Samueli woyamba
6 Likasa ya Yahova idakhala mudera ya Afilisiti kwa minyezi 7. 2 Manje Afilisiti adachemera antsembe na wonena vakutsogolo nkuwabvunza kuti: “Ko Likasa ya Yahova tichite nayo chani? Tiuzeni vomwe tingachite pakuibwezera kwawo.” 3 Iwo adadawira kuti: “Peno mukubweza likasa ya pangano ya Yahova wa Izirayeli, ayi kuti muibweze mulibe kupereka ntsembe. Mulimose momwe vingakhalire, mufunika kupereka ntsembe yopalamula.” Mukachita teno mudzapole ndipo mudzadziwe ndawa yake Mulungu alibe kusiya kukuboneresani.” 4 Manje iwo adabvunza kuti: “Ko ntsembe yopalamula yomwe tifunika kumutumizira ikhale ya chani?” Pakudawira, antsembe na wonena vakutsogolo wale adanena kuti: “Mutumize vifaniziro 5 va golide va matenda ya muyi, na vifaniziro 5 va mbewa, mobverana na chiwerengero cha olamulira cha Afilisiti. Muchite vimwevi ndawa muliri muyu wagwera aliyese wa imwepo, pabodzi na olamulira wanu. 5 Mukonze vifaniziro va matenda yanu ya muyi na vifaniziro va mbewa vomwe vikudzonga dziko, ndipo mufunika kulemekeza Mulungu wa Izirayeli. Mukachita teno, panango adzachepeseko mabvuto yomwe akubwereserani imwepo, mulungu wanu na dziko yanu. 6 Ndawa chani mukuumisa mitima yanu ninge momwe adachitira Aiguputo na Farao? Mulungu padawaboneresa Aizirayeli adabvuma kuyenda ndipo iwo adayendadi. 7 Mukonze ngolo inyowani ndipo mutenge ng’ombe ziwiri zomwe ziri na wana, zomwe zikanati zamangiwako padjoko, nkuzimangirira pangolo mwiyo. Koma wana wa ng’ombe mwizo muwabweze kumuyi kuti osati ayendembo. 8 Mukachita teno, mutenge Likasa ya Yahova nkuiikha mungolo mwiyo. Ndipo mutenge vinthu vagolide vomwe mukuvitumiza ninge ntsembe yopalamula nkuviikha mu bokosi inango pambali pa Likasa mwiyo, patsogolo pake muyitumize imbayende. 9 Manje mumbakainyang’ane: Likasa mwiyo ikakayenda na njira yoyenda kwawo ku Beti-semesi, ndiye kuti Mulungu ndiye yemwe watichitira vinthu voipa maninge vimwevi. Koma peno ikayendelini kumuko, tidzadziwe kuti ni Mulungulini yemwe watichitira vimwevi, koma vandochitikambo.”
10 Wanthu mwawo adachitadi vimwevo. Adatenga ng’ombe ziwiri zomwe zenze na wana nkuzimangirira kungolo, ndipo wana wa ng’ombe zimwizo adazifungira m’khola ku muyi. 11 Manje adaikha Likasa ya Yahova mu ngolo mwiyo. Adaikhamo pomwe bokosi yomwe yenze na mbewa za golide komasoti na vifaniziro va matenda yawo ya m’muyi. 12 Ng’ombe mwizo zidayamba kufamba mu nsewu woyenda ku Beti-semesi. Zimbandofamba mu nsewu ukulu zinkulira ndipo ziribe kukhonera kumakulu panango kumanzere. Pamwapa nkuti wolamulira wa Afilisiti akuzitewera m’mambuyo mpakana kukafika m’malire ya ku Beti-semesi. 13 Wanthu wa ku Beti-semesi ambakolola tirigu muchigwa. Padakwiza maso nkuwona Likasa, adakondwa maninge. 14 Ngolo ire idafika m’munda wa Yoswa, wa ku Beti-semesi, ndipo idaima pafupi na mwala ukulu. Manje wanthu mwawo adabadula matabwa ya ngolo mwiyo nkupereka ntsembe yoshoka kwa Yahova.
15 Alevi adabulusa Likasa ya Yahova na bokosi momwe mwenze vinthu va golide vire nkuviikha pa mwala ukulu ule. Patsogolo pake amuna wa ku Beti-semesi adapereka ntsembe zoshoka na ntsembe zinango kwa Yahova ntsiku mwiyo.
16 Wolamulira 5 wa Afilisiti wale padaona vimwevi, adabwerera ku Ekironi ntsiku mwiyo. 17 Vifaniziro va golide va matenda ya muyi vomwe Afilisiti adatumiza kwa Yahova ninge ntsembe yopalamula ni ivi: Thaundi ya Asidodi idapereka chifaniziro chibodzi, ya Gaza chibodzi, ya Asikeloni chibodzi, ya Gati chibodzi na ya Ekironi chibodzi. 18 Chiwerengero cha mbewa za golide chenze cholingana na cha mathaundi yose ya Afilisiti yolamuliriwa na wolamulira 5 wale, kuyambira thaundi yokhala na mpanda wolimba maninge mpakana kumiyi yalibe mipanda.
Mwala ukulu womwe adaikhapo Likasa ya Yahova uli ninge mboni mpakana lero m’munda wa Yoswa wa ku Beti-semesi. 19 Koma Mulungu adapha wanthu wa ku Beti-semesi ndawa adanyang’ana Likasa ya Yahova. Adapha wanthu 50 070* ndipo wanthu adayamba kulira ndawa Yahova adapha wanthu azinji. 20 Pamwapo amuna wa ku Beti-semesi adanena kuti: “Ni mbani angaimirire pamaso pa Yahova Mulungu wochena ndipo Mulungu ayende kwa mbani akatisiya?” 21 Patsogolo pake adatumiza mawu kwa wanthu wa ku Kiriyati-yearimu yakuti: “Afilisiti abweza Likasa ya Yahova, bwerani mudzaitenge.”