NKHANI YOPFUNZIRA 33
Yahova awona vomwe vinkuchitikira atumiki wake
‘Diso ya Yahova ili pa wanthu omwe amugopa.’—SAL. 33:18.
NYIMBO NA. 4 “Yehova Ndi M’busa Wanga”
VOMWE TIPFUNZIREa
1. Ndawa chani Yesu adakumbira Yahova kuti ambanyang’anire opfunzira wake?
USIKU wakuti mangwana yake afe, Yesu adakumbira chinthu chofunika maninge kwa Ababa wake. Iye adakumbira Yahova kuti ambanyang’anire opfunzira wake. (Yoh. 17:15, 20) Koma kundochokera kalekale, Yahova wakhala akunyang’anira kale atumiki wake na kuwateteza. Podiya kuti viri teno, Yesu ambadziwa kuti opfunzira wake agumane na mayesero ya mwadzidzidzi yochokera kwa Satana. Yesu ambadziwa pomwe kuti opfunzira wake angakwanise kupirira mayesero mwaya mothandiziwa na Yahova basi.
2. Mobverana na Salimo 33:18-20, ndawa chani tifunikalini kumbachita mantha tikagumana na mabvuto?
2 Dziko yotongewa na Satana ino inkubweresera mabvuto yazinji Akhrisitu chaiwo ntsiku zino. Tinkugumana na mabvuto yomwe yangatichitise kukhala wokwinyirira na kukangira kukhala wokhulupirika kwa Yahova. Koma vomwe tipfunzire munkhani ino vitithandize kuwona kuti palibe chifukwa chochitira mantha. Viri teno ndawa yakuti Yahova ankuwona mabvuto yose yatinkugumana nayo ndipo ni wokonzeka kutithandiza. Naboni manje tikambirane vitsanzo viwiri va m’Baibolo vomwe vinkuwonesadi kuti ‘maso ya Yahova yali pa wanthu omugopa.’—Lewengani Salimo 33:18-20.
PENO TIKUNDOONA KUTI TILI TEKHATEKHA
3. Nchani chingachitise kuti timbadziwone kuti tili tekhatekha?
3 Podiya kuti mumpingu wathu muli abale na alongo azinji, nthawe zinango tingambadziwone kuti tili tekhatekha. Mwakulinganiza, alumbwana angambadziwone kuti ali okhaokha peno ankutsutsiwa na anzawo wakushikola podiya kuti ankuyesesa kuwafotokozera vomwe achakhulupirira. Ndipo angambadziwone pomwe kuti ali okhaokha peno afulukira mumpingu unango. Anango ise tishupika na maganizo yodziwona kuti tilibe na basa ndipo palibe yemwe angatithandize. Panango tingambazeze kufotokozerako anango momwe tinkubvera ndawa yoganiza kuti panango angatibveseselini. Ndipo tingafike pakukaikira kuti peno alipodi munthu yemwe atiikhira nzeru. Kudziwona kuti tili tekhatekha kungachitise kuti tikhale na nkhawa nkumbawona kuti palibe chomwe chingatithandize. Koma Yahova afunalini kuti timbaganize tene. Ndawa chani tinkufotokoza vimwevi?
4. Ndawa chani mneneri Eliya adalewa kuti: ‘Nasala nekhanekha’?
4 Onani vomwe vidachitikira Eliya yemwe wenze mwamuna wokhulupirika. Iye adathawa kwa ntsiku 40 kuti apulumuse moyo wake ndawa Yezebeli wenze adachita kulumbira kuti amuphe. (1 Maf. 19:1-9) Padabishala kumphako, iye adalilira Yahova kuti: ‘Nandokhala nekhanekha mneneri.’ (1 Maf. 19:10) Koma panthawe mwiyi enze adakaliko aneneri anango ndawa yakuti Obadiya wenze adabisa aneneri okwana 100 kuchitira kuti Yezebeli angawaphe. (1 Maf. 18:7, 13) Manje ndawa chani Eliya ambadziwona kuti ali yekhayekha? Ko iye angaganiza kuti aneneri wale omwe Obadiya adawabisa wose adaphewa? Ko iye ambaganiza tene ndawa yowona kuti wanthu azinji alibe kuyamba kutumikira Yahova panthawe yomwe Baala adadziwika kuti ni mulungulini chaiye pa Phiri ya Karimeli? Ko iye ambadziwona kuti ali yekhayekha ndawa yakuti wanthu ambafuna kumupha? Baibolo ifotokozalini vose vomwe Eliya angaganiza. Koma chomwe tinkudziwa nchakuti Yahova ambabvesa bwinobwino momwe Eliya angabvera ndipo angadziwa momwe angamuthandizire.
