Atumiki wa Yahova akonda chilungamo

1. Ko Yosefe adagumana na chiyeso chiponi, ndipo iye adachita chani?

YOSEFE yemwe wenze mwana wa Yakobo, adagumana na chiyeso choshupa maninge. Nkazi munango adamuuza kuti: ‘Bwera ugone nane.’ Iye wenze nkazi wa abwana wake Potifara. Yosefe adalamba vimwevi. Wanthu anango angaganize kuti, ‘manje Yosefe adalambiranyi pakuti panthawe mweyi Potifara penze palibe?’ Panthawe mweyo Yosefe wenze kapolo ndipo kulamba kumoku kudakamubweresera mabvuto. Podiya kuti venze teno, Yosefe adapitiriza kulamba. Ndawa chani? Iye adalewa kuti: ‘Ko ningachitirenyi choipa chikulu tene nkuchimwira Mulungu?’—Gen. 39:7-12.

2. Ko Yosefe adadziwa tani kuti kuchita chigololo kwenze kuchimwira Mulungu?

² Ko Yosefe adadziwa tani kuti Mulungu awona kuti kuchita chigololo ni ‘tchimo ikulu’? Chilamulo cha Mose chomwe chenze na lamulo yobveka bwino yolewa kuti ‘ayi kuchita chigololo,’ panthawe mweyo kwenze kulibe ndipo chidadzanembewa payadapita magole 200. (Eks. 20:14) Olo nteno, Yosefe ambamudziwa bwino Yahova ndipo ambadziwiratu kuti Iye angakomedzewelini peno iye angachite chigololo. Mwakulinganiza Yosefe ambadziwa bwino kuti Yahova adalinganiza vakuti banja imbachitike pakati pa mwamuna m’bodzi na nkazi m’bodzi. Iye adabva momwe Yahova adatetezera ambuya wake a Sara maulendo yawiri kuti akwanise kukhala wokhulupirika kwa amuna wawo. Pa nthawe inango, Mulungu adateteza pomwe Rabeka yemwe wenze nkazi wa Isaki. (Gen. 2:24; 12:14-20; 20:2-7; 26:6-11) Kuganizira nkhani mwezi kudathandiza Yosefe kudziwa vomwe vingakondwerese Yahova na vomwe vingamuipire. Pakuti Yosefe ambakonda maninge Mulungu wake, iye wenze wotsimikiza kutewedza mpfundo za chilungamo za Yahova.

3. Ko mu nkhani mweyi tikambirane chani?

³ Tinashuwa kuti imwepo mukondambo chilungamo. Koma olo viri teno tose ndise ochimwa ndipo tikaleka kusamala, dziko yoipa ino ingatisokoneze mosashupa. (Yes. 5:20; Aro. 12:2) Ndipomwapa naboni tikambirane kuti ko chilungamo nchani na kuona momwe tingaphindulire tikambachita vinthu mwachilungamo. Patsogolo pake tikambirane njira zitatu zomwe zingatithandize kuti timbakonde maninge mpfundo za Yahova.

KO CHILUNGAMO NCHANI?

4. Ko wanthu azinji anamaganizo yophonyeka yaponi pa nkhani ya chilungamo?

⁴ Wanthu anango awona kuti munthu wachilungamo achadekana kukhala woshupa, wokonda kuweruza anango ndipo ambadziwone kukhala wapadzulu kuposha iwo. Koma Mulungu akondwalini na makhalidwe yose mwaya. Yesu pewenze pa dziko yapasi, adatsuula mwamphanvu atsogoleri wavipembedzo womwe ambakhazikisa malamulo yawoyawo pa nkhani ya chilungamo. (Mla. 7:16; Luka 16:15) Munthu wachilungamo adziwonalini kuti achita bwino kuposha wanthu anango.

5. Mobverana na Baibolo, ko chilungamo nchani? Perekani vitsanzo.

⁵ Chilungamo ni khalidwe yabwino maninge. Ndipo mwachigwato tinganene kuti chilungamo ni kuyesesa kuchita vinthu vomwe Yahova akondwera navo. M’Baibolo, mawu yakuti ‘chilungamo’ yatanthauza kutewedza mpfundo za padzulu za Yahova. Mwakulinganiza, Yahova adalimbikisa wanthu wa bizi kuti ambaphatise basa ‘mipimo yoyenerera.’ (Deut. 25:15) Mawu yachiheberi yomwe adayatsumbudzulira kuti mpimo ‘woyenerera’ yangathandauze pomwe kuti mpimo ‘wachilungamo.’ Ndipomwapa Mkhrisitu yemwe akufuna kumbaonewa kuti ni wachilungamo, achadekana kumbachita vinthu vabwino pa bizi. Munthu yemwe akonda chilungamo vimuwawa akambawona munthu ankuchitiriwa vinthu viribe chilungamo. ‘Pakufuna kukondweresa Yahova,’ munthu wachilungamo ayesesa kuganizira momwe Yahova angabvere ndawa ya vomwe iye wasalula.—Akol. 1:10.

