NKHANI YOPFUNZIRA 32
Alumbwana, pitirizani kupita patsogolo olo kuti mudabatizika kale
‘Naboni tikule pa vinthu vose mu chikondi.’—AEF. 4:15.
NYIMBO NA. 56 Inuyo Panokha Muzikonda Kwambiri Choonadi
VOMWE TIPFUNZIREa
1. Ko alumbwana azinji achitako kale vinthu vabwino viponi?
ALUMBWANA azinji ankubatizika gole iliyose. Ko imwepo ndimwembo mulumbwana ndipo mudabatizika manjemanje? Peno nteno, dziwani kuti abale na alongo ni wokondwa ndipo Yahova ankukondwambo namwe. (Miy. 27:11) Ndoganizirani kuwanda kwa vinthu vomwe mwakwanisa kuchita. Imwepo mudayesesa kupfunzira Baibolo mwakhama panango kwa magole yazinji. Vomwe mungapfunzira vidakutsimikizirani kuti Baibolo ni Mawudi yochokera kwa Mulungu. Chokomedza maninge nchakuti imwepo mudayamba kukonda maninge Munichiro wa Baibolo. Imwepo mudayamba kukonda maninge Yahova mpakana kufika pakudzipereka kwa iye nkubatizika. Mudachita bwino maninge!
2. Ko tikambirane chani munkhani ino?
2 Ni vosachita kubvunza kuti imwepo mudagumana na mayesero yazinji pamungayesesa kuti mubatizike. Pamunkukula apa, mugumane pomwe na viyeso vinango. Satana ayesese kuchepesa chikondi chanu kwa Yahova kuti mufikane pakusiya kumutumikira. (Aef. 4:14) Ayi kubvuma kuti vimwevi vikuchitikireni. Manje nchani chingakuthandizeni kuti mupitirize kukhala wokhulupirika kwa iye na kukwanirisa vomwe mudamupolomisa? Muchadekana kupitiriza ‘kuyesesa’ kupita patsogolo kuti mukhale Mkhrisitu wokhuma. (Aheb. 6:1) Manje mungachite tani vimwevi?
KO MUNGACHITE TANI KUTI MUKHALE MKHRISITU WOLIMBA?
3. Ko Akhrisitu wose angachite chani kuti apitirize kupita patsogolo olo kuti adabatizika kale?
3 Tikandobatizika, tose tichadekana kutewedza malangizo yomwe mtumi Paulo adapereka kwa Akhrisitu wa ku Efeso. Iye adawalimbikisa kuti akhale Akhrisitu ‘wachikulire.’ (Aef. 4:13) Pamwapa venze ninge ankuwauza kuti: ‘Pitirizani kupita patsogolo.’ Paulo adalinganiza kukula kwa Mkhrisitu na kukula kwa mwana pakufuna kutithandiza kubvesa vomwe iye angatanthauza. Azibereki akandokhala na mwana akondwa maninge. Koma sikuti iye akhale kacheche mpakana kalekale. Nkupita kwa nthawe, iye adzafunike kusiya ‘kuchita vinthu ninge mwana.’ (1 Akor. 13:11) Nchibodzibodzimbo na Mkhrisitu. Olo kuti tidabatizika, tichadekana kupitiriza kukula mwauzimu. Naboni manje tikambirane mpfundo zinango zomwe zingatithandize kuchita vimwevi.
4. Ko ni khalidwe iponi yomwe ingakuthandizeni kuti mukule mwauzimu? Fotokozani. (Afilipi 1:9)
4 Yesesani kumbakonda maninge Yahova. Imwepo mumukonda kale Yahova. Koma pali vamungachite kuti mumbamukonderetu maninge. Ko mungachite tani? Mtumi Paulo adafotokoza mpfundo yofunika maninge pa Afilipi 1:9. (Lewengani.) Paulo adapempherera Afilipi ‘kuti chikondi chawo chipitirize kukula.’ Vimwevi vinkuwonesa kuti tingakwanise kukulisa chikondi chathu. Tingakwanise kuchita vimwevi ‘tikadziwa vinthu molondola na kukhala wobvesa vinthu.’ Tikamudziwa bwino Yahova, tingayambe kumukonda maninge ndipo tingamutembeje ndawa ya makhalidwe yake yabwino na momwe achachitira vinthu. Kumudziwa kungatithandize pomwe kuti tikhale na shungu ikulu yofuna kumukondweresa na kupewa kuchita vinthu vomukalipisa. Tiyesesa pomwe kuzindikira vomwe iye ankufuna na kuyesesa kuvichita.
