Samueli woyamba
24 Sauli padandobwerera kuchokera komwe ambathamangisa Afilisiti, adauziwa kuti: “Davide ali muchipululu cha Eni-gedi.”
2 Patsogolo pake Sauli adatenga amuna 3000 osankhuliwa mu Izirayeli mose, ndipo adayenda m’minyala yomwe mumbakhala mbuzi za m’mapiri kukafagafaga Davide na amuna omwe ambafamba naye. 3 Patsogolo pake Sauli adafika kumakhola ya nkhosa yaminyala m’mbali mwa nsewu, komwe kwenze mphako. Iye adangena m’mphako mumo kukadzithandiza.* Pa nthawe mweyi nkuti Davide na amuna omwe ambafamba naye alikhale pasi kumbuyo kwa mphako mwiyo pamalo yobisika. 4 Amuna omwe enze na Davide mwawo adamuuza kuti: “Lero ni ntsiku yomwe Yahova ankukuuzani kuti: ‘Ona! Napereka mzondi wako m’manja mwako, ndipo ungamuchite chirichose chomwe ukufuna.’” Pamwapo Davide adanyamuka ndipo mwakachetechete adagwata kanguwo ka m’nyantsi mwa nkhanjo wogwata manja wa Sauli. 5 Koma patsogolo pake Davide chikumbuntima chake chidayamba kumushupa ndawa ya kugwata kanguwo ka m’nyantsi mwa nkhanjo wogwata manja wa Sauli. 6 Iye adauza wanthu omwe enze naye kuti: “Nikaiwona nkhani mweyi ninge momwe Yahova ankuiwonera, ninkuwona kuti ningayeselini kuchitira vimwevi mbuya wangu, wodzodzewa wa Yahova. Ningamuchitirelini voipa ndawa iye ni wodzodzewa wa Yahova.” 7 Manje na mawu mwaya, Davide adalambiza* wanthu omwe enze naye kuti osati achitire Sauli choipa chirichose. Patsogolo pake Sauli adabula m’mphako mumo nkumbayenda,
8 Nayembo Davide adabula m’mphako mumo ndipo adachemera Sauli kuti: “Mbuya wangu mpfumu!” Sauli padachungunuka, Davide adagwada nkujolima mpakana nkhope yake kufika pasi. 9 Pamwapo Davide adauza Sauli kuti: “Ndawa chani munkubvera vomwe wanthu ankunena vakuti: ‘Davide akufuna kukuchitirani voipa?’ 10 Lero mwawona mwekha kuti Yahova wenze wakuperekani m’manja mwangu m’mphako umu. Munthu munango wenze waniuza kuti nikupheni, koma nakubverani ntsisi nkunena kuti: ‘Ningachitirelini voipa mbuya wangu, ndawa ni wodzodzewa wa Yahova.’ 11 Ababa wangu, onani kanguwo aka, kam’nyantsi mwa nkhanjo wanu wogwata manja. Pomwe nimbagwata kanguwo mwaka niribe kukuphani. Manje onani kuti niribe maganizo yoipa panango yokuphindukirani, ndipo niribe kukuphonyerani. Koma imwepo mukufagafaga moyo wangu kuti muniphe. 12 Yahova aweruze pakati pa inepano na imwepo, ndipo Yahova abwezere m’malo mwa inepano, koma djanja yangu iyi idzakuchitirenilini choipa. 13 Pale mwambi wakalekale unena kuti: ‘Choipa chichokera kwa munthu woipa, koma djanja yangu idzakuchitirenilini choipa. 14 Ko mpfumu ya Izirayeli inkufagafaga mbani? Ko munkuthamangisa mbani? Shuwadi mukuthamangisa m’mbwaya* yakufa? Nthata ibodzi? 15 Yahova akhale woweruza, ndipo aweruze pakati pa inepano na imwepo. Iye adzawone nkhani mweyi nkuniweruza kuti ndine wosaphonya ndipo adzanipulumuse m’manja mwanu.”
16 Davide padandomaliza kuyankhula mawu mwaya, Sauli adati: “Ko ni mawu yako mwana wangu Davide?” Patsogolo pake Sauli adayamba kulira mokuwa. 17 Iye adauza Davide kuti: “Ndiwe wolungama maninge kuposha inepano, ndawa wanichitira vabwino, koma inepano nakubwezera voipa. 18 Lero waniuza vinthu vabwino vomwe wanichitira, ndawa ulibe kunipha pomwe Yahova wanipereka m’manja mwako. 19 Ko ni mbani yemwe angagumane munthu yemwe amuzonda nkumusiya kuti ayende mwantendere? Yahova adzakupase vinthu vabwino ndawa ya vomwe wanichitira lero. 20 Inepano ninkudziwa kuti iwepo udzakhale mpfumu, ndipo ufumu wa Izirayeli udzapitirize kukhala m’manja mwako. 21 Manje nilumbirire m’dzina ya Yahova kuti udzadzongelini mbadwa* zangu komasoti udzapfudzelini dzina yangu m’nyumba ya ababa wangu.” 22 Patsogolo pake, Davide adalumbirira Sauli ndipo Sauli uyo adayenda kwawo. Koma Davide na amuna omwe enze naye adayenda kumalo yoshupa kufikako.