6. Ndawa chani tichadekana kutewedza mpfundo za Yahova posiyanisa chabwino na choipa? (Yesaya 55:8, 9)

⁶ Baibolo ifotokoza kuti Yahova ni Chimake cha chilungamo. Ndipomwapa iye afotokozewa kuti ‘ali khale pa malo ya chilungamo.’ (Yer. 50:7) Pakuti Yahova ni Mulengi, iye ndiye woyenerera kukhazikisa mpfundo zosiyanisira chabwino na choipa. Pakuti ndise wochimwa, tingakwaniselini kusiyanisa chabwino na choipa. Koma pakuti Yahova ni wangwiro, adziwa bwinobwino chabwino na choipa. (Miy. 14:12; lewengani Yesaya 55:8, 9.) Koma pakuti tidakonzewa mu chifaniziro cha Mulungu, tingakwanise kutewedza mpfundo zake pa nkhani ya chilungamo. (Gen. 1:27) Isepano tikonda maninge kuchita vimwevi. Kukonda Ababa wathu kutilimbikisa kuchita vose vatingakwanise kuti timutewedzere.—Aef. 5:1.

7. Ndawa chani tifunika mpfundo zothandiza? Perekani chitsanzo.

⁷ Tiphindula maninge tikambatewedza mpfundo za Yahova posiyanisa chabwino na choipa. Ko munkukwanisa kuona kuti ndawa chani? Ndoganizani mwavidakakhalira adakati aliyese aphatisira basa mpimo womwe akufuna pakugulisa chimanga chake. Vidakakhala voshupa maninge. Wanthu akambaphatisa basa mipimo yabwino vikhala vothandiza maninge. Nchibodzibodzimbo, mpfundo za Mulungu zosiyanisira chabwino na choipa zititeteza maninge.

8. Ko wanthu wokonda kuchita vinthu vabwino adzatambire madaliso yaponi?

⁸ Yahova adalisa wanthu womwe ayesesa kutewedza mpfundo zake. Iye ankupolomisa kuti: ‘Olungama adzatambire dziko yapasi ndipo adzakhale mumo mpakana kalekale.’ (Sal. 37:29) Ndoganizani momwe vidzakhalire vokomedza wanthu akadzakhala wobvana, wantendere na wokondwa maninge ndawa yakuti aliyese akutewedza mpfundo za Yahova. Yahova ankufunambo kuti imwepo mudzakondwe pa nthawe mweyo. Ndipomwapa tingati tose tinavifukwa vabwino vokondera chilungamo! Ko tingachite tani kuti timbakonde maninge khalidwe mweyi? Naboni tikambirane vinthu vokwana vitatu.

YESESANI KUTI MUMBAKONDE MANINGE MPFUNDO ZA YAHOVA

9. Nchani chomwe chingatithandize kukonda chilungamo?

⁹ Choyamba: Mbakondani Yahova yemwe adakhazikisa mpfundo zimwizi. Kuti timbakonde chilungamo, tingachite bwino kumbakonda maninge Yahova yemwe adatiikhira mpfundo zosiyanisira chabwino na choipa. Tikambakonda maninge Yahova, tidzayambe kutewedza mpfundo zake zachilungamo. Mwakulinganiza, adakati Adamu na Hava ambamukonda maninge Yahova, adakabvera lamulo yomwe adawapasa.—Gen. 3:1-6, 16-19.

