Oweruza

20 Pavidateno, Aizirayeli wose kuchokera ku Dani mpakana ku Bere-seba komasoti kudera ya Giliyadi, adasonkhana pabodzi mobverana* pamaso pa Yahova ku Mizipa. 2 Patsogolo pake, atsogoleri wa wanthu na madzinza yose ya Izirayeli adaimirira pakati pa mpingo wose wa wanthu wa Mulungu. Amuna ofamba pasi okhala na vibemba enzepo 400 000.

3 Wanthu wa dzinza ya Benjamim adabva kuti amuna wa Izirayeli ayenda ku Mizipa.

Patsogolo pake amuna wa Izirayeli adati: “Tiuzeni, ko vinthu voipa teneuyu vachitika tani?” 4 Mlevi ule, mwamuna wa nkazi yemwe adaphewa ule, adadawira kuti: “Inepano na nkazi wangu tidafika ku Gibeya, mudera ya Benjamim, kuti tigone kumuko. 5 Manje wanthu* wa ku Gibeya adabwera usiku kuzungulira* nyumba yomwe nidagona. Iwo ambafuna kunipha, koma m’malo mwa vimwevi adaponderera nkazi wangu mpakana adafa. 6 Pamwapo nidatenga thupi ya nkazi wangu nkuigwatagwata mapitsi ndipo nidatumiza mapitsi mwayo mudera yose komwe kwenze Aizirayeli. Nidachita vimwevi ndawa yakuti vomwe adachita ivo ni voipa maninge komasoti ni vochitisa manyazi mu Izirayeli. 7 Manje mose imwepo wanthu wa ku Izirayeli, kambiranani nkhani mweyi nkuwona vochita.”

8 Pavidateno wanthu wose adanyamuka mobverana,* ndipo adati: “Palibe yemwe abwerere ku tenti yake panango kumuyi kwake. 9 Wanthu wa ku Gibeya tiwachitire vinthu ivi: “Tichite maere patsogolo pake nkuyenda kukamenyana nawo. 10 Ndipo m’madzinza yose ya Izirayeli titengemo amuna 10 pa amuna 100 aliwose, amuna 100 pa amuna 1000 aliwose komasoti amuna 1000 pa amuna 10 000 aliwose. Amuna mwawa ambakatengere masocha vinthu vofunika, kuti ayende kukamenyana na wanthu wa ku Gibeya na wa ku Benjamim ndawa ya vinthu vochitisa manyazi vomwe achita mu Izirayeli.” 11 Pamwapo amuna wose wa Izirayeli adasonkhana nkukonza gulu ibodzi yankhondo kuti amenyane na thaundi ya Gibeya.

12 Manje madzinza ya Izirayeli yadatumiza amuna kwa atsogoleri wose wa dzinza ya Benjamim, kukawabvunza kuti: “Ko ndawa chani vinthu voipa ivi, vachitika muthaundi yanu? 13 Manje bweresani wanthu oipa mwawo wa mu Gibeya kuti tiwaphe nkuchosa choipa ichi mu Izirayeli.” Koma wanthu wa dzinza ya Benjamim adalamba kubvera vomwe Aizirayeli anzawo adanena.

14 Manje wanthu wa dzinza ya Benjamim adanyamuka m’mathaundi yawo nkukasonkhana ku Gibeya kuti akamenyane na amuna wa ku Izirayeli. 15 Ntsiku mweyo wanthu wa dzinza ya Benjamim adasonkhanisa amuna onyamula vibemba okwana 26 000 kuchokera m’mathaundi yawo, osawerengera amuna 700 wa ku Gibeya osankhuliwa mwapadera. 16 Pa masocha mwaya, penze amuna ophatisa basa djanja yamadzere okwana 700 osankhuliwa mwapadera. Aliyese pa amuna mwawa ambakwanisa kuponya mwala nkuboma tsitsi ibodzi osaphonya.

