‘Mumbafambe mu choonadi’

1. Ko tiphindula tani tikambasimbirana momwe tidakhalira wa Mboni za Yahova?

“KO IMWEPO mudapfunzira tani choonadi?” Tinashuwa kuti nkuyambalini kubvunziwa mbvunzo moyu. Tikonda kubvunza mbvunzo moyu kuti timudziwe bwino m’bale panango mulongo wathu. Vitikomedza maninge abale na alongo wathu akambatisimbira momwe adapfunzirira choonadi ndipo isembo tiwasimbira vomwe vidatichitisa kuti tikhale wa Mboni za Yahova na kupitiriza kukonda Yahova mpaka pano. (Aro. 1:11) Macheza yatene yatithandiza kuwona kuti ni mwayi ukulu maninge kukhala wa Mboni za Yahova ndipo tifunalini kusiya. Kucheza na abale wathu kungatithandize pomwe kuti tipirize kumbachita vinthu vokondweresa Yahova na vomwe vingachitise kuti iye atidalise. Tikambachita vimwevi ndiye kuti ‘tinkufamba mu choonadi.’—3 Yoh. 4.

2. Ko tikambirane chani mu nkhani ino?

² Munkhani ino, tikambirane vifukwa vinango vomwe vitichitisa kukonda choonadi. Patsogolo pake tione vomwe tingachite kuti tipitirize kumbakonda choonadi chimwechi. Kukambirana nkhani mweyi kutithandize kuti timbatembeje Yahova nthawe zose ndawa yotibweresa mu choonadi. (Yoh. 6:44) Vimwevi vitithandize pomwe kuti tikulise shungu yathu yombapfunzisa anango choonadi.

VOMWE VITICHITISA KUKONDA ‘CHOONADI’

3. Ko ni chifukwa chikulu chiponi chomwe chitichitisa kukonda choonadi?

³ Pana vifukwa vizinji vomwe vitichitisa kukonda choonadi. Chifukwa chikulu nchakuti tikonda Yahova Mulungu wathu yemwe ndiye Munichiro wa choonadi. M’Mawu yake Baibolo, sikuti adandotithandiza kudziwa kuti Iye ndiye adalenga kudzulu na dziko yapasi basi, koma adatithandiza pomwe kudziwa kuti Iye ni Baba yemwe atikonda maninge. (1 Pet. 5:7) Tikudziwa kuti Mulungu ni ‘wachifundo maninge, afulumizalini kukalipa ndipo ni wodzala na kukoma mtima na choonadi.’ (Eks. 34:6) Yahova akonda kuchita vinthu mwachilungamo. (Yes. 61:8) Iye vimuwawa akambatiwona tikubonera ndipo ni wofunisisa kumalisa mabvuto yathu. Ndipomwapa adakhazikisiratu nthawe yochita vimwevi. (Yer. 29:11) Tikundodikhira kuti nthawe mweyi ifike! Chimwichi ni chifukwa chibodzi chomwe chitichitisa kukonda maninge Yahova!

4-5. Ndawa chani mtumi Paulo adalinganiza chidikhiro chathu na ndangula?

⁴ Ko ni chifukwa chinango chiponi chomwe chitichitisa kukonda choonadi? Choonadi chitithandiza kuti tiphindule mu njira zizinji. Ganizirani chitsanzo ichi: Choonadi cha m’Baibolo chinkuphatanidzapo chidikhiro chathu chakutsogolo. Pakufuna kuonesa kuti chidikhiro chathu nchofunika maninge, Paulo adanemba kuti: ‘Chidikhiro chatinacho chiri ninge ndangula ya miyoyo yathu ndipo nchotsimikizika na chokhazikika.’ (Aheb. 6:19) Ninge mwaviriri kuti barko ikaikhiwa ndangula ichitalini pendapenda, chidikhiro chomwe Baibolo ikutipasa chingatithandize kukhala wolimba pa mabvuto.

