Samueli woyamba
19 Patsogolo pake Sauli adauza mwana wake Yonatani na atumiki wake wose kuti akufuna kupha Davide. 2 Pakuti Yonatani, mwana wa Sauli ambakonda maninge Davide, iye adauza Davide kuti: “Ababa wangu akufuna kukupha. Pulizi mangwana machibese ukhale wosamala. Udzayende kukabishala ndipo ukakhale kumuko. 3 Inepano niyende nawe m’thengo komwe ukabishale uko ndipo nikaimirire pafupi na ababa wangu. Ababa wangu nikayankhule nawo va iwepo, ndipo virivose vomwe vikachitike, shuwadi nidzakuuze.”
4 Pamwapo Yonatani adayankhula vabwino va Davide kwa Sauli ababa wake. Iye adawauza kuti: “Mpfumu ayi kuti ichimwire ntumiki wake Davide, ndawa iye alibe kukuphonyerani, ndipo wakhala akukuchitirani vinthu vabwino maninge. 5 Iye adaikha moyo wake pangozi nkupha Mfilisiti ule, mwakuti Yahova adapulumusa Aizirayeli. Imwepo mudawona vimwevi ndipo mudakondwa. Manje ndawa chani mukufuna kuchimwira Davide munthu wosaphonya, pa kumupha palibe chifukwa?” 6 Sauli adabvera vomwe Yonatani adanena, ndipo adati: “Ninkulumbira mu dzina ya Yahova Mulungu wamoyo, Davide aphewelini.” 7 Pavidateno, Yonatani adachemera Davide nkumufotokozera vose. Patsogolo pake, Yonatani adatenga Davide nkuyenda naye kwa Sauli ndipo Davide adapitiriza kukhala na Sauli ninge pakuyamba.
8 Paidapita nthawe, nkhondo idayamba pomwe ndipo Davide adayenda kukamenyana na Afilisiti. Iye adapha Afilisiti azinji ndipo Afilisiti omwe enze adakhala adawiniwa nkuthawa.
9 Manje Yahova adabvuma kuti mzimu woipa umubwerere Sauli ali m’nyumba mwake nkondo uli m’manja. Panthawe mwiyo nkuti Davide ankumuimbira nyimbo na zeze. 10 Sauli ambafuna kulasa Davide na nkondo kuti amukhomerere kuchipupa. Koma Davide adaumbzyenga mwakuti nkondo muyo udalasa chipupa. Usiku muyo Davide adathawa. 11 Patsogolo pake Sauli adatuma wanthu kuti akazinge nyumba ya Davide kuti machibese yake amuphe. Koma Mikala nkazi wa Davide adauza Davide muyo kuti: “Peno uthawelini* usiku uno, mangwana uphewe.” 12 Nthawe mwiyoletu, Mikala adathandiza Davide kuti abule na pajanera nkuthawa. 13 Manje Mikala adatenga fano ya aterafi* nkuikha pa m’beda. Iye adaikha kombe wa ukuse wa mbuzi pomwe Davide ambatsamirisa nsolo wake ndipo adafunikiza fano mwiyo na chovala.
14 Sauli adatuma wanthu kuti akamutenge Davide, koma Mikala adawauza kuti: “Wadwala.” 15 Pamwapo Sauli adatuma wanthu mwawo kuti akawone Davide ndipo adawauza kuti: “Mubwere naye kuno pa m’bedi wake muyo kuti adzaphewe.” 16 Wanthu mwawo padangena, adagumana fano ya terafi* iri pa m’bedi, kombe wa ukuse wa mbuzi uli pomwe ambatsamirisira nsolo wake Davide. 17 Pavidateno Sauli adabvunza Mikala kuti: “Ndawa chani waninamiza teneuyu nkuthawisa mzondi wangu?” Mikala adadawira Sauli kuti: “Waniuza kuti: ‘Nisiye nithawe! Apo neye, nikuphe.’”
18 Davide adathawa nkukafika kwa Samueli ku Rama ndipo adafotokozera Samueli vose vomwe Sauli adamuchitira. Patsogolo pake Davide na Samueli adachoka nkukakhala ku Nayoti. 19 Paidapita nthawe, wanthu adauza Sauli kuti: “Davide ali ku Nayoti, ku Rama.” 20 Nthawe mwiyoletu, Sauli adatumiza wanthu kuti akaphate Davide. Wanthu mwawo padaona aneneri wachikulire ankunena vakutsogolo, Samueli ali imirire nkumbawatsogolera, iwo adatambira mzimu wa Mulungu ndipo nawombo adayamba kuchita vinthu ninge aneneri.
21 Sauli padauziwa vimwevi, nthawe mwiyoletu adatumiza wanthu anango, ndipo nawombo adayamba kuchita vinthu ninge aneneri. Pavidateno Sauli adatumiza gulu inango yachitatu, koma nawombo adayamba kuchita vinthu ninge aneneri. 22 Patsogolo pake nayembo Sauli adanyamuka nkuyenda ku Rama. Padafika pa nchera ukulu womwe uli ku Seku, adabvunza kuti: “Ko Samueli na Davide ali kuponi?” Wanthu adadawira kuti: “Ali ku Nayoti, ku Rama.” 23 Sauli ankupitiriza ulendo wake woyenda ku Nayoti, ku Rama, nayembo adatambira mzimu wa Mulungu ndipo adayamba kuchita vinthu ninge mneneri mpakana kukafika ku Nayoti, ku Rama. 24 Nayembo Sauli adavula vovala vake, ndipo adayambambo kuchita vinthu ninge mneneri pafupi na Samueli. Iye adagona mwapo ali pezi* masikati yose na usiku wose. Ndawa ya vimwevi wanthu ambanena kuti: “Ko Sauli nayembo ni mneneri?”