5-6. Ko tingachite tani kuti tiyambe kukonda maninge Yahova? Fotokozani.
5 Kuti tiyambe kumukonda maninge Yahova, tingafunike kumudziwa bwino Mwana wake yemwe awonesa makhalidwe ya Ababa wake mosaphonyesa. (Aheb. 1:3) Njira yabwino yodziwira Yesu, ni kupfunzira mabukhu ya Mateyu, Maliko Luka na Yohane. Peno imwepo mulibe chizolowezi chowerenga Baibolo ntsiku iliyose, tani kuyambiratu manje so? Mukambawerenga nkhani ya Yesu, ikhirani nzeru maninge pa makhalidwe yake. Iye wenze wofikika ndipo ambakonda pomwe kucheza na wana. (Maliko 10:13-16) Yesu wenze wachikondi na wabwino mtima ndipo opfunzira wake ambachitalini mantha kumuuza vomwe ankuganiza. (Mat. 16:22) Pamwapa Yesu adawoneseratu kuti atewedzeradi Ababa wake. Viri teno ndawa yakuti Yahova nayembo ni wofikika maninge. Tingapemphere kwa iye panthawe iliyose na kumufotokozera chilichose chili kumtima kwathu na momwe tinkubvera tichimbatsimikiza kuti ankutibva. Iye atikonda ndipo atiikhira nzeru maninge.—1 Pet. 5:7.
6 Yesu ambachitira chifundo maninge wanthu. Mateyu adanemba kuti: ‘Padawona chigulu cha wanthu, adawabvera chifundo ndawa yakuti iwo enze okuluzikakuluzika ninge nkhosa zilibe nyakabusa.’ (Mat. 9:36) Ko Yahova nayembo ni wachifundo? Yesu adalewa kuti: ‘Ababa wangu afunalini kuti olo m’bodzi pa tuwana utu adzachenekewe.’ (Mat. 18:14) Mawu mwaya ni yolimbikisa ndawa yankuwonesa kuti Yahova atikonda maninge. Tikayesesa kumudziwa bwino Yesu, tiyamba kukonda maninge Yahova.
7. Ko kubverana na Akhrisitu olimba kungakuthandizeni tani?
7 Kuti mukhale Mkhrisitu wolimba na wachikondi maninge, mungachite bwino kumbakhala nthawe itali na abale na alongo wanu na kuyesesa kuwadziwa bwino. Ndoganizani momwe iwo aliri wokondwa. Iwo awona kuti adachita bwino kuyamba kutumikira Yahova ndipo adziringalini ne pang’ono. Mbachezani nawo kuti akusimbireni madaliso yomwe agumana pakutumikira Yahova. Mukafuna kusaina vochita pankhani ikulu, mbawabvunzani kuti akuuzenkoni nzeru. Kumbukirani kuti ‘vinthu vikwanisika alangizi akawanda.’—Miy. 11:14.
Ko mungadzikonzekerese tani peno kushikola kwanu mupfunzisiwa kuti vinthu vilibe kuchita kulengewa? (Onani ndime 8-9)
8. Ko mungafunike kuchita chani peno munkukaikira vinthu vinango vomwe Baibolo ichapfunzisa?
8 Gumanani midawiro pa nkhani zomwe muzikaikira. Ninge mwatafotokozera mu ndime 2, Satana adzayesese kutikangisa kukula mwauzimu. Njira ibodzi yomwe iye achachitira vimwevi, ni kutichitisa kuti timbakaikire vipfunziso va m’Baibolo. Mwakulinganiza, wanthu angakuuzeni kuti ni Mulungulini adalenga vinthu vose koma vidondokhalako vokha. Panango pemwenze mwana mumbakhulupirira maninge kuti Mulungu ndiye adalenga vinthu vose. Koma pamunkukula apa manje mwayamba kukaikira ndawa ya vomwe munkupfunzisiwa kushikola. Vomwe maticha yachafotokoza pofuna kuikhira kumbuyo chipfunziso chakuti vinthu vidakhalako vokha, vingawoneke ninge vobveka. Koma dziwani kuti iwo aitengeralini siriyasi nkhani mweyi kuti awone vinthu votsimikizira kuti kulidi Mulengi. Kumbukirani mpfundo yogumanika pa Miyambo 18:17 yomwe ilewa kuti: ‘Munthu woyamba kufotokoza mbali yake pa mulandu angawoneke ninge analazau, koma munzake abwera nkumufufuzafufuza.’ M’malo mothamingira kutsimikizira vomwe mwabva kushikola, mungachite bwino kufagafaga m’Baibolo kuti muchite kuwona mwekha. Mumbafagefage m’mabukhu yathu ndipo mumbacheze na abale na alongo omwe poyamba ambakhulupirirambo kuti vinthu vodondokhalako vokha. Abvunzeni kuti akufotokozereni vomwe vidawatsimikizira kuti kuli Mulengi yemwe atikonda maninge. Macheza yatene yangakuthandizeni kuti mumbakhulupirire vinthu vomwe vinaumboni.
