momwe nkhani zimwizi zingadzongere aliyese payekha na mpingu wose. Iye wenze pomwe wokonzeka kuchinja vinthu vomwe adadjaira kuchitira kuti angakalipise anango. (1 Akor. 9:19-22) Isembo kuti tilimbikise abale na alongo wathu ntsiku zino, timbakhale okonzeka kusiya kuchita vinthu vomwe tidadjaira peno tinkuwona kuti vingakalipise anzathu.

8. Ko Paulo adachita chani paidabuka nkhani yosokoneza ntendere mumpingu?

⁸ Paulo adapereka chitsanzo chabwino pankhani yokhazikisa ntendere peno pabuka nkhani yomwe tinkubvesesanalini. Mwakulinganiza, Akhrisitu woyambirira ambangingimira kuti wanthu omwe ni Ayudalini achitiwe mdulidwe. Panango iwo ambangingimira tene pakufuna kuti Ayuda asiye makani. (Agal. 6:12) Koma Paulo adawoneseratu kuti ankubveranalini navo ne pang’ono. Koma m’malo mongingimira kuti Akhrisitu achite vomwe iye ankuganiza, adadzichepesa nkupereka nkhani mwiyi kwa atumi na akulu omwe enze ku Yerusalemu. (Mac. 15:1, 2) Vimwivi vidathandiza maninge kuti Akhrisitu akhale pantendere mumpingu.—Mac. 15:30, 31.

9. Ko tingatewedzere tani chitsanzo cha Paulo?

⁹ Kuti tikhazikise ntendere pakabuka nkhani yoshupa, tingachite bwino kubvunzako malangizo kwa wanthu omwe Yahova wawaikha kuti asamalire mpingu. Malangizo yogumanika m’Baibolo tingayagumane m’mabukhu na mavidiyo yofalisiwa na gulu ya Yahova. Tikambayaphatisa basa malangizo mwaya m’malo mongingimira maganizo yathu, tingathandize kuti mumpingu mukhale ntendere.

10. Ko Paulo adachita pomwe chani pofuna kulimbikisa ntendere mumpingu?

¹⁰ Paulo adalimbikisa pomwe ntendere pakufotokoza makhalidwe yabwino ya abale na alongo wake, osati kumbandokhalira kufotokoza vinthu vomwe iwo achitalini bwino. Mwakulinganiza, m’mawu yomalizira ya mukalata yake yoyenda kwa Aroma, Paulo adatomola madzina wanthu azinji achimbaguma makhalidwe yawo yabwino. Isembo tingachite bwino kumbatomolako makhalidwe yabwino ya abale na alongo wathu. Tikateno, ndiye kuti tinkutewedzera Paulo ndipo tingachitise kuti abale na alongo wathu ambakondane maninge.

11. Ko tingachite tani kuti tikhazikise ntendere peno tayambana na anzathu?

¹¹ Nthawe zinango, olo Akhrisitu olimba angayambane. Vimwevi ndivo vidachitikira Paulo na Baranaba omwe enze paushamwali wolimba. Amuna awiri mwawa adasiyana maganizo pankhani yakuti peno ankufunikana kutenga Maliko paulendo wawo wa umishonale panango neye. Iwo ‘adayamba kugegedzana maninge’ ndipo aliyese adayenda kwayekha. (Mac. 15:37-39) Koma Paulo, Baranaba na Maliko adakonza pomwe ushamwali wawo ndipo vimwevi vidawoneseratu kuti ankufuna maninge kuti mumpingu mukhale ntendere. Patsogolo pake Paulo adayamba kusimba makhalidwe yabwino ya Baranaba na Maliko. (1 Akor. 9:6; Akol. 4:10) Isembo tingachite bwino kumbakambirana na anzathu wa mumpingu peno tayambana na kupitiriza kuwona makhalidwe yawo yabwino. Tikateno tidzakhale pantendere na abale na alongo wathu.—Aef. 4:3.

PAULO ADALIMBISA CHIKHULUPIRIRO CHA ABALE NA ALONGO WAKE

12. Ko ni mabvuto yaponi yomwe abale na alongo wathu ankugumana nayo?

¹² Kuti tilimbikise abale na alongo wathu, tingachite bwino kuwathandiza kuti ambakhulupirire maninge Yahova. Anango ankunyozewa na azibale wawo, anzawo wakubasa panango wakushikola. Anango ankubonera na matenda ndipo anango ankushupika maganizo. Pali pomwe Akhrisitu anango omwe adabatizika kalekale ndipo adikhira mapeto ya nthawe ino kwa nthawe itali, koma namanje yakanati kufika. Vimwivi viyesa maninge chikhulupiriro cha Akhrisitu ntsiku zino. Abale na alongo wa mpingu woyambirira, nawombo adagumana na mabvuto ninge mwaya. Manje ko Paulo adawathandiza tani kuti akhale olimba?

13. Ko Paulo adathandiza tani omwe anganyozewa ndawa ya vomwe angakhulupirira?

¹³ Paulo adaphatisa basa Malemba pakulimbisa chikhulupiriro cha bale na alongo wake. Mwakulinganiza, Akhrisitu anango wachiyuda ambasowa kuti awadawire tani azibale wawo omwe ambawatsutsa ndipo ambakhulupirira kuti kukhala Myuda ndiko kofunika maninge kuposha kukhala Mkhrisitu. Koma kalata ya Paulo idawawonesa vomwe angachite. (Aheb. 1:5, 6; 2:2, 3; 9:24, 25) Iwo adakaphatisa basa malangizo ya Paulo podawira wanthu wotsutsa. Isembo ntsiku zino tingathandize abale na alongo wathu kuti ambaphatise basa mabukhu yofotokozera Baibolo kuti ambakwanise kufotokoza vomwe achakhulupirira. Ndipo peno wachilumbwana anyozewa ndawa yokhulupirira kuti Mulungu ndiye adalenga vinthu vose, tingamulimbikise kuti awerenge nkhani za m’bulosha yakuti Kodi Zamoyo Zinachita Kulengedwa? na yakuti Mmene Moyo Unayambira—Mafunso 5 Ofunika Kwambiri kuti achite kuwona yekha kuti ankukhulupirira vinthu vobveka.