⁵ Pamwapa Paulo ambafotokoza va chidikhiro chakudzulu chomwe Akhrisitu wodzozewa anacho. Koma mawu mwaya ni yophindulisa pomwe kwa Akhrisitu womwe ankudikhira kudzakhala na moyo wosapera pano padziko yapasi. (Yoh. 3:16) Shuwadi, kupfunzira va chidikhiro cha moyo wosapera kwatithandiza maninge kuti tikhale na moyo waphindu.

6-7. Ko Yvonne adaphindula tani ndawa yodziwa chaivo pankhani ya tsogolo yathu?

⁶ Wonani vomwe vidachitikira mulongo munango dzina yake Yvonne. Iye alibe kulerewa na Mboni za Yahova ndipo pewenze mwana ambagopa maninge kufa. Iye ambakumbukira mawu yanango yomwe adawerenga ndipo ambakwanisalini kuyayebwa. Mawu mwaya yenze yakuti: “Idzafike ntsiku yomwe idzakhale yomalizira kukhala na moyo.” Iye adalewa kuti: “Mawu mwaya yambanisowesa tulo ntsiku zizinji ndawa yoganizira vati vidzanichitikire kutsogolo. Nimbadzibvunza kuti: ‘Manje peno nidzafe, moyo moyu unaphindu yanyi?’ Koma olo nteno nimbachita mantha na kufa basi!”

⁷ Patsogolo pake padakhala mtsikana, Yvonne adagumana na wa Mboni za Yahova. Iye adalewa kuti: “Nidayamba kukhulupirira maninge kuti kutsogolo tidzakhale na moyo wosapera mparadaiso padziko yapasi.” Ko kupfunzira choonadi kudamuthandiza tani mulongo wathu moyu? Iye adalewa pomwe kuti: “Nimbasowalini pomwe tulo ndawa yoganizira vakutsogolo panango kugopa kufa.” Tinashuwa kuti imwepo mukuonambo kuti Yvonne akondwa maninge ndawa yokhala mu choonadi ndipo iye akonda pomwe maninge kufotokozera anango va chidikhiro chake cha kutsogolo.—1 Tim. 4:16.

8-9. (a) Ko mwamuna wa mu fanizo ya Yesu adawonesa tani kuti chuma chadagumana nchofunika maninge? (b) Ko imwepo mungawonesembo tani kuti choonadi nchofunika?

⁸ Choonadi cha m’Baibolo chiphatanidzapo pomwe ntontholo wabwino wa Ufumu wa Mulungu. Yesu adalinganiza choonadi cha Ufumu na chuma chobisika. Pa Mateyu 13:44, Yesu adalewa kuti: ‘Ufumu wakudzulu uli ninge chuma chobisika m’munda chomwe munthu adachigumana nkuchibisa. Ndawa ya chimwemwe chewenze nacho, adayenda kukagulisa vinthu vose vewenze navo nkukagula munda moyu.’ Wonani kuti mwamuna moyu adachita kuchibukira chuma mwechi, alibe kuchita kuchifagafaga neye. Koma padachigumana, iye adachita khama kuti akhale nacho. Mpaka adafika pakugulisa vinthu vose vewenze navo. Ndawa chani? Ndawa yakuti ambadziwa kuti chuma chadagumana chenze chofunika maninge. Chuma mwechi chenze chodula kuposha vinthu vose vomwe iye adabvuma kuluza.

⁹ Ko imwepo muonambo kuti choonadi nchofunika maninge? Ni vosachita kubvunza! Tikudziwa kuti palibe chinthu olo chibodzi chofunika maninge mu dziko iyi kuposha kutumikira Yahova manjeuno na kukhala na chidikhiro cha moyo wosapera mu dziko inyowani yotongewa na Ufumu wa Mulungu. Kukhala pa ushamwali wabwino na Yahova, ni chinthu chofunika maninge kuposha chinthu chilichose chomwe tingabvume kuluza. Chinthu chabwino kwa isepano ni ‘kuyesesa kumukondweresa Yahova.’—Akol. 1:10.

10-11. Ko nchani chidalimbikisa Michael kuti asiye karate?

