Samueli woyamba
23 Paidapita nthawe, wanthu adauza Davide kuti: “Afilisiti akumenyana na thaundi ya Keila, ndipo ankutenga vokolola vomwe viri pamalo yopulira mbewu.” 2 Pamwapo Davide adabvunza Yahova kuti: Ko niyende kukapha Afilisiti? Yahova adadawira Davide kuti: Yenda ukaphe Afilisiti mwawo ndipo ukapulumuse Keila. 3 Koma amuna omwe enze na Davide adanena kuti: “Peno tikuchita mantha tiri kuno ku Yuda, manje kuli tani tikayenda ku Keila kukamenyana na masocha ya Afilisiti!” 4 Pamwapo Davide adabvunza pomwe Yahova. Ndipo Yahova adamudawira kuti: “Nyamuka, yenda ku Keila, ndawa nipereke Afilisiti mwawo m’manja mwako.” 5 Pamwapo Davide na amuna omwe enze naye adayenda ku Keila kukamenyana na Afilisiti. Iye adatenga vipfuwo vawo ndipo adapha Afilisiti azinji, mwakuti Davide adapulumusa wanthu wa muthaundi ya Keila.
6 Pomwe Abiyatara mwana mwamuna wa Ahimeleki ambathawira kwa Davide ku Keila, adatenga efodi. 7 Patsogolo pake Sauli adauziwa kuti: “Davide ali ku Keila.”Manje Davide adanena kuti: “Mulungu wamupereka kwa inepano ndawa wadzifungira yekha pakungena muthaundi yokhala na misuwo yofungiwa mwamphanvu.” 8 Pamwapo Sauli adachemeresa wanthu wose kuti ayende kunkhondo kuti akazungulire thaundi ya Keila momwe mwenze Davide na wanthu wake. 9 Davide padadziwa kuti Sauli ankumukonzera chiwembu, adauza Abiyatara wantsembe kuti: “Bweresa efodi.” 10 Patsogolo pake Davide adati: “Yahova Mulungu wa Izirayeli inepano ntumiki wanu nabva kuti Sauli ankufuna kubwera kuno ku Keila kudzadzonga thaundi mweyi ndawa ya inepano. 11 Ko atsogoleri* wa mu thaundi ya Keila adzanipereke m’manja mwake? Ko Sauli abweredi kuno ninge momwe inepano ntumiki wanu nabvera? Yahova Mulungu wa Izirayeli, pulizi niuzeni inepano ntumiki wanu.” Yahova adamudawira kuti: Inde abweredi.” 12 Pamwapo Davide adabvunza pomwe kuti: “Ko atsogoleri wa mu thaundi ya Keila adzanipereke kwa Sauli pabodzi na amuna omwe niri nawo awa?” Yahova adadawira kuti: “Inde adzakupereke.”
13 Nthawe mwiyoletu Davide adanyamuka pabodzi na amuna 600 omwe enze naye wale. Iwo adachoka ku Keila nkumbandoyendambo kulikose komwe angakhale otetezeka. Sauli padabva kuti Davide wathawa ku Keila alibe kumulondola pomwe. 14 Davide ambakhala kumalo yoshupa kufikako kumapiri mu chipululu cha Zifi. Sauli ambafagafaga Davide nthawe zose koma Yahova alibe kumupereka m’manja mwake. 15 Pomwe Davide wenze ku chipululu cha Zifi ku Horesi, adadziwa kuti* Sauli ali mudera mwiyo ndipo ankufagafaga moyo wake.
16 Patsogolo pake Yonatani mwana wa Sauli adayenda kwa Davide ku Horesi ndipo adamuthandiza* kuti agumane mphanvu kuchokera kwa Yahova. 17 Pamwapo adamuuza kuti: “Ayi kuchita mantha ndawa Sauli ababa wangu akugumanelini, mwakuti ukhaledi mpfumu ya Izirayeli, ndipo inepano nidzakhale wachiwiri kwa iwepo. Sauli ababa wangu ankudziwa bwino vimwevi.” 18 Patsogolo pake awiri mwawo adachita pangano pamaso pa Yahova ndipo Davide adapitiriza kukhala ku Horesi koma Yonatani adabwerera kwawo.
19 Patsogolo pake amuna wa ku Zifi adayenda kwa Sauli ku Gibeya nkumuuza kuti: Davide ankubishala pafupi na isepano ku malo yoshupa kufikako ku Horesi, paphiri ya Hakila yomwe iri ku sul* kwa Yesimoni.* 20 Nthawe iriyose yomwe mungafune kubwera, bwerani, ndipo ise tidzamupereke m’manja mwanu.” 21 Sauli padabva vimwevi adati: “Yahova akudaliseni, ndawa mwanichitira chifundo. 22 Manje ninkukukumbirani kuti mukafagefage malo chaiyo yomwe ankukhala komasoti munthu yemwe adamuwona ndawa nabva kuti niwochenjera maninge. 23 Mukafagefage malo yose yobisika komwe iye ankubishala, ndipo mukabwere na umboni. Patsogolo pake nidzayende namwe pabodzi ndipo peno alidi kumuko nidzamufagefage pakati pa wanthu mamidyau* ya ku Yuda.”
24 Pamwapo iwo adamusiya Sauli nkutsogola kuyenda ku Zifi. Pamwapa nkuti Davide na amuna omwe ambafamba naye ali mu chipululu cha Maoni, ku Araba, ku sul* kwa Yesimoni. 25 Patsogolo pake Sauli adafika na masocha yake kudzafagafaga Davide. Davide padabva vimwevi nthawe mweyo adayenda kukabishala kumwala, ndipo adapitiriza kukhala ku chipululu cha Maoni. Sauli padauziwa vimwevi adayamba kufagafaga Davide mu chipululu cha Maoni. 26 Patsogolo pake Sauli adafika mbali inango ya phiri yomwe Davide na amuna omwe enze naye adabishala. Pavidateno Davide adayamba kukonzekera mwakankulumize kuti athawe Sauli. Pa nthawe mweyi nkuti Sauli na masocha yake akhala pang’ono kugumana Davide na amuna omwe enze naye. 27 Koma patsogolo pake kudabwera munthu na ntontholo wakuti: “Bwerani mwakankulumize Afilisiti angena mu dziko yathu kuti adzachite nkhondo!” 28 Pavidateno Sauli adaleka kufagafaga Davide ndipo adabwerera kukamenyana na Afilisiti. Ndawa ya vimwevi malo mwayo adayapasa dzina yakuti, Mwala Wogawanisa.
29 Manje Davide adachoka kumuko nkukakhala kumalo yoshupa kufikako ya ku Eni-gedi.