Samueli woyamba
20 Manje Davide adathawa nkuchoka ku Nayoti, ku Rama. Koma adayenda kwa Yonatani nkumuuza kuti: “Ko inepano nachita chani? Naphonya chani, ndipo ababa wako nawaphonyera chani kuti afune kunipha?” 2 Yonatani adamudawira kuti: “Ni vosakwanisika vimwivo, ufelini. Ababa wangu angachitelini chirichose, chikulu panango ching’ono, neye kuniuza. Ko ababa wangu anganibisire nkhani mweyi ndawa chani? Vingachitikelini vimwevo.” 3 Koma Davide adalumbira kuti: “Ababa wako akudziwa kuti unikonda. Iwo anganene kuti: ‘Yonatani ayi kumuuza vimwevi ndawa angakalipe navo.’ Mwakuti ninkulumbira pa dzina ya Yahova Mulungu wamoyo, komasoti pamaso pako, impfa iri pafupi maninge na inepano!”
4 Patsogolo pake Yonatani adauza Davide kuti: “Nikuchitire chirichose chomwe unganene.” 5 Davide adauza Yonatani kuti: “Pale mangwana ni ntsiku yomwe mwezi unyowani uwoneke, ndipo nifunika kukadya pabodzi na mpfumu. Nikufuna kuti unibvumize kuti niyende kukabishala kuthengo mpakana nkucha maulo. 6 Peno ababa wako angazindikire kuti inepano palibe, ukawauze kuti: ‘Davide adanigwigwirira kuti nimubvumize kuchoka kankulumize kuti ayende ku thaundi ya kwawo ku Betelehemu, ndawa banja yawo yose inkukapereka ntsembe ya pagole.’ 7 Peno anganene kuti: ‘Palibe bvuto!’ Ndiye kuti vinthu viri bwino kwa inepano ntumiki wako. Koma peno angakalipe, udziwe kuti atsimikiza ntima kunichitira voipa. 8 Uniwonese chikondi chokhulupirika inepano ntumiki wako, ndawa iwepo na inepano tidachita pangano pamaso pa Yahova. Koma peno ndine wophonya, undonipha ndiwepo, m’malo mwakuti ukanipereke kwa ababa wako.”
9 Yonatani adadawira kuti: “Ni vosakwanisika kuti iwepo ukhale wophonya! Nichiti nadziwa voipa vomwe ababa wangu akufuna kukuchitira, ukuganiza kuti ningakuuzelini?” 10 Pamwapo Davide adabvunza Yonatani kuti: “Manje nimbani wati adzaniuze peno ababa wako adawira mokalipa?” 11 Yonatani adadawira Davide kuti: “Nabo tiyende kuthengo.” Pamwapo wose adayenda kuthengo. 12 Yonatani adauza Davide kuti: “Nidzayankhule na ababa wangu mangwana panango nkucha ndipo Yahova Mulungu wa Izirayeli akhale mboni. Peno alibe nawe chifukwa, nikutumizire mawu yokudziwisa. 13 Yahova anilange maninge inepano Yonatani, nikadziwa kuti ababa wangu ankufuna kukuchitira voipa koma osakudziwisa nkukusiya kuti uyende mwantendere. Yahova akhale nawe ninge momwe adakhalira na ababa wangu. 14 Ndipo ko udzaniwoneselini chikondi chokhulupirika cha Yahova niri moyo olo pomwe nafa? 15 Ayi kudzaleka kuwonesa wanthu wa m’banja yangu chikondi chokhulupirika, olo pomwe Yahova adzadzonge mzondi aliyese wa Davide padziko yapasi.” 16 Pamwapo Yonatani adachita pangano na wa m’banja ya Davide kuti: “Yahova adzabonerese wanthu omwe azonda Davide.” 17 Pamwapo Yonatani adachitisa kuti Davide alumbire pomwe powonesa kuti ambamukonda maninge ndawa Yonatani ambakonda maninge Davide ninge momwe ambadzikondera yekha.
18 Patsogolo pake Yonatani adanena kuti: “Mangwana ni ntsiku yomwe mwezi unyowani uwoneke, ndipo wanthu adzazindikire kuti iwepo palibe ndawa mpando wako udzakhale ulibe munthu. 19 Ndipo nkucha adzabvunze va iwepo. Udzayende kukabishala pamalo yomwe udabishala pa ntsiku ire* ndipo udzakhale pafupi na mwala uyu. 20 Inepano nidzathuse tumikondo tung’onotung’ono* tutatu kumbali inango ya mwala moyu, ninge kuti ninkufuna kulasa chinthu. 21 Manje nidzauze ntumiki wangu kuti: ‘Yenda ukalokote tumikondo uto.’ Koma nikadzauza ntumiki muyo kuti: ‘Tumikondo tuli mbali iyo, yenda ukalokote,’ iwepo udzabule ndawa ninkulumbira m’dzina ya Yahova, Mulungu wamoyo, vinthu vidzakhale kuti viri bwino ndipo palibe chochitisa nkhawa chirichose. 22 Koma nikadzauza ntumiki muyo kuti: ‘Tumikondo tuli kutali maninge na iwepo,’ ndiye kuti ufunika kuchoka, ndawa Yahova wakubvumiza kuyenda. 23 Yahova akhale mboni yathu mpakana kalekale pa vomwe iwepo na inepano tapolomisana.”
