Yesu adadyesa wanthu azinji

Ntsiku inango atumi adabwera kuchoka komwe ambalalikira. Pamwapa nkuti Pasika wa mu 32  Yesu ali pano padziko, wasala pang’ono kuchitika. Atumi mwawo enze adaneta maninge ndipo Yesu adanyamuka nawo pa barko nkuyenda ku Betsaida kuti akapumule. Koma padasala pang’ono kufika kuntunthu, adawona kuti wanthu azinji afika kale ndipo ankuwadikhirira. Podiya kuti yenze nthawe yakuti apumule na opfunzira wake, Yesu adawabvera ntsisi. Adapolesa odwala wose patsogolo pake adayamba kuwapfunzisa. Yesu adawapfunzisa va Ufumu wa Mulungu ntsiku yose. Ku m’maulo, atumi adamuuza kuti: ‘Wanthu mwawa ananjala auzeni ayende kuti akafage chakudya.’

Yesu adawadawira kuti: ‘Osati ayende. Imwepo muwapase chakudya.’ Atumi mwawo adamubvunza kuti: ‘Mukutanthauza kuti tiyende tikawagulire chakudya?’ Pamwapo ntumi munango dzina yake Filipo adanena kuti: ‘Olo tichikhala na kobiri zizinji tingakwaniselini kugula chakudya cha wanthu wose mwawa.’

Yesu adawabvunza kuti: ‘Ko tiri na chakudya chizinji tani?’ Andireya adati: Nching’onog’ono maninge. Tiri na mikate 5 na ntsomba ziwiri basi.’ Pamwapo Yesu adati: ‘Bweresani.’ Ndipo adauza wanthu mwawo kuti akhazikike pa mauswa m’magulu ya wanthu 50 panango 100. Yesu adatenga mkate na ntsomba zire ndipo adanyang’ana kudzulu ndipo adapemphera. Patsogolo pake adapereka chakudya mwecho kwa opfunzira wake, opfunzira mwawo adawagawira wanthu. Penze amuna 5000 komasoti akazi na wana, wose adadya nkukhuta. Atumi mwawo adakonkhobza vomwe vidasala na cholinga chakuti ayi kuti ataye kalikose. Chakudya chomwe chidasala chidakwana madengu 12, vimwevi venze vodabwisa maninge.

Wanthu padawona vimwevo adadabwa maninge ndipo ambafuna kuti Yesu akhale mpfumu yawo. Koma Yesu ambadziwa kuti imwiyo yenzelini nthawe yomwe Yahova ambafuna kuti iye akhale mpfumu. Patsogolo pake, adauza wanthu wose kuti ambayende ndipo iye na atumi wake adayenda tsidya inango ya nyanja ya Galileya. Atumi mwawo adakwira barko, koma Yesu adayenda yekha ku phiri kuti akapemphere kwa Ababa wake. Yesu ambayesesa kugumana mpata wopemphera olo kuti ambatangwanika maninge.