Yesu adapfunzisa ateweri wake kupemphera

Afarisi ambakonda kuchita vinthu na cholinga chondofuna kudabwisa wanthu. Akachitira munthu vabwino, ambafuna kuti aliyese adziwe. Ambakonda kupemphera pa malo yomwe pambapita wanthu azinji na cholinga chakuti ambawonewe na wanthu mwawo. Komasoti iwo ambandobwerezera mapemphero nkumbayafotokoza m’masunagoge komasoti m’mphambano na chakulinga chakuti wanthu ambawabve. Ndipomwapa, wanthu adadabwa pomwe Yesu adawawauza kuti: ‘Ayi kumbapemphera ninge Afarisi. Iwo ambaganiza kuti Mulungu angachite chidwi na mapepmphero yawo yataliyatali. Pemphero ni nkhani yomwe ikhala pakati pa Yahova na munthu yemwe ankupemphera uyo. Ndipo ayi kumbabwerezera vibodzibodzi popemphera. Mulungu afuna kuti mumbamufotokozere vomwe viri muntima mwanu, osati vondobwerezerabwerezera.’

Yesu adanena pomwe kuti ‘mumbapemphere tene: “Ababa wathu wa kudzulu dzina yanu ichenesewe, Ufumu wanu ubwere. Vomwe munkufuna vichitike pa dziko yapasi pano ninge mwaviriri kudzulu.”’ Adawauzapomwe kuti angakumbire chakudya cha ntsiku mwiyo. Komasoti ambakumbire kuti Mulungu awakhululukire machimo yawo nakuti awathandize pa vinthu vinango vomwe iwo ankufuna.

Yesu adati: ‘Ayi kuleka kupemphera. Pitirizani kukumbira Ababa wanu Yahova kuti akupaseni vinthu vabwino. Azibereki apasa wana wawo vinthu vabwino. Mwana wanu akakukumbirani chakudya mungamupaselini mwala. Komasoti akakukumbirani nsomba mungamupaselini nyoka.’

Patsogolo pake adati: ‘Peno imwepo mupasa wana wanu vinthu wabwino, kuli tani Ababa wanu Yahova? Iye adzakupaseni mzimu uchena. Chodekana ni kupemphera basi.’ Ko iwepo utewedza malangizo ya Yesu mwaya? Ko ukambapemphera utomola vinthu viponi?