Samueli woyamba

2 Patsogolo pake Hana adapemphera kuti:

11 Patsogolo pake Elikana adayenda kumuyi kwake ku Rama, koma mwana muyo adasala nkumbatumikira Yahova monyang’aniriwa na wantsembe Eli.

12 Wana wa Eli enze oipa ndipo ambalemekezalini Yahova. 13 Munthu aliyese akambapereka ntsembe ambafunika pomwe kupereka mbali ya nyama mwiyo kwa wantsembe. Ndipo vomwe vimbachitika ni vakuti nyama mwiyo ikambabwabwata, ntumiki wa wantsembe ambabwera na foloko* ya manu yatatu iri m’manja. 14 Akachita teno ambapitisa foloko mwiyo m’basiya, m’poto ya vophatira viwiri, mumphika panango m’poto ya chophatira chibodzi. Manje wantsembe ambatenga chirichose chomwe foloko mwiyo yachosa. Vimwevi ni vomwe ambachitira Aizirayeli wose oyenda ku Silo. 15 Komasoti olo munthu wopereka ntsembe akalibe washoka mafuta, ntumiki wa wantsembe ambabwera nkumuuza kuti: “Nipase nyama yosaphika nikawotchere wantsembe. Wantsembe ankufunalini nyama yophika koma yosaphika.” 16 Munthu muyo akanena kuti: “Bakadikhira ashokeretu mafuta aya ndipo utenge chirichose chomwe unkufuna,”* iye ambadawira kuti: “Neye, nipase manje so, apo neye nichite kukutengera!” 17 Atumiki mwawa ambachimwira maninge Yahova, ndawa ambalemekezalini ntsembe ya Yahova.

18 Manje Samueli ambatumikira pamaso pa Yahova ndipo ambavala efodi wa nguwo, podiya kuti wenze mwana. 19 Komasoti gole iriyose amayi wake ambamusonera ka m’khanjo kogwata manja. Iwo ambamuyendesera ka m’khanjo mwako akayenda na amuna wawo kukapereka ntsembe yapagole. 20 Pa ulendo unango, Eli adadalisa Elikana na nkazi wake, ndipo adati: “Yahova akupase pomwe mwana kupitira mwa nkazi muyu kuti angene m’malo mwa yemwe adaperekewa kwa Yahova.” Patsogolo pake azibereki mwawo adabwerera kwawo. 21 Yahova adamudalisa Hana mwakuti adabereka wana anango. Adabereka wana amuna atatu na wana akazi awiri. Ndipo Samueli adapitiriza kukula ankutumikira Yahova.

22 Pa nthawe mweyi Eli wenze adakalamba maninge koma adabva vose vomwe wana wake ambachitira Aizirayeli wose. Adabva pomwe kuti ambagona na akazi omwe ambatumikira pansuwo pa chitenti chogumanako. 23 Ndipo iye ambawauza kuti: “Ko munkuchitiranyi vimwevi? Ndawa vomwe wanthu wose ankunena ponena va imwepo ni voipa vokhavokha. 24 Ayi kuchita teno wana wangu, ndawa nkhani zomwe ninkubva, zomwe wanthu wa Yahova ankunena, ni zabwinolini. 25 Munthu akachimwira munzake, munthu munango angakwanise kumugwigwiririra kwa Yahova,* koma akachimwira Yahova, ko angamupempherere ni mbani?” Koma wana mwawo ambabveralini ababa wawo ndipo Yahova wenze adatsimikiza ntima kuti awaphe. 26 Koma Samueli ambakula bwino ndipo ambakondewa maninge na Yahova komasoti na wanthu.

27 Manje munthu wa Mulungu adayenda kwa Eli nkumuuza kuti: “Yahova wanena kuti: ‘Ko inepano niribe kuchitisa kuti wanthu wa m’nyumba ya ababa wako anidziwe pomwe enze akapolo ku nyumba ya Farao ku Iguputo? 28 Pa madzinza yose ya Izirayeli nidasankhula m’bereki wako kukhala wantsembe wangu, kuti ambayende pa malo yangu yoperekera ntsembe kukapereka ntsembe za nyama, ambapereke ntsembe zopukiza nakuti ambavale efodi pamaso pangu. Komasoti nidapasa nyumba ya m’bereki wako ntsembe zose zoshoka na moto za Aizirayeli.* 29 Ndawa chani wanthu imwe mukunyoza ntsembe zangu zomwe nidalamula kuti zimbaperekewe m’nyumba yangu? Ndawa chani munkupitiriza kulemekeza wana wanu kuposha inepano podzinenepesa na nyama zabwino za ntsembe iriyose ya wanthu wangu Aizirayeli?

30 Ndipomwapa Yahova Mulungu wa Izirayeli wanena kuti: “Nidanenadi kuti wanthu wa m’banja yako komasoti wa m’banja ya m’bereki wako adzanitumikire mpakana kalekale.” Koma manjeuno Yahova ankunena kuti: “Ningachitelini pomwe vimwivo, ndawa yemwe ankunilemekeza nidzamulemekeze koma yemwe ankuninyoza, adzanyozewe.” 31 Manje bvesera, ntsiku zidzafike pomwe nidzamalise mphanvu zako* komasoti mphanvu za nyumba ya ababa wako, mwakuti m’nyumba yako palibe munthu yemwe adzakalambe. 32 Ndipo m’nyumba yangu undodzaona mzondi pakati pa vinthu vose vabwino vomwe vidzachitikire Izirayeli. M’nyumba yako mudzagumanikelini pomwe munthu wokalamba. 33 Munthu wa m’banja yako yemwe nidzamusiyiselini kutumikira pa malo yangu yoperekera ntsembe adzachitise kuti maso yako yaleke kuwona komasoti kukukwinyiririsa. Koma wanthu azinji wa m’banja yako adzaphewe na chibemba. 34 Ndipo vomwe vidzachitikire wana wako awiri Hofeni na Pinihasi chidzakhale chizindikiro kwa iwepo, chidzachitike ni ichi: Wose awiri adzafe ntsiku ibodzi. 35 Patsogolo pake nidzasankhule wantsembe wangu wokhulupirika. Muyo adzachite mobverana na vomwe ntima wangu ukufuna. Nidzamumangire nyumba yokhalisa, ndipo adzatumikire wodzodzewa wangu ninge wantsembe nthawe zose. 36 Manje aliyese wosala m’nyumba yako adzafike nkumugwadira kuti amulipire kobiri na chakudya, ndipo ambadzanene kuti: “Nibvumeni pulizi kuti nikhale wantsembe kuti nimbagumaneko chakudya pang’ono.”’”