Samueli woyamba
22 Pamwapo Davide adachoka kumuko nkuthawira ku mphako ya Adulamu. Azibale wake na wanthu wose wa m’nyumba ya ababa wake padabva vimwevi, adanyamuka nkumutewera. 2 Wanthu wose omwe enze na mabvuto, wose omwe enze na vikwerete, na wose omwe enze na madandaulo adasonkhana kwa iye, ndipo iye adakhala mtsogoleri wawo. Amuna wose omwe enze naye enzepo 400.
3 Patsogolo pake Davide adayenda ku Mizipe, ku Mowabu ndipo adauza mpfumu ya Mowabu kuti: “Nikukumbira kuti ababa na amayi wangu abakakhale namwe kuno mpakana nidziwe vomwe Mulungu anichitire.” 4 Pamwapo adawasiya kuti ambakhale na mpfumu ya Mowabu, mwakuti iwo adakhala kumuko nthawe yose yomwe Davide ambabishala kumalo yoshupa kufikako.
5 Paidapita nthawe, Gadi yemwe wenze mneneri, adauza Davide kuti: “Ayi kuti ukhale pomwe kumalo yoshupa kufikako. Chokako muko ndipo uyende m’dziko ya Yuda. Pamwapo Davide adachoka nkuyenda kukakhala ku thikita* ya Hereti.
6 Sauli adabva kuti Davide na wanthu omwe enze naye agumanika. Pa nthawe mweyi Sauli wenze ku Gibeya alikhale pasi pa muti wa usika, pamtunthu. Iye wenze na nkondo m’manja ndipo atumiki wake wose enze adamuzungulira. 7 Patsogolo pake Sauli adauza atumiki wake mwawo kuti: “Bveserani imwepo wa dzinza ya Benjamim. Ko nayembo mwana wa Jese adzakupaseni mose imwepo minda ya uva na minda ya mbewu zinango? Ko mose imwepo adzakuikheni kukhala atsogoleri wa magulu ya wanthu 1000 na atsogoleri wa magulu ya wanthu 100? 8 Mose imwepo mwanikonzera chiwembu. Pomwe mwana wangu adachita pangano na mwana wa Jese, palibe yemwe adaniuza. Palibe pomwe yemwe wanichitira chifundo nkuniuza kuti mwana wangu chaiye wachitisa ntumiki wangu kunibishalira ninge momwe viliri umu.”
9 Patsogolo pake Doegi wa ku Edomu, nkulu wa atumiki wa Sauli adadawira kuti: “Inepano nidawona mwana wa Jese padabwera ku Nobu kwa Ahimeleki, mwana wa Ahitubu. 10 Ahimeleki adabvunza kwa Yahova m’malo mwa Davide ndipo adamupasa chakudya. Mpakana adamupasa pomwe chibemba cha Goliyati Mfilisiti.” 11 Nthawe mweyoletu mpfumu idatumiza wanthu kuti akachemere Ahimeleki wantsembe, mwana wa Ahitubu komasoti antsembe wose wa m’banja ya ababa wake omwe enze ku Nobu. Pamwapo wose adabwera kwa mpfumu.
12 Manje Sauli adati: “Bvesera iwepo mwana wa Ahitubu.” Ahimeleki adadawira kuti: “Ninkubva mbuya wangu.” 13 Sauli adapitiriza kumuuza kuti: “Ndawa chani iwepo na mwana wa Jese mwanikonzera chiwembu? Iwepo udamupasa nkate na chibemba komasoti udamubvunzirira kwa Mulungu. Iye waniphindukira ndipo manjeuno wanibishalira.” 14 Ahimeleki adadawira mpfumu mwiyo kuti: “Pa atumiki wanu wose ni mbani yemwe ni wokhulupirika* ninge Davide? Iye ni nkomweni wa mpfumu, mtsogoleri wa masocha yokutetezani komasoti munthu wolemekezeka m’nyumba yanu. 15 Ko nayamba lero kumubvunzirira kwa Mulungu? Ningachitelini vomwe munkunena ivo! Pulizi mpfumu ayi kuniwona ninge niri na mulandu inepano ntumiki wanu komasoti wanthu wose wa m’nyumba ya ababa wangu, ndawa inepano ntumiki wanu niribe chirichose pa nkhani mweyi.”
16 Koma mpfumu idati: “Shuwadi iwepo Ahimeleki na wanthu wose wa m’nyumba ya ababa wako, muti mufe.” 17 Patsogolo pake Sauli adauza masocha yothamanga yomwe yenze yadamuzungulira kuti: “Phani antsembe wa Yahova ndawa ali kumbali ya Davide! Iwo ambadziwa kuti Davide ankuthawa, koma alibe kuniuza!” Koma olo nteno, atumiki wa mpfumu mwawo alibe kufuna kupha antsembe wa Yahova. 18 Manje mpfumu idauza Doegi kuti: “Iwe, phaya antsembe awa!” Nthawe mweyoletu Doegi wa ku Edomu adapha antsembe mwawo. Ntsiku mweyi adapha amuna 85 ovala efodi wa nguwo. 19 Iye adapha pomwe wanthu wa mu thaundi ya Nobu yomwe yenze thaundi ya antsembe. Adapha amuna na akazi, wana na wana oyamwa, ng’ombe na abulu komasoti nkhosa.
20 Koma mwana m’bodzi mwamuna wa Ahimeleki, mwana wa Ahitubu, dzina yake Abiyatara adapulumuka ndipo adathawa nkutewera Davide. 21 Abiyatara adauza Davide kuti: “Sauli wapha antsembe wa Yahova.” 22 Manje Davide adauza Abiyatara kuti: “Ntsiku mweire pomwe nidandowona kuti Doegi wa ku Edomu aliko, nidadziwiratu kuti akauze Sauli. Inepano ndine nachitisa kuti wanthu wose wa m’banja ya ababa wako aphewe. 23 Koma iwepo khala na inepano ndipo ayi kuchita mantha. Ndawa aliyese yemwe ankufagafaga moyo wako ankufagafagambo moyo wangu, ndipo nikuteteze.”