10. Ko Abulahamu adachita tani kuti amudziwe bwino Yahova?

¹⁰ Isepano tifunalini kuchitambo vinthu ninge vomwe Adamu na Hava adachita. Kuti tipewe, tingachite bwino kumbapfunzira va Yahova, kuwona makhalidwe yake yabwino na kuyesesa kubvesa momwe iye achaganizira. Tikachita vimwivi tidzayambe kukonda maninge Yahova. Ganizirani chitsanzo cha Abulahamu yemwe ambakonda maninge Yahova. Iye ambabvera Yahova podiya akumbiriwe kuchita vinthu voshupa maninge. Iye ambalambalini, koma ambayesesa kumudziwa bwino Yahova. Mwakulinganiza, padadziwa kuti Yahova ankufuna kudzonga Sodomu na Gomora, Abulahamu pakuyamba adachita mantha poganiza kuti panango ‘Woweruza wa dziko yose yapasi’ pakudzonga wanthu osalungama adzongere pabodzi na olungama. Abulahamu ambawona kuti vimwevi vingakwanisikelini, ndipomwapa adayamba kubvunza Yahova mibvunzo yazinji. Yahova adamudawira mibvunzo yake yose modekha. Pamapeto pake Abulahamu adazindikira kuti Yahova awona mtima wa munthu aliyese ndipo angalangelini munthu wosaphonya pabodzi na munthu wophonya.—Gen. 18:20-32.

11. Nchani chinkuwonesa kuti Abulahamu ambakonda maninge Yahova ndipo ambamukhulupirira?

¹¹ Abulahamu adakomedzewa na macheza yomwe adachita na Yahova pomwe angakambirana va mathaundi ya Sodomu na Gomora. Tinashuwa kuti macheza mwaya yadamuthandiza kuti ambakonde maninge Ababa wake kuposha kalekale. Koma magole yazinji patsogolo pake, Abulahamu adagumana na chiyeso chochitisa kuti vikhale voshupa kukhala wokhulupirika kwa Yahova. Yahova adamukumbira kuti apereke ntsembe mwana wake Isaki yemwe ambamukonda maninge. Koma panthawe mwiyi Abulahamu ambamudziwa kale bwinobwino Mulungu wake ndipo alibe kuchita mibvunzo yazinji. Abulahamu adandobvera ndipo adayamba kukonzekera kuti achite vomwe Mulungu adamukumbira. Koma ndoganizani momwe vidamuwawira mumtima mwake pangakonzekera kuti amupereke ntsembe Isaki. Tinashuwa kuti chomwe chidamuthandiza ni kuganizira maninge vomwe angadziwako pankhani ya Yahova. Iye ambadziwa kuti Yahova angachitelini vinthu vilibe chilungamo panango mosowa chikondi. Mtumi Paulo adafotokoza kuti Abulahamu wenze wotsimikiza kuti Yahova amumukise mwana wake Isaki. (Aheb. 11:17-19) Ndipo Yahova wenze adapolomisa kale kuti Isaki adzakhale baba wa mitundu yazinji ndipo panthawe mwiyi Isaki wenze alibe ne mwana m’bodzi. Abulahamu ambakonda maninge Yahova, ndipomwapa wenze wotsimikiza kuti ababa wake mwawa amukumbira kuchita vinthu vachilungamo. Ndipomwapa adakhala na chikhulupiriro nkubvera podiya kuti venze voshupa.—Gen. 22:1-12.

12. Ko tingamutewedzere tani Abulahamu? (Salimo 73:28)

¹² Ko tingamutewedzere tani Abulahamu? Tingachite bwino kupitiriza kupfunzira va Yahova ninge iye. Tikachita teno, tidzakhale pa ushamwali wolimba na iye ndipo tidzayambe kumukonda kuposha kalekale. (Lewengani Salimo 73:28.) Chikumbumtima chathu chidzatilimbikise kuchita vabwino ndawa yodziwa momwe Yahova achaganizira. (Aheb. 5:14) Vimwevi vingatithandize kuti peno munthu ankutilimbikisa kuchita voipa tilambiretu nthawe mweyo. Tidzapewe kuchita chinthu chomwe tinkudziwiratu kuti chikalipise Yahova na kudzonga ushamwali wathu na iye. Manje nchani pomwe chatingachite kuti tiwonese kuti tikonda chilungamo?

13. Nchani chatingachite kuti tikhale wachilungamo? (Miyambo 15:9)

¹³ Chachiwiri: Yesesani kumbachita vinthu vachilungamo ntsiku iliyose. Peno tinkufuna kuti thupi yathu ikhale yolimba, tifunika kumbachita masenzeka yolimbisa thupi kawirikawiri. Kuti tikhalembo wachilungamo, tifunika kumbayesesa ntsiku iliyose kumbachita vinthu vachilungamo. Kuchita vimwevi sikuti ni koshupa neye. Tinkulewa teno ndawa Yahova angatiuzelini kuchita vinthu vomwe ankudziwiratu kuti tingakwaniselini. (Sal. 103:14) Iye ankutitsimikizira kuti ‘akonda munthu wochita chilungamo.’ (Lewengani Miyambo 15:9.) Peno tinkufuna kukwanirisa cholinga chatinacho pakutumikira Yahova, tiyesesa kuchita khama. Peno tinkufuna kukhala wachilungamo, timbachitembo khama. Yahova ni wodekha ndipo adzatithandize kuti tipite patsogolo podiya kuti papite nthawe.—Sal. 84:5, 7.