¹⁰ Azinji ise tidachita khama maninge pakuyesesa kuti Yahova ambakondwere nase. Anango mpaka adabvuma kusiya basa zapadzulu kudziko uku. Anango adasiya mapulani yawo yofunisisa kulemera ndipo anango adasiya makhalidwe yawo yoyipa pa nthawe yomwe adayamba kupfunzira va Yahova. Vimwevi ndivo Michael adachita. Azibereki wake enzelini wa Mboni za Yahova. Padafika pa ulumbwana, iye adayamba kupfunzira karate. Iye adalewa kuti: “Cholinga changu chenze chakuti nthawe zose thupi yangu imbakhale yolimba maninge. Ndipo kazinjikazinji nimbawona kuti palibe angakwanise kuniwina.” Koma padayamba kupfunzira Baibolo, Michael adapfunzira kuti Yahova aipidwa na kuchita ndewo. (Sal. 11:5) Pakulewa va banja ya Mboni za Yahova yomwe ingamupfunzisa choonadi, Michael adalewa kuti: “Iwo alibe kuniuzako kuti nisiye kuchita karate, adandopitiriza kumbanipfunzisa choonadi cha m’Baibolo basi.”

¹¹ Michael pangapitiriza kupfunzira choonadi, adayamba kukonda maninge Yahova. Iye adadabwa maninge padabva kuti Yahova achitira chifundo maninge atumiki wake. Nthawe inango, Michael adazindikira kuti achadekana kuchinja vinthu pa moyo wake. Iye adalewa kuti: “Nimbadziwa kuti kusiya kuchita karate kukhale chinthu choshupa maninge pa moyo wangu. Koma nidadziwa pomwe kuti nikasiya nikondwerese Yahova ndipo nidatsimikiza mtima nkusiya na kuyambiratu kutumikira Yahova.” Michael adaona kuti choonadi nchofunika maninge pa moyo wake ndipo vimwevi vidamuchitisa kuti achinje khalidwe yake.—Yak. 1:25.

12-13. Ko choonadi cha m’Baibolo chidamuthandiza tani Mayli?

¹² Pakufuna kuwonesa kuti choonadi nchofunika maninge, Baibolo ichilinganiza na luju yomwe inkuvunika pa m’dima. (Sal. 119:105; Aef. 5:8) Mayli wa ku Azerbaijan, nayembo ankutembeja maninge momwe Mawu ya Mulungu yadamuthandizira. Iye adakulira m’banja ya wanthu osiyana vipembedzo. Ababa wake enze mu tchetchi ya Muslim ndipo amayi wake enze Ayuda. Iye adalewa kuti: “Nimbakaikiralini kuti Mulungu aliko, koma olo nteno nenze na mibvunzo yazinji. Nimbadzibvunza kuti: ‘Ndawa chani Mulungu adalenga wanthu peno iye afuna kuti iwo ambabonere kumoto mpakana kalekale?’ Pakuti wanthu azinji alewa kuti chilichose chomwe chikuchitika ni cholinga cha Mulungu, nimbadzibvunza kuti ‘manje ndiye kuti Mulungu moyu vimukomedza akambawona wanthu akubonera?’”

¹³ Mayli adapitiriza kufagafaga midawiro ya mibvunzo yake. Nthawe inango iye adabvuma kupfunzira Baibolo ndipo adakhala wa Mboni za Yahova. Iye adalewa kuti: “Mpfundo zobveka bwino za m’Baibolo zidanithandiza maninge kukhala munthu wokondwa. Choonadi chosatsutsika chogumanika m’Mawu ya Mulungu, chidanithandiza kukhala na ntendere wa mumtima.” Ninge mwadachitira Mayli, naboni tose timbatamande Yahova ‘yemwe adatichosa mu mdima nkutionesa kugaka kwake kodabwisa.’—1 Pet. 2:9.

14. Nchani chatingachite kuti timbakonde maninge choonadi? (Onani bokosi yakuti: “Vinthu vinango vomwe vilinganiziwa na choonadi.”)