9. Ko mwapfunzira chani pa vomwe vidachitikira Melissa?
9 Mulongo munango dzina yake Melissa adakondwa maninge na vomwe adagumana pangafagafaga va nkhani yolewa va chilengedwe.b Iye adalewa kuti: “Kushikola, nkhani yakuti vinthu vidondokhalako vokha ifotokozewa munjira ninge yobveka. Pakuyamba nimbachita mantha kuwauza kuti ninkubveranalini navo. Nimbachita mantha kuti panango awone kuti vomwe inepano nichakhulupirira ndivo vosabveka. Koma nidawona kuti Yahova afuna kuti timbamutumikire pavifukwa vobveka. Ndipomwapa nidayamba kufagafaga. Nidawerenga mabulosha yakuti Existe um Criador Que Se Importa com Você?, Kodi Zamoyo Zinachita Kulengedwa? na yakuti Mmene Moyo Unayambira—Mafunso 5 Ofunika Kwambiri. Nkhani za m’mabulosha mwaya zidanithandiza maninge, kundoti nidazigumana mochebwa.”
10-11. Ko nchani chingakuthandizeni kuti musambandochita vomwe thupi yanu inkufuna? (1 Atesalonika 4:3, 4)
10 Ayi kumbachita makhalidwe yoipa. Pamuli mulumbwana, chilakolako chanu cha kugonana chikhala champhanvu maninge ndipo mungakhale pachiyeso chochita chigololo. Satana andofuna kuti mumbandochita vomwe thupi yanu inkufuna. Ko manje mungachite tani kuti osati mufike pakuchita chigololo? (Lewengani 1 Atesalonika 4:3, 4.) Mukambapemphera kwa Yahova, mbamuuzani momwe munkubvera. Ayi kumbamubisira chinthu ndipo mukumbireni kuti akupaseni mphanvu. (Mat. 6:13) Kumbukirani kuti Yahova andofuna kukuthandizani, osati kukuweruzani. (Sal. 103:13, 14) Kuwerenga Baibolo kungakuthandizeni pomwe. Melissa watafotokoza kumayambiriro ambalimbana na bvuto yoganizira vinthu voipa. Iye adalewa kuti: “Kuwerenga Baibolo kudanithandiza kuti nilimbane na vilakolako vangu. Baibolo imbanikumbusa kuti nidadzipereka kwa Yahova ndipo nifunika kumutumikira kwa moyo wangu wose.”—Sal. 119:9.
11 Ayi kuyesa kulimbana na mabvuto yanu pamwekha. Mbawauzani azibereki wanu vomwe munkulimbana navo. Ni voshupa maninge kufotokozera azibereki wanu vomwe munkugumana navo pamoyo wanu, koma kuchita vimwevi ni kothandiza maninge. Melissa adalewa kuti: “Nidakumbira Yahova kuti anithandize kukhala wolimba moyo ndipo nidauza ababa wangu mabvuto yomwe nimbagumana nayo. Panidachita vimwevi nidabva bwino maninge ndipo ninkudziwa kuti Yahova adakondwambo maninge.”