17 Amuna wa ku Izirayeli okhala na vibemba omwe adasonkhanisiwa enzepo 400 000, osawerengera amuna wa ku dera ya Benjamim. Aliyese pa masocha mwaya wenze wodziwa bwino kumenya nkhondo. 18 Ndipo Aizirayeli adayenda ku Beteli kukabvunza kwa Mulungu kuti: “Ni mbani yemwe ni woyenerera kutitsogolera kunkhondo yokamenyana na dzinza ya Benjamim?” Yahova adadawira kuti: “Yuda akutsogolereni.”

19 Pavidateno, Aizirayeli adanyamuka machibese nkukamanga nsasa kuti amenyane na wanthu wa ku Gibeya.

20 Masocha ya Chiizirayeli yadayenda kukamenyana na dzinza ya Benjamim ku Gibeya ndipo kumuko aliyese adaimirira pamalo yake kukonzekera kumenya nkhondo. 21 Pavidateno, wanthu wa dzinza ya Benjamim adabula mu thaundi ya Gibeya nkupha amuna wa Izirayeli 22 000 ntsiku mwiyo. 22 Koma masocha ya Izirayeli yadalimba ntima ndipo yadayenda pomwe kukaimirira pamalo mwayale pokonzekera kumenya nkhondo ninge momwe adachitira ntsiku yoyamba ire. 23 Pamwapo Aizirayeli adayenda ku Beteli ndipo adalira pamaso pa Yahova mpakana maulo. Iwo adabvunza Yahova kuti: “Ko tiyende pomwe kukamenyana na abale wathu wa dzinza ya Benjamim?” Yahova adawadawira kuti: “Yendani mukamenyane nawo.”

24 Pamwapo Aizirayeli adayenda pomwe kwa wanthu wa dzinza ya Benjamim ntsiku yachiwiri. 25 Pavidateno wanthu wa dzinza ya Benjamim adabula muthaundi ya Gibeya kudzagumana nawo ntsiku yachiwiri mwiyo ndipo adapha pomwe Aizirayeli 18 000. Wose mwawa omwe adaphewa enze amuna okhala na vibemba. 26 Pavidateno, amuna wose wa Izirayeli adayenda ku Beteli. Kumuko adalira nkukhala pasi pamaso pa Yahova ndipo adadzimana kudya mpakana maulo. Iwo adapereka kwa Yahova ntsembe zoshoka na ntsembe zam’bverano. 27 Patsogolo pake amuna wa ku Izirayeli adabvunza kwa Yahova, ndawa ntsiku mwizo likasa ya pangano ya Mulungu chaiye yenze ku Beteli kumuko. 28 Ntsiku mwizo Pinihasi, mwana wa Eliezara, mwana wa Aroni, ni yemwe ambatumikira* pafupi na likasa mwiyo. Pamwapo amuna wa Izirayeli adabvunza kuti: “Ko tiyende pomwe kukamenyana na abale wathu wa dzinza ya Benjamim panango osati tiyende pomwe?” Yahova adadawira kuti: “Yendani ndawa mangwana niwapereke m’manja mwanu.” 29 Pavidateno Aizirayeli adaikha amuna kuti abishale kuzungulira thaundi yose ya Gibeya.

30 Pamwapo Aizirayeli adayenda kwa wanthu wa dzinza ya Benjamim ntsiku yachitatu ndipo adakonzekera kumenyana na wanthu wa muthaundi ya Gibeya ninge momwe ambachitira maulendo yanango yale. 31 Wanthu wa dzinza ya Benjamim adayenda kukamenyana nawo, Aizirayeli mwawo adachitisa kuti wanthu wa dzinza ya Benjamim abule nkuyenda kutali na thaundi mweyo. Manje, ninge momwe vimbachitikira maulendo yanango yale, wanthu wa dzinza ya Benjamim mwawo adayamba kupha masocha yanango ya Chiizirayeli m’misewu yakuluyakulu. Nsewu unango wenze woyenda ku Beteli ndipo unango wenze woyenda ku Gibeya. Iwo adapha masocha 30 ya Chiizirayeli ndipo vitanda vawo venze bvuu. 32 Pamwapo wanthu wa dzinza ya Benjamim adati: “Tinkuwawina ninge poyamba pale.” Koma Aizirayeli adati: “Naboni timbathawe kuti tiwayendese ku misewu yakuluyakulu, kutali na thaundi mweyi.” 33 Manje masocha yose ya Chiizirayeli payadafika ku Baala-tamara, yadaima kuti yamenyane na wanthu wa dzinza ya Benjamim. Panthawe mweyi Aizirayeli omwe adabishala pafupi na thaundi ya Gibeya wale, adayamba kubula. 34 Pamwapo masocha yosankhuliwa mwapadera ya Chiizirayeli, yokwana 10 000 yadafenderera thaundi ya Gibeya ndipo padayambika nkhondo yogopsya. Koma wanthu wa dzinza ya Benjamim ambadziwalini kuti asala pang’ono kugumana na tsoka.

