Miliri yanango 6

Mose na Aroni adayenda kwa Farao kukamuuza ntontholo wochokera kwa Mulungu wakuti: ‘Peno ubvumelini kuti wanthu wangu ayende, nitumize mu dziko mweyi tuvilombo toyamwa magazi.’ Manje tuvilombo muto tudadzala mu nyumba za Aiguputo wose wolemera na wosauka kubodzi mwakuti twenze mbwee palipose. Koma ku Goseni komwe Aizirayeli angakhala kwenze kulibe tuvilombo muto. Kundoyambira muliri wa 4 moyu, miliri mwaya yambandobwerera Aiguputo wokha. Pamwapo Farao adagwigwirira Mose kuti: ‘Unipempherere kwa Yahova kuti achose tuvilombo motu, mukachita teno nikubvumizeni kuti muyende.’ Koma Yahova padandochosa tuvilombo muto, Farao adachinja maganizo iye alibe kupfunzirapo kanthu.

Yahova adalewa kuti: ‘Farao akaleka kubvuma kuti wanthu wangu ayende, vipfuwo vose va Aiguputo viyambe kuduwala na kufa. Mangwana yake, vipfuwo va Aiguputo vidayamba kufa, koma vipfuwo va Aizirayeli vimbafalini. Olo venze teno Farao alibe kubvuma kuti Aizirayeli ayende.

Manje Yahova adauza Mose kuti ayende pomwe kwa Farao ndipo akawaze dotha m’dzulu. Dotha mwiyo idasanduka pfumbi ndipo idadzadza dziko yose ya Aiguputo. Pfumbi mwiyo ikagwera munthu panango vipfuwo, imbayambisa vilonda vowawa maninge. Koma Farao alibe kubvuma kuti Aizirayeli ayende.

Yahova adatuma pomwe Mose kuti ayende kwa Farao nkukalewa kuti: ‘Ko unkufunalini kuti wanthu wangu ayende? Mangwana nibwerese chinvula cha matalala.’ Mangwana yake Yahova adabweresadi nvula ya matalala, tumpheni komasoti moto. Ku Iguputo kwenze kukanati kwagwako chinvula ninge chimwechi. Chinvula chimwechi chidadzonga miti komasoti mbewu zose kuchosapo zaku Goseni. Farao adalewa kuti: ‘Kanipempherere kwa Yahova kuti aimise nvula mweyi!’ ndipo nikubvumizeni kuti muyende.’ Koma nvula ya matalala mwiyo paidandosiya Farao adachinja pomwe maganizo yake.

Patsogolo pake, Mose adalewa kuti: ‘Manje kugwe abombo ndipo adye vomera vose vomwe viribe kudzongewa na matalala.’ Pamwapo kudagwa abombo ndipo adadya mbeu zose komasoti masamba yose ya m’miti.’ Farao adagwigwirira pomwe Mose kuti: ‘Kanipempherere kwa Yahova kuti achose abombo mwawa.’ Koma Yahova padandochosa abombo mwawo, Farao adalamba pomwe kuti Aizirayeli ayende.

Yahova adauza pomwe Mose kuti: ‘Pfuthula djanja yako ndipo ulate kudzulu.’ Nthawe mwiyo kudachita mdima ukulu. Kwa ntsiku zitatu, Aiguputo ambakwanisalini kuona munthu aliyese panango chinthu chirichose. Koma m’nyumba mwa Aizirayeli mumbakhala mogwerewera.

Pamwapo Farao adauza Mose kuti: ‘Iwepo na wanthu wako mbayendani. Koma vipfuwo vanu muvisiye.’ Koma Mose adalewa kuti: ‘Vipfuwo vathu tivitenge ndawa tinkufuna kukapereka ntsembe kwa Mulungu wathu.’ Farao adakalipa maninge ndipo adalewa kuti: ‘Choka nifunalini pomwe kuti nidzakuone. Ndipo ukadzandobwera pomwe nidzakuphe.’