Ko kuganizira momwe Yahova adathandizira Eliya, kungatilimbikise tani peno tinkudziwona kuti tili tekhatekha? (Onani ndime 5-6)
5. Ko Yahova adachita chani kuti osati Eliya ambadzibve kuti ali yekhayekha?
5 Yahova adathandiza Eliya munjira zizinji. Iye adamulimbikisa Eliya kuti ayankhule. Tinkulewa teno ndawa yakuti adamubvunza kawiri kuti: ‘Ko unkuchita chani kuno Eliya?’ (1 Maf. 19:9, 13) Nthawe iliyose yomwe Eliya angafotokoza momwe ankubvera, Yahova ambamubvesera. Iye adamudawira bwinobwino Eliya nkumutsimikizira kuti alibe kumusiya ndipo adamuwonesa mphanvu zake. Yahova adamutsimikizira pomwe Eliya kuti padakali Aizirayeli anango azinji omwe adakali kumutumikira. (1 Maf. 19:11, 12, 18) Ni vosachita kubvunza kuti Eliya adabva bwino maninge padamasuka nkufotokozera Yahova momwe angabvera na kubva vomwe Iye adamudawira. Yahova adapasa Eliya basa ikulu, koma yofunika maninge. Iye adamuuza kuti adzoze Hazaeli kuti akhale mpfumu yolamulira Siriya, Yehu kuti ambalamulire Aizirayeli na Elisa kuti akhale mneneri. (1 Maf. 19:15, 16) Pakumupasa basa mweyi, Yahova adamuthandiza Eliya kuti ambaikhire nzeru pa vinthu vofunika maninge. Mulungu adapasa pomwe Eliya shamwali wabwino maninge Elisa kuti ambamuthandize. Ko imwepo mutambira tani thandizo yomwe Yahova ankukupasani panthawe yomwe munkudzibva kuti muli mwekhamwekha?
6. Ko mungamuuze chani Yahova mpemphero peno munkudzibva kuti muli mwekhamwekha? (Salimo 62:8)
6 Yahova ankukukumbirani kuti mumbapemphere kwa iye. Iye ankuwona mabvuto yomwe munkugumana nayo ndipo ankukutsimikizirani kuti ambabvesere mapemphero yanu panthawe iliyose. (1 Ates. 5:17) Iye akomedzewa maninge kubvesera mapemphero ya atumiki wake. (Miy. 15:8) Manje nchani chamungafotokoze mpemphero peno mudziwona kuti muli mwekhamwekha? Muuzeni vose Yahova ninge momwe Eliya adachitira. (Lewengani Salimo 62:8.) Mufotokozereni vinthu vomwe vinkukuchitisani kukhala na nkhawa ndipo mukumbireni kuti akuthandizeni kulimbana na maganizo yodziwona kuti muli mwekhamwekha. Mwakulinganiza, peno kushikola mudziwona kuti muli mwekhamwekha ndipo mushupika kudawira anzanu akambakubvunzani vomwe muchakhulupirira, mukumbireni Yahova kuti akuthandizeni kukhala wanzeru na wachikanga kuti mumbakwanise kuwafotokozera bwinobwino. (Luka 21:14, 15) Peno munkulimbana na maganizo yodziwona kuti mulibe na basa, mukumbireni Yahova kuti akuthandizeni kugumana Mkhrisitu wolimba kuti mumufotokozereko maganizo yanu. Mungamukumbire pomwe kuti athandize Mkhrisitu yemwe munkufuna kumufotokozera maganizo yanu kuti akubvesereni mosamala. Muuzeni Yahova momwe munkubvera, onani momwe ankudawirira mapemphero yanu ndipo mbabvumani akambakuthandizani pophatisa basa anzanu. Mukachita teno, mudzadzibvelini kuti muli mwekhamwekha.