24 Pamwapo Davide adayenda kuthengo kukabishala. Pa ntsiku yowoneka mwezi unyowani, mpfumu idakhala pampando wake kuti idye chakudya. 25 Idakhala pamalo yake ya nthawe zose, pafupi na chipupa. Yonatani adakhala monyang’anana na mpfumu mwiyo, pomwe Abineri adakhala pambali pa mpfumu. Koma mpando wa Davide wenze ulibe munthu. 26 Pa ntsiku mweyi Sauli alibe kuyankhula chirichose, ndawa ambaganiza kuti: ‘Chinthu chinango chachitika ndipo wapsyipiziwa. Vingachitike kuti wapsyipiziwadi muyu.’ 27 Mangwana yake, mpando wa Davide udapitiriza kukhala ulibe munthu. Pamwapo Sauli adabvunza mwana wake Yonatani kuti: “Ndawa chani mwana wa Jese alibe kubwera kudzadya dzulo na lero?” 28 Yonatani adadawira Sauli kuti: “Davide adanigwigwirira kuti nimubvumize kuyenda ku Betelehemu. 29 Adaniuza kuti: ‘Pulizi nibvumize kuti niyende ndawa banja yathu inkuyenda kukapereka ntsembe mu thaundi ya kwathu. M’bale wangu ndiye wanichemera. Manje peno unganikomere ntima, nibvumize niyende nikawone abale wangu.’ Ndipomwapa alibe kubwera kudzadya na mpfumu.” 30 Koma Sauli adakalipa naye maninge Yonatani, ndipo adamuuza kuti: “Chimwana cha nkazi wopanduka iwe! Ukuganiza kuti ninkudziwalini kuti wasankhula kubverana na mwana wa Jese, nkudzichitisa manyazi wekha komasoti kuvula amayi wako? 31 Peno mwana wa Jese muyo angakhale na moyo, iwepo na ufumu wako udzakhazikikelini. Tumiza munthu akamuphate nkumubweresa kwa inepano, ndawa shuwadi afunika kufa.”
32 Koma Yonatani adadawira Sauli ababa wake kuti: “Aphewe ndawa chani? Waphonya chani?” 33 Padateno, Sauli adaponya nkondo wake kuti amuphe. Pamwapa manje, Yonatani adadziwa kuti ababa wake atsimikiza vakupha Davide. 34 Nthawe mwiyoletu, Yonatani adanyamuka pa meza mwapo ali kalipe maninge, ndipo ntsiku mwiyo alibe kudya. Iye adachita vimwevi ndawa ya kuwawiwa ntima na nkhani ya Davide komasoti ndawa yakuti ababa wake adamuchitisa manyazi.
35 Pakudachena, Yonatani adayenda kuthengo komwe adapangana kuti akagumane na Davide ndipo adayenda na mulumbwana wake. 36 Manje adauza mulumbwana wake uyo kuti: “Thamanga ukalokote tumikondo tomwe ninkuthusa.” Mulumbwana muyo adathamanga, ndipo Yonatani adathusa kankondo mwakuti kadamupitirira. 37 Mulumbwana ule padafika pamalo pomwe kankondo ka Yonatani kadagwera, Yonatani adakuwa kuti: “Kankondo kagwera patali kutsogolo kwako!” 38 Yonatani adapitiriza kuti: “Kulumiza! Thamanga, ayi kuchebwa!” Pamwapo ntumiki muyo adalokota tumikondo muto nkuyenda nato kwa iye. 39 Mulumbwana muyo alibe kuzindikira chirichose. Yonatani na Davide okha ndiwo ambadziwa vomwe vikuchitika. 40 Patsogolo pake, Yonatani adapasa mulumbwana wake muyo vitsulo vake va nkhondo nkumuuza kuti: “Tenga vitsulo ivi umbayende navo.”
41 Mulumbwana muyo padayenda, Davide adabula pomwe adabishala, ndipo penze pafupi pamwapo, cha ku sul. Manje adagwada nkujolima katatu. Padateno, Davide na Yonatani adabejalana ndipo wose adayamba kulira, koma Davide ndiye adalira maninge. 42 Patsogolo pake Yonatani adauza Davide kuti: “Yenda mwantendere, ndawa tose talumbira m’dzina ya Yahova kuti: ‘Yahova akhale pakati pa iwepo na inepano, komasoti pakati pa mbadwa* zako na mbadwa* zangu mpakana kalekale.’”
Patsogolo pake Davide adanyamuka nkumbayenda ndipo Yonatani adabwerera kwawo.