Samueli woyamba

18 Manje Davide padandomaliza kuyankhula na Sauli, Yonatani na Davide adayamba kubverana maninge* mwakuti Yonatani adayamba kukonda Davide ninge momwe ambadzikondera yekha.* 2 Kuyambira ntsiku mwiyo, Sauli alibe kubvuma kuti Davide abwerere kunyumba kwa ababa wake. 3 Yonatani na Davide adachita pangano, ndawa Yonatani ambakonda Davide ninge momwe ambadzikondera yekha.* 4 Pamwapo Yonatani adavula nkhanjo wake wogwata manja nkumupasa Davide. Adamupasa pomwe vovala vake va nkhondo, chibemba, uta na bande. 5 Davide adayamba kuyenda ku nkhondo ndipo kulikose komwe Sauli wamutumiza, vinthu vimbamufambira bwino.* Pamwapo Sauli adamuikha kuti akhale nkulu wa masocha ndipo vimwevi vidakondweresa wanthu wose na atumiki wa Sauli.

6 Davide na masocha yanango akambabwera kuchokera kukapha Afilisiti, azimayi ambabula m’mathaundi yose ya Izirayeli ankuimba nyimbo komasoti ankuvina. Iwo ambayenda kukachunguzira mpfumu Sauli mokondwa, ankuimba maseche na choimbira cha vingwe vitatu. 7 Azimayi omwe ambakondwa wale ambaimba kuti:

8 Sauli adakalipa maninge ndipo nyimbo mwiyi imbamunyantsa, mwakuti adayamba kuganiza kuti: “Akutamanda Davide pakunena kuti wapha mamidyau yazinji maninge, koma ine akundonena kuti napha mamidyau yokha basi. Ndiye kuti kwakhala ni kumupasa ufumu muyu basi!” 9 Kuyambira ntsiku mwiyo, Sauli adayamba kunyang’ana Davide na diso yoipa.

10 Mangwana yake, Mulungu adabvuma kuti Sauli aphatiwe na mzimu woipa mwakuti adayamba kuchita vinthu vachilendo* m’nyumba mwake. Panthawe mwiyi nkuti Davide ankuimba nyimbo na zeze ninge momwe ambachitira ndipo Sauli wenze na nkondo m’manja mwake. 11 Patsogolo pake Sauli adathusa nkondo muyo ndipo mu ntima mwake ambati: “Nimulase Davide nkumukhomerera kuchipupa!’ Koma Davide adambzyenga nkuthawa ndipo vimwevi vidachitika kawiri kose. 12 Manje Saulo adachita mantha na Davide ndawa Yahova wenze na Davide, koma Sauli uyo wenze adamuchokera. 13 Pamwapo Sauli adachosa Davide kuti osati ambakhale naye pomwe pafupi, ndipo adamuikha kukhala mtsogoleri wa gulu ya masocha 1000, mwakuti Davide ambatsogolera masocha kunkhondo. 14 Vinthu vidapitiriza kumufambira bwino* pa vose vomwe ambachita ndipo Yahova wenze naye. 15 Sauli padawona kuti Davide vinthu vikumufambira bwino maninge, adachita naye mantha. 16 Koma wanthu wose wa mu Izirayeli na wa mu Yuda ambamukonda maninge Davide ndawa ambawatsogolera ku nkhondo.

17 Patsogolo pake Sauli adauza Davide kuti: “Pale ninamwana nkazi nkulu Merabu ndipo nidzakupase kuti akhale nkazi wako. Koma iwepo upitirize kumenya nkhondo za Yahova na kuniwonesa kuti ndiwe wolimba ntima.” Mu ntima mwake ambati: ‘Osati nimuphe ndinepano koma amuphe ni Afilisiti.’ 18 Koma Davide adadawira Sauli kuti: “Ndine mbani inepano ndipo azibale wangu na wanthu wa m’banja ya ababa wangu ni mbani mu Izirayeli, kuti nikhale nkomweni wa mpfumu?” 19 Manje paidakwana nthawe yopereka Merabu mwana nkazi wa Sauli kwa Davide, wenze adaperekewa kale kwa Adiriyeli Mmeholati kuti akhale nkazi wake.

20 Manje Mikala mwana nkazi wa Sauli ambakonda Davide. Wanthu adauza Sauli va nkhani mwiyi ndipo Sauli padabva adakondwa. 21 Pamwapo Sauli adati: “Nimupase Mikala kuti akhale msampha kwa iye, kuti Afilisiti amuphe.” Pavidateno Sauli adauza Davide kachiwiri kuti: “Lero uchite nane mbverano wa ukwati.” 22 Kuingizira pamwapo, Sauli adayankhula na atumiki wake kuti: “Mukayankhule na Davide mwachintsintsi ndipo mukamuuze kuti: “Mpfumu inkukondwa nawe, ndipo atumiki wake wose akukukonda maninge. Manje chita mbverano wa ukwati na mpfumu.’” 23 Atumiki wa Sauli padauza Davide mawu mwaya, Davide adadawira kuti: “Ko mukuwona kuti ni nkhani ing’ono kuti munthu wosauka na wonyozeka ninge ine nichite mbverano wa ukwati na mpfumu?” 24 Manje atumiki mwawo adauza Sauli kuti: “Vimwevi ndivo vomwe Davide watidawira.”

25 Sauli adati: “Mukamuuze Davide kuti: ‘Sikuti mpfumu inkufuna malowolo, koma ikundofuna makhanda yomwe ayachose pochita mdulidwe wa Afilisiti yokwana 100, kuti ibwezere azondi wake.’” Koma pamwapa Sauli ambakonza chiwembu kuti Davide aphewe na Afilisiti. 26 Pamwapo atumiki wa Sauli adauza Davide mawu mwaya. Davide adakondwa nayo mawu mwayo ndipo adabvuma kuti achite mbverano wa ukwati na mpfumu. Nthawe yomwe adabverana ikalibe kukwana, 27 Davide na masocha yake adayenda kukapha Afilisiti 200. Manje Davide adabweresa makhanda yawo ya kuntsonga ndipo adayapereka kwa mpfumu kuti achite naye mbverano wa ukwati. Pamwapo Sauli adapereka Mikala, mwana wake nkazi kwa Davide kuti akhale nkazi wake. 28 Sauli adazindikira kuti Yahova ali na Davide. Adazindikira pomwe kuti mwana wake Mikala, ambamukonda maninge Davide uyo. 29 Vimwevi vidachitisa pomwe kuti Sauli ambamugope maninge Davide ndipo Sauli ambamuzonda Davide kwa moyo wake wose.

30 Panthawe iriyose yomwe akuluakulu wa Afilisiti ayenda kukamenya nkhondo, vinthu vimbamufambira bwino* maninge Davide kuposha atumiki wose wa Sauli, mwakuti dzina ya Davide idabvekera maninge.