35 Yahova adawina wanthu wa dzinza ya Benjamim pamaso pa Aizirayeli, mwakuti ntsiku mweyi Aizirayeli adapha wanthu wa dzinza ya Benjamim okwana 25 100. Wose mwawa enze amuna omwe ambakhala na vibemba.

36 Wanthu wa dzinza ya Benjamim ambaganiza kuti pakuti Aizirayeli ankuthawa, ndiye kuti ankuwawina. Koma Aizirayeli mwawo ambathawa ndawa ambathemba anzawo omwe adabishala pafupi na thaundi ya Gibeya wale. 37 Amuna omwe adabishala wale, adathamanga nkukangena muthaundi ya Gibeya. Padateno, adamwazikana ndipo adapha wanthu wose wa muthaundi mweyo na chibemba.

38 Aizirayeli enze adapangana na amuna omwe adabishala wale kuti akagase moto muthaundi mweyo kuti utsi wake ukhale chizindikiro.

39 Aizirayeli padayamba kuthawa, wanthu wa dzinza ya Benjamim adayamba kuwathamangisa ndipo adapha masocha 30 ya Chiizirayeli. Wanthu wa dzinza ya Benjamim mwawo, ambanena kuti: “Tinkuwawina ninge pakuyamba pale.” 40 Pomwe vimbachitika vimwevi, utsi wa chizindikiro ule udayamba kukwira n’dzulu kuchokera muthaundi mweyo ndipo umbawoneka ninge chipilala. Wanthu wa dzinza ya Benjamim padachungunuka, adandowona thaundi yose inkugaka moto. 41 Pavidateno Aizirayeli adachungunuka, ndipo wanthu wa dzinza ya Benjamim adasokonezeka ndawa adazindikira kuti vinthu vawashupa. 42 Pamwapo wanthu wa dzinza ya Benjamim adachungunuka nkuyamba kuthawa Aizirayeli ndipo ambathawira kuchipululu. Koma adapanikiziwa maninge ndawa masocha ya Chiizirayeli yomwe yenze muthaundi yale nayombo yadabwera n’kuyamba kuwapha. 43 Iwo adazungulira wanthu wa dzinza ya Benjamim ndipo adawathamangisa osawasiya mwakuti adawawinira pafupi chaipo na thaundi ya Gibeya, mbali ya ku machibese. 44 Pakumalizira pake, masocha 18 000 ya dzinza ya Benjamim yadaphewa ndipo yose mwawa yenze masocha yamphanvu.

45 Wanthu wa dzinza ya Benjamim mwawo adachungunuka n’kuyamba kuthawira kuchipululu, ku mwala wa Rimoni. Aizirayeli adapha pomwe wanthu wa dzinza ya Benjamim 5000 m’misewu yakuluyakulu, ndipo adapitiriza kuwathamangisa mpakana kukafika ku Gidomu n’kupha pomwe amuna anango 2000. 46 Wanthu wose wa dzinza ya Benjamim omwe adaphewa ntsiku mweyi, adakwana 25 000. Yose mwawa yenze masocha yamphanvu yokhala na vibemba. 47 Koma masocha yokwana 600 yadathawira kuchipululu ku mwala wa Rimoni ndipo yadakhala kumuko kwa minyezi 4.

48 Masocha ya Chiizirayeli yadabwerera nkukapha na chibemba wanthu wa dzinza ya Benjamim omwe adasala muthaundi komasoti vipfuwo. Adapha chirichose chomwe adagumana. Kuingizira mwapa adagasa na moto mathaundi yose yomwe ambayagumana munjira.