14. Ko ‘chodzitetezera pachifuwa chachilungamo’ nchani, ndipo ndawa chani tifunika kumbachivala?

¹⁴ Yahova ankutikumbusa mwachikondi kuti kuyesesa kukhala wachilungamo ni kosashupa. (1 Yoh. 5:3) Koma kutiteteza ndipo ntsiku iliyose tifuna kutetezewa. Kumbukirani vitsulo va nkhondo vomwe mtumi Paulo adavifotokoza. (Aef. 6:14-18) Ko pa vitsulo vimwivi, ni chiponi chomwe chingateteza mtima wa nsocha? Ni ‘chodzitetezera pachifuwa chachilungamo’ chomwe chinkuimira mpfundo zachilungamo za Yahova. Ninge mwevenzere kuti chodzitetezera pachifuwa chimbateteza mtima wa nsocha, mpfundo za Yahova zachilungamo zingatetezembo umunthu wathu wa nkati. Ndipomwapa ni vofunika maninge kuti timbavale vitsulo vose vankhondo vomwe vinkuphatanidzapo chodzitetezera pachifuwa chachilungamo.—Miy. 4:23.

15. Ko mungachivale tani chodzitetezera pachifuwa chachilungamo?

¹⁵ Ko imwepo mungachivale tani chodzitetezera pachifuwa chachilungamo? Kuti mukwanise, mungachite bwino kumbaganizira mpfundo za Yahova mukambasaina vochita ntsiku iliyose. Mukambaganizira vati muyankhule, nyimbo zati mubvesere, mavidiyo yati munyang’anire panango mabukhu yati muwerenge, mungachite bwino kuyamba mwadzibvunza kuti: ‘Ko nikachita vimwivi ndiye kuti nikuudyesa chani mtima wangu? Ko Yahova akondwera navo vimwevi? Ko vinichitise kuyamba khalidwe yachigololo, ndewo, kumeka na kudzikonda yomwe ni makhalidwe yomwe Yahova yamuipira?’ (Afil. 4:8) Peno munkufuna kuti mpfundo zachilungamo za Yahova ziteteze mtima wanu, mumbayesese kuchita vinthu vobverana na chifuniro chake.

16-17. Ko lemba ya Yesaya 48:18 inkutitsimikizira tani kuti tingakwanise kutewedza mpfundo za Yahova zachilungamo mpakana kalekale?

¹⁶ Ko nthawe zinango mukhala na nkhawa yakuti panango nkuyenda kwa nthawe mudzakwaniselini kutewedza mpfundo zachilungamo za Yahova? Peno nteno, ganizirani chitsanzo chabwino chogumanika pa Yesaya 48:18. (Lewengani.) Yahova ankupolomisa kuti chilungamo chathu chidzakhale ‘ninge madzi ya munyanja yomwe yandokhalira kuwinduka.’ Linganizani kuti munkufamba m’mbalim’mbali mwa nyanja ndipo munkuwona madzi yomwe yakundowinduka ne yankulekalini. Manje ko mukambayanyang’ana mungayambe kuganiza kuti kutsogolo yangadzaleke kuwinduka? Neye. Viri teno ndawa yakuti munkudziwa kuti madzi ya munyanja mwiyi yakhala yankuwinduka kuchokera kalekale ndipo yadzalekelini.

¹⁷ Chilungamo chanu chingakhalembo ninge madzi mwaya ya munyanja. Ko vingakwanisike tani? Peno pali nkhani yomwe munkufunika kusaina vochita, yambani mwawona vomwe Yahova ankufuna kuti muchite. Mukazindikira vomwe iye ankufuna, basi chitani vimwevo. Podiya kuti vomwe iye ankukuuzani vingawoneke ninge voshupa, dziwani kuti Ababa wanu wachikondi ambakuthandizeni nthawe zose kuti mumbachite vinthu vobverana na mpfundo zake zachilungamo.—Yes. 40:29-31.