12. Ko mungachite tani kuti mumbasankhule vinthu mwanzeru?
12 Mumbatsogolerewe na mpfundo za m’Baibolo. Pomwe munkukula, azibereki wanu angakupaseni ufulu kuti mumbachiteko vinthu vinango pamwekha. Koma dziwani kuti iwo ndiwo ananzeru maninge kuposha imwepo. Ko mungapewe tani kuchita vinthu vomwe vingakudzongereni ushamwali wanu na Yahova? (Miy. 22:3) Mulongo munango dzina yake Kari adafotokoza vomwe vidamuthandiza kusankhula vinthu mwanzeru. Iye adazindikira kuti Mkhrisitu wokhuma osati ambadikhire kuti achite kugumana lamulo pankhani iliyose yomwe ingabuke. Iye adati: “Nimbafunika kubvesa bwino mpfundo za m’Baibolo osati kundodziwa chabe malamulo.” Mukambawerenga Baibolo, dzibvunzeni kuti: ‘Ko nkhani mwiyi inkuwonesa kuti Yahova aganiza tani? Ko munkhani mwiyi munampfundo zomwe zinganithandize kusiyanisa chabwino na choipa? Peno nteno, ko ningaphindule tani nikaziphatisa basa?’ (Sal. 19:7; Yes. 48:17, 18) Mukambawerenga Baibolo na kuganizira mpfundo zamwagumana, vingakhale vosashupa kuti musankhule vinthu vokondweresa Yahova. Mukapitiriza kukula mwauzimu, mudzazindikire kuti, sikuti munthu afunikira lamulo pa chilichose ndawa yakuti mudzakhale mukudziwa bwino momwe Yahova achaganizira.
Ko mulongo wachitsikana uyu wasankhula azishamwali wotani?(Onani ndime 13)
13. Ko azishamwali wabwino angakuthandizeni tani? (Miyambo 13:20)
13 Sankhulani azishamwali omwe akonda Yahova. Ninge mwatafotokozera kumayambiriro, azishamwali wamungasankhule angachitise kuti mukhale Mkhrisitu wolimba panango neye. (Lewengani Miyambo 13:20.) Mulongo munango dzina yake Sara wenze adaluza chimwemwe chake. Koma patsogolo pake padadzachitika chinthu chomwe chidamuthandiza kuwona vinthu moyenerera. Iye adati: “Nidayamba kukhala na azishamwali panthawe yabwino maninge. Sondo iliyose nimbayenda na mulongo munango wachitsikana kukapfunzira Ntsanja ya ulonda. Shamwali munango adanithandiza kuti niyambe kumbapereka ndemanga pamisonkhano. Azishamwali mwawa adanithandiza maninge kuti niitengere siriyasi pfunziro ya panekha na kupemphera kawirikawiri. Nidayamba kulimbisa ushamwali wangu na Yahova ndipo nidayamba pomwe kukondwa ninga poyamba.”
14. Ko nchani chidathandiza Julien kuti agumane azishamwali wabwino?
14 Ko mungasankhule tani azishamwali omwe angakuthandizeni maninge? Julien yemwe ankutumikira ninge nkulu adalewa kuti: “Penenze mulumbwana, kukonda kulalikira ndiko kudanithandiza kuti nigumane azishamwali wabwino. Azishamwali wangu mwawa enze wakhama maninge ndipo adaniwonesa momwe ningakhalire wokondwa pakutumikira Yahova. Nidadziikhira cholinga chochita utumiki wanthawe zose pamoyo wangu. Nidazindikira pomwe kuti chinthu chomwe chinkuchitisa kuti nikhale na azishamwali ang’onong’ono, ni kukonda kucheza na wanthu wa nsinkhu wangu basi. Koma patsogolo pake nidadzakhala na azishamwali anango wabwino pa Beteli. Chitsanzo chawo chidanithandiza kuti nimbasankhule bwino vokondweresa ndipo vimwivi vidachitisa kuti nikhale paushamwali wolimba na Yahova.”
15. Ko Paulo adachenjeza Timoteyo kuti ambakhale wosamala na chani akambasankhula azishamwali? (2 Timoteyo 2:20-22)
15 Manje mungachite tani peno munkuwona kuti munthu munango wa mu mpingu mwanu angakhalelini shamwali wabwino kwa imwepo? Paulo angadziwa kuti Akhrisitu anango wa munthawe yake enze alibe makhalidwe yabwino. Ndipomwapa iye adachenjeza Timoteyo kuti osati ambabverane nawo. (Lewengani 2 Timoteyo 2:20-22.) Ushamwali wathu na Yahova ni wofunika maninge. Tidachita khama maninge kuti tikwanise kukhala pa ushamwali na Yahova, ndipomwapa tingabvumelini kuti munthu munango atidzongere ushamwali moyu.—Sal. 26:4.
KO KUDZIIKHIRA VOLINGA KUNGAKUTHANDIZENI TANI KUTI MUPITE PATSOGOLO MWAUZIMU?