Ko imwepo muwona njira zothimizirira utumiki wanu na kuyesesa kumbalalikira pabodzi na anzanu? (Onani ndime 7)
7. Ko mwapfunzira chani pa chitsanzo cha Mauricio?
7 Yahova watipasa basa yabwino kuti tiphate. Mbatsimikizani kuti iye awona vomwe munkuchita ndipo ayamikira basa yomwe munkuchita mumpingu na mu utumiki. (Sal. 110:3) Ko kutangwanika na basa ya Yahova kungatithandize tani kuti tisambadzibve kuti tili tekhatekha? Onani vomwe vidachitikira m’bale munango wachilumbwana dzina yake Mauricio.b Padandoti wabatizika, shamwali wake wapamoyo adasiya choonadi. Mauricio adalewa kuti: “Nenze nilibiretu mphanvu ndipo nimbawona kuti palibe chaphindu chomwe ningakwanise kuchita. Nimbachita mantha kuti panango inembo nikwaniselini kupitiriza kukhala wokhulupirika kwa Yahova na kukhala mugulu yake. Nimbadziwona kuti nili nekhanekha ndipo palibe angakwanise kunibvesa.” Manje nchani chidathandiza Mauricio? Iye adalewa kuti: “Nidayamba kumala nthawe itali ninkulalikira. Vimwevi vidanithandiza kuti osati nimbandokhalira kuganizira va ine nekha ndipo nidakwanisa kulimbana na maganizo yosalimbikisa. Nidayamba kukhala wokondwa maninge ndawa yotumikira pabodzi na anzangu ndipo maganizo yodziwona kuti nili nekhanekha yadayamba kunichokera.” Inde, olo panthawe yomwe tinkukwanisalini kulalikira na anzathu maso na maso, tingagumane mphanvu tikambayesesa kulalikira nawo pabodzi pophatisa basa makalata na foni. Ko nchani pomwe chidathandiza Mauricio? Iye adalewa pomwe kuti: “Ningayesesa kukhala bize na basa za mumpingu. Akanipasa mbali pamisonkhano, nimbayesesa kuikonzekera mwakhama. Mbali zimwizi zimbanithandiza kudzibva kuti anzangu aniikhira nzeru ndipo Yahova anikonda.”
PENO NDISE WOKWINYIRIRA NDAWA YA MABVUTO YAKULU
8. Ko tikubva tani tikagumana na mabvuto?
8 Ni vosapeweka kugumana na mabvuto muntsiku zomalizira zino. (2 Tim. 3:1) Koma olo nteno, vitidabwisa kukachitika matsoka yachilengedwe panango mabvuto yanango yakuluyakulu. Tingagumane na mabvuto yosowa kobiri, matenda panango kuferewa. Vikakhala tene, tingakhale wokwinyirira maninge ndipo tingakhale na nkhawa makamaka peno vinkuchitika kuti tagumana na bvuto iyi, kanthawe pang’ono nkugumaniratu pomwe na inango. Koma kumbukirani kuti Yahova ankuwona vose vomwe vinkukuchitikirani ndipo tsimikikizani kuti adzakuthandizeni kupirira bvuto iliyose.
9. Fotokozani mabvuto yomwe Yobu adagumana nayo.
9 Onani momwe Yahova adathandizira mwamuna munango wokhulupirika Yobu. Iye adagumana na mabvuto yazinji maninge mukanthawe kochepa. Pa ntsiku ibodzi chabe, Yobu adagumana na vinthu vizinji vowawa maninge. Vigananga vidabwera nkuba vipfuwo na kupha azinyabasa wake ndipo choipa maninge nchakuti wana wake wose adafa pantsiku mwiyi. (Yobu 1:13-19) Adakali na chisoni ndawa yoferewa, Yobu adadwala matenda ya vilonda thupi yose. (Yobu 2:7) Vimwivi vidamuwawa maninge Yobu mpaka adafika pakulewa kuti: ‘Moyo wangu unkuniyipira maninge ndipo nilibe pomwe shungu yofuna kupitiriza kukhala na moyo.’—Yobu 7:16.