18. Ndawa chani tifunikalini kuweruza anango pakundoyendera mpfundo zathu?

¹⁸ Chachitatu: Siyirani Yahova udindo woweruza. Pomwe tinkuyesesa mwakhama kutewedza mpfundo zachilungamo za Yahova, timbapewe pomwe kuweruza anango nkumbadziwona kuti ndise wachilungamo maninge. M’malo mombawona kuti anzathu alibe na basa nkumbathamingira kuwaweruza pakundoyendera mpfundo zathu, tingachite bwino kukumbukira kuti Yahova ndiye ‘Woweruza wa dziko yose yapasi.’ (Gen. 18:25) Yahova alibe kutipasa udindo woweruza anzathu. Ndipomwapa Yesu adapereka lamulo yakuti: ‘Lekani kuweruza anzanu kuchitira kuti imwembo mungaweruziwe.’—Mat. 7:1.b

19. Ko Yosefe adawonesa tani kuti ambakhulupirira maninge kuti Yahova ndiye anaudindo woweruza?

¹⁹ Naboni tikambirane pomwe chitsanzo cha Yosefe yemwe wenze munthu wachilungamo. Iye adapewa kuweruza anango olo wanthu omwe adamuchitira voipa. Azibale wake chaiwo adamuchitira vinthu voipa, kumugulisa kuti akakhale kapolo ndipo mpaka adafika ponamiza ababa wawo kuti Yosefe adaphewa. Magole yazinji patsogolo pake, Yosefe adadzagumana pomwe na wanthu wa m’banja mwake. Panthawe mwiyi, iye wenze wolamulira wamphanvu maninge mudziko yose ya Iguputo ndipo adakafuna adakabwezera voipa vomwe azibale wake mwawa adamuchitira. Ndipo azibale wake wa Yosefe ambachitadi mantha kuti panango awabwezere pa vomwe adamuchitira podiya kuti panthawe mwiyi ambadzilinga pa voipa vadamuchitira. Koma Yosefe adawalimbikisa kuti: ‘Ayi kuchita mantha. Ko inepano natenga udindo wa Mulungu?’ (Gen. 37:18-20, 27, 28, 31-35; 50:15-21) Yosefe modzichepesa adazindikira kuti Yahova yekha ndiye anaudindo woweruza azibale wake mwawa.

20-21. Ko tingachite tani kuti tipewe kudziwona kuti ndise wachilungamo maninge?

²⁰ Isembo tingachite bwino kutewedzera Yosefe nkusiyira Yahova udindo woweruza. Mwakulinganiza, tingachitelini bwino kumbandokhalira kuwona vose vomwe abale wathu ankuchita kuti tiwone volinga vawo. Viri teno ndawa tingakwaniselini kuwona vomwe viri mumtima mwa munthu. Koma ‘Yahova yekha ndiye angakwanise kufufuza mpakana kudziwa volinga va munthu.’ (Miy. 16:2) Yahova akonda wanthu wakhaindi iliyose, vilibe basa kuti adakula tani ndipo chikhalidwe chawo chili tani. Ndipo Yahova ankutilimbikisa kuti ‘timbafutukule mtima wathu.’ (2 Akor. 6:13) Tingachite bwino kuyesesa kumbakonda abale na alongo wathu, osati kumbandokhalira kuwaweruza.

²¹ Vimwevi vinkutanthauza pomwe kuti osati timbaweruze wanthu omwe ni Mbonilini. (1 Tim. 2:3, 4) Peno m’banja mwanu munamunthu wotsutsa, ko mungathamingire kuganiza kuti “iye adzakhalelini Mboni”? Neye. Mungachitelini bwino kuganiza tene ndawa kumuku kungakhale kusowa chilungamo. Ayi kuyebwa kuti Yahova adakali kupereka mpata kwa ‘wanthu wakhaindi yose’ kuti alape. (Mac. 17:30) Nthawe zose mumbakumbukire kuti kudziwona kuti ndimwe wachilungamo maninge, kumuku ndiko kusowa chilungamo.

22. Ndawa chani imwepo munkufuna kupitiriza kumbakonda chilungamo?

²² Naboni tose timbakonde mpfundo zachilungamo za Yahova. Tikachita teno, tidzakhale okondwa maninge ndipo tidzapereke chitsanzo chabwino kwa anango kuti ayambembo kukonda Mulungu wathu. Naboni tose tipitirize ‘kumbabva njala na nyota yachilungamo.’ (Mat. 5:6) Dziwani kuti Yahova nthawe zose awona khama yomwe munkuchita kuti mupite patsogolo ndipo vimwivi vimukondweresa maninge. Mbayesesani kuchita vimwivi ndawa yakuti wanthu mudziko ino ankupitiriza kuchita vinthu vilibe chilungamo. Nthawe zose mumbakumbukire kuti ‘Yahova akonda chilungamo.’—Sal. 146:8.