Miliri yatatu yoyambirira

Aiguputo ambachichimiza Aizirayeli kuti ambaphate basa ninge akapolo. Yahova adatumiza Mose na Aroni kwa Farao kukamuuza kuti: ‘Yahova walewa kuti bvumani kuti wanthu wangu ayende kuchipululu kuti akanitumikire.’ Koma Farao adadawira mwamwano kuti: ‘Vomwe Yahova wanena ivo niribe navo basa, nibvumelini kuti Aizirayeli ayende.’ Padateno adaingizira basa yomwe Aizirayeli angaphata. Pamwapo Yahova adafuna kuti Farao adziwe kuti iye ni nkulu kuposha milungu yose. Ko unkudziwa vomwe adachita? Adabweresa ku Iguputo Miliri 10. Yahova adauza Mose kuti: ‘Farao ankufunalini kunibvera, mangwana machibese akhale ali ku kamadzi ka Nilo. Uyende ukamuze kuti: ‘Pakuti unkufunalini kuti wanthu wangu ayende, madzi yose yamu kamadzi ka Nilo yakasanduke magazi.’’ Mose adabvera Yahova ndipo adayendadi kwa Farao. Kumuko Aroni adamenya na mpsyimbo madzi ya mu kamadzi ka Nilo Farao ankuwona. Madzi mwayo yadasanduka magazi ndipo yadayamba kununkha. Ntsomba zose zidafa ndipo wanthu adasowa madzi yakumwa. Koma Farao alibe kubvuma kuti Aizirayeli ayende.

Pazidapita tsiku 7, Yahova adatumiza pomwe Mose kwa Farao kukamuuza kuti: ‘Ukaleka kubvuma kuti wanthu wangu ayende, mu Iguputo mukhale achule palipose. Aroni adakwiza mpsyimbo yake m’dzulu ndipo achule adayamba kudzala dziko yose. Ambagumanika m’nyumba, pam’beda, m’mapuleti tindoti palipose. Pavidateno Farao adauza Mose kuti akamupempherere kwa Yahova kuti muliri moyu umale ndipo adamupolomisa kuti abvume kuti Aizirayeli ayende. Pamwapo Yahova adamalisadi muliri ule ndipo achule mwawo adayamba kufa. Aiguputo adaunjika achule mwawo mahobo mahobo mwakuti dziko yose imbanukha. Koma Farao padawona kuti muliri ule wamala, alibe kubvuma kuti Aizirayeli ayende.

Manje Yahova adauza Mose kuti: ‘Aroni amenye pasi na mpsyimbo ndipo pfumbi isanduke ntchentche zoluma.’ Aroni adachitadi vimwevo ndipo padagwa ntchentche zoluma. Aiguputo anango adauza Farao kuti: ‘Muliri moyu wachokera kwa Mulungu.’ Koma Farao alibe kubvuma kuti Aizirayeri ayende.