Samueli woyamba

7 Pamwapo amuna wa ku Kiriyati-yearimu adabweradi nkutenga Likasa ya Yahova ndipo adaiikha m’nyumba mwa Abinadabu yomwe yenze pa phiri. Manje adasankhula* Eliezara mwana wake kuti ambanyang’anire Likasa ya Yahova.

2 Kuchokera pomwe Likasa idayamba kukhala ku Kiriyati-yearimu, padapita nthawe ikulu mpakana yadakwana magole 20 ndipo Aizirayeli wose adayamba kufagafaga* Yahova. 3 Patsogolo pake Samueli adauza Aizirayeli wose kuti: “Peno mukubwereradi kwa Yahova na ntima wanu wose, chosani milungu yachilendo komasoti vifaniziro va Asitoreti, ndipo mumbatumikire Yahova yekha na ntima wanu wose. Mukachita teno, adzakupulumuseni kwa Afilisiti.” 4 Pamwapo Aizirayeli adachosa Abaala na vifaniziro va Asitoreti nkuyamba kutumikira Yahova yekha.

5 Manje Samueli adawauza kuti: “Sonkhanisani Aizirayeli wose pabodzi ku Mizipa, ndipo nikakupempherereni kwa Yahova.” 6 Pamwapo iwo adasonkhana pabodzi ku Mizipa, patsogolo pake adatunga madzi nkuyakhuthulira pasi pamaso pa Yahova ndipo adadzimana kudya ntsiku mwiyo. Iwo adanena kuti: “Tachimwira Yahova.” Ndipo Samueli adayamba kuweruza Aizirayeli ku Mizipa.

7 Afilisiti padabva kuti Aizirayeli asonkhana ku Mizipa, olamulira wawo adanyamuka kuti akamenyane na Aizirayeli. Ndipo Aizirayeli padabva vimwevi, adachita mantha ndawa ya Afilisiti mwawo. 8 Pamwapo Aizirayeli adauza Samueli kuti: “Ayi kusiya kupemphera kwa Yahova Mulungu wathu kuti atithandize na kutipulumusa kwa Afilisiti.” 9 Manje Samueli adatenga mwana wa nkhosa woyamwa nkumupereka ntsembe yoshoka yantero kwa Yahova. Padateno adapemphera kwa Yahova kuti athandize Aizirayeli ndipo Yahova adamuthandiza. 10 Pomwe Samueli ambapereka ntsembe yoshoka, Afilisiti ambafendera kuti amenyane na Aizirayeli. Pavidateno, Yahova adachitisa kuti kudzulu kugunde maninge pa ntsiku mwiyo kuti asokoneze Afilisiti. Pamwapo Afilisiti mwawo adawiniwa na Aizirayeli. 11 Aizirayeli adanyamuka ku Mizipa nkuyamba kuthamangisa Afilisiti mpakana ku sul* kwa Beti-kara. 12 Patsogolo pake Samueli adatenga mwala nkuuyimisa pakati pa Mizipa na Yesana ndipo adaupasa dzina yakuti Ebenezeri,* pakuti adanena kuti: “Mpakana pano Yahova akupitiriza kutithandiza.” 13 Pamwapo Afilisiti adawiniwa ndipo alibe kubwera pomwe mudera ya Izirayeli. Panthawe yose yomwe Samueli wenze na moyo, Yahova alibe kubvuma kuti Afilisiti angene mudera ya Aizirayeli. 14 Komasoti Aizirayeli adatenga mathaundi yomwe Afilisiti mwawo adatenga kuyambira ku Ekironi mpakana ku Gati. Kuingizira pamwapo Aizirayeli adatenga pomwe dera yawo yomwe Afilisiti enze adawatengera.

Komasoti Aizirayeli na Aamori enze pantendere.

15 Samueli adapitiriza kuweruza Izirayeli kwa moyo wake wose. 16 Gole iriyose Samueli ambayenda ku Beteli, ku Giligala na ku Mizipa ndipo ambaweruza Aizirayeli m’madera yose mwaya. 17 Pamwapo ambabwerera ku Rama ndawa ndiko kwenze nyumba yake, ndipo kumuko ambaweruza pomwe Aizirayeli. Iye adamangira Yahova malo yoperekera ntsembe kumuko.