Yobu ankuganizira mawu yomwe Yahova wamuuza yolewa va vinyama vadalenga. (Onani ndime 10)
10. Ko Yahova adamuthandiza tani Yobu kuti apirire mabvuto yake? (Onani foto ya pakhava.)
10 Yahova ambawona vose vomwe vimbachitikira Yobu. Pakuti Yahova ambamukonda maninge Yobu, adamuthandiza kupirira mayesero yake kuti apitirize kukhala wokhulupirika. Yahova adayankhula na Yobu nkumukumbusa kuti Iye ndiye ananzeru maninge ndipo asamalira vinthu vomwe adalenga. Iye adamufotokozera vinyama vosiyanasiyana. (Yobu 38:1, 2; 39:9, 13, 19, 27; 40:15; 41:1, 2) Yahova adaphatisa pomwe basa mulumbwana munango dzina yake Elihu kuti alimbikise Yobu. Elihu adamutsimikizira Yobu kuti Yahova nthawe zose adalisa atumiki wake akapirira. Koma Yahova adachitisa pomwe kuti Elihu apereke malangizo yachikondi kwa Yobu. Elihu adathandiza pomwe Yobu kuti asambandokhalira kudziganizira yekha ndawa yakuti ni mng’ono maninge pakulinganiza na Yahova yemwe adalenga vinthu vose. (Yobu 37:14) Yahova adamupasa pomwe vochita Yobu. Adamuuza kuti apempherere anzake atatu omwe enze adachimwa. (Yobu 42:8-10) Ko Yahova atithandiza tani ntsiku zino tikambagumana na mabvuto yakulu?
11. Ko Baibolo itilimbikisa tani tikambagumana na mabvuto?
11 Ntsiku zino sikuti Yahova ayankhula nase sitiriti ninge momwe adachitira na Yobu. Koma ayankhula nase pakuphatisa basa Baibolo yomwe ni Mawu yake. (Aro. 15:4) Iye atilimbikisa pakutiuza vomwe adzatichitire kutsogolo. Ndoonankoni chabe vinthu vochepa vomwe Baibolo ifotokoza vomwe vingatithandize tikambagumana na mabvuto. M’Mawu yake, Yahova ankutitsimikizira kuti ‘palibe chomwe chingachitise kuti iye aleke kutikonda’ ndipo vimwevi vinkuphatanidzapo mabvuto yakuluyakulu. (Aro. 8:38, 39) Iye atitsimikizira pomwe kuti ‘ali pafupi na aliyese womuchemera’ mpemphero. (Sal. 145:18) Yahova ankutifotokozera kuti tikamuthemba, tingakwanise kupirira bvuto iliyose ndipo tingakhale wokondwa podiya kuti tinkubonera. (1 Akor. 10:13; Yak. 1:2, 12) Mawu ya Mulungu yatikumbusa kuti mabvuto yomwe tinkugumana nayo ni yakanthawe kochepa tikalinganiza na madaliso yosapera yomwe iye atipasa. (2 Akor. 4:16-18) Yahova ankutsimikizira kuti manjemanje acheneke Satana na viwanda vake ndawa yakuti ndiwo ankuchitisa kuti timbabonere. (Sal. 37:10) Ko imwepo mudaikhako kale mumsolo mavesi yolimbikisa yomwe yadzakuthandizeni pamabvuto yakutsogolo?
12. Ko Yahova adikhira kuti timbachite chani peno tinkufuna kuphindula na Mawu yake?
12 Yahova afuna kuti timbapatule nthawe yopfunzira Baibolo na kuganizira maninge vatawerenga. Tikambaphatisa basa vomwe tawerenga, tikhala na chikhulupiriro cholimba ndipo tikhala paushamwali wabwino na Ababa wathu. Tikambachita vimwevi ndipo patingakwanise kupirira mabvuto. Yahova apereka pomwe mphanvu kwa wanthu omwe akonda kuwerenga Mawu yake. Mzimu wake utipasa mphanvu ‘kuposha yobadwa nayo’ kuti tikwanise kupirira bvuto iliyose.—2 Akor. 4:7-10.
13. Ko malangizo yoperekewa na ‘kapolo wokhulupirika na wanzeru’ yatithandiza tani kupirira mabvuto?
13 Mothandiziwa na Yahova, ‘kapolo wokhulupirika na wanzeru’ wakonza nkhani zizinji, mavidiyo na nyimbo zomwe zingatithandize kulimbisa chikhulupiriro chathu nakuti ushamwali wathu na Yahova upitirize kukhala wolimba. (Mat. 24:45) Timbaviphatise basa mokwana vinthu vimwevi vochokera kwa Yahova. Mulongo munango wa ku Estados Unidos manjemanjepa adafotokoza momwe aliri wotembeja ndawa ya vinthu vimwevi. Iye adalewa kuti: “Kwa magole 40 yomwe nakhala ninkutumikira Yahova, chikhulupiriro changu chakhala chikuyesewa nthawe na nthawe.” Iye adagumana na mabvuto yakulu maninge. Ambuya wake adafa pangozi ya karo ndawa yakuti diraiva wenze woledzera, azibereki wake adadwala maninge mpakana kufa ndipo iye adagumaniwa na khansa maulendo yawiri. Manje nchani chidamuthandiza kuti apirire? Iye adalewa kuti: “Yahova nthawe zose anisamalira. Malangizo yoperekewa na kapolo wokhulupirika na wanzeru yanithandiza maninge kuti nipirire. Malangizo mwaya yanithandiza kukhala wolimba ninge Yobu yemwe adalewa kuti: ‘Mpakana kufa, nidzalekelini kukhala wokhulupirika!’”—Yobu 27:5.
