Samueli woyamba
4 Samueli adayankhula na Aizirayeli wose.
Patsogolo pake Aizirayeli adayenda kukamenyana na Afilisiti ndipo adamanga nsasa pafupi na Ebenezeri. Koma Afilisiti adamanga nsasa ku Afeki. 2 Afilisiti mwawo adafola ali konzeke kumenyana na Aizirayeli. Nkhondo mwiyo iribe kuwafambira bwino Aizirayeli, mwakuti Aizirayeli adawiniwa na Afilisiti. Pa nkhondo mwiyi Afilisiti adapha masocha ya Aizirayeli yothamangira 4000. 3 Wanthu mwawo padabwerera ku nsasa, akulu wa Izirayeli adanena kuti: “Ndawa chani lero Yahova wabvuma kuti Afilisiti atiwine?* Naboni tikatenge likasa ya pangano ya Yahova ku Silo timbakhale nayo, kuti itipulumuse m’manja mwa azondi wathu.” 4 Pamwapo adatumiza wanthu ku Silo kukatenga likasa ya pangano ya Yahova wa magulu yankhondo yakudzulu, yemwe akhala padzulu* pa akerubi. Wana awiri wa Eli, Hofeni na Pinihasi, enzembo kumuko pabodzi na likasa ya pangano ya Mulungu chaiye.
5 Likasa ya pangano ya Yahova paidandofika mu nsasa, Aizirayeli wose adakuwa mokondwa, mwakuti dziko idagunduzika. 6 Afilisiti padabva zungo mwiyo adabvunza kuti: “Ko zungo mwiyi, yomwe inkubveka mu nsasa wa Aheberi ni ya chani?” Patsogolo pake adabva kuti Likasa ya Yahova yabwera mu nsasa muyo. 7 Afilisiti mwawo adachita mantha ndipo adati: “Mulungu wafika mu nsasa wawo.” Ndipo adati: “Tsoka yatigwera, ndawa vinthu ninge vimwevi vikalibe vachitikako. 8 Apa vinthu vathina manje. Ni mbani yemwe atipulumuse m’manja mwa Mulungu nkulu moyu? Moyu ni Mulungu yemwe adapha Aiguputo azinji muchipululu. 9 Limbani ntima ndipo chitani vinthu ninge amuna imwepo Afilisiti, kuti Aheberi ayi kuti atitonge ninge momwe isepano tidachitira na iwo. Chitani vinthu ninge amuna na kumenya nkhondo.” 10 Pamwapo Afilisiti adamenyadi nkhondo ndipo Aizirayeli adawiniwa mwakuti aliyese adathawira kutenti yake. Aizirayeli omwe adaphewa enze azinji. Padaphewa masocha yofamba pasi yokwana 30 000. 11 Komasoti Likasa ya Mulungu idatengewa, ndipo Hofeni na Pinihasi, wana wa Eli, adaphewa.
12 Ntsiku mwiyo munthu munango wa dzinza ya Benjamim adathamanga kuchoka kumalo komwe kumbachitika nkhondo kukafika ku Silo, adang’amba vovala vake komasoti adadzithira madothi kunsolo. 13 Padafika, adagumana Eli alikhale pampando m’mphepete mwa nsewu, maso yali kunjira, ndawa ambachita mantha maninge akaganizira va Likasa ya Mulungu chaiye. Munthu muyo adangena mu thaundi mwiyo kukanena va nkhondo mwiyo, ndipo wanthu wose wa mu thaundi mumo adayamba kulira. 14 Eli padabva kulira kwa wanthu mwawo, adabvunza kuti: “Ko wanthu mwawo ankulira chani?” Patsogolo pake mwamuna ule adathamanga kwa Eli kukamuuza nkhani mweyi. 15 (Eli wenze na magole 98, ndipo maso yake yambawoneka ninge yankunyang’ana koma ambawonalini chirichose.) 16 Munthu ule adauza Eli kuti: “Inepano lero ninkuchokera kunkhondo ndipo nachokako ninkuthawa.” Pamwapo Eli adamubvunza kuti: “Ko nchani chachitika mwana wangu?” 17 Munthu yemwe adabwera na mawu muyo adati: “Aizirayeli athawa Afilisiti, ndipo awiniwa. Wana wanu pomwe awiri, Hofeni na Pinihasi, aphewa. Komasoti Likasa ya Mulungu chaiye yatengewa.”
18 Munthu muyo padandotomola va Likasa ya Mulungu chaiye, Eli yemwe wenze pa nsuwo wa mpanda adagwa chagada kuchoka pampando. Khosi yake idathyoka ndipo adafa ndawa wenze wokalamba komasoti wenze wonenepa maninge. Eli adaweruza Aizirayeli kwa magole 40. 19 Mulowola wake, nkazi wa Pinihasi, wenze na mimba ndipo wenze pafupi kubereka. Padabva kuti Likasa ya Mulungu chaiye yatengewa komasoti apongozi wake na mwamuna wake afa, mimba idamuwawa mwadzidzidzi ndipo adabereka mwana. 20 Nkazi muyu padasala pang’ono kumwalira, amayi omwe adaima pambali pake adamuuza kuti: “Ayi kugopa, wabereka mwana mwamuna.” Koma iye alibe kudawira komasoti alibe kuchita chirichose. 21 Iye adapasa mwana muyo dzina yakuti Ikabodi* nkunena kuti: “Ulemerero wachoka mu Izirayeli kuyenda kudziko inango.” Adanena vimwevi ndawa ya Likasa ya Mulungu chaiye yomwe yenze idatengewa komasoti ndawa ya vomwe vidachitikira apongozi wake na mwamuna wake. 22 Adanena kuti: “Ulemerero wachoka mu Izirayeli kuyenda kudziko inango, ndawa Likasa ya Mulungu chaiye yatengewa.”