Muliri wa 10

Mose adauza Farao kuti adzayendelini pomwe kukagumana naye. Koma akanati anyamuka adamuuza kuti: ‘Lero pakati pa usiku wana wose woyamba kubadwa wa Aiguputo afe kuyambira mwana wa Farao mpakana wa akapolo.’

Yahova adauza Aizirayeli kuti adye chakudya chapadera. Adawauza pomwe kuti: ‘Muphe mwana wa nkhosa panango wambuzi, koma ikhale imuna yagole ibodzi. Ndipo magazi yake mupakasire pa misuwo yanu yongenera m’nyumba, nyama yake muyiwotche ndipo muidye pabodzi na mikate yalibe chofufumisa. Mudye pomwe mulivale vovala vanu vapaulendo na ntsapato zanu pomwe munkukonzekera ulendo. Usiku wa lero muchoke mu Iguputo.’ Ko unkuganiza kuti Aizirayeli adabva tani padauziwa vimwevi?

Pakati pa usiku, mngelo wa Yahova adayenda mu nyumba zose za Aiguputo. Nyumba iriyose yomwe yenze iribe magazi pa nsuwo, mwana woyamba kubadwa ambaphewa. Koma mngelo muyo ambaphalini wana wa mu nyumba zomwe zidapakasiriwa magazi pa misuwo ya nyumba zawo. Banja iriyose ya Aiguputo, peno ni yolemera panango yosauka, mumbafa mwana woyamba. Koma palibe mwana olo m’bodzi wa Aizirayeli yemwe ambaphewa.

Mwana woyamba wa Farao adaphewambo. Apa manje nthota za Farao zidamalira mwapo. Nthawe mwiyo adauza Mose na Aroni kuti: ‘Nyamukani, chokani kuno mukatumikire Mulungu wanu, mutenge pomwe vipfuwo vanu!’

Usiku moyu Aizirayeli adanyamuka ndipo kunja kumbagwerewera ndawa yakuti kwenze mwezi. Mabanja komasoti madzinza yadayenda pabodzi. Penze pomwe amuna 600,000 komasoti akazi na wana azinji. Penze pomwe wanthu wa makhaindi yanango, omwe adayendambo kuti akatumikirembo Yahova, pamwapa ni pomwe padamalira ukapolo wa Aizirayeli!

Pakufuna kukumbukira vomwe Yahova adawachitira pakuwapulumusa, Aizirayeli mwawa ambadya chakudya chapadera chire gole iriyose. Mwambo moyu umbachemerewa kuti Pasika.