Ko tingathandize tani abale na alongo wathu mu mpingu? (Onani ndime 14)
14. Ko Yahova aphatisa tani basa abale na alongo wathu kuti atithandize pamabvuto? (1 Atesalonika 4:9)
14 Yahova wapfunzisa pomwe atumiki wake kuti ambakwanise kulimbikisana panthawe zoshupa. (2 Akor. 1:3, 4; lewengani 1 Atesalonika 4:9.) Abale na alongo wathu ankutewedzera Elihu ndipo ni okonzeka kuthandiza abale wawo panthawe zoshupa. (Mac. 14:22) Mwakulinganiza, onani momwe abale na alongo wa mumpingu wa Diane adamuthandizira panthawe yomwe mwamuna wake adadwala maninge. Iye adati: “Venze voshupa maninge. Koma tidawona momwe Yahova adatithandizira na kutiwonesa chikondi panthawe mwiyi. Ninkulewa tene ndawa abale na alongo wa mumpingu mwathu adayesesa kutithandiza. Iwo ambabwera kudzatizungira, ambatifonera, ambatikumbatira ndipo vimwivi vidatithandiza maninge kuti tipirire. Podiya kuti nimbakwanisalini pomwe kufambisa karo, abale na alongo ambayesesa kunitenga nkuniyendesa kumisonkhano na kunithandiza kulalikira.” Vomwe mulongo moyu adalewa vinkuwoneseratu kuti ni mwayi ukulu maninge kukhala m’banja mwiyi yachikondi.
NDISE OTEMBEJA NDAWA YAHOVA ATISAMALIRA MWACHIKONDI
15. Ndawa chani ndise otsimikiza kuti tingakwanise kupirira bvuto iliyose?
15 Mabvuto yabwerera munthu aliyese. Koma ninga mwatawonera, osati timbayese kulimbana nayo tekha. Yahova nthawe zose awona vomwe vinkutichitikira ninge mwanchitira baba wachikondi. Iye nthawe zose ali nase pafupi ndipo ni wokonzeka kutibvesera mapemphero yathu yokumbira thandizo. (Yes. 43:2) Tinkutsimikiza kuti Yahova angatithandize kupirira bvuto iliyose ndawa yakuti iye ni wokonzeka kutithandiza. Iye watipasa mwayi wa pemphero, Baibolo, mavidiyo, mabukhu na abale na alongo wachikondi omwe ni okonzeka kutithandiza pamabvuto.
16. Nchani chatingachite kuti Yahova apitirize kutisamalira mwachikondi?
16 Ndise oyamikira maninge ndawa yakuti Ababa wathu wakudzulu awona vose vomwe vinkutichitikira. Ndipomwapa ‘mitima yathu yankukondwa.’ (Sal. 33:21) Kuti tiwonese kuti tinkumutembejadi Yahova, timbayesese kuphatisa basa vinthu vose vomwe iye ankutipasa pofuna kutithandiza. Timbachite pomwe mbali yathu kuti Mulungu apitirize kutisamalira. M’mawu yanango tingalewe kuti, tikapitiriza kumbabvera Yahova na kuchita vabwino, iye adzapitirize kutinyang’anira mpakana kalekale!—1 Pet. 3:12.
NYIMBO NA. 30 Atate Wanga, Mulungu Wanga Ndiponso Bwenzi Langa
a Tifunika kuthandiziwa na Yahova kuti tikwanise kupirira mabvuto yomwe tinkugumana nayo ntsiku zino. Nkhani ino ititsimikizire kuti Yahova awona vomwe vinkuchitikira atumiki wake. Iye adziwa bwino mabvuto yomwe munthu aliyese payekha ankugumana nayo ndipo ayesesa kumuthandiza.
b Madzina yanango yachinjiwa.