DZIKO ILI PA MABVUTO

1 | Mumbateteze thanzi yanu

NDAWA YAKE VIRI VODEKANA

Mabvuto panango ngozi zanchilengedwe vingakhudze thanzi yathu mu njira zosiyanasiyana.

Vinthu voipa vikachitika wanthu achakhala na nkhawa ndipo omwe achakhala na nkhawa kwa nthawe itali angadwale.
Kukayamba miliri, shipitali ikangira kusamalira bwinobwino odwala ndawa pa nthawe ibodzi achasamalira wanthu azinji. Ndipo mankhwala yachawonekalini.
Mabvuto yachitisa kuti kobiri zimbasowe ndipo vimwevi vichitisa kuti wanthu ambakangire kugumana vinthu ninge chakudya chothandiza kuti akhale na thanzi yabwino komasoti kobiri zopagaliri ku shipitali.

Vomwe muchadekana kudziwa

Kudwala maninge komasoti kubonera maganizo kungasokoneze momwe muchaganizira ndipo vimwevi vingachitise kuti muleke kusamalira thanzi yanu. Pakumalizira matenda yanu yangayingizirike.
Peno mungaleke kusamalira mabvuto ya thanzi yomwe munayo, mabvuto mwayo yangakule ndipo yangadzonge moyo wanu.
Mukakhala na thanzi yabwino, vingakushupenilini kusalula vinthu mwanzeru panthawe yomwe mwagumana na mabvuto.
Peno ndimwe wolemera panango wosauka mungakwanise kuchita vinthu vomwe vingateteze thanzi yanu.

Vomwe mungachite manjeuno

Munthu wanzeru adziwiratu vinthu voipa vomwe vingachitike ndipo peno ni vokwanisika achita vinthu mosamala kuti avipewe. Vimwevi vingaphate pomwe basa pa nkhani ya thanzi yathu. Nthawe zizinji tingapewe kutenga matenda panango kuthandiza kuti yafalikire maninge tikambakhala waukhuzi. Pale kupewa kuposha kupolesa.

“Tikambayesesa kukhala waukhuzi na kusamalira pa muyi pathu, tikhala tinkupulumusa kobiri zomwe tidakaphatisa basa pakupagali kushipali komasoti kugula mankhwala.”—Andreas.a

a Madzina yanango mu gazini ino yachinjiwa.

VOMWE MUNGACHITE KUTI MUPIRIRE—Mpfundo zomwe zingakuthandizeni

Pa nthawe ya mabvuto, mumbateteze thanzi yanu pakuchita vinthu ivi

MUMBAKHALE WAUKHUZI

Mumbakhale waukhuzi

Baibolo inena kuti: ‘Wochenjera ni ule yemwe akawona tsoka abishala.’ (Miyambo 22:3) Mumbadziwiretu komasoti kupewa vinthu vomwe vingadzonge moyo wanu.

Mumbasambe m’manja na sabau pafupipafupi, makamaka mukanati mwaphata chakudya na pomwe mwachoka kuchimbudzi.
Nthawe zose mumbakonze m’nyumba mwanu na kufafadzira mankhwala yophera tuvilombo na kupukuta malo yomwe yaphatiwaphatiwa.
Peno ni vokwanisika ayi kukhala mofendererana na wanthu omwe ana matenda yopasirana.

MUMBADYE CHAKUDYA CHOPASA THANZI

Mumbadye chakudya chopasa thanzi

Baibolo inena kuti: ‘Palibe munthu yemwe adazondako kale thupi yake, koma achayidyesa na kuikonda.’ (Aefeso 5:29) Tiwonesa kuti tichakonda thupi yathu tikambasamala na vinthu vomwe tichadya.

Mumbamwe madzi yazinji.
Mumbadye vipatso na masamba yosiyanasiyana.
Ayi kumbadya mafuta yazinji, munyu uzinji komasoti shuga uzinji.
Ayi kumbapepa fodya, kumwa mowa maninge na kuphatisa basa mankhwala yosokoneza msolo.

“Kuti tileke kudwaladwala timbayesese kudya vakudya vopasa thanzi. Tikaleka kuchita vimwevi tingadzonge kobiri zochepa zomwe tigumana, kupagaliri shipitali. Niwona kuti ni vabwino kuphatisa basa kobiri mwezi kugulira chakudya chopasa thanzi.”—Carlos.

MUBACHITE MASENZEKA YOLIMBISA THUPI

Mubachite masenzeka yolimbisa thupi

Baibolo inena kuti: ‘Kupumula pang’ono ni kwabwino kuposha kuphata basa mwakhama ni kuthamangisa mphepo.’ (Mlaliki 4:6) Ni shuwadi kuti tichadekana kuphata basa, koma tichadekana kupumula mokwana.

Mumbachite masenzeka yolimbisa thupi. Mungayambe pang’onopang’ono koma mumbachite kawirikawiri. Kuchita masenzeka yolimbisa thupi kungakuthandizeni maninge, peno ndimwe nkhalamba, wopunduka panango munkudwala matenda yosamala.
Mumbagone mokwana

Mumbagone mokwana. Peno mungakangire kugona mokwana mungambakhale na nkhawa komasoti kukangira kuyikha maganizo yanu yose pa vomwe munkuchita. Vimwevi vikachitika kwa nthawe ikulu vingadzonge maninge thanzi yanu.
Mumbayikhe nthawe yakuti mumbagone ndipo mumbagonedi nthawe mweyo ikakwana. Mumbayesese kugona na kumuka nthawe ibodzibodzi ntsiku iliyose.
Mumbapewe kumbanyang’anira TV panango kuphatisa basa foni pa nthawe yogona.
Ayi kumbadya maninge panango kumwa vakumwa vomwe vikhala na kafee ndipo ayi kumbamwa mowa pomwe mwakhala pang’ono kukagona.

“Niwona kuti kugona kukhudza maninge thanzi yangu. Peno nilibe kugona mokwana, nthawe zinango msolo uniwawa komasoti thupi iniphwanya. Koma nikagona mokwana niwona kuti nikhala wokonzeka kuchita chilichose chomwe ninkufuna. Nikhala na mphanvu zizinji komasoti nidwaladwalalini.”—Justin.