Samueli woyamba
8 Samueli padakalamba, adaikha wana wake amuna kuti akhale oweruza mu Izirayeli. 2 Mwana wake woyamba wenze Yoweli ndipo wachiwiri wenze Abiya. Iwo enze oweruza ku Beere-seba. 3 Wana wake mwawa alibe kutewedzera chitsanzo chake. Iwo ambakonda kuchita vinthu viribe chilungamo kuti agumane phindu, kutambira bobobo komasoti kuphonyesa chilungamo.
4 Paidapita nthawe, akulu wose wa mu Izirayeli adasonkhana pabodzi nkuyenda kwa Samueli ku Rama. 5 Iwo adamuuza kuti: “Imwepo mwakalamba, koma wana wanu ankutewedzeralini chitsanzo chanu. Manje mutisankhulire mpfumu kuti imbatitonge ninge wanthu wa makhaindi yose.” 6 Koma Samueli alibe kukondwa pomwe adamuuza kuti: “Mutipase mpfumu yakuti imbatitonge.” Pamwapo Samueli adapemphera kwa Yahova. 7 Yahova adauza Samueli kuti: “Bvera vose vomwe wanthu mwawo akuuze, ndawa alibe kulamba iwepo koma alamba inepano kuti nikhale mpfumu yawo. 8 Vomwe ankuchita ivi ni vomwe akhala ankuchita kundoyambira ntsiku yomwe ine nidawabulisa ku Iguputo mpakana manjeuno. Akupitiriza kunisiya nkumbakatumikira milungu yanango ndipo vimwevi ndivo vomwe akuchitirambo iwepo. 9 Ndipomwapa bvera vomwe ankukuuza ivo. Koma uwachenjeze mwamphanvu, ndipo uwauze vomwe munthu yemwe akufuna kuti akhale mpfumu yawo adzafune kwa iwo.”
10 Samueli adafotokozera wanthu omwe ambamukumbira kuti awapase mpfumu vose vomwe Yahova adanena. 11 Iye adawauza kuti: “Munthu yemwe adzakhale mpfumu yanu ambadzachite ivi: Ambadzatenge wana wanu kuti ambafambise ngolo zake komasoti kupakira pa makavalo yake. Anango mwa wana wanu mwawo ambadzathamange patsogolo pa ngolo zake. 12 Adzaikhe wanthu anango kuti akhale atsogoleri wa magulu ya wanthu 1000 na atsogoleri wa magulu ya wanthu 50. Anango ambadzalime minda yake, kukolola mbewu zake komasoti kukonza vitsulo vake vankhondo na vitsulo vophatisira basa pa ngolo zake. 13 Wana wanu akazi adzatengewe kuti ambakakonze mafuta yonunkhira, mikate na vakudya vinango. 14 Adzakutengereni malo yanu yabwino maninge komasoti minda yanu ya uva na ya maolivi nkupasa anyabasa wake. 15 Adzatenge pomwe gawo ibodzi pa magawo 10 ya vokolola va minda yanu ya uva na minda ya mbewu zinango nkuvipereka kwa magovernador yake na anyabasa wake. 16 Komasoti adzatenge anyabasa wanu amuna, anyabasa wanu akazi, anyakabusa wanu wabwino maninge na abulu wanu kuti ambakawaphatise basa. 17 Pa vipfuwo vanu 10 virivose adzatengepo chipfuwo chibodzi ndipo imwepo mudzakhale anyabasa wake. 18 Ntsiku inango mudzalire ndawa yosankhula kukhala na mpfumu, koma Yahova adzakudawirenilini.”
19 Koma wanthu mwawo adalamba kubvera vomwe Samueli adawauza. Iwo adati: “Neye. Ise tikufuna mpfumu basi. 20 Vikakhala teno tikhale ninge wanthu wa makhaindi yose, ndipo mpfumu yathu mwiyo ndiyo yomwe imbatitonge na kutitsogolera pokamenya nkhondo.” 21 Samueli padabva vomwe wanthu mwawo adanena, adafotokozera Yahova vose mwivo. 22 Yahova adauza Samueli kuti: “Bvera vomwe anena ivo ndipo asankhulire mpfumu yakuti imbawatonge.” Patsogolo pake Samueli adauza Aizirayeli mwawo kuti: “Aliyese ayende kuthaundi ya kwawo.”