Chakudya Cha maulo Cha Ambuya

Ayuda ambachita chikondwelero cha maulo cha pasika pa ntsiku ya 14 ya nisani. Ambachita vimwevi pa kukumbukira vomwe Mulungu adachita pa kuwapulumusa ku Iguputo kuti akakhale mu dziko yopolomisiwa. Mu 33 Yesu ali pano pa dziko yapasi, Iye na atumi wake adachita mwambo moyu ku Yerusalemu mu chipinda cha m’dzulu. Pomalizira, Yesu adanena kuti: ‘M’bodzi wa imwepo adzanipereke.’ Atumi mwawo adadabwa maninge ndipo adabvunza Yesu kuti: ‘Munkunena mbani?’ Yesu adadawira kuti: ‘Yemwe nimupase nkate uyu.’ Patsogolo pake adapereka nkate ule kwa Yudasi Sikariyoti, nthawe mweyoletu Yudasi adabula.

Yesu adapemphera ndipo patsogolo pake adanyemanyema nkate nkuupereka kwa atumi mwawo. Ndipo adati: ‘Dyani nkate moyu. Unkuimira thupi yangu yomwe nidzaipereke ndawa ya imwepo.’ Pamwapo adapemphera pomwe nkupereka vinyu kwa atumi mwawo. Adanena kuti: ‘Mwani vinyu moyu. Unkuimira magazi yangu yomwe nidzayapereke na cholinga choti machimo ya wanthu yakhululukiriwe. Mumbachite vimwevi gole iliyose ponikumbukira. Ninkukupolomisani kuti tidzatonge pabodzi ku dzulu.’ Kundoyambira nthawe mweyo, ateweri wake wa Khrisitu achita mwambo wokumbukira impfa yake gole iriyose. Mwambo moyu uchemerewa chakudya cha maulo cha ambuya.

Padamaliza mwambo moyu, Atumi mwawo adayamba kugegedzana. Nkhani yake yenze yakuti nkulu ni mbani. Koma Yesu adawauza kuti: ‘Yemwe ni nkulu maninge pa mose imwepo ni ule yemwe adziona kuti ni ng’ono maninge.

‘Imwepo ndimwe azishamwali wangu. Nikuuzani chirichose chomwe Ababa wangu afuna kuti nikuuzeni. Manje nikuyenda kudzulu kwa Ababa. Wanthu adzadziwe kuti ndimwe wopfunzira wangu peno mukondana. Ndipo mumbakondane ninge momwe inapano nikukonderani.’

Pakumalizira, Yesu adakumbira Yahova kuti ateteze opfunzira wake. Adakumbirasoti kuti awathandize kumbachita vinthu mobverana na mwa ntendere. Patsogolo pake adakumbira kuti dzina ya Yahova ichenesewe. Pamwapo Yesu na Atumi wake, adaimba nyimbo zotamanda Yahova patsogolo pake adabula mu chipinda mumo. Apa manje nthawe yoti Yesu amangiwe yenze idafendera.