Samueli woyamba

21 Patsogolo pake Davide adafika ku Nobu kwa Ahimeleki wantsembe. Ahimeleki padawona Davide adayamba kunjenjemera, ndipo adamubvunza kuti: “Ndawa chani uli wekhawekha?” 2 Davide adadawira Ahimeleki wantsembe kuti: “Mpfumu yanituma kuti nikachite vinthu vinango ndipo yaniuza kuti: ‘Ayi kuuza aliyese vomwe nakuuza ivi komasoti malangizo yomwe nakupasa.’ Napangana na alumbwana wangu kuti nigumane nawo pamalo yanango. 3 Manje peno muli na mikate 5 panango chakudya chirichose munipaseko.” 4 Koma wantsembe muyo adadawira Davide kuti: “Palibe nkate wamba, koma pali nkate wopatulika. Ningakupase moyu peno alumbwana wako ayesesa kudzisunga osagona na akazi.” 5 Davide adadawira wantsembe muyo kuti: “Akazi alibe kutifenderera ninge momwe venzere poyamba pomwe nidayenda kukamenya nkhondo. Alumbwana mwawo akhala ochena olo pomwe tiri pa basa wamba, manje kuli tani lero?” 6 Pamwapo wantsembe muyo adamupasa nkate wopatulika, ndawa penze palibe nkate unango koma wachiwonesero womwe adauchosa pamaso pa Yahova ntsiku mwiyo kuti aikhepo unyowani.

7 Pa ntsiku mwiyo, m’bodzi wa atumiki wa Sauli wenze kumuko ndawa enze adamusunga pamaso pa Yahova. Dzina yake wenze Doegi ndipo wenze wa ku Edomu. Iye wenze nkulu wa anyakabusa wa Sauli.

8 Davide adabvunza Ahimeleki kuti: “Ko muli na nkondo panango chibemba? Niribe kukwanisa kutenga chibemba panango vitsulo vangu, ndawa vomwe mpfumu yanituma ni vofunika mwakanfulumize.” 9 Wantsembe muyo adadawira kuti: “Chomwe chiripo ni chibemba cha Goliyati Mfilisiti yemwe udamupha mu Chigwa cha Ela. Chakulungiriwa na nguwo ndipo chiri kuseri kwa efodi. Peno ungachikonde ungachitenge, ndawa chiripo ni chimwechi chokha.” Pamwapo Davide adati: “Palibe pomwe chinango ninge chimwechi, nipaseni.”

10 Davide adanyamuka ntsiku mwiyo ndipo adapitiriza kuthawa Sauli. Paidapita nthawe adafika kwa Mpfumu Akisi ya ku Gati. 11 Padafika kumuko, atumiki wa Akisi adanena kuti: “Ko moyu ni Davidelini mpfumu ya dziko ya Izirayeli? Ni ulelini yemwe ambamuimbira nyimbo uku ankuvina nkumbati:

12 Davide padabva vimwevi, adachita mantha maninge pakugopa vomwe Akisi mpfumu ya ku Gati angachite. 13 Manje pomwe enze na wanthu mwawo adayamba kuchita vinthu ninge nyansala kuti aleke kudziwika kuti ni wabwinobwino. Iye ambanembanemba pa misuwo ya mipanda, uku mata yali rwerwerwerwe pa ndebvu zake. 14 Pavidateno Akisi adauza atumiki wake kuti: “Ko munkuwonalini kuti munthu moyu ni nyansala? Manje ndawa chani mwabwera naye kwa inepano? 15 Ko inepano ninkusowa wanthu openga kuti munibweresere munthu moyu kuti ambadzapengere konkuno? Ko moyu angangene m’nyumba mwangu?”