Samueli woyamba
5 Afilisiti padatenga Likasa ya Mulungu chaiye, adaitenga ku Ebenezeri nkuyenda nayo ku Asidodi. 2 Afilisiti mwawo adaikha Likasa ya Mulungu chaiye mu nyumba ya* Dagoni ndipo adaikhazika pafupi na Dagoni muyo. 3 Mangwana yake wanthu wa ku Asidodi padamuka machibese, adagumana Dagoni wagwa chamimba patsogolo pa Likasa ya Yahova. Pavidateno, adatenga Dagoni nkumubwezeresa pa malo yake. 4 Mangwana yake padamuka machibese, adagumana kuti Dagoni wagwa pomwe chamimba patsogolo pa Likasa ya Yahova. Nsolo wa Dagoni na manja yake venze vidagwatika nkugwera pansuwo. Mbali yomwe imbawoneka ninge ntsomba ni yomwe idasala.* 5 Ndipomwapa antsembe wa Dagoni na wanthu wose omwe angena mu nyumba ya Dagoni ku Asidodi apondalini pansuwo wa nyumba ya Dagoni mpakana lero.
6 Yahova adayamba kuboneresa wanthu wa ku Asidodi, ndipo adachitisa kuti wanthu wa mu thaundi ya Asidodi na madera yake yozungulira ayambe kudwala matenda ya muyi.* 7 Wanthu wa ku Asidodi padaona vimwevi, adati: “Ayi kubvuma kuti Likasa ya Mulungu wa Izirayeli ipitirize kukhala kuno ndawa iye watiboneresa maninge pabodzi na mulungu wathu, Dagoni.” 8 Pamwapo adachemeresa wolamulira wose wa Afilisiti nkuwabvunza kuti: “Tichite tani na Likasa ya Mulungu wa Izirayeli?” Iwo adadawira kuti: “Likasa mwiyi, ya Mulungu wa Izirayeli, tiitumize ku Gati.” Pamwapo Likasa ya Mulungu wa Izirayeli adaiyendesa kumuko.
9 Padafika nayo kumuko, Yahova adaboneresa pomwe wanthu wa mu thaundi mwiyo, mwakuti enze alibe ntendere. Iye adachitisa kuti wanthu wose wa mu thaundi mumo, kuyambira mng’ono mpakana nkulu, adwale matenda ya muyi. 10 Pamwapo adatumiza Likasa ya Mulungu chaiye ku Ekironi. Manje Likasa ya Mulungu chaiye paidandofika ku Ekironi, wanthu wa kumuko adayamba kulira, kuti: “Atibweresera Likasa ya Mulungu wa Izirayeli kuti tose atiphe!” 11 Patsogolo pake adachemeresa wotsogolera wose wa Afilisiti nkuwauza kuti: “Chosani Likasa ya Mulungu wa Izirayeli kuno, ibwerere kwawo kuti wanthu ise tileke kuphewa.” Adanena vimwevi ndawa mu thaundi yose mwiyo wanthu ambagopa kufa, ndawa Mulungu chaiye ambawaboneresa. 12 Wanthu omwe alibe kufa adadwala matenda ya muyi. Ndipo wanthu wa muthaundi mwiyo ambalira mokuwa mwakuti mawu yawo yambabveka kudzulu.