Yesu adafamba pa Nyanja

Kuyingizira pa kupolesa odwala na kumukisa wakufa, Yesu ambakwanisa pomwe kulamulira mphepo komasoti nvula. Ntsiku inango padamaliza kupemphera, adaona kuti pa nyanja ya Galileya pana chimphepo na mabimbi. Atumi wake enze m’barko ndipo ambalimbana na chimphepo pa nyanja mwapo. Patsogolo pake iye adabuluka mphiri mumo nkuyamba kuyenda pa madzi kuyenda komwe kwenze barko ya atumi. Atumi mwawo padawona munthu ankufamba pamadzi, adachita mantha. Koma Yesu adawauza kuti: ‘Ayi kuchita mantha, ndine.’

Pamwapo Petulo adati: ‘Ambuya peno ndimwepo, niuzeni nibwere kuna imwepo.’ Yesu adamuuza kuti: ‘Bwera.’ Pamwapo Petulo adabula m’barko mule nkuyamba kufamba pamadzi nkuyenda komwe kwenze Yesu. Koma padasala pang’ono kufika komwe kwenze Yesu, adanyang’ana chimphepo chire. Padachita vimwevi adachita mantha ndipo adayamba kumira. Iye adakuwa kuti: ‘Ambuya nipulumuseni!’ Yesu adamumphata djanja nkumubvuza kuti: ‘Ndawa chani wayamba kukaikira? Chikhulupiriro chako chirikuponi?’

Yesu na Petulo adapakira mu barko mule ndipo nthawe mwiyo mphepo yire idaleka. Ko ukuganiza kuti Atumi mwawo adabva tani? Iwo adati: “Ndimwedi mwana wa Mulungu.”

Kenzelini koyamba Yesu kuchita vimwevi. Nthawe inango ali pabodzi na atumi wake mu barko, Yesu adayenda kumbuyo kwa barko nkugona. Pomwe wenze gone, panyanja mwapo padayambika chimphepo ndipo mabimbi yambamenya barko mwakuti mu barko mumo mumbangena madzi. Atumi adamumusa Yesu nkumuuza kuti: ‘Mpfunzisi tikufa, pulizi tithandizeni.’ Yesu adamuka nkuuza nyanja mwiyo kuti: “Leka! Demba!” Nthawe mwiyoletu chimphepo chire chidaleka ndipo pa nyanja mwapo padademba. Patsogolo pake Yesu adawabvunza atumi mwawo kuti: “Ko mukalibiretu chikhulupiriro?” Atumi mwawo adayamba kuuzana kuti: “Mpakana chonzi na nyanja nkumbamubvera.” Iwo adapfunzira kuti peno akhulupirira maninge Yesu, afunikalini kugopa chirichose.