Samueli woyamba
3 Pa nthawe mwiyo, Samueli mwana ule ambatumikira Yahova monyang’aniriwa na Eli. Koma mawu ya Yahova yambabvekabvekalini ntsiku mwizo ndipo wanthu ambawonalini masomphenya pafupipafupi.
2 Ntsiku inango Eli wenze adagona kuchipinda kwake. Pa nthawe mweyi, maso yake yenze yadachita mdima ndipo ambakwanisalini kuwona. 3 Kandyero ya Mulungu yenze ikalibe yadzimwisiwa, ndipo Samueli wenze adagona mu kachisi* wa Yahova momwe mwenze Likasa ya Mulungu. 4 Pamwapo Yahova adachemera Samueli ndipo iye adadawira kuti: “Inepano mbuya wangu.” 5 Pamwapo adathamangira kwa Eli nkunena kuti: “Nabwera mbuya wangu, nabva kuchemera.” Koma Eli adamuuza kuti: “Niribe kukuchemera. Yenda ukagone.” Padateno Samueli adayenda kukagona pomwe. 6 Yahova adamuchemera pomwe kuti: “Samueli!” Pamwapo Samueli adamuka nkuyenda pomwe kwa Eli nkunena pomwe kuti: “Nabwera ndawa nabva munkunichemera.” Koma Eli adamuuza kuti: “Niribe kukuchemera mwana wangu. Yenda ukagone.” 7 (Pa nthawe mweyi Samueli wenze akalibe wadziwa Yahova ndipo Yahova wenze akalibe wayamba kuyankhula naye.) 8 Manje Yahova adachemera pomwe kachitatu kuti: “Samueli!” Pamwapo Samueli adamuka nkuyenda kwa Eli, ndipo adanena kuti: “Nabwera, ndawa shuwa mwanichemera.”
Pavidateno Eli adazindikira kuti Yahova ni yemwe ambachemera mwana muyo. 9 Pamwapo Eli adauza Samueli kuti: “Yenda ukagone, ndipo akakuchemera pomwe unene kuti: ‘Yankhulani Yahova, ine ntumiki wanu nikubva.’” Pamwapo Samueli adabwerera kukagona.
10 Patsogolo pake Yahova adabwera nkuima pamalo mwayo ndipo adachemera pomwe ninge poyamba pale kuti: “Samueli!” Samueli!” Samueli adadawira kuti: “Yankhulani, ine ntumiki wanu ninkubva.” 11 Pamwapo Yahova adauza Samueli kuti: “Bvesera! Nichite vinthu vinango mu Izirayeli vakuti munthu aliyese akadzabva m’matu mwake mudzalire. 12 Ntsiku mwiyo nidzachitire Eli vose vomwe nidanena ponena va wanthu wa m’banja yake, kuyambira vinthu voyambirira mpakana vomalizira. 13 Umuuze kuti nidzaweruze wanthu wa m’banja yake mpakana kalekale ndawa ya vinthu vophonyeka vomwe iye ankudziwa. Wana wake ankunyoza Mulungu koma ankuwatsuulalini. 14 Ndipomwapa nalumbirira wanthu wa m’banja ya Eli kuti machimo ya wanthu wa m’banja yake yadzakhululukiriwelini na ntsembe iriyose.”
15 Samueli adapitiriza kugona mpakana machibese. Padamuka adafungula misuwo ya nyumba ya Yahova, koma ambagopa kuuza Eli va masomphenya yomwe adawona. 16 Manje Eli adachemera Samueli kuti: “Samueli, mwana wangu!” Ndipo iye adadawira kuti: “Inepano mbuya wangu.” 17 Pamwapo Eli adamuuza kuti: “Pulizi ayi kunibisira. Ko Mulungu wakuuza chani? Mulungu akulange ukanibisira olo mawu yabodzi pa mawu yomwe wakuuza.” 18 Pamwapo Samueli adamuuza vose ndipo alibe kumubisira chirichose. Pavidateno, Eli adati: “Ni Yahova yemwe wanena. Achite vomwe ankuwona kuti ni vabwino.”
19 Samueli adapitiriza kukula ndipo Yahova wenze naye, mwakuti mawu yake yose yadakwanirisika. 20 Aizirayeli wose kuchokera ku Dani mpakana ku Beere-seba, adadziwa kuti Samueli ni yemwe wasankhuliwa kukhala mneneri wa Yahova. 21 Ndipo Yahova adapitiriza kuwonekera ku Silo, pakuti Yahova adathandiza Samueli kuti amudziwe bwino. Adachita vimwevi pophatisira basa mawu ya Yahova.