Vodabwisa vomwe vidachitika pa Nyanja Ifuwira

Farao padabva kuti Aizirayeli ayenda adachinja maganizo yake. Pamwapo adauza masocha yake kuti: ‘Tengani ngolo za nkhondo tiwatewere. Ayi kuti tiwabvumize kuti ayende.’ Patsogolo pake, Farao na masocha yake adayamba kuthamangira Aizirayeli.

Yahova ambatsogolera wanthu wake, masikati ambaphatisa basa ntambo ndipo usiku ambaphatisa basa moto. Aizirayeli padafika pa Nyanja Ifuira Yahova adawauza kuti amange misasa.

Patsogolo pake, Aizirayeli adaona Farao na masocha yake ankuwatewera. Aizirayeli enze alibe kothawira ndawa kutsogolo kwawo kwenze Nyanja ndipo kumambuyo kwawo kumbabwera masocha. Iwo adachita mantha maninge ndipo adalilira Mose kuti: ‘Tife basi! Vidakakhala bwino udakandotisiya ku Iguputo kule.’ Koma Mose adawauza kuti: ‘Ayi kugopa Yahova atipulumuse.’ Pamwapa Mose adaonesa kuti ambathemba maninge Yahova.

Manje Yahova adauza Aizirayeli kuti anyamuke. Usiku moyu Yahova adachitisa kuti ntambo ule ukhale pakati pa Aizirayeli na Aiguputo. Vimwevi vidachitisa kuti komwe kwenze Aiguputo kukhale mdima koma komwe kwenze Aizirayeli kukhale kogwerewera.

Yahova adauza Mose kuti apfuthule djanja yake kuti alate pa Nyanja. Pamwapo Yahova adachitisa kuti chonzi champhanvu chimenye panyanja mwapo usiku wose. Patsogolo pake, Nyanja mwiyo idagawana ndipo madzi yadaima ninge chipupa mbali zose. Aizirayeli adayambuka pouma nkuyenda kutsidya ya Nyanja mwiyo.

Masocha ya Farao adawatewera nkungena pakati pa vipupa va madzi mwayo. Padachita teno Yahova adachitisa kuti masocha mwayo yasokonezeke. Ndawa maviri ya ngolo zawo za nkhondo yadayamba kuchoka. Padaona vimwevi, masocha mwayo yadakuwa kuti: ‘Naboni tithawe! Yahova ankuwamenyera nkhondo.’

Patsogolo pake, Yahova adauza Mose kuti: ‘Pfuthula djanja yako na kulata pa nyanja.’ Nthawe mwiyo madzi yadabwerera momwe yenzere, nkumiza masocha yose ya Aiguputo. Farao na masocha yake adafera pamwapo palibe olo bodzi yemwe adapulumuka.

Aizirayeli mwawo padaona kuti apulumusiwa, adatamanda Mulungu pakuimba kuti: ‘Nimuimbire Yahova ndawa yakuti iye ni wam’dzulum’dzulu maninge. Wathusira pa Nyanja makavalo na wopakira pamakavalo mwayo.’ Pakuimba nyimbo mweyi, azimayi ambavina ndipo ambaimba tungoma, aliyese adakondwa maninge.