¹⁴ Vimwevi ni vitsanzo vochepa chabe voonesa kuti choonadi chinaphindu maninge. Tinashuwa kuti imwepo mukukumbukirambo vitsanzo vinango. Tani pa pfunziro yanu ya pamwekha mukafagefage vifukwa vinango vomwe vitichitisa kukonda choonadi? Peno tiona kuti choonadi nchofunika maninge, ndiye kuti nthawe zose timbayesese kuchita vinthu voonesa kuti tikomedzewa kukhala wa Mboni za Yahova.

MOMWE TINGAONESERE KUTI TIKONDA CHOONADI

15. Ko ni njira iponi yatingaonesere kuti tikonda choonadi?

¹⁵ Tingaonese kuti tikonda choonadi, peno nthawe zose tipfunzira Baibolo na mabukhu yofotokoza Baibolo. Vilibe basa peno takhala mu choonadi kwa nthawe itali panango neye, tose tichadekana kuyesesa kupfunzira vinthu vizinji. Ntsanja yoyambirira yopfunzira idalewa kuti: “Mudziko ino munavipfunziso vizinji vabodza, ndipomwapa ni voshupa kuti munthu agumane choonadi. Kuti munthu akwanise kuchigumana choonadi achadekana kuchita khama maninge. . . . Osati timbawone kuti vomwe tidapfunzira vakwana. . . . Koma tichadekana kuyesesa kupfunzira mpfundo zinango za m’Baibolo.” Nishuwadi kuti kupfunzira ni basa, koma tikayesesa tiphindula maninge.

16. Ko imwepo mupfunzira Baibolo mwanjira yanyi? (Miyambo 2:4-6)

¹⁶ Anango akondalini kuwerenga na kupfunzira. Koma Yahova ankutilimbikisa kuti ‘timbafunefune’ na ‘kufagafaga’ kuti tibvesese bwino choonadi. (Lewengani Miyambo 2:4-6.) Tikambayesesa kuchita khama, tiphindula maninge. Corey adalewa kuti akambapfunzira Baibolo payekha, ayesesa kumbaikhira nzeru vesi iliyose payokha. Iye adalewa kuti: “Niwerenga mawu yose ya mnyantsi, kuwerenga mareferensia cruzada ndipo nifagafaga pomwe vinthu vinango. . . . Kupfunzira Baibolo mwanjira mweyi, kunithandiza kuti niphindule maninge!” Peno tipfunzirambo mwa njira mweyi panango inango, tose tichadekana kupatula nthawe yakuti tipfunzire Baibolo.—Sal. 1:1-3.

17. Ko tingachite tani kuti timbaphatise basa vomwe tikupfunzira? (Yakobo 1:25)

¹⁷ Koma sikuti kundopfunzira choonadi nikokwana neye. Tichadekana kumbaphatisa basa pa moyo wathu vomwe tinkupfunzira. Tikachita teno ndipo patingakhaledi wokondwa chaivo. (Lewengani Yakobo 1:25.) Ko tingachite tani kuti timbaphatise basa vomwe tinkupfunzira? M’bale munango adalewa kuti tingachite bwino kudziunguza kuti tione mbali zomwe tichita bwino na mbali zomwe tichadekana kuchinja. Pankhani mweyi mtumi Paulo adalewa kuti: ‘Olo nteno mulimose mwatapitira patsogolo, naboni tipitirize kupita patsogolo ndipo timbafambe bwino panjira mweyi.’—Afil. 3:16.

18. Ndawa chani tichadekana kuyesesa ‘kufamba mu choonadi’?

¹⁸ Ndoganizani momwe tingaphindulire tikambayesesa ‘kufamba mu choonadi’! Sikuti tindochitisa kuti moyo wathu ukhale wabwino chabe, koma tichitisa pomwe kuti Yahova pabodzi na abale na alongo wathu akhale okondwa. (Miy. 27:11; 3 Yoh. 4) Ndipomwapa tingalewe kuti tinavifukwa vobveka vokondera choonadi na kupitiriza kuphatisa basa vomwe tikupfunzira.