16. Ko mungadziikhire volinga viponi?
16 Dziikhireni volinga vabwino. Khalani na volinga vomwe vingakuthandizeni kukhala Mkhrisitu wolimba. (Aef. 3:16) Mwakulinganiza, mungadziikhire cholinga chakuti mumbawerenge na kupfunzira Baibolo nthawe zose. (Sal. 1:2, 3) Mungadziikhire pomwe cholinga chakuti mumbapemphere kawirikawiri na mochokera pasi pa moyo. Apo neye mungawone kuti munkufunika kumbasankhula bwino vokondweresa na kuphatisa bwino basa nthawe. (Aef. 5:15, 16) Yahova adzakondwe maninge kukuwonani imwepo munkuyesesa kupita patsogolo.
Ko mulongo wachitsikana uyu wasankhula azishamwali wotani? (Onani ndime 17)
17. Ko mungaphindule tani ndawa yothandiza wanthu anango?
17 Imwepo mungakhale Mkhrisitu wolimba peno muyesesa kuthandiza wanthu anango. Yesu adalewa kuti: ‘Kupasa kubweresa chimwemwe chikulu kuposa kutambira.’ (Mac. 20:35) Mungaphindule maninge peno pamuli mulumbwana tene muyesesa kumbaphatisa basa nthawe yanu na mphanvu zanu pakuthandiza anango. Mwakulinganiza, mungadziikhire cholinga chakuti mumbathandize wanthu wokalamba na wodwala wa mumpingu mwanu. Mungawathandize kugula vinthu panango kuphatisa basa vipangizo vachizungu. Peno ndimwe m’bale, mungachite bwino kuyesesa kuti muyenerere kukhala mtumiki wothandiza kuti mumbathandize maninge abale na alongo wanu. (Afil. 2:4) Mungathandize pomwe wanthu omwe ni Mbonilini pakuwalalikira ntontholo wabwino wa Ufumu. (Mat. 9:36, 37) Ndipo peno ni vokwanisika, yesesani kuchita utumiki wanthawe zose.
18. Ko utumiki wanthawe zose ungakuthandizeni tani kukhala pa ushamwali wolimba na Yahova?
18 Kuchita utumiki wa nthawe zose kungakuthandizeni kukhala pa ushamwali wolimba maninge na Yahova. Kuchita upainiya kungakuthandizeni kuti mukangene Shikola ya Olalikira va Ufumu. Ndipo mungakhale pomwe wokonzeka kuyenda ku chimango panango kukatumikira pa Beteli. Mulongo munango wachitsikana dzina yake Kaitlyn adalewa kuti: “Panidandoti nabatizika, kumala nthawe itali maninge ninkulalikira pabodzi na anzangu wokhuma mwauzimu kudanithandiza maninge kuti nikhale wolimba. Chitsanzo chawo chidanithandiza kuti niidziwe bwino Baibolo nakuti nimbapfunzise bwino wanthu.”
19. Ko mudzatambire madaliso yaponi mukapitiriza kukula mwauzimu?
19 Mukapitiriza kukula mwauzimu, mudzatambire madaliso yazinji. Mudzapewe kucheneka ulumbwana wanu pakumbandokwanirisa volinga vilibe na basa. (1 Yoh. 2:17) Mudzabvelini ululu womwe munthu aubva peno alibe kusankhula vinthu mwanzeru. Koma mudzakhale wokondwa maninge na moyo. (Miy. 16:3) Chitsanzo chanu chabwino chidzalimbikise Akhrisitu anzanu, peno akhale alumbwana panango akuluakulu. (1 Tim. 4:12) Ndipo chofunika maninge nchakuti imwepo mudzakhale na ntendere na wokondwa maninge ndawa yotumikira Yahova na kukhala naye pa ushamwali.—Miy. 23:15, 16.
NYIMBO NA. 88 Ndidziwitseni Njira Zanu
a Atumiki wose wa Yahova akondwa maninge kuwona alumbwana na atsikana ankubatizika. Iwo achadekana kupitiriza kupita patsogolo olo kuti abatizika kale. Podiya kuti nkhani mweyi ni yothandiza kwa wose mumpingu, inkulimbikisa maninge wachilumbwana omwe abatizika manjemanje kuti apitirize kukula mpaka kukhala Akhrisitu wokhuma.
b Madzina yanango yachinjiwa.