14. Ko Paulo ambayesesa kuchita chani podiya kuti wenze wotangwanika na basa yolalikira na kupfunzisa?

¹⁴ Paulo adalimbikisa abale na alongo wake kuti ambawonesane chikondi ‘mu vochita.’ (Aheb. 10:24) Iye adathandiza abale na alongo wake osati mu voyankhula chabe, koma na vochita vake pomwe. Mwakulinganiza, abale wa ku Yudeya pangabonera na njala, Paulo adathandizira pakugawa chakudya. (Mac. 11:27-30) Ndipo olo kuti Paulo ambakhala wotangwanika maninge pa basa yolalikira na kupfunzisa, iye nthawe zose ambawona njira za momwe angathandizire abale osowa. (Agal. 2:10) Ndawa yochita vimwivi, iye adathandiza abale na alongo kukhulupirira kuti nthawe zose Yahova ambawasamalire. Ntsiku zinombo tikambadzipereka nkuphatisa basa nthawe na maluso yathu kuti tithandize kukachitika ngozi zamwadzidzidzi, tingathandizembo abale na alongo wathu kuti akhale na chikhulupiriro cholimba. Njira inango yothandizira ni kuchita vopereka kuti vithandize pa basa yapadziko yose. Tikambathandiza mwanjira mweyi na mwanjira zinango, tingachitise kuti abale na alongo wathu ambatsimikize kuti Yahova adzawasiyelini ne pang’ono.

15-16. Ko timbachite tani tikawona kuti m’bale panango mulongo wathu wayamba kufoka?

¹⁵ Paulo ambathandiza wanthu omwe ayamba kufoka. Iye ambawachitira chifundo ndipo ambawauza mawu yabwino. (Aheb. 6:9; 10:39) Mwakulinganiza, mu kalata yake yoyenda kwa Aheberi, iye adaphatisa basa mobwerezabwereza mawu yakuti ‘ise’ na yakuti ‘isepano’ pakufuna kuwonesa kuti olo iyembo ambafunika kuphatisa basa malangizo yomwe ambapasa anzake. (Aheb. 2:1, 3) Kuti titewedzere Paulo, isembo osati timbandowasiya wanthu omwe chikhulupiriro chawo chafoka, koma timbawaonese kuti tiwaganizira maninge. Tikachita vimwivi, tingawawonese kuti tiwakondadi chaivo. Dziwani kuti tikambayesesa kuwayankhula mawu yabwino, iwo angalimbikisiwe maninge.

¹⁶ Paulo adawatsimikizira abale na alongo wake kuti Yahova ankuwona basa zawo zabwino. (Aheb. 10:32-34) Isembo ntsiku zino tingachite bwino kumbathandiza m’bale panango mulongo yemwe chikhulupiriro chake chayamba kuchepa. Tingachite bwino kumubvunza momwe iye adapfunzirira choonadi panango kumulimbikisa kuti akumbukire nthawe yomwe Yahova adamuthandiza kalekale. Panthawe mwiyi tingachite pomwe bwino kumutsimikizira kuti Yahova alibe kuyebwa vomwe iye adachita kalekale ndipo adzamusiyelini ne pang’ono. (Aheb. 6:10; 13:5, 6) Macheza yatene yangathandize abale na alongo wathu kuti akhale na mphanvu yopitiriza kutumikira Yahova.

‘PITIRIZANI KULIMBIKISANA’

17. Ko tose tingachite bwino kuyesesa kuti timbachite bwino pankhani iponi?

¹⁷ Ninge mwaviriri kuti munthu womanga nyumba ayenda achithimizira luso yake nkuyenda kwa nthawe, isembo tingachite bwino kuyesesa kumbachita bwino maninge pankhani yolimbikisa anango. Kuti tithandize anzathu kukhala na mphanvu yopirira mayesero, tingachite bwino kuwasimbira vitsanzo va atumiki wakumbuyo omwe adapirira. Tingalimbikise ntendere potomolako makhalidwe yabwino ya anzathu, kupewa kuchita vinthu vodzonga ntendere na kuyesesa kukambirana peno tayambana. Ndipo tingapitirize kulimbisa chikhulupiriro cha anzathu powawonesa momwe angaphatisire basa Baibolo pofotokoza vomwe achakhulupirira, kuwathandiza pa vinthu vomwe ankusowa, kuwasimbira mbiri ya atumiki okhulupirika na kuyesesa kuwathandiza akayamba kufoka.

18. Ko imwepo ndimwe wofunisisa kupitiriza kuchita chani?

¹⁸ Wanthu omwe ankuphata basa yachimango akhala okondwa maninge. Isepano tingakhalembo okondwa tikambayesesa kulimbikisa abale na alongo wathu. Mosiyana na nyumba zomwe nkuyenda kwa nthawe zikugwa, basa yolimbikisa abale na alongo ibweresa maphindu yomwe yangamalelini. Ndipomwapa naboni tose ‘tipitirize kunyamalisana na kulimbikisana.’—